Makapnek a Biag iti Panagserbi Kas Misionero

Nalpas ti gubat idi 1945, ngem narigat latta ti biag. Gapu ta German-kami, pinapanawdakami iti Czechoslovakia ken pinagsublidakami idiay Germany, a dadael idin dagiti siudadna ken nakaad-adun dagiti marigrigat. No dadduma, agpatpatnag a makipila dagiti antik tapno laeng makaalada iti bassit a makan. Sagpaminsan met a mapankami iti kabakiran tapno mangala iti blackberry ken uong, sa isukatmi iti tinapay. Nagbassit ti rasion a makan nga uray la agpukaw dagiti taraken ta takawen dagiti tattao tapno adda makanda. Masansan a maturogkami a mabisbisin.

Ti Umuna a Gundaway a Naammuan ti Pamiliak ti Kinapudno

Katoliko da lolo ken lolak, ngem awan ti Bibliami. Saan a kayat a lakuan ti padi ni lolok ta umanay kanon a dumngeg iti Misa dagiti miembro ti simbaan. Gapu iti dayta, adu a saludsod ni lolok maipapan iti Dios ti saan a nasungbatan.

Pito ti tawenko idi adda dua a Saksi ni Jehova nga immay iti balaymi. Inusarda ti Biblia a mangsungbat kadagiti saludsod ni lolok maipapan iti Trinidad, impierno, ken iti kasasaad dagiti natay. Nagustuan ni lolok dagiti nalawag ken makapnek a sungbat ti Biblia. Kombinsido a nasarakannan ti kinapudno. Kalpasanna, nakipagadal ti intero a pamiliami iti maysa a Saksi nga agassawa.

Ammokon ti Kayatko iti Biag

Manipud kinaubingko, ay-ayatekon ni Jehova. Magusgustuak ti agbasa kadagiti artikulo maipapan kadagiti misionero nga agserserbi ken Jehova iti adayo a pagilian. Pampanunotek, ‘Kasano ngata ti panagbiagda? Kasano ti panangasabada kadagiti tattao a saan pay a pulos nakangngeg iti nagan ni Jehova?’

Iti edad a 12, kayatkon ti agbalin a misionera, isu a rinugiakon nga aramiden dagiti masapul nga aramidek tapno magaw-atko ti kalatko. Umuna, inkagumaak ti agbalin a naregta a manangaskasaba iti naimbag a damag. Kalpasanna, idi Disiembre 12, 1954, nabautisaranak, sa idi agangay, nagbalinak a payunir. Ammok nga asideg idin a magaw-atko ti kalatko!

Ammok met a masapul a makasaoak iti Ingles tapno makapag-Gilead-ak, isu nga inkagumaak a sursuruen dayta. Napanunotko a pagpraktisan dagiti Amerikano a soldado nga adda iti Germany iti dayta a tiempo. Maysa nga aldaw, inasitgak ti maysa a soldado ket imbagak, “Kristoak.” Kinitanak ken siaalumamay nga imbagana, “Siguro ti kayatmo nga ibaga ket ‘Kristianoak.’” Ti ammok idi ket nalaingakon nga ag-Ingles!

Idi agtawenakon iti nasurok a 20, napanak idiay England, ket nagtrabahoak iti kada agsapa kas para aw-awir iti anak ti maysa a Saksi a pamilia. Kada malem, makipasetak iti panangasaba iti binalaybalay, a nagsayaat a gundaway tapno mapraktisko ti ag-Ingles. Kalpasan ti makatawenko idiay England, simmayaat met laengen ti panag-Ingles-ko.

Nagsubliak iti Germany idi Oktubre 1966, ket naawisak nga agserbi kas special pioneer idiay Mechernich. Ngem dagiti tattao iti teritoria ket saan nga interesado iti mensahetayo, nalamiisda a kas iti klima sadiay. Didakami man laeng pastreken uray nakalamlamiis unay iti ruar. Isu a kanayonko idi nga ikararag ken Jehova, “No ipalubosmo nga agbalinak a misionera, pangngaasim ta ipannak iti napudot a lugar.”

Nagaw-atkon ti Kalatko

Kalpasan laeng ti sumagmamano a bulan a panagserbik kas special pioneer, pinatgan ni Jehova ti tarigagay ti pusok! Nakaawatak iti imbitasion nga ageskuela iti maika-44 a klase ti Gilead School para kadagiti misionero. Naggraduarak idi Septiembre 10, 1967. Sadino ti nakaibaonak? Iti napintas ken napudot a pagilian ti Nicaragua, iti Central America! Sibabara nga inabrasadak ken ti tallo pay a kakaduak dagiti misionero nga addan sadiay. Kaslaak ken apostol Pablo, a “nagyaman iti Dios ket bimmileg ti pakinakemna” idi sinabat isuna dagiti kakabsat.—Aramid 28:15.

Naibaonak iti natalna nga ili ti León, ket determinadoak a dagus a makasursuro iti Spanish. Ngem uray no 11 nga oras iti kada aldaw iti uneg ti dua a bulan a nagad-adalak, narigatanak latta a makasursuro!

Malagipko nga adda idi bumalay a mayat a mangpainum kaniak iti fresco, nga awag dagiti taga-Nicaragua iti fruit juice. Ti ammok a naibagak ket, “purified water” laeng ti in-inumek. Ngem kasla nakigtot ti babai. Kalpasan ti sumagmamano nga aldaw, naammuak a ti naibagak ket “holy water” laeng ti in-inumek! Imbag laengen ta idi agangay, nasursurok met laeng ti ag-Spanish.

Kaaduanna nga intero a pamilia ti iyadalak iti Biblia. Natalged ti riknak iti León, magusgustuak ti mangyadal iti Biblia iti rabii, no dadduma, agingga iti 10:00 p.m. Dandani kabesadok idi ti nagan ti amin nga umili. No agawidak, kablaawak ken makitungtongak kadagiti malabsak. Mannakigayyemda ngamin, ken magusgustuanda ti agpalamiis iti rabii iti ruar ti balayda bayat a nakatugawda iti tumbatumba.

Adda sumagmamano a natulongak a mangammo iti kinapudno iti León. Maysa kadakuada ni Nubia, nga adda walo nga annakna a lallaki. Intultuloyko nga iyadalan iti Biblia agingga a naibaonak idiay Managua idi 1976. Iti uneg ti 18 a tawen, awanen ti komunikasionko ken Nubia ken kadagiti annakna, agingga nga immatenderak iti kombension idiay León. Bayat ti intermision, pinalikmutandak dagiti agtutubo a lallaki—dagiti annak ni Nubia! Maragragsakanak unay a makaammo a nagballigi ni Nubia a nangpadakkel kadagiti annakna iti kinapudno.

Panagserbi Kas Misionero Kadagiti Narigat a Tiempo

Iti maudi a paset ti 1970’s, napadasan ti Nicaragua ti bigla a panagbalbaliw ti kagimongan ken politika. Inaramidmi ti amin a kabaelanmi tapno maitultuloymi ti mangasaba. Iti teritoria a nakaibaonak—ti Masaya, iti abagatan ti kabesera a siudad a Managua—masansan nga adda dagiti natatagari ken armado nga agprotprotesta. Maysa a rabii bayat ti gimongmi iti Kingdom Hall, masapul nga agpaklebkami ta nagpipinnaltog dagiti miembro ti Sandinista ken dagiti guardia ti gobierno.a

Maysa nga aldaw bayat nga addaak met iti ministerio, nakitak ti maysa a nakamaskara a Sandinista a mangpalpaltog iti maysa a guardia. Pinadasko ti aglibas ngem immadu nga immadu dagiti lallaki a nakamaskara. Ti la nagtartarayak ngem awan ti paglemmengak. Idi kuan, kasla tudon nga agtinnag dagiti bala manipud kadagiti helicopter ti gobierno. Ngem bigla nga adda lalaki a nanglukat iti ridaw ti balayda sa ginuyodnak iti uneg. Nariknak nga insalakannak ni Jehova!

Nai-deport-ak!

Nagserbiak idiay Masaya agingga idi Marso 20, 1982. Diakto pulos malipatan dayta nga aldaw. Sakbay a mammigatkami a kaduak ti lima pay a misionero, nakitami ti maysa a grupo dagiti Sandinista a soldado a nakaiggem iti machine gun nga agturong iti likudan ti missionary home. Bigla a simrekda iti kosina, ken maysa kadakuada ti nangibilin: “Ikkandakayo iti maysa nga oras nga agempake iti saggaysa a maleta, sa sumurotkayo kadakami.”

Impandakami dagiti soldado iti maysa a farm, ket nagtalinaedkami sadiay iti sumagmamano nga oras. Kalpasanna, impaluganda ti uppat kadakami iti bassit a bus a mapan iti border ti Costa Rica, sa pinapanawdakami iti pagilian. Idi agangay, 21 a misionero ti nai-deport.

Inaywanandakami dagiti kakabsat iti Costa Rica, ket iti sumaruno nga aldaw, nakadanonkami iti sanga nga opisina iti San José. Saankami a nagbayag sadiay. Kalpasan ti agarup 10 nga aldaw, walo kadakami ti naibaon iti baro nga asaynmentmi kas misionero iti Honduras.

Panagserbi iti Honduras

Iti Honduras, naibaonak iti Tegucigalpa. Bayat ti panagserbik iti 33 a tawen iti dayta a siudad, nagbalin a walo ti dati a maymaysa a kongregasion. Makapaladingit ta iti panaglabas dagiti tawen, immadu ti krimen iti Tegucigalpa. Nakaad-adu dagiti agtatakaw, ket namin-ano a naholdapak. Adda met dagiti miembro ti gang nga agdawat kaniak iti kuarta wenno ti aw-awaganda a “buis ti gubat.” Ibagak no kua, “Adda itedko a napatpateg ngem kuarta,” sa ikkak ida iti tract wenno magasin. Kalpasan dayta, masansan a bay-andakon!

Natalna ken nasingpet ti kaaduan kadagiti tattao iti Tegucigalpa, ket natulongak ti dadduma kadakuada a mangammo iti kinapudno. Maysa kadakuada ni Betty. Kasla nagpartak idin ti panagrang-ay daytoy nga iyad-adalak iti Biblia, agingga a maysa nga aldaw, imbagana a kayatnan ti mapan iti sabali a relihion. Naupayak idi. Ngem kalpasan ti dua a tawen, pinanawan ni Betty ti relihionna ken nakipagadal manen iti Biblia kaniak. Apay? Gapu ta kailiw ni Betty ti pudno nga ayat a nariknana iti kongregasion. (Juan 13:34, 35) Imbagana: “Nakaragragsakkayo a mangawat iti amin kadagiti gimong, nabaknang man wenno marigrigat. Naidumdumakayo.” Idi agangay, nagpabautisar ni Betty.

Nagserra ti missionary home iti Tegucigalpa idi 2014. Kalpasan dayta, na-reassign-ak iti Panama. Kaduak itan ti uppat a nabayagen a misionero iti maysa a missionary home.

Mangyeg iti Pudno a Ragsak ti Pananggun-od Kadagiti Naespirituan a Kalat

Limapulo ket lima a tawenen a misioneraak. Ngem ita, saankon a maaramidan ti dati a maar-aramidak gapu ta nakapuyen ti salun-atko. Tultulongannak ni Jehova nga agtalinaed nga aktibo iti panangisuro iti dadduma maipapan kenkuana.

Adda kadi pay sabali a karera a mabalin koma a nagun-odko? Wen, siempre. Ngem adu koma a bendision ti nakaikapisak! Adda nasurok a 50 a naespirituan nga annakko a natulongak a mangammo iti kinapudno ken nakaad-adu met dagiti gagayyemko. Malaksid iti daytoy “dakkel a pamiliak,” adda ni Anti Steffi nga aggigian idiay Germany, a mangay-ayat ken mangsupsuporta kaniak.

Uray awan asawak, diak narikna nga agmaymaysaak. Kanayon nga adda ni Jehova iti sibayko. Addaanak met kadagiti nagsasayaat a gagayyem kas ken Marguerite Foster, a kaduak a misionera iti 17 a tawen. Adu dagiti naragsak a kapadasanmi, ken nadekketkami nga aggayyem agingga ita.—Proverbio 18:24.

Nakaragragsakak unay ta ammok nga inusarko ti biagko iti kasayaatan a pamay-an—ti panagserbik ken Jehova iti amin a kabaelak. Natungpalko ti arapaapko idi ubingak, ken nakaad-adu dagiti naragsak a kapadasak bayat a gawgaw-atek dayta! Talaga a nakaragragsakak, ken padpadaanak ti tiempo a mapagserbiak ni Jehova iti agnanayon.