Saan a Pulos Aggibus ti Pudno a Nakristianuan nga Ayat

Igor: Karamankami a dua iti maysa a grupo dagiti Saksi iti ili ti Tkvarcheli, Abkhazia, nga agarup 85 a kilometro manipud iti kongregasion a nakaikamengan ti grupomi iti siudad ti Jvari. Maminsan kada bulan a mapanak idiay Jvari tapno mangala kadagiti literatura. Idi 1992, di nagbayag kalpasan a nagpatingga ti Soviet Union, pinadas ti rehion ti Abkhazia ti sumina iti Georgia. Naggugubat dagiti rebelde ken dagiti soldado ti Georgia ket permi a rimmigat ti kasasaad.

Gizo: Nabautisaranak idi agtawenak iti 21, makatawen sakbay ti gubat. Idi nangrugi ti gubat, nagbuteng dagiti kakabsat ket saanda nga ammo no kasanoda nga ituloy ti mangasaba. Ngem pinaregtanakami ni Igor, a maysa a nasayaat a pastor. Imbagana: “Daytoy ti panawen a kasapulan dagiti tattao ti liwliwa. Agtalinaed laeng a natibker ti espiritualidadtayo no itultuloytayo ti ministeriotayo.” Isu nga inaldaw a siaannad nga inkaskasabami ti makaliwliwa a mensahe ti Sao ti Dios kadagiti kaarrubami.

Igor: Gapu iti gubat, saankami a makapagna iti dati a dalanmi a mapan idiay Jvari tapno mangala kadagiti literatura. Dimmakkelak iti rehion ti Abkhazia isu nga adda ammok a natalged a dalan kadagiti pagmulaan iti tsaa ken kadagiti bambantay. Ngem delikado latta ta mabalin a makasabatak kadagiti armado a lallaki wenno makapayatak iti bomba. Nupay kasta, diak kayat nga agpeligro ti biag dagiti kakabsat isu a maymaysaak a mapmapan iti kada bulan. Iti tulong ni Jehova, kanayon a makaalaak kadagiti naintiempuan a naespirituan a taraon a timmulong tapno agtalinaed a natibker ti espiritualidadmi.

Awan ti gubat iti ilimi a Tkvarcheli ngem di nagbayag, naipariten ti sumrek ken rummuar, ket rimmigat ti kasasaadmi. Idi dandanin ti lam-ek, maib-ibusen ti makanmi ket madanagankami. Kasta unay ti ragsakmi idi naammuanmi a mangisagsagana dagiti kakabsat idiay Jvari kadagiti kasapulanmi!

Gizo: Maysa nga aldaw, dinamag kadakami ni Igor no mabalin a mausar ti balaymi a pagidulinan ken pagiwarasan kadagiti makan nga insagana dagiti kakabsat. Planona a mapan alaen dagiti makan idiay Jvari. Madanagankami ta delikado dayta. Adda dagiti checkpoint a masapul a labsanna ken mabalin a makasabat kadagiti armado a lallaki ken agtatakaw.​—Juan 15:13.

Maragsakankami unay ta kalpasan ti sumagmamano nga aldaw, nagsubli ni Igor a saan a naan-ano, ken napno ti iggemna a lugan iti makan nga umanay a kanenmi iti sumaruno a bulbulan! Kadagidi a naririgat a tiempo, napaneknekanmi a mismo a saan nga aggibus ti pudno a Nakristianuan nga ayat.​—1 Cor. 13:8.