Amin a Kasuratan ket Makagunggona iti Panangisuro
1 Ti sirib iti balakad ti Biblia ket di mapadisan. Ti moral a pagalagadan nga itandudona ket saan a maartapan. Ti mensahena ket nabileg, “ket kabaelanna a lasinen dagiti panunot ken dagiti panagem ti puso.” (Heb. 4:12) Kasanotay a matulongan dagiti dadduma tapno maawatanda a masapul a sukimatenda a siaannad daytoy a libro? Mabalin a kayatyo nga ipadas dagiti sumaganad a singasing no itukonyo ti New World Translation a kadua ti libro a Ti Biblia—Saot’ Dios wenno iti Tao? bayat ti Nobiembre.
2 Idinto ta adu a tattao ti agparikut no kasano a magun-odanda dagiti kangrunaan a kasapulanda, nalabit a maawis ti riknada iti daytoy nga iyaasideg:
◼ “Adut’ makasasaok a tattao kadagitoy nga aldaw a madanagan kadagiti pinansial nga obligasionda. Asino ti pagarupyo a makaited iti kasayaatan a pammagbaga kadagita a banag? [Palubosan a sumungbat.] Nasarakak nga itukon ti Biblia ti praktikal a balakad a tumulong kadatayo a mangliklik kadagiti saan a nasken a problema. Palubosandak a mangipakita iti ehemplo.” Luktan iti panid 163 ti libro a Ti Biblia—Saot’ Dios wenno iti Tao? sa basaen ti 1 Timoteo 6:9, 10, a naadaw iti parapo 3.
3 Adtoy pay ti sabali a singasing a mabalinyo nga usaren:
◼ “Tunggal agbasatay iti pagiwarnak wenno agimdeng iti damag makangngegtayo iti sabali a problema a mangpadanag kadatayo. [Dakamaten ti sumagmamano a makadisturbo a pasamak a naipadamag iti kallabes a pagiwarnak.] Kasanotayo a sarangten dagiti problema a kas iti daytoy? [Palubosan a sumungbat.] Idi 1983, ti presidente ti Estados Unidos kinunana a ti Biblia ket addaan iti kaimbagan a mensahe a naisurat ket ‘iti uneg ti pinanidna naglaonda kadagiti sungbat iti amin a problema nga ammo ti tao.’ Ipalagip daytoy kadatayo no ania ti kuna ti Biblia. [Basaen ti 2 Timoteo 3:16, 17.] Kayatko nga ipakita kadakayo no apay a makapagtalektayo iti Biblia.” Ipakita ti sumagmamano a punto manipud Kapitulo 1 ti libro sayo itukon dayta.
4 No adu dagiti saan a relihioso a tattao iti teritoriayo, mabalinyo nga ipadas daytoy nga iyaasideg:
◼ “Adu a tattao ditoy a lugar ti mangmatmat iti Biblia a kas agsusupiat ken kas awan mamaayna a sarsarita. Naimatangandan ti adu unay a dakes a bambanag a naaramid gapu iti relihion isu a didan agtalek iti Biblia. Kinapudnona, umad-adu ti tattao nga agpangpangadua no ti Biblia ket Sao ti Dios wenno ti tao. Ania ti opinionyo?” Palubosan a sumungbat. Agpannuray no ania ti sungbat ti bumalay, luktan iti benneg ti libro a Ti Biblia—Saot’ Dios wenno iti Tao? a mainaig iti parikut wenno panangmatmat ti bumalay, sa pagsaritaan ti maysa wenno dua a punto. Kas pagarigan, mabalin nga adda gundawayyo a mangusar iti parapo 27-9, manipud iti panid 66 iti sidong ti subtema a “Ni Jesus—Pudno a Persona.”
5 Ti panangtulong iti sabsabali a mangapresiar iti pudno a pateg ti Biblia isut’ maysa a kasayaatan a banag a maaramidtayo a tumulong kadakuada; maispalna ti biagda.—Prov. 1:32, 33.