Nasayaat Kadi ti Maaddaan iti Personal a Teritoria?
1. Apay nga ikabilangam ti maaddaan iti personal a teritoria?
1 Kadagiti kongregasion nga aduan iti teritoria, mabalin a maikkan dagiti agibumbunannag iti personal a teritoria, a nalabit asideg iti pagnanaedanda. Kastoy ti kuna ti libro nga Organisado, panid 103: “No addaanka iti personal a teritoria a kombeniente kenka, mausarmo a sieepektibo ti tiempo a mabusbosmo iti panagserbim iti tay-ak. Maysa pay, mabalin a kayatmo ti mangawis iti sabali nga agibumbunannag a makipagtrabaho kenka iti teritoriam.”
2. Kasano a mausar ti personal a teritoria kas kanayonan ti grupo a panangasaba?
2 Kanayonan iti Grupo a Panangasaba: No mangalaka iti personal a teritoria nga asideg iti pagtrabtrabahuam, mabalinmo ti mangasaba kabayatan ti pangngaldaw wenno sakbay nga agawidka. Mabalin nga adda kaduam a sabali pay nga agibumbunannag nga asideg met laeng sadiay. No mangalaka iti teritoria nga asideg iti balayyo, nalakakayo laeng a mangasaba a sangapamiliaan iti rabii. Siempre, no saanka a makatabuno iti taripnong sakbay ti panangasaba, maitutop nga agkararagka ken ni Jehova a dumawat iti pannarabayna sakbay nga irugim ti mangasaba. (Fil. 4:6) Maysa pay, masapul a balanse ti panangbusbosmo iti tiempom a mangasaba iti personal a teritoriam ken iti panangsuportam iti grupo a panangasaba. Nangnangruna kadagiti ngudo ti lawas, adu ti rummuar iti tay-ak, isu a nasaysayaat no suportaran ti panangasaba ti grupoyo.
3. Ania dagiti pagsayaatan ti pannakaadda iti personal a teritoria?
3 Dagiti Pagsayaatanna: No adda personal a teritoriam, adda pangasabaam kaanoman nga ipalubos ti iskediulmo. Ad-adu ti tiempom a mangasaba ken basbassit ti tiempo a busbosem nga agbiahe. Gapu iti daytoy, adda dagiti nakapag-auxiliary wenno regular pioneer. Yantangay asideg laeng iti lugaryo dagiti bumalay a mangipakita iti interes, nalaklaka ti agsarungkar ken mangyadal iti Biblia. Natakuatan ti adu a ti panangasaba iti personal a teritoria ket makatulong tapno makasinninged ken maalada ti panagtalek ti bumalay, nangnangruna no saan laeng a mammaminsan ti pannakawanas ti teritoria sakbay nga isublida dayta tapno sublaten met dagiti dadduma. Ti kadi panangasaba iti personal a teritoria ket makatulong kenka ken iti pamiliam tapno naan-anay a maitungpalyo ti ministerioyo?—2 Tim. 4:5.