Ania ti Kuna ti Biblia Maipapan iti Krismas?
Sungbat ti Biblia
Awan ti mabasa iti Biblia a petsa ti pannakayanak ni Jesus, ken saan met a naibilin a selebrarantayo ti pannakayanakna. Kuna ti McClintock and Strong’s Cyclopedia: “Saan nga imbilin ti Dios ti panangrambak iti Krismas, ken saan met a naibatay daytoy iti Baro a Tulag.”
No kitaentayo ti pakasaritaan ti Krismas, maammuantayo a nagtaud dayta iti pagano a narelihiosuan a ritual. Kuna ti Biblia a mapagpungtottayo ti Dios no agdayawtayo kenkuana iti wagas a dina anamongan.—Exodo 32:5-7.
Ti nagtaudan dagiti kaugalian iti Krismas
Panangrambak iti pannakayanak ni Jesus: “Saan a rinambakan dagiti nagkauna a Kristiano ti pannakayanak ni [Jesus] gapu ta ibilangda a kaugalian dagiti pagano ti panangrambak iti pannakayanak ti siasinoman.”—The World Book Encyclopedia.
Disiembre 25: Awan ti pammaneknek a daytoy ti aldaw a pannakayanak ni Jesus. Mabalin a pinili dagiti lider ti simbaan daytoy a petsa tapno maigiddan kadagiti pagano a piesta a maang-angay iti panawen ti winter solstice.
Panagsisinnukat iti regalo, panagraragsak, panagpapangan: Kuna ti The Encyclopedia Americana: “Adu a nakaugalian a ragragsak iti Krismas ti natulad iti Saturnalia, maysa a piesta dagiti Romano a maramrambakan iti tengnga ti Disiembre. Kas pagarigan, daytoy a rambak ti namunganayan ti nalabor a piesta, panagsisinnagut, ken panangsindi kadagiti kandela.” Kuna ti Encyclopædia Britannica a “maisardeng amin a trabaho ken negosio” kabayatan ti Saturnalia.
Christmas lights: Sigun iti The Encyclopedia of Religion, ar-arkosan dagiti taga-Europa dagiti pagtaenganda “kadagiti silaw ken nadumaduma a kita ti evergreen” kas panangrambak iti winter solstice ken panangabug kadagiti dakes nga espiritu.
Mistletoe, holly: “Mamati dagiti Druid nga adda pannakabalin ti mistletoe. Mapagdaydayawan ti evergreen holly tapno agsubli ti init.”—The Encyclopedia Americana.
Christmas tree: “Gagangay ti panagdaydayaw iti kayo kadagiti pagano a taga-Europa, ken nagtultuloy dayta uray idi nakombertedan iti Kristianismo.” Ti maysa kadagiti pamay-an a nagtultuloy ti panagdaydayaw iti kayo ket ti kaugalian a “panangikabil iti Christmas tree iti pagserkan wenno uneg ti balay iti panawen ti lam-ek.”—Encyclopædia Britannica.