Panagsagana Itan iti Naparang-ay a Trabaho iti Masakbayan
1 Bayat ti panagapit, mas kupado ngem iti gagangay dagidiay makiraman iti daytoy. Ken bayat ti tiempo iti kinaganat, mas nagaget ken agbannog dagiti tattao ngem iti gagangay. Agbibiagtayon iti tiempo ti panagapit ken tiempo iti kinaganat. Nawadwad ti trabaho. Nakasaganakayo kadin a mangiringpas iti amin a kasapulan?—Mat. 9:37, 38; 13:39; Luc. 13:24; 1 Tim. 4:10.
TI MEMORIAL
2 Ti panawen iti Memorial isut’ kapatgan a tiempo iti tawen dagiti tattao ni Jehova. Iti daytoy a tawen ti Memorial isut’ maaramid iti rumabii ti Martes, Abril 10. Nakaaramidkayon aya iti urnos nga awan ti makalapped kadakayo ken ti pamiliayo a tumabuno? Nagimbitarkayo kadin kadagiti kabagian ken gagayyemyo? Kasano met ngay dagiti interesado idiay teritoriayo, dagiti estudianteyo ti Biblia, ken dagidiay dati nga estudianteyo?—Luc. 22:19; Apoc. 22:17.
3 Masansan nga iyurnos dagiti panglakayen ti pannakadalus a naimbag iti Kingdom Hall sakbay ti Memorial tapno nakasagana iti amin. Naaramid kadin ti urnos a maipaay iti ispiker ti Memorial, dagiti emblema ken dagiti mangidasar, agraman dagiti kanayonan a tugaw ken umdas a bilang iti attendant a maipaay iti espesial nga okasion?
NAPARANG-AY A PANNAKIRAMAN ITI TAY-AK TI SERBISIO
4 Ipalagip ti Memorial iti sakripisio ni Jesus nga agpaay kadatayo. Gapuna a maitutop unay a tiempo a tingitingen no kasano a maparang-ay ti trabahotayo iti tay-ak ti ministerio. Maysa daytoy a wagas ti panangiyebkas iti panangipateg ti di magatadan nga asi ni Jehova babaen iti Anakna.
5 Makaserbikayo kadi a kas auxiliary payunir bayat iti Marso, Abril ken Mayo? Iti Marso adda kampaniatayo a mangiwarnak iti nabileg a mensahe a linaon iti Apocalipsis a libro, ket sigurado a kayattayo amin ti agbannog a maipaay iti daytoy a trabaho. Iti Abril itukontayo ti Pagwanawanan a suskripsion, ket addaantayo iti espesial nga artikulo, a kas iti “Asinot’ Mangibagnos ti Sangatauan nga Agturong iti Talna?” (Abril 1) ken “Sangalubongan a Talna—Anianto ti Pudpudno a Kaipapananna?” (Abril 15). Ti Agriingkayo! isut’ naglaon iti “Adda Aya Biag iti Makinruar a Law-ang?” (Abril 8) ken “Aniat’ Panginanamaan iti Napapaut a Biag?” (Abril 22). Babaen dagitoy nga ekselente a material maparegtatayo a mangusar iti amin a lima a Sabado iti Marso a maipaay iti panagmagasina ken maiyurnos iti intero a bulan ti Abril iti ministerio!
6 Manayonan koma ti regget tapno maaddaantayo iti naparang-ay a pannakiraman iti tay-ak ti ministerio. Agpapan pay saankayo a makapayunir, maiparbeng unay no mangitudingkayo iti personal a kalatyo ti oras a maipaay iti Marso, Abril ken Mayo. Mabalinyo kadi nga iyurnos iti ad-adu a tiempo iti ministerio babaen ti panangkissayyo iti personal a gakat ken panagpalpaliwayo? Ikagumaanyo koma. Dawatenyo ken Jehova a pabilgen ken bendisionannakayo. Dagidiay addaan iti pisikal a limitasion mabalinda ti agpatulong kadagiti dadduma, tapno manayonanda met ti pannakiramanda iti daytoy a kampania.
7 Kadatayo amin, ti Marso ken Abril isut’ masapul a kakopaduan a tiempo iti serbisio ni Jehova. Gagetan koma dagiti panglakayen nga organisaren dagiti amin a bambanag. Dagiti kasapulan a literatura ti nasakbay koma a mapedido. Siguruen nga adda ektra a magasina, nangruna dagiti ruar iti Abril ken Mayo, tapno adda umdas a mausar. Bayat ti Abril, adda pagimbaganna no mausisa iti Abril 8 no siasinoda dagiti saan pay a nakaruar iti serbisio agingga iti dayta a tiempo, iti kasta dagiti nataengan nga agibumbunannag ket mabalinda a badangan dagitoy tapno nawadwad ti makiraman iti aktibidad ti Abril. Maurnos dagiti teritoria ken taripnong sakbay iti panangasaba, agraman iti panangasaba kadagiti rumabii. Bayat a sipapasnek nga ikararag ken Jehova iti bendisionna, ikagumaantayo met nga usaren a nainsiriban iti tiempo a maipaay iti dayawna.