Saankayo a Bumdeng
1. Ania a trabaho ti agkasapulan iti tured, ken apay?
1 Bimdengkayo kadin a nangasaba idiay eskuelaan gapu ta maamakkayo amangan no umsiendakayo? Sigurado nga agkasapulan iti tured ti panangasaba, nangruna no managbabainkayo. Ania ti makatulong kadakayo?
2. Ania ti nasayaat a tingitingenyo a naimbag no mangasabakayo iti eskuelaan?
2 Tingitingenyo a Naimbag: Nupay ti eskuelaan ket maibilang a personal a teritoriayo, laglagipenyo a saan a kasapulan a kasabaanyo ti amin a kas iti panangasabayo iti binalaybalay. Tingitingenyo a naimbag no kaanokayo a mangasaba. (Ecl. 3:1, 7) Mabalinyo nga iyebkas ti pammatiyo bayat ti klaseyo wenno no adda asaynmentyo. Wenno no adda agsaludsod a kaeskuelaanyo no apay a saankayo a makiramraman kadagiti sumagmamano nga aktibidad. Adda dagiti Kristiano nga iti rugi pay laeng ti klase ket imbagadan kadagiti mannursuro nga isuda ket Saksi ni Jehova ken inikkanda ida iti literatura a mangilawlawag kadagiti patpatientayo. Adda met dagiti mangibati iti literatura iti lamisaanda tapno agsaludsod dagiti kaeskuelaanda maipapan iti dayta.
3. Kasanokayo a makapagsagana a mangasaba idiay eskuelaan?
3 Agsaganakayo: Naturturedkayo a mangasaba no nakasaganakayo. (1 Ped. 3:15) Gapuna, panunotenyo dagiti saludsod a mabalin a tumaud, ken mangisaganakayo iti sungbat dagita. (Prov. 15:28) No posible, mangitugotkayo iti Biblia ken sumagmamano a publikasion, kas iti libro a Pannakirinnason, Iyimtuod Dagiti Agtutubo, ken dadduma pay a literatura maipapan iti panamarsua, tapno adda mausaryo no kasapulan. Kiddawenyo kadagiti dadakkelyo nga agensayokayo bayat ti panagdaydayaw ti pamiliayo.
4. Apay nga itultuloyyo ti mangasaba idiay eskuelaan?
4 Agbalinkayo a Positibo: Saanyo nga ipapan a kanayon nga uyawendakayo dagiti kaeskuelaanyo no iranudyo ti kinapudno. Mabalin nga adda dagiti mangapresiar iti kinaturedyo ket dumngegda pay ketdi. Ngem saankayo a maupay no awan ti mangipangag kadakayo. Maragsakan ni Jehova ta inkagumaanyo ti mangasaba. (Heb. 13:15, 16) Itultuloyyo a kiddawen kenkuana a tulongannakayo nga ‘agtultuloy nga agsao buyogen ti isuamin a kinatured.’ (Ara. 4:29; 2 Tim. 1:7, 8) Panunotenyo ti ragsakyo no adda dumngeg kadakayo. Nalabit agbalinto pay ketdi a padayo nga agserserbi ken Jehova!