Awisenyo Ida nga Umay
1 Maiwarwaragawagen iti 233 a pagilian iti intero a lubong daydi nayawis adu a siglon ti napalabas: “Umaykayo, ket sumang-attayo iti bantay ni Jehova, . . . ket isuronatayonto kadagiti dalanna, ket magnatayonto kadagiti danana.” (Isa. 2:3) Ti panangiturong kadagiti tattao iti organisasion ni Jehova ket maysa kadagiti kasayaatan a wagas tapno matulongantay ida nga agprogreso iti naespirituan nga agturong iti biag nga agnanayon.
2 Dagiti dadduma nga agibumbunannag agalikakada a mangawis kadagiti tattao idiay Kingdom Hall agingga nga awan pay panagprogreso ti panagadalda iti Biblia iti pagtaengan. Ngem, no dadduma, mangrugin a tumabuno dagiti tattao iti gimong ti kongregasion uray pay sakbay a mairugi ti panangyadal iti Biblia kadakuada. Saantay koma nga agtaktak a sibabara a mangawis ken mangparegta kadagiti tattao a makigimong.
3 Ti Aramidenyo: Kanayon nga usarenyo dagiti handbill tapno maipakaammoyo kadagiti tattao dagiti lokal a gimongtayo. Ibagayo a libre dagiti gimong ket awan maaramid a panagur-or. Ilawlawagyo ti pannakaikondukta dagiti gimong. Pagminarenyo nga aktual a kurso ti panagadal iti Biblia dagitoy ket adda adalen a material a maited kadagiti amin kas pagsurotan. Dakamatenyo ti nagduduma a kasasaad ken kabibiag dagidiay tumabtabuno. Ibagayo nga aggapu iti sangakaarrubaan dagiti tumabuno ket maabrasa dagiti ub-ubbing a nagduduma ti tawenda. Awisentay koma dagidiay iyad-adalantayo, nga itukontay kadakuada ti aniaman a maitulongtayo tapno makatabunoda.
4 Maysa kadagiti maudi a nailanad iti Biblia ket nabara nga awis a pannakiraman kadagiti probision ni Jehova iti biag: “Ket ti espiritu ken ti nobia itultuloyda a kunaen: ‘Umayka!’ . . . Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.” (Apoc. 22:17) Awan sandi ti panangawistayo kadagiti sabsabali a tumabuno kadagiti gimongtayo.
5 Naimpadtuan nga inladawan ti Isaias 60:8 dagiti ginasut a ribu a kabbaro nga agdaydayaw a kumamkamang itan kadagiti kongregasion ti ili ti Dios a kasla kalkalapati “nga agtayab a kasla ulep, ken kakasla kalkalapati kadagiti tawada.” Mabalintay nga awisen amin dagiti kabbaro kadagiti gimongtayo ket ipariknatay a maabrasada. Iti kastoy a wagas, makibimbinnadangtayo ken Jehova bayat a papartakenna ti trabaho a panagurnong.—Isa. 60:22.