Nagbalin a Misionero ti Dati a Managbabain

Nayanakak idi 1951 idiay Vienna, Austria. Katoliko ti pamiliami. Managbabainak idi. Ngem patiek nga adda Dios ken masansan idi nga agkararagak. Idi agtawenak iti siam, nangrugi a nakipagadal iti Biblia ni tatangko kadagiti Saksi ni Jehova. Di nagbayag, nakipagadal met ni nanangko.

Idi agangay, naitimpuyogkami iti Döbling Congregation iti Vienna. Nakaad-adu ti inaramidmi a sangapamiliaan. Nagbasa ken nagadalkami iti Biblia, nakigimongkami, ken nagboluntariokami kadagiti asamblea. Bayat dagita a tawtawen, tinulongannak ni tatangko nga ad-adda pay a mangayat unay ken Jehova. Kinapudnona, ti kanayon idi nga ikarkararag ni tatangko ket agbalinkami koma a payunir iti adingko a babai. Ngem saan idi a dayta ti kalatko.

PANANGRUGI ITI AMIN-TIEMPO A PANAGSERBI

Nabautisaranak idi 1965. Katorse idi ti tawenko. Ngem marigatanak a makisarita kadagiti diak am-ammo iti ministerio. Masansan met idi a mapampanunotko a nalalaing ti dadduma nga agtutubo ngem siak. Isu a kayatko la unay nga agbalinak met koma a kas kadakuada tapno gayyemendak. Di nagbayag kalpasan ti bautismok, nakibarkadaak kadagiti saan nga agserserbi ken Jehova. Naragsakak met ketdi no kadkaduak ida. Ngem makonkonsiensiaak ta nagadu a tiempo ti us-usarek para kadakuada. Marigatanak idi a mangisardeng iti pannakikadkaduak kadakuada. Ngem adda nakatulong kaniak.

Iti dayta a tiempo, nagbalin nga agibumbunannag iti kongregasionmi ti 16 ti tawenna a balasitang a ni Dorothée. Bilibak iti kinaregtana iti ministerio. In-inaunaak bassit kenkuana. Ngem saanak unay a naregta. Isu nga imbagak iti bagik: ‘Saksi dagiti nagannakko. Ngem maymaysa ni Dorothée a Saksi iti pamiliana. Ay-aywananna pay ti agsaksakit a nanangna. Ngem kanayon latta met a mapan mangasaba!’ Gapu iti ulidanna, napabilegak a mangaramid iti ad-adu pay para ken Jehova. Di nagbayag, nagpayunirkami ken Dorothée. Umuna, nag-auxiliary pioneer-kami (maaw-awagan idi iti vacation pioneer). Sa idi agangay, nag-regular pioneer-kami. Makaakar ti kinaregta ni Dorothée. Tinulongannak a mangirugi iti kaunaan pay laeng nga iyad-adalak iti Biblia. In-inut a naalak ti riknak a makisarita kadagiti tattao iti binalaybalay, iti lansangan, ken iti dadduma pay a situasion.

Iti umuna a tawenko kas regular pioneer, naibaon iti kongregasionmi kas special pioneer ti maysa a brother a ni Heinz. Nagbalin a Saksi idiay Canada idi binisitana ni manongna a maysa met a Saksi. Idi damo pay laeng, nagustuakon isuna. Ngem kayatna ti agmisionero idinto ta diak kayat. Isu nga idi damo, diak impadlaw a kursonadak isuna. Ngem idi agangay, naginnaremkami sa nagkasarkami ken nagkaduakami nga agpayunir idiay Austria.

PINAGBALINKO A KALAT TI AGMISIONERO

Kanayon idi nga ibagbaga ni Heinz a talaga a kayatna ti agmisionero. Saannak met ketdi a pinilit. Ngem tinulongannak a mangikonsiderar iti dayta. Insaludsodna, “Awan anakta, kayata ngata nga ad-adu pay ti maaramidanta nga agserbi ken Jehova?” Gapu ta managbabainak, mabutengak idi nga agmisionero. Nagpayunirak met ketdi nga agpayso, ngem pampanunotek pay laeng ti maipapan iti panagmisionero, panagriknak ket kasla nakarigrigaten. Ngem kanayon nga inyes-estoria ni Heinz ti ragsak ti kinamisionero. Tinulongannak met a saanak unay nga agpokus iti bagik no di ket panunotek no kasanoak a makatulong iti dadduma. Talaga a nagdakkel ti naitulong kaniak ti balakadna.

In-inut a nariknak a kayatko metten ti agmisionero isu a nagaplaykami nga ageskuela iti Gilead. Ngem insingasing ti branch servant a lalaingek pay laeng ti ag-English. Kalpasan ti tallo a tawen a panangpasayaatko iti panag-English-ko, nasdaawkami ta naibaonkami nga agserbi iti maysa a Yugoslavian Congregation iti Salzburg, Austria. Nagserbikami sadiay iti simmaruno a pito a tawen, agraman ti makatawen a panagserbimi iti sirkito. Nagrigat ti lengguahe a Serbo-Croatian. Ngem nagadu ti iyad-adalanmi iti Biblia.

Idi 1979, kiniddaw dagiti mangidadaulo iti sangay a mapankami pay la “agbakasion” iti Bulgaria. Gapu ta maiparit pay idi ti trabahotayo iti daytoy a lugar, kiniddawda a pagparangenmi nga “agbakbakasionkami” laeng. Ngem ti talaga a rantami ket mangipuslit kadagiti napabassit a kopia dagiti publikasiontayo para iti lima a sister iti Sofia a kabesera daytoy a pagilian. Mabutbutengak idi. Ngem tinulongannak ni Jehova iti dayta a naidumduma nga asaynmentmi. Nakitak a nakaturtured dagitoy a lima a sister ken nakaragragsakda uray no posible nga ibalud ida dagiti polis iti aniaman a kanito. Gapu iti ulidanda, timmuredak a mangaramid iti amin a kabaelak iti aniaman a kiddawen kaniak ti organisasion ni Jehova.

Idi agangay, nagaplaykami manen iti Gilead. Ket ita, adda imbitasion a naawatmi nga ageskuelakami. Impagarupmi a ti atenderanmi a klase ket iti English idiay United States. Ngem idi Nobiembre 1981, nangrugi ti Gilead Extension School iti sangay ti Wiesbaden, Germany. Isu a ti inatenderanmi a klase ket iti German, isu a nalaklakakon a naawatan. Sadino ti nakaibaonanmi?

PAGILIAN A KANAYON TI GUBAT

Ti nakaibaonanmi ket idiay Kenya! Ngem dinamag ti sanga nga opisina no kayatmi ti agserbi iti kaarrubana a pagilian ti Uganda. Nasurok a 10 a tawen sakbayna, adda napasamak a kudeta. Isu a ti mangiturturay idi iti Uganda ket ni General Idi Amin. Bayat ti panagturayna, rinibu ti napapatay ken minilion ti nakapasar iti nakaro a rigat. Ngem idi 1979, napatakias ni Idi Amin iti puestona. Isu a permi ti butengko a mapan iti dayta a nakagulgulo a pagilian. Ngem ti Gilead ti nangisagana kadakami nga agtalek ken Jehova, isu a nag-wen-kami.

Nakarigrigat idi ti situasion idiay Uganda. Maipapan iti dayta, kastoy ti imbaga ni Heinz a mabasa iti 2010 Tinawen a Libro: “Adu a serbisio ti nadadael kas iti linia ti komunikasion ken kimmiddit ti suplay a danum. . . . Gagangay ti panagpipinnaltog ken panagtakaw nangruna iti rabii. . . . Awanen ti matatao kadagiti kalsada. Addada aminen kadagiti pagtaenganda ken masansan nga idawdawatda nga awan koma ti mangserrek kadakuada.” Nupay adda dagita a pakarigatan, intultuloy latta dagiti kakabsat sadiay ti naragsak a panagserbida ken Jehova!

Idi 1982, simmangpetkami ken Heinz iti Kampala, ti kabesera ti Uganda. Iti immuna a lima a bulanmi sadiay, nakipagyankami pay laeng iti balay da Sam ken Christina Waiswa a kadua ti lima nga annakda ken uppat a kakabagianda. Masansan a maminsan laeng a mangan iti agmalem ti pamilia da Brother ken Sister Waiswa, isu a mas naapresiarmi ti kinamanagpadagusda. Bayat ti pannakipagyanmi kadakuada, adu ti nasursuromi ken Heinz a nakatulong kadakami iti panagmisioneromi. Kas pagarigan, nasursuromi ti agin-inut. Sumagmamano la a litro ti pagdigusmi idi sa tayaenmi iti batia tapno adda maisuyat iti kasilias. Idi 1983, immakarkami ken Heinz iti maysa a balay idiay Kampala a nataltalged a pagyanan.

Talaga a nagustuanmi ti panangasaba idiay Kampala. Malagipko a nakaipaimakami iti nasurok nga 4,000 a magasin iti laeng makabulan! Ngem ti talaga a nagustuanmi ket dagiti tattao. Raraemenda ti Dios ken kayatda a pagsasaritaan ti maipapan iti Biblia. Gagangay kadakami ken Heinz ti maaddaan iti sagsa-10 agingga iti sagsa-15 nga iyad-adalan iti Biblia. Nakaad-adu ti nasursuromi kadagiti iyad-adalanmi. Kas pagarigan, naapresiarmi ti kinapositiboda nga agpapan agawid kadagiti gimong kada lawas. Dida man la nagreklamo ken kanayonda a nakaisem.

Idi 1985 ken 1986, adda manen dua pay a panaggugubat dagiti militar iti Uganda. Masansan a makakitakami kadagiti ubbing a nakaiggem iti dadakkel a paltog. Maus-usarda kas soldado ken agbantay kadagiti checkpoint. Iti dayta a tiempo, inkararagmi nga ikkannakami ni Jehova iti sirib ken pagkalmaenna ti riknami bayat nga agbirbirokkami kadagiti interesado iti ministerio. Ket sinungbatan ni Jehova dagiti kararagmi. Masansan a malipatanmi payen ti butengmi kada adda masarakanmi nga aginteres iti mensahe ti Pagarian.

Magusgustuanmi met ti mangasaba kadagiti foreigner. Kas pagarigan, naam-ammo ken inyadalanmi ti agassawa a taga-Tatarstan (Central Russia) a da Murat ken Dilbar Ibatullin. Ni Murat ket maysa a doktor. Nabautisaranda ken agtultuloyda a simamatalek nga agserserbi ken Jehova. Idi agangay, makaparagsak met ta naam-ammok ti taga-Ukraine a ni Tatjana Vileyska a gistay idi nagpakamatay. Idi nabautisaran ni Tatjana, nagsubli idiay Ukraine ket idi agangay, nagserbi kas paraipatarus kadagiti publikasiontayo.a

BARO NGA ASAYNMENT

Idi 1991, bayat nga agbakbakasionkami ken Heinz iti Austria, tinawagannakami ti sangay tapno ipakaammona ti baro nga asaynmentmi: iti Bulgaria. Iti adu a tawen, naiparit ti trabaho a panangasaba iti dadduma a pagilian iti Europe. Ngem nagbalbaliw dayta, isu a napalubosan dagiti Saksi ni Jehova a mangasaba kadagita a pagilian, a kas iti Bulgaria. Kas nadakamatkon, naibaonkami idi iti Bulgaria tapno agipuslit kadagiti publikasion bayat a maiparparit pay laeng ti trabahotayo. Ngem ita, naibaonkami iti daytoy a pagilian tapno mangasaba.

Imbaga dagiti kakabsat a saankamin nga agsubli idiay Uganda. Isu a saankami a nakapagsubli idiay Uganda tapno koma iyempakemi dagiti gamitmi wenno makapagpakada man la koma kadagiti kakabsat sadiay. Imbes ketdi, nagdiretsokamin iti Bethel iti Germany. Inikkandakami iti lugan ket nagbiahekami a mapan iti Bulgaria. Naibaonkami nga agserbi iti maysa a grupo a buklen ti agarup 20 nga agibumbunannag iti Sofia.

Adda sumagmamano a problema a napasaranmi iti Bulgaria. Umuna, saankami a makapagsao iti lengguaheda. Kasta met, dagiti laeng publikasiontayo a naipatarus iti Bulgarian ket Ti Kinapudno a Mangiturong iti Biag nga Awan Inggana ken Ti Librok Dagiti Estoria ti Biblia. Nagrigat ti mangirugi iti panangyadal iti Biblia. Ngem uray no adda dagita a problema, naregta latta a mangasaba ti bassit a grupomi. Saan a nagustuan ti Bulgarian Orthodox Church ti panangasabami isu a rinugiandakami a busoren.

Idi 1994, nawaswas ti pannakairehistro dagiti Saksi kas maysa a relihion. Adu a taga-Bulgaria ti nangibilang kadatayo kas delikado a relihion. Adda dagiti kakabsat a naaresto. Nakaad-adu pay dagiti kinaulbod nga inwarwaras ti media maipapan kadatayo. Ibagbagada a baybay-an latta kanon dagiti Saksi a matay dagiti annakda. Komkombinsirenda pay ketdi kano ti dadduma a padada a Saksi nga agpakamatay. Narigatankami ken Heinz a mangasaba. No mangasabakami, masansan nga adda dagiti mangbugkaw kadakami, mangtawag kadagiti polis, ken batuendakami pay no kua. Saanen a mabalin ti mangiserrek kadagiti publikasiontayo. Nagrigat met ti agabang kadagiti paggigimongantayo. Adda pay ketdi idi kombensiontayo a pinasardeng dagiti polis. Naiduma ti nakairuamanmi ken Heinz idiay Uganda ta nasingpet dagiti tattao sadiay ken naglaka ti mangasaba! Ngem adda nakatulong kadakami tapno makayami dagita a problema.

Saanmi a binaybay-an ti makikadua kadagiti kakabsat iti daytoy a pagilian. Saanda a pinanawan ti kinapudno. Agyamyamanda met ta tinulonganmi ida. Insakitmi ti maysa ken maysa ken nagtitinnulongkami. Nakaad-adu ti nasursuromi kadagita a napadasanmi. Nasursuromi ken Heinz a mabalintayo latta gayam ti agtalinaed a naragsak iti aniaman nga asaynmenttayo, basta itultuloytayo nga ayaten dagiti tattao.

Ngem kalpasan ti sumagmamano a tawen, simmayaat met laeng ti situasion. Nairehistro manen ti relihiontayo idi 1998, ken nagadu met a publikasiontayo idi agangay ti naipatarus iti Bulgarian. Sa idi 2004, naidedikar ti baro a pasdek iti sangaytayo. Ita, addan 2,953 nga agibumbunannag iti Bulgaria iti 57 a kongregasion. Iti laeng napalabas a tawen serbisio, 6,475 ti immatender iti Memorial. Lima laeng idi a sister ti adda iti Sofia. Ngem ita, addan siam a kongregasion! Talaga a nakitami a ti ‘bassit ket nagbalin a sangaribu.’—Isa. 60:22.

PANANGIBTUR KADAGITI PROBLEMA ITI SALUN-AT

Naaddaanak iti adu a sakit. Namin-adu a nakita dagiti doktor nga adda tumorko. Adda pay ketdi nakitada a tumor iti utekko. Nagpa-radiation therapy-ak tapno bumassit ti tumor. Kalpasanna, napankami idiay India tapno ipaikkatko ti kaaduan kadagita a tumor. Nagpaut iti 12 nga oras ti operasionko. Nagpaimbagak iti sangay ti India. Idi immimbagakon, nagsublikamin iti asaynmentmi iti Bulgaria.

Idi agangay, naaddaan ni Heinz iti karkarna a sakit a maawagan iti Huntington’s disease. Matawid dayta kadagiti nagannak. Gapu iti dayta a sakit, marigatan a magna, agsao, ken mangkontrol iti panaggarawna. Bayat a kumarkaro dayta a sakitna, masapul a kanayon a tulongak. No dadduma, permi ti bannogko ken madanaganak no kasanok a maaywanan. Ngem adda agtutubo a brother nga agnagan iti Bobi a regular a mangawis ken Heinz a mangasaba. Saan a mabain ni Bobi uray no saan a makontrol ni Heinz ti panagsao wenno panaggarawna. Imbag laengen ta adda idi ni Bobi a kanayon a mangas-asikaso ken Heinz kadagiti tiempo a diak maaywanan isuna. Pinilimi ken Heinz ti saan a maaddaan iti annak iti daytoy a sistema. Ngem panagriknami, inted a mismo ni Jehova ni Bobi kas pannakaanakmi!—Mar. 10:​29, 30.

Naaddaan met ni Heinz iti kanser. Idi 2015, makapaladingit ta natay ti ipatpategko nga asawa. Idi natayen ni Heinz, mailiwak unay kenkuana. Isu idi ti kanayon a mangpakpakalma kaniak no kasdiay a madanaganak. Permi a maikawaak ita ta awanen isuna. Ngem para kaniak, sibibiag latta ni Heinz! (Luc. 20:38) Agmalmalem a kas man la mangmangngegko latta dagiti nagsayaat nga imbagbaga ken pammalagipna kaniak. Agyamanak unay ta adu a tawen a nakapagkaduakami a simamatalek a nagserbi ken Jehova.

AGYAMANAK UNAY ITI TULONG NI JEHOVA

Talaga a tinulongannak ni Jehova a mangibtur iti amin a rigat a napadasak. Tinulongannak met a manglaban iti kinamanagbabainko. Gapu iti dayta, nasursurok nga ayaten dagiti tattao kas maysa a misionero. (2 Tim. 1:7) Iti tulong ni Jehova, agserserbikami itan ken adingko iti amin a tiempo. Agdama nga agserserbida ken lakayna iti sirkito kadagiti Serbian a kongregasion iti agduduma a paset ti Europe. Nasungbatan met laengen dagiti kararag ni tatangko!

Kada agadalak iti Biblia, kalmado ti riknak ken natalna ti panunotko. Kadagiti narigat a tiempo, nasursurok nga ‘ad-adda pay nga ipasnekko ti agkararag,’ kas iti inaramid idi ni Jesus. (Luc. 22:44) Ti maysa kadagiti sungbat ni Jehova kadagiti kararagko ket dagiti kakongregasionko iti Nadezhda, Sofia. Nakaay-ayat ken nakaim-imbagda. Aw-awisendak no kua a makikadua kadakuada ken kanayon nga ibagbagada nga ipatpategdak. Dagita ti mangparparagsak kaniak.

Masansan a pampanunotek ti maipapan iti panagungar. Im-imadyinek nga agkakaduakamin a sangapamiliaan iti Paraiso. Adda iti sango ti balaymi dagiti nagannakko nga immubingen a kas idi kakaskasarda. Maim-imadyinko met ni adingko nga aglutluto, sa nakatakder met ni Heinz iti abay ti kabaliona. No pampanunotek dagita, rumagsakak, malipatak dagiti negatibo a mapampanunotko, ken mapno ti pusok iti panagyaman ken Jehova.

No panunotek ti amin nga inaramid kaniak ni Jehova ken dagiti aramidennanto pay para kaniak iti masanguanan, mariknak nga agpaypayso ti imbaga ni David iti Salmo 27:​13, 14: “Sadino ngata koma itan ti ayanko no awan pammatik a makitak ti kinaimbag ni Jehova iti daga dagiti sibibiag? Manginanamaka ken Jehova; papigsaem ti pakinakemmo ken bumilegka. Wen, manginanamaka ken Jehova.”