Ti Dila ti Pusa

Dagiti taraken a pusa ket pagaammo a managdaldalus. Mabalin a 24 a porsiento iti oras a nakariingda ti usarenda a mangdalus iti bagida. Madalusanda a naimbag ti bagida gapu iti nakaskasdaaw a disenio ti dilada.

Panunotem: Ti rabaw ti dila ti pusa ket addaan iti 290 a papilla, babassit a kawit a kas kasikkil ti kukom. Kasla kutsarita ti tunggal papilla a dagus a makaala iti katay no iyatras ti pusa ti dilana. Bayat a dildilpatan ti pusa ti dutdotna, dumanon dagiti papilla iti kudilna sa mangiruar iti katay.

Kada aldaw, agarup 48 a milliliter (1.6 oz) a katay ti maikabil ti dila ti pusa iti kudilna. Naglaon daytoy a katay kadagiti enzyme a mangikkat kadagiti rugit. Kasta met, bayat nga agmaga ti katay, mangipaay dayta iti dandani 25 a porsiento a pagpalamiis ti pusa iti bagina. Napateg dayta ta manmano ti glandula ti pusa a pagruaran ti ling-etna.

No adda paset ti dutdot ti pusa a nasirot, iyun-unegna dagiti papilla-na tapno mawakray dayta. Mabalin nga usaren ti pusa ti murdong dagiti papilla-na a pangapros iti kudilna no daldalusanna ti dutdotna. Tinulad dagiti researcher dagiti maaramidan ti dila ti pusa idi nagaramidda iti sagaysay nga usarenda iti eksperimentoda. Daytoy a sagaysay ket saan unay a maitalmeg iti buok no idilig iti ordinario a sagaysay ken nalaklaka a dalusan—sa nabibiit ti panangwakrayna kadagiti nasirot a buok. Patien dagiti researcher a ti dila ti pusa ket makatulong iti panagimbento kadagiti nasaysayaat a pamay-an ti panangdalus iti burburan, dutdotan, ken muldotan a bambanag. Mabalin met a mausar dayta a pangpasayaat kadagiti pamay-an ti panangyapros iti losion wenno agas iti kudil a muldotan.

Panagkunam? Ti kadi komplikado a dila ti pusa ket produkto ti ebolusion? Wenno adda nangdisenio iti dayta?