Baro a Programa ti Asamblea Sirkito
Kasano a posible a masarangettayo a sititibker dagidiay nainget a bumusbusor iti pudno a panagdaydayaw? Kasanotay a malabanan ti naynay a panangikagumaan ni Satanas a mangsulisog kadatayo nga agsubli iti dakes a lubong? Masungbatan dagitoy a napateg a saludsod iti programa ti asamblea sirkito iti tawen 2009. Natemaan daytoy iti “Itultuloymo a Parmeken ti Dakes Babaen ti Naimbag.” (Roma 12:21) Kitaentayo no ania ti naisagana iti dayta nga asamblea.
Ti manangaywan iti distrito ipaayna dagiti palawag a “Napabileg a Mangparmek iti Dakes Babaen ti Naimbag,” “Agannadkayo iti Nalabes a Panagtalek iti Bagi!,” “Asidegen nga Agpatingga ti Amin a Kinadakes!,” ken “Panangpabileg iti Pammatitayo a Mangparmek iti Lubong.” Ti manangaywan iti sirkito ilawlawagna dagiti tema nga “Itan ti Panawen nga Agtalinaedtayo a Siririing!,” a naibatay iti Roma 13:11-13, ken “Diyo Ipakita a Naupaykayo iti Aldaw ti Rigat,” a naibatay iti Proverbio 24:10. Mangngegantayto met ti paset ti manangaywan iti sirkito a napauluan, “Panangasikaso Kadagiti Kasapulan ti Sirkito.” Ti sabali pay a makagutugot a paset ket ti “Mabalinyo Kadi ti Makiraman ‘iti Daytoy a Ministerio’—Babaen ti Panagpayunir?” Napauluan ti umuna kadagiti dua a simposium iti “Agtakderkayo a Sititibker Maibusor Kadagiti Pangallilaw a Pamuspusan ti Diablo.” Tulongannatayo daytoy a mangilasin ken mangilaksid kadagiti nasikap a pangallilaw ti Diablo iti tay-ak ti teknolohia, paglinglingayan, ken edukasion. Ti simposium a “Maaddaan iti Bileg a Mangsaranget ken Satanas iti Daytoy Nadangkes nga Aldaw” ipakitana no kasanotayo a mayaplikar a naan-anay ti naipaltiing a balakad a nailanad iti Efeso 6:10-18.
Direkta nga agkanaig ti panangparmek iti gubuayan ti kinadakes ken ti panangikasaba iti mensahe maipapan iti Pagarian. (Apoc. 12:17) Di ngarud pakasdaawan nga awan sarday ti panangdarup ni Satanas kadagiti Saksi ni Jehova! (Isa. 43:10, 12) Ngem saan nga agballigi ti Diablo gapu ta determinadotayo nga ‘agtultuloy a mangparmek iti dakes babaen ti naimbag.’ Mangaramidkayo itan kadagiti masnup nga urnos tapno magunggonaankayo iti uppat a sesion ti asamblea sirkito.