Baro a Programa ti Asamblea Sirkito
Maikari ni Jehova a maidaydayaw. Kasanotay nga idaydayaw ni Jehova? Iti daytoy a banag, ania dagiti karit a pakaipasanguan dagiti dadduma? Ania dagiti bendision a sagsagrapen dagidiay mangidaydayaw ita iti Dios? Ti programa ti asamblea sirkito para iti 2008 ipaayna dagiti makapnek a sungbat kadagitoy a saludsod. Ti temana ket “Aramidenyo ti Amin a Bambanag a Maipaay iti Dayag ti Dios.” (1 Cor. 10:31) Usigenyo no ania ti naisagana kadatayo iti dayta a dua nga aldaw nga asamblea a pakasagrapantayo iti nabaknang a naespirituan a pannursuro.
Ipalawagto ti manangaywan iti distrito dagiti tema nga “Apay nga Idaydayawtayo ti Dios?” ken “Mapagulidanankayo Koma Babaen ti Panangtungpalyo Kadagiti Bilin ti Dios.” Ipaaynanto ti diskurso publiko a, “Siasino Dagiti Mangidaydayaw iti Dios?,” ken ti pangserra a palawag a, “Sangsangkamaysa a Panangidaydayaw iti Dios iti Sangalubongan.” Ikonduktana met ti Teokratiko nga Eskuelaan ti Panagministro. Ipalawagto ti manangaywan iti sirkito dagiti tema a “Pagragsakanyo nga Iyanninaw ti Dayag ti Dios,” “Panangasikaso Kadagiti Kasapulan ti Sirkito,” ken “Agtalinaedkayo a ‘Sititibker a Naipasdek iti Kinapudno,’” a naibatay iti 2 Pedro 1:12. Kanayonanna, maammuantayto no kasano a “Pakaidayawan ti Dios ti Panagpayunir.” Ti umuna kadagiti dua a mamagpanunot a simposium ibuksilanna ti naipaltiing a sasao a masarakan iti 1 Corinto 10:31. Napauluan daytoy iti “Panangidaydayaw iti Dios iti Amin a Benneg ti Biagtayo.” Ti simposium a “Panangipaay iti Sagrado a Panagserbi ken Jehova” salaysayenna dagiti nadumaduma nga aspeto ti panagdayawtayo. Mangngegantayto ti pannakagupgop Ti Pagwanawanan ken ti pannakasalaysay ti teksto iti Domingo. Addanto met maangay a bautismo.
Kaaduan a tattao saanda a bigbigen ti Dios. Saan a mautob dagiti adu a tattao ti kinadayag ni Jehova gapu ta makumikomda kadagiti natauan a gakat. (Juan 5:44) Ngem kombinsidotayo a nagpateg ti panangutob no kasanotay nga ‘aramiden ti amin a bambanag a maipaay iti dayag ti Dios.’ Iplanom ti tumabuno ket magunggonaankanto a naan-anay iti amin nga uppat a sesion.