Panangaramid Kadagiti Teokratiko nga Aktibidad iti Mayo
1 Itukon ti Mayo dagiti oportunidad a makiraman iti nagduduma nga aktibidad. Adu ti manggundaway iti bakasion ti pagadalan ken ti nasayaat a panawen a mangsagrap iti panagaliwaksay. Nupay kasta, agannadtayo a maibusor iti pannakasinga dagiti teokratiko a rutinatayo.—Fil. 3:16.
2 No adda nawaya a tiempoyo, a kas iti bakasion ti pagadalan, pinanunotyo kadi maipapan ti panangragpat iti ad-adu a pannakiraman iti ministerio? Adu ti nakasarak iti daytoy a kas nasayaat a tiempo iti panagpalista nga auxiliary payunir. Masansan a luktanna daytoy iti ruangan ti dakdakkel a pribilehio kas regular payunir. Masagrap dagiti pamilia ti pudno a ragsak no usarenda dagiti aldaw a sangsangkamaysa iti ministerio. Gapu ta napapaut iti lawag ti aldaw, ad-adu dagiti makaapit ti gunggona no makiramanda pay a mangasaba iti rumabii.
3 Kasano met ngay ti panangtulong iti maysa a kongregasion nga agkasapulan iti badang a mangwanas ti teritoriada? Nalabit nga adda dadduma iti kongregasionyo nga agmayat a makikuyog kadakayo nga agserbi iti maysa wenno dua a lawas idiay agkasapulan iti dakdakkel a tulong. No bassit laeng ti grupoyo, nalabit a dagiti agibumbunannag iti kaarruba a kongregasion ti agngayangay a kumuyog kadakayo. No limitado iti mabiaheyo, nalabit a mairekomenda ti manangaywan iti sirkitoyo ti asideg a kongregasion a mangipateg iti tulongyo.
4 Nakaplanokayo aya nga agbakasion iti adayo manipud ti pagtaenganyo? No kasta, nakaplanokayo met kadi a tumabuno iti gimong idiay papananyo? Kasano met ngay ti pannakipagserbiyo iti tay-ak a kadua dagiti kakabsat sadiay? Ti panangiraman kadagitoy iti bakasionyo ti pudno a makagunggona kadakayo ken iti dadduma. (Roma 1:11, 12) Makaaramidkayo met kadi ti impormal a panangasaba bayat iti biaheyo? Siguruenyo nga itugot iti Biblia ken abastoyo a literatura. Usarenyo ti dadduma a tiempoyo nga agbasa ken agadal ti Biblia. Laglagipenyo nga uray sagpaminsan a kasapulantayo ti agbakasion iti sekular a panggedan, ditay kayat ti agbakasion iti panagserbi ken Jehova.
5 Naridam koma dagiti panglakayen a mangorganisar a naimbag iti aktibidad ti kongregasion. No adda panglakayen wenno ministerial nga adipen nga umadayo, masapul a maiyurnos iti sabsabali a mangtaming kadagiti rebbengenda. Babaen ti panangipasakbay iti mangidaulo a manangaywan iti petsa ti kaawan dagiti kakabsat, dayta ti tumulong kenkuana a mangaramid iti maitutop a panangator.
6 Wen, ti tiempo iti bakasion ket nakupado unay. Ngem dagiti pakalapdan ti nalaka a mangsinga iti naimbag a rutina ti serbisio iti Pagarian. Gundawayanyo ti nawaya a tiempo iti daytoy a bulan. Kednganyo no ania dagiti mas napatpateg a bambanag ket ilugaryo ida nga umuna iti iskediolyo.—Fil. 1:10.