Ti Sao ti Dios Adda Bilegna

1. Ania ti tema ti aldaw ti espesial nga asamblea iti 2014?

¹ Saan a kas iti aniaman a gapuanan ti imperpekto a tao, ti Biblia ket addaan iti bileg a mangbalbaliw kadatayo. Kabaelanna nga itunos ti pampanunot ken danatayo iti pagayatan ni Jehova. Kasano kabileg ti Sao ti Dios? Kasanotayo a naan-anay a magunggonaan iti bilegna? Kasanotayo nga usaren ti Sao ti Dios tapno ad-adda nga epektibo ti panangtulongtayo kadagiti sabsabali? Sigurado a mapabilegtayo amin iti naespirituan bayat a mailawlawag dagitoy a punto iti programa iti aldaw ti espesial nga asamblea iti 2014. Natemaan daytoy iti “Ti Sao ti Dios Adda Bilegna,” a naadaw iti Hebreo 4:12.

2. Imdengantayo ti sungbat dagiti ania a saludsod?

² Ammuem ti Sungbat Dagitoy a Saludsod: Bayat ti panagimdengmo iti programa, isuratmo ti sungbat dagitoy a saludsod:

• Apay a rumbeng nga agtalektayo iti Sao ni Jehova? (Sal. 29:4)

• Kasanotayo a mapadasan a mismo ti bileg ti Sao ti Dios iti biagtayo? (Sal. 34:8)

• Kasanoyo nga usaren ti bileg ti Sao ti Dios iti ministerioyo? (2 Tim. 3:16, 17)

• Ania ti aramidentayo tapno ditay mabiktima iti makaallilaw a pannakabalin ti lubong ni Satanas? (1 Juan 5:19)

• Kas agtutubo, kasanoyo a maragpat ti naespirituan a balligi? (Jer. 17:7)

• Kasanotayo a bumileg iti tiempo a nakapuytayo? (2 Cor. 12:10)

• Ania ti makatulong iti agtultuloy a panagbalbaliw, uray kadagiti natibker ti pannakasarikedkedna nga ugali ken kababalin? (Efe. 4:23)

3. Malaksid iti panagimdeng iti programa, kasanotayo pay a magunggonaan iti aldaw ti espesial nga asamblea?

³ Sigurado a magunggonaantayo kadagiti mangngegantayo a napapateg nga impormasion! Maysa pay, ti aldaw ti espesial nga asamblea ket kas met laeng iti asamblea sirkito ken kombension distrito a mangipaay kadatayo iti gundaway nga agpalawa ken mangtagiragsak iti pannakilangen kadagiti kakabsat a saantayo a kakongregasion. (Sal. 133:1-3; 2 Cor. 6:11-13) Gapuna, gundawayanyo ti makilangen kadagiti datin a gagayyemyo ken makiam-ammokayo kadagiti dadduma. No adda bumisbisita nga ispiker a maituding iti espesial nga asambleayo, kas koma iti manangaywan iti distrito wenno Bethelite, apay a diyo gundawayan ti makilangen kenkuana ken iti asawana? Talaga nga adu ti panggapuantayo a mangsegga iti sumaganad nga aldaw ti espesial nga asamblea!