Tuladenyo ti Di Panangidumduma ni Jehova
1 Maseknan ni Jehova kadagiti tattao. Awatenna nga awan panangidumduma ti asinoman nga agaramid iti pagayatanna. (Ara. 10:34, 35) Idi kinaskasabaan ni Jesus dagiti tattao, saan met a nangidumduma. (Luc. 20:21) Nasken a tuladentayo ti ulidanda, a kas ti inaramid ni Pablo, a nagsurat: “Adda ti isu met laeng nga Apo a mangringbaw iti isuamin, isu a nabaknang kadagidiay amin nga umaw-awag kenkuana.”—Roma 10:12.
2 Ti panangipakaammo iti naimbag a damag ti Pagarian ti Dios kadagiti amin a masarakantayo ket mangitan-ok iti Dios. Masapul nga itultuloytayo nga iranud daytoy nakaskasdaaw a mensahe kadagiti sabsabali, aniaman ti pulida, sosial a kasasaadda, napagadalanda, wenno kasasaad ti panagbiagda. (Roma 10:11-13) Kaipapanan daytoy a kasabaantay dagidiay dumngeg—lallaki, babbai, agtutubo, ken nataengan. Masapul a mapantayo iti amin a pagtaengan tapno ipaayantay ti kada bumalay iti gundaway a makangngeg iti kinapudno.
3 Ipakita ti Interes iti Isuamin: Ti kalattayo ket papanantay koma amin a mabalintay a kasarita. Gapu ta sipapanunotda iti daytoy, addada agibumbunannag a nagballigi a nangasaba kadagiti tattao iti opisina dagiti doktor, ospital, balay a pagtaraknan, ken rehabilitation center. Malaksid iti dayta, nangaskasaba dagiti agibumbunannag kadagiti agimanmanehar iti puneraria, superbisor ken mammagbaga iti eskuelaan, ken hues. No asitganyo dagiti opisial, mayanatup nga iyebkasyo ti panangapresiar kadakuada gapu kadagiti makatulong a serbisioda iti komunidad. Managraemkayo koma, ken mangpilikayo kadagiti naintiempuan nga artikulo a nangnangruna nga adda pakainaiganna iti kita ti trabahoda ken kadagiti parikut a mainaig iti dayta.
4 Iti naminsan, adda kabsat a babai a nakisarita iti maysa a hues iti opisinana. Kalpasan ti naganaygay a saritaan, kastoy ti komento ti hues: “Ammom no aniat’ magustuak kadagiti Saksi ni Jehova? Addaanda kadagiti prinsipio a natibker ti pundasionna ket dida sumiasi iti dayta.” Naipaay ti nasayaat a pammaneknek iti daytoy naimpluensia a tao.
5 Ditay mabasa ti puso dagiti tattao. Nupay kasta, babaen ti pannakisarita iti isuamin a masarakantayo, ipakpakitatay ti pammatitayo iti kabaelan ti Dios a mangiwanwan iti trabahotayo. Mainayon pay, daytoy ti mangipaay kadagiti tattao iti pribilehio tapno mangngegan ken ipangagda ti mensahe ti namnama. (1 Tim. 2:3, 4) Usarentay koma a nainsiriban ti tiempotayo ken ikagumaantay a tuladen ti di panangidumduma ni Jehova babaen ti panangidanontayo iti naimbag a damag iti isuamin a tattao a mabalintay a danonen.—Roma 2:11; Efe. 5:1, 2.