Manipud Kadagiti Agbasbasa

Panangpili iti Pakiasawaan Pagyamanan iti naamaan a pannakaseknanyo kadakami nga agtutubo iti artikulo a “Ti Panangmatmat ti Biblia: No Kasano ti Agpili iti Pakiasawaan.” (Oktubre 8, 1999) Ti kinaawan padas ti gapu nga agapura ti adu nga agtutubo a makiasawa. Pagarupenda a pudno a panagayat ti pannakaengganio. Kaykayatko laengen ti agmaymaysa ngem ti makiasawa iti diak makatunosan.

S.R.M., Brazil

Agtawenak iti 40 ken balasangak pay laeng. Inaldaw nga ikarkararagko ken Jehova a makasarakak koma iti pakiasawaak, ket ikagkagumaak a patanoren dagiti kalidad a kasapulan tapno agballigi ti pannakiasawak. Makaparegta unay a basaen dagiti singasing maipapan iti panangbirok iti tao a nabileg ti espiritualidadna, kapadak dagiti kalatna ken mangikagkagumaan a mangpatanor kadagiti bunga ti espiritu ti Dios. Pagyamanan unay iti panangpabilegyo iti determinasionko nga agtultuloy nga aguray ken Jehova.

E. F., Estados Unidos

Dagiti Langaylangayan Adun a tawen a palpaliiwek iti balkonko ti panagaramid dagiti European swift kadagiti umokda. Sumangpetda no Mayo ken kellaat a diak idan a makita no Agosto. Gapu iti artikulo a “Langaylangayan​—Nasiwet nga Agtayab” (Oktubre 8, 1999), ad-adun nga amang ti ammok maipapan kadagitoy a nakaskasdaaw a parsua.

A. D., Alemania

Pakasaritaan ti Biag Nasuroken a sangapulo a tawen a maysaak nga amin-tiempo a managebanghelio ket masansan a matignayak nga agyaman kadakayo gapu kadagiti artikuloyo a nagsayaat ti pannakaisuratda. Dagiti nagsayaat a kapadasan ti adu a misionero ti kangrunaan a magustuak. Nabayagen a kayatko nga agbalinak met koma a misionera. Tultulongannak dagiti kapadasan a kas iti kapadasan da Willem ken Gré van Seijl (“Ti Aktual a Pasamak Linab-awanna Dagiti Ninamnamak,” Oktubre 8, 1999) a mangtaginayon iti tarigagayko nga agserbi iti ganggannaet a pagilian.

P. K., Estados Unidos

Idi binasak ti artikulo, malmaldaangak unay. No dadduma, mariknak a diakto pulos maragpat dagiti naespirituan a kalatko. Marigatanak met a mangtaginayon iti positibo a kababalin iti trabahok kas amin-tiempo a managebanghelio. Nagsayaat ken optimistiko ti panangmatmat da Willem ken Gré nupay adda dagiti lapped, isu a binendisionan ni Jehova dagiti panagreggetda. Dayta ti nangpabileg iti panagtalekko a maragpatko met dagiti kalatko no taginayonek a nabileg ti pammatik.

K. C., Estados Unidos

Mannakigayyem Pagyamanan unay iti artikulo nga “Agimtuod Dagiti Agtutubo . . . Apay a Saanak Unay a Mannakigayyem?” (Oktubre 22, 1999) Agtawenak iti 17, ket dandani pinagpanunotnak ti artikulo a naisurat dayta para laeng kaniak. Inyebkasna ti eksakto a marikriknak. Masansan a mangngegak a natangsitak kano. Ngem ti kinapudno a saan unay a matagtagari ti maysa a tao ngem iti dadduma ket saan koma a rason tapno di umiso ti pannakaipato dayta a tao.

R. R., Alemania

Ti maysa a grabe a panagsakitko idi ubingak ti gapu a mariknak a naiputputongak kadagiti sabsabali. Tinulongannak daytoy nga artikulo a mangbigbig ken mangtaming kadagiti riknak ken mangaramidak iti pamuspusan tapno maparmekko ti kasasaadko. Ikagumaakton ti makigayyem kadagiti kakongregasionko.

J.F.F., Brazil

Di Umiso a Numero! Kanayon a magustuak dagiti artikuloyo ken ti karkarna a kinaumisoda. Nupay kasta, kastoy ti nadakamat iti “Panangmatmat iti Lubong,” ti benneg nga “Agrayo Unay iti Kotse” (Setiembre 8, 1999): “Mapattapatta nga agarup 40 a milion a lugan ti agdama a maus-usar idiay Estados Unidos.” Ad-adu nga amang ti aktual a bilang ngem iti dayta.

R. K., Estados Unidos

Dispensarendakami iti daytoy a kamali. Saanmi a nadlaw a naadawmi ti di umiso a bilang. Iti agdama, nasurok a 130 a milion a kotse ti nairehistro idiay Estados Unidos.​—ED.