Tulong Kadagiti Mais-stress nga Agtrabtrabaho iti Hospital

Ni Bryn, nga agnanaed iti North Carolina, U.S.A., ket miembro ti Hospital Liaison Committee, a makipagtrabtrabaho kadagiti hospital iti lugarda a mangasikaso kadagiti kasapulan dagiti pasiente a Saksi ni Jehova.

Gapu iti COVID-19 pandemic, adu a hospital ti saan nga agpastrek kadagiti bisita. Tinawagan ni Bryn ti direktor a mangas-asikaso iti naespirituan a suporta para kadagiti pasiente iti hospital iti lugarda tapno ammuenna no kasano a maipaay ti suporta kadagiti pasiente a Saksi.

Ti assistant ti direktor ti nakasarita ni Bryn. Gapu ta maiparit ti panagbisita, sinaludsod ni Bryn no mabalin a maited ti numero ti teleponona kadagiti pasiente a Saksi tapno makasaritana ida. Immanamong ti assistant.

Napanunot met ni Bryn dagiti agtrabtrabaho iti hospital. Imbagana iti assistant nga ap-apresiarenna ti trabahoda iti hospital ken sapay koma ta nasalun-atda. Kinunana pay a nabasana a nakaad-adu a tattao, nangnangruna dagiti agtrabtrabaho iti hospital, ti mais-stress unay gapu iti pandemia.

Immanamong ti assistant a makapa-stress unay ti agtrabaho iti hospital gapu iti COVID-19.

Imbaga ni Bryn: “Adu ti impormasion iti website-mi a makatulong kadagiti tattao a manglaban iti stress. No mapanka iti jw.org ken i-type-mo ti ‘stress’ iti Search field, makabirokka kadagiti makaparegta nga artikulo para kadagiti staff-yo.”

Bayat nga agsarsaritada, linuktan ti assistant ti website, in-type-na ti sao nga “stress” iti Search field, ket nakitana dagiti naitampok nga artikulo. Imbaga ti assistant: “Wow! Ipakitak daytoy iti direktor. Makatulong daytoy kadagiti staff-mi ken kadagiti dadduma. Iyimprentak dagitoy ta iwarasko.”

Kalpasan ti sumagmamano a lawas, nakasarita ni Bryn ti direktor, ket kinunana a linuktanda ti website ken nangyimprentada kadagiti artikulo maipapan iti stress ken dadduma pay a nainaig a topiko. Inwarasda dagita kadagiti nurse ken dadduma pay nga staff iti hospital.

Imbaga ni Bryn: “Nagyaman ti direktor gapu iti trabahotayo ken kadagiti nagsasayaat nga artikulo. Nagdakkel ti naitulong dagita.”