Sangadapan Laeng Manipud ken Patay
“Ar-arapaapek no maminsan a dua manen ti gurongko. . . . Adu a tawenen ti napalabas, idi bassitak pay, nakiay-ayamak kadagiti gayyemko a kaarrubak. Idi kuan ‘BOOM’. . . Napukolen ti kannawan a gurongko.”—Song Kosal, 12, Cambodia.
Kada aldaw, agarup 70 a tattao ti promedio a pukolan wenno patayen dagiti bomba a naimula iti daga. Saan a soldado ti kaaduan a biktima. Imbes ketdi, dagitoy ket sibilian—lallaki nga agpaspastor iti baka, agsaksakdo a babbai, ken agay-ay-ayam nga ubbing. Kas pagarigan, ti walo ti tawenna a ni Rukia, a nagparang iti akkub ket napukolan iti bomba a naimula iti daga a nakatayan ti tallo a kakabsatna a lalaki ken ni ikitna.
Ti bomba a naimula iti daga ket napigsa pay laeng kalpasan ti 50 a tawen a pannakaimulana. Gapuna, “dayta ti kakaisuna a nabati nga armas a mangpatay iti ad-adu a tattao kalpasan a nagpatinggan ti rinnupak ngem ti matay bayat ti panagrurupak,” kuna ti The Defense Monitor. Awan ti makaammo no mano a bomba ti naimula iti daga iti intero a lubong. Gagangayen a mangngeg nga adda mapattapatta a di kumurang nga 60 a milion. Pudno nga adu ti maik-ikkat a bomba a naimula iti daga. Ngem, iti nabiit pay, idi 1997, impadamag ti United Nations nga “iti tunggal maikkat a bomba a naimula iti daga, 20 ti maimula. Idi 1994, mapattapatta a 100,000 ti naikkat, ngem adda kanayonan a 2 a milion a naimula.”
Apay a dagiti bomba a maimula iti daga ti kaykayat dagiti komander ti militar iti kaaldawantayo? Ania ti epekto dagitoy iti ekonomia ken iti kagimongan? Kasano a maapektaran dagiti makalasat? Maikkatto ngata iti planetatayo dagiti bomba a naimula iti daga?
[Picture Credit Lines iti panid 3]
© ICRC/David Higgs
Copyright Nic Dunlop/Panos Pictures