Baro a Programa ti Aldaw ti Espesial nga Asamblea
1 Nupay idaydayaw ti media ken dagiti sekular nga edukador ti material a kinabaknang, idagadag ti Sao ti Dios nga “Agbalintayo a Nabaknang iti Nasayaat nga Ar-aramid.” (1 Tim. 6:18) Dayta ti tema ti programa ti aldaw ti espesial nga asamblea a mangrugi inton Pebrero 2003. Ania a pammaregta ti maawattayto iti daytoy nga asamblea?
2 Ipalawag ti manangaywan iti sirkito no ania ti kayat a sawen ti “Panagbalin a Nabaknang iti Imatang ti Dios,” ken manginterbiu iti dadduma kadagiti mangikagkagumaan a manggun-od iti naespirituan a kinabaknang. Iti umuna a palawagna iti dayta nga aldaw, ipakita ti bumisbisita nga ispiker no kasano ti panangaramid ti ili ti Dios iti “Nasayaat nga Ar-aramid iti Daytoy Tiempo ti Panagani.” Maparegtanto ti tunggal maysa kadatayo a mangutob no ania pay ti mabalintay nga aramiden tapno naan-anay ti pannakiramantayo iti maar-aramid ita a trabaho a panagani nga impaannong ti Dios.
3 Anian a ragsaktayo a makakita kadagiti Kristiano nga agtutubo nga agur-urnong iti naespirituan a kinabaknang! Pakaidayawan daytoy ni Jehova ken tulonganna dagiti agtutubo a mangisaad iti nasayaat a pundasion para kadagiti pribilehio iti masanguanan. Ti paset a “Panangkomendar Kadagiti Agtutubo Gapu Kadagiti Nasayaat nga Aramid a Pakaidayawan ni Jehova” itampokna dagiti nasayaat a maar-aramidan dagiti agtutubo a Kristiano.
4 Ania ti ibunga ti panagaramid iti naimbag? Masalaysay daytoy iti maudi a palawag ti bumisbisita nga ispiker a napauluan, “Itultuloyyo ti Agaramid iti Naimbag ket Apitenyo Dagiti Bendision ni Jehova.” Salaysayenna ti uppat a benneg a pakagun-odantayo kadagiti nabaknang a bendision: (1) kas indibidual, (2) kas pamilia, (3) kas kongregasion, ken (4) kas sangalubongan nga organisasion.
5 Maaddaanto iti gundaway nga agpabautisar dagidiay nakapagdedikaren ken Jehova. No nakasaganakayon nga agpabautisar, ipakaammoyo a dagus dayta iti mamangulo a manangaywan.
6 No maipakaammo ti petsa ti asamblea iti lugaryo, iplanoyo a dagus ti itatabunoyo. Ikagumaanyo ti sumangpet a nasapa tapno saanyo a maliwayan ti panglukat a kanta ken kararag. Ti itatabuno ken panagimdeng iti intero a programa ti aldaw ti espesial nga asamblea pabilgennatayo nga agtultuloy nga agbiag iti wagas a mamagbalin kadatayo a pudpudno a nabaknang iti imatang ni Jehova a Diostayo.