Ti Ipangpangrunatayo

1. Kasano nga impakita ni Jesus a napateg kenkuana ti ministerio?

¹ Impangpangruna ni Jesus ti ministerio. Sipipinget nga intungpalna dayta, ken nagnagna iti ginasut a kilometro iti intero a Palestina tapno makasabaanna ti adu a tattao aginggat’ mabalin. Pinagtalinaedna a simple ti biagna tapno ad-adu a tiempo ken atension ti mabusbosna iti ministerio. (Mat. 8:20) Idi inkagumaan nga igawid dagiti tattao tapno agasanna dagiti masakit, kinuna ni Jesus: “Kasta met nga iti sabsabali a siudad masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.”—Luc. 4:43.

2. Apay a ti ministerio ket nakapatpateg unay ken Jesus?

² Apay a ti ministerio ket nakapatpateg unay ken Jesus? Ti kangrunaan a pakaseknanna ket ti pannakasantipikar ti nagan ni Jehova. (Mat. 6:9) Ipatpategna ti nailangitan nga Amana isu a kayatna nga aramiden ti pagayatanna ken tungpalen ti amin a bilinna. (Juan 14:31) Malaksid iti dayta, napasnek ti pannakaseknanna kadagiti tattao ken kayatna a tulongan ida.—Mat. 9:36, 37.

3. Kasanotayo a maipakita nga ipangpangrunatayo ti ministerio?

³ Tuladentayo ni Jesus: Mabalin a saan a nalaka nga ipangpangruna ti ministerio a kas iti inaramid ni Jesus gapu ta adu a banag ditoy lubong ti mangagaw iti pigsa ken tiempotayo ken mangsinga kadatayo. (Mat. 24:37-39; Luc. 21:34) Gapuna, nasken a siguraduentayo dagiti napatpateg a bambanag, ken mangilatangtayo iti oras nga agsagana ken makiraman a regular iti trabaho a panangasaba. (Fil. 1:10) Ikagumaantayo a taginayonen ti simple a panagbiag ken liklikantayo nga usaren a naan-anay ti lubong.—1 Cor. 7:31.

4. Apay a napateg a taginayonentayo ti umiso a prioridad?

⁴ No ababa laeng ti tiempo, ammo ti masirib a tao no ania ti ipangpangrunana. Kas pagarigan, no madamagna nga adda sumungsungad a napigsa a bagyo, usarenna ti tiempo ken pigsana nga agsagana tapno natalged ti pamiliana ken pakdaaranna dagiti kaarrubana. Iyud-udina dagiti saan unay a napateg a banag. Ababan ti nabati a tiempo sakbay a dumteng ti Armagedon. (Sof. 1:14-16; 1 Cor. 7:29) Tapno maispaltayo ti biagtayo ken dagidiay dumngeg kadatayo, nasken nga asikasuentayo a kanayon ti bagbagitayo ken dagiti isursurotayo, addatayo man iti uneg wenno ruar ti kongregasion. (1 Tim. 4:16) Wen, ti pannakaisalakantayo ket agpannuray iti panangipangpangrunatayo iti ministerio!