Ania ti Masapul a Maammuak Maipapan iti Isports?

Mabalin a pagsayaatam wenno pagdaksam ti isports. Agdepende dayta iti klase ti isports nga ay-ayamem, no kasanoka nga agay-ayam, ken iti kapaut ti panagay-ayammo.

• Ania dagiti pagsayaatanna?

• Kaano a saan a nasayaat?

• Ti kuna dagiti padam nga agtutubo

Ania dagiti pagsayaatanna?

Mabalin a pagsayaatan ti salun-atmo ti isports. Kuna ti Biblia nga “adda maited ti panangwatwat iti bagi.” (1 Timoteo 4:8, Ti Baro a Naimbag a Damag Biblia) “Dakkel ti maitulong ti isports tapno kanayonka a naganaygay,” kuna ti agtutubo a ni Ryan. “Adayo a nasaysayaat dayta ngem iti agyan iti uneg ti balay nga agay-ayam kadagiti video game.”

Sursuruannaka ti isports a makikooperar ken tulongannaka a maaddaan iti disiplina iti bagi. Inusar ti Biblia ti isports kas maysa a pagarigan a mangisuro iti napateg a leksion. Kunana: “Dagiti tumataray iti lumba agtarayda amin, ngem maysa laeng ti umawat iti gunggona.” Sa innayonna: “Tunggal tao a makisalsalisal watwatenna ti panagteppel iti amin a bambanag.” (1 Corinto 9:​24, 25) Ti punto? Kasapulan ti panagteppel, wenno disiplina iti bagi, ken pannakikooperar tapno masurotmo dagiti paglintegan ti maysa nga isports. Kasta met laeng ti kapanunotan ti tin-edyer a ni Abigail. Kunana, “Gapu iti isports, nasursurok ti makitinnulong ken mangibaga iti kapanunotak iti sabsabali.”

Makatulong ti isports tapno maaddaanka iti gagayyem. No agay-ayamka iti isports, makaduam ti sabsabali. “Dandani amin nga isports ket adda laokna a kompetision,” kuna ti agtutubo a ni Jordan, “ngem no panunotem nga ay-ayam laeng, nagsayaat dayta a tsansa tapno makaduam ti sabsabali.”

Kaano a saan a nasayaat?

Klase ti isports nga ay-ayamem. Kuna ti Biblia: ‘Ni met laeng Jehova sukimatenna daydiay nalinteg kasta met daydiay nadangkes, ket ti asinoman a mangay-ayat iti kinaranggas pudno unay a guraenna.’​—Salmo 11:5.

Naranggas ti dadduma nga isports. Kas pagarigan, kastoy ti naobserbaran ti tin-edyer a babai a ni Lauren: “No makiboksing ti maysa, awan sabali a kayatna no di bugbogenna ti kalabanna. Kas Kristiano, ditay makilablaban, isu nga apay koma a pagragsakantayo a buyaen dagiti agbibinnugbog?”

Panunotem: Ibagbagam kadi nga awan pagdaksan ti panagay-ayam wenno panagbuya kadagiti naranggas nga isports ta saanmo met nga aktual nga aramiden dagita? No kasta, laglagipem a kuna ti Salmo 11:5 a kagura ni Jehova ti tao a “mangay-ayat iti kinaranggas,” saan la a ti mangar-aramid iti dayta.

No kasanoka nga agay-ayam. Kuna ti Biblia: “Awan ti aniaman nga aramidenyo gapu iti rinnupir [wenno, riri] wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangyo a ti dadduma nangatngatoda ngem dakayo.”—Filipos 2:3.

Siempre, adda latta kompetision no aglaban ti dua a team. Ngem no ti pampanunotem ket basta mangabakka uray ania ti mapasamak, maawan ti ragsak ti ay-ayam. “Naglaka laeng a masobraam ti makikompetensia,” kuna ti tin-edyer a ni Brian. “No nalalaingka iti maysa nga isports, mas kasapulam nga ipakita ti kinapakumbaba.”

Panunotem: Imbaga ti agtutubo a lalaki a ni Chris, “Linawaskami nga ag-soccer, ket adda no kua dagiti maak-aksidente.” Isu nga isaludsodmo iti bagim, ‘Ania dagiti kaaduan a pakaigapuan ti aksidente? Ania ti mabalinko nga aramiden tapno maliklikan ti aksidente?’

Kapaut ti panagay-ayammo. Kuna ti Biblia: ‘Siguraduenyo ti napatpateg a bambanag.’​—Filipos 1:​10.

Masapul nga ammom no ania dagiti prioridadmo. Dagiti koma aktibidad mainaig iti panagdaydayawmo iti Dios ti iyun-unam. Kaaduanna nga agpaut iti sumagmamano nga oras ti panagay-ayam wenno uray panagbuya laeng iti isports. Kuna ti agtutubo a babai a ni Daria: “Agririkami no kua ken Mommy ta nakabaybayagak nga agbuybuya iti isports iti TV. Kunana nga inusarko la koman ti tiempok iti mas importante a banag.”

Panunotem: Dumdumngegka kadi kadagiti nagannakmo no bagbagaandaka maipapan kadagiti bambanag nga iyun-unam? Kuna ti agtutubo a ni Trina: “No dimi maaramid nga agkakabsat dagiti importante a trabahomi gapu iti panagbuybuyami iti isports, palagipannakami ni Mama nga agsuelsueldo latta dagiti agay-ayam, agbuyakami man wenno saan. ‘Ngem asino ti mangbaybayad kadakayo?’ isaludsodna. Ti puntona? Addan trabaho dagiti agay-ayam. Ngem dakami, no dimi aramiden ti assignment-mi ken ti dadduma pay a responsabilidadmi, kasanominto a masuportaran ti bagbagimi iti masanguanan? Ipapaawat ni Mama a saan koma a ti panagay-ayam wenno panagbuya iti isports ti kapatgan iti biagmi.”