Napatpateg Ngem iti Aniaman a Karera

Kas insalaysay ni Murat Ibatullin

Idi 1987, ti Ministry of Health ti Russia imbaonnak idiay Uganda, Africa. Immanamongak iti uppat a tawen a kontrata a panagserbi sadiay kas doktor. Kinapudnona, diak kayaten ti agsubli idiay Russia, ngem ninamnamak a makagun-odak iti kapadasan a makatulong kaniak nga agserbi iti pagilian a kas iti Australia, Canada, wenno Estados Unidos ti America. Ngem idi 1991, nagbaliw ti planok, ket nagsubliak idiay Russia. Palubosandak a mangilawlawag.

NAYANAKAK idi 1953 iti siudad ti Kazan’ a kabesera ti Republic of Tatarstan iti Central Russia. Tatar dagiti nagannakko, ket Muslim ti kaaduan a Tatar. Idi ubingak, malagipko nga agparintumeng dagiti apongko no agkararagda ken Allah. Da Tatang ken Nanang ken ti kakabsatda paruarendakami iti kuarto tapno dimi maisturbo dagiti apongmi. Kiremandakami dagiti nagannakmi ket kasla mababainda. Komunista ken ateistada ngaminen idi.

Idi uppat ti tawenko, nabiktimaak iti kaudian nga epidemia ti polio iti Soviet Union. Agkarasubliak iti ospital ken sanatorium tapno agpaeksamen. Malagipko nga inkararag ni lolok nga umimbagak koma. Kayatko a nasalun-atak kas ti dadduma nga ubbing, isu a nupay adda depekto ti gurongko, nagay-ayamak iti soccer, hockey, ken dadduma pay nga isport.

Bayat a dumakdakkelak, inarapaapko ti agbalin a doktor. Saanak a relihioso ngem saanak met nga ateista. Diak la idi pampanunoten ti maipapan iti Dios. Iti dayta a tiempo, kagurak ti ideolohia dagiti Komunista isu a masansan a makidiskusionak ken ni Tatang ken iti ulitegko a propesor iti philosophy iti maysa nga unibersidad. Agtartrabaho idi ni Tatang iti State Security Committee a pagaammo kas KGB. Idi nagturposakon iti kinadoktor, inkeddengko ti agbalin a nalaing a neurosurgeon ken agabrod.

Panangbirok iti Nasayaat a Biag

Idi 1984, naileppasko ti thesis-ko maipapan iti panangdayagnos kadagiti tumor ti utek. Ket idi 1987, naibaonak iti maysa nga ospital idiay Mulago iti pagilian ti Uganda. Immakarak iti daytoy napintas a pagilian a kadua ni baketko a Dilbar ken ti annakmi a da Rustem ken Alisa, nga agtawen idi iti pito ken uppat. Nagrigat ti trabahok iti ospital, karaman iti dayta ti panagopera kadagiti pasiente nga addaan iti HIV. Masansan a mapanak iti dadduma nga ospital iti intero a pagilian ta dudua la idi ti neurosurgeon iti Uganda.

Maysa nga aldaw, iti maysa a paglakuan iti libro, iti damo a gundaway nakakitakami ken Dilbar iti Russian a Biblia. Gimmatangkami iti sumagmamano a kopia tapno ipatulodmi iti gagayyemmi idiay Soviet Union. Nagrigat ngamin idi ti gumatang sadiay iti Biblia. Binasami ti sumagmamano a kapitulona ngem insardengmi a dagus gapu ta nagrigat met a tarusan.

Nupay kasta, tallo a tawen a timmabtabunokami iti nadumaduma a simbaan iti Uganda ket pinadasmi nga ammuen ti patpatien dagiti umili ken ti kaipapanan dayta iti biagda. Inadalko met ti Koran iti orihinal a lenguahena. Kinapudnona, nagkaklasekami ken Rustem a nagadal iti Arabic. Sumagmamano la bulan, makapagsaokamin iti simple nga Arabic.

Agarup iti dayta met la a tiempo, naam-ammomi da Heinz ken Marianne Wertholz. Taga-Germany ni Heinz ken taga-Austria met ni Marianne. Misioneroda a mangisursuro iti Biblia. Idi damo, dimi pulos napagsasaritaan ti relihion. Gagangay la daydi a panagsasarita dagiti Europeo nga agsasarak idiay Africa. Dinamagmi no apay a napanda iti Uganda. Imbagada a misioneroda a Saksi ni Jehova ken tumultulongda kadagiti tattao nga agadal iti Biblia.

Nalagipko nga iti maysa a philosophy course iti nageskuelaak nga unibersidad idiay Russia, naibaga kadakami a dagiti Saksi ket maysa a sekta. Idatdatonda kano dagiti ubbing sada inumen ti dara dagita. Imbagak daytoy kada Heinz ken Marianne ta diak mamati nga anamonganda ti kasta. Agpadakami ken Dilbar nga immawat iti kopia ti libro a Mabalinyo ti Agbiag nga Agnanayon iti Paraiso a Daga.a Sumagmamano la nga oras a binasami ti kaaduan a pasetna. Idi nagsardengak nga agbasa, sinaludsodko ken Dilbar no ania ti makunana iti libro. Napalalo ti ragsakna iti nabasana nga uray la simgar! Imbagak a kasta met ti nariknak.

Kalpasan dayta, magagarankamin a makisarita manen kada Heinz ken Marianne. Idi nagkikitakami, nagadu ti napagsasaritaanmi. Ti nasursuromi maipapan iti Biblia ket simmarut iti pusomi isu nga inranudmi dagita kadagiti gagayyem ken katrabahuanmi. Karaman kadakuada ti embahador, dagiti konsulado ti Russia ken dadduma a pagilian, ken ti maysa a pannakabagi ti Vatican a nagkuna a “sarsarita laeng” ti Daan a Tulag. Nasdaawkami iti dayta nga imbagana!

Idi Nagawidkami

Idi 1991, makabulan sakbay a nagsublikami idiay Russia, inkeddengmi ken Dilbar ti agbalin a Saksi ni Jehova. Napanunotmi nga apaman a makagtengkami iti Kazan’, dagus nga itultuloymi ti makigimong. Ngem nasdaawkami ta tallo met la a bulanen, awan pay ti nasarakanmi a Kingdom Hall ken uray maysa a kapammatianmi! Isu nga inkeddengmi ti agbalaybalay, kas ti ar-aramiden dagiti Saksi ni Jehova iti intero a lubong, uray no duduakami. Gapu iti dayta, adda dagiti narugianmi nga iyadalan iti Biblia, a pakairamanan ti maysa a babai a nagbalin a Saksi idi agangay.

Kalpasan dayta, sinarungkarannakami ti maysa a lakay a Saksi a nakaawat iti adresmi manipud kadagiti Saksi idiay Uganda. Rinugianmi ti nakitaripnong iti grupo a buklen ti 15 nga aggigimong iti bassit ken maysa ti siledna nga apartment. Kanayon a nakikomunikar kadakami da Heinz ken Marianne ket binisitadakami pay ditoy Kazan’. Idi agangay, pinasiarmi ida idiay Bulgaria, ti simmaruno a pagilian a nakaidestinuanda ken pagserserbianda pay la ita a misionero.

Nagbalin a Nabunga ti Pagiliak

Iti tunggal gundaway, iranranudko ti kinapudno ti Biblia kadagiti katrabahuak kadagiti ospital ditoy Russia. Iti panaglabas ti tiempo, adu ti nagbalin a Saksi ni Jehova, agraman ti dadduma a padak a doktor. Idi 1992, makatawen kalpasan ti panagawidmi, dagiti Saksi ditoy Kazan’ ket nagbalin nga 45; ken iti simmaganad a tawen, nasuroken a 100. Ita, piton ti kongregasion dagiti Saksi ditoy Kazan’—lima iti Russian, maysa iti Tatar, ken maysa iti sign-language. Adda met dagiti grupo nga aggigimong iti English ken Armenian.

Idi 1993, timmabunoak iti komperensia dagiti doktor idiay New York City. Naaddaanak iti gundaway nga agpasiar iti sangalubongan a hedkuarter dagiti Saksi ni Jehova idiay Brooklyn. Naam-ammok ni Lloyd Barry, a tumultulong a mangorganisar iti trabaho a panangasaba dagiti Saksi ni Jehova iti intero a lubong. Nupay okupado, inwayaanna ti makisarita kaniak.

Nagsaritaanmi ti panagkasapulan kadagiti naibasar-Biblia a literatura iti lenguahe a Tatar. Kalpasan ti sumagmamano a tawen, nabukel ti maysa a grupo a mangipatarus iti Tatar ditoy Russia, ket nangrugin a rummuar dagiti literatura a Tatar. Anian a ragsakmi idi regular a maaw-awatmin ti magasin a Ti Pagwanawanan a nadisenio para iti panagadal iti Biblia! Di nagbayag, nabuangay ti maysa a kongregasion iti lenguahe a Tatar.

Panagopera a Di Agusar iti Dara

Sursurotek ti amin a moral a linteg ti Dios a pakairamanan ti mabasa iti Aramid 15:20 a mangibilbilin kadagiti agserserbi iti Dios nga “umadayoda . . . iti dara.” Innayon ti bersikulo 29 nga itultuloyda ti “umadayo iti bambanag a naisakripisio kadagiti idolo ken iti dara ken iti bambanag a nabekkel ken iti pannakiabig.”

Isu a no agpaagas dagiti Saksi ni Jehova, kiddawenda kadagiti doktor a maraem ti desisionda a maaramat dagiti pamay-an a di agusar iti dara. Nakipagtrabahoak met idi iti Hospital Liaison Committee dagiti Saksi iti Kazan’.b Idi 1997, kasapulan a maopera a dagus ti maysa ti tawenna a ni Pavel iti siudad ti Novosibirsk. Nagpatulong kadakami ni nanangna. Mabilbilang la idi ditoy Russia ti nalaing a doktor a mayat nga agopera a di agusar iti dara. Tinulonganmi nga agsapul iti doktor a mayat a mangusar kadagiti alternatibo a pamay-an.

Di nagbayag, nakabirokkami iti ospital ditoy Kazan’ nga addaan kadagiti doktor a mayat a mangopera ken Pavel. Idi Marso 31, 1997, ti nakaro a sakit ti puso ni Pavel a maawagan iti tetralogy of Fallot ket sibaballigi unay nga inopera dagiti doktor. Dida nagusar iti dara. Idi Abril 3, kastoy ti impadamag ti diario a Vechernyaya Kazan: “Nasayaaten ti kasasaad ti ubing ken din agkasapulan iti agas para iti puso . . . Kalpasan ti 11 a bulan, nabang-aran met laengen ti Nanang ni Pavlik [Pavel].” Kalpasan la ti sumagmamano a tiempo, immimbag ni Pavel iti pannakaoperana ket iti pasilio ti ospital ti nagsursuruanna a magna.

Nasalun-at ken normalen ti kasasaad ni Pavel. Pagay-ayatna ti aglangoy, agpauyas iti kaniebian, ken ag-soccer. Haiskulen ken naregtada a dua ken nanangna a miembro ti kongregasion dagiti Saksi ni Jehova iti siudad ti Novosibirsk. Kalpasan ni Pavel, ti dadduma pay a Saksi ni Jehova nga addaan iti sakit ti puso ket sibaballigi nga inopera dagiti doktor iti isu met la nga ospital a dida nagusar iti dara. Rumangrang-ay ti tay-ak ti medisina ditoy Tatarstan, ket gagangayen ti panagopera a di agusar iti dara.

Ti Trabahok Ita

Dakami nga agassawa, agraman ti dadduma pay a Saksi, ket agtartrabaho iti ospital a mangituktukon iti kabaruan a panangagas kadagiti sakit ti utek ken puso. Nagduduma nga operasion ti ar-aramidenmi, nangruna kadagiti pasiente a mangpili iti pamay-an a di unay mamagsayasay iti dara. Maysaak a neuroradiologist ken agtultuloy ti panangparang-ayko iti noninvasive bloodless neurosurgery (panangagas a di agkasapulan iti operasion). Kas propesor iti Department of Neurology and Neurosurgery iti Kazan’ State Medical University, mangisursuroak kadagiti doktor ken estudiante iti medisina ken ipapaamirisko kadakuada dagiti bentaha ti panangagas a di agusar iti dara.c

Kaduak ni Dilbar iti ospital kas espesialista iti ultrasound. Maragragsakankami a makatulong kadagiti padami a tao. Ngem ti kangrunaan a pakaragsakanmi ket ti pannakakitami no kasano a papaimbagen ti Biblia dagiti tattao iti naespirituan a pamay-an. Anian a rag-omi nga iranud kadagiti tattao ti dandanin matungpal a kari ti Dios a ditoy daga “awanto ti agtataeng nga agkuna: ‘Masakitak.’”—Isaias 33:24.

[Footnotes]

[Ladawan iti panid 12]

Panagserbik kas doktor idiay Africa

[Ladawan iti panid 13]

Idi nangrugikami nga agassawa a makipagadal iti Biblia kadagiti Saksi ni Jehova, 1990

[Ladawan iti panid 14]

Sinarungkarak ni Lloyd Barry bayat ti kaaddak idiay Brooklyn, New York, 1993

[Ladawan iti panid 15]

Ni Pavel ken ni nanangna ita

[Ladawan iti panid 15]

Bayat a mangaskasabakami ken ni baketko a Dilbar