Panagopera a Di Mausar ti Dara—Naballigi a Kaso
Idi naipablaak ti ruar ti Agriingkayo! nga Enero 8, 2000, maipapan iti tema a panangagas ken panagopera a di mausar ti dara, naawat dagiti editor daytoy a makaparegta a surat.
“Impalagip daytoy a ruar ti Agriingkayo! ti kasasaad a sinarangetmi nga agassawa maipapan iti balasangmi a ni Janice. Kalpasan unay ti pannakaipasngayna, natakuatan nga adda lima a depekto ti pusona. Ti kakaruan isu ti panagbalbaliw ti posision dagiti dadakkel nga urat.a Tangay masapul a maopera, nangbirokkami iti siruhano ti ubing idiay Buffalo, New York, E.U.A., a mayat nga agopera a di mausar ti dara.
“Idi uppat a bulanna, damo a naopera ni Janice—maysa a closed-heart surgery (pannakatarimaan dagiti urat iti aglawlaw ti puso a mangkissay kadagiti temporario a sintomas sakbay a mayeskediul ti open-heart surgery), tapno malapdan bassit ti panagtaray ti dara iti barana. Lima a bulan kalpasanna, naopera iti maikadua—daytoy ti open-heart surgery (mapasardeng ti puso ket ti heart-lung a makina ti mangibomba iti addaan oksihena a dara iti bagi) tapno umiso ti panagtaray ti darana. Awan ti dara a nausar kadagitoy dua nga operasion, ket naan-anay a naballigi!
“Ag-17 anyos itan ni Janice ket nakasalsalun-at. Agyamankami kadagiti natured a siruhano a situtulok a nangraem iti takdermi maipapan iti dara. Talaga a maitutop nga awagan dagitoy iti inyawagyo kadakuada iti ruar nga Enero 8 a ‘Dagiti Nangyun-una iti Medisina.’ Kas sungbat iti naisaludsod iti dayta a magasin a, Natalged kadi nga alternatibo ti panagopera a di mausar ti dara? Sigurado a masungbatantay dayta iti wen!
[Footnote]
a Iti daytoy a kasasaad, nagsinnukat ti posision ti aorta ken ti pulmonary artery. Isu a mapan laeng iti bara ti aduan-oksihena a dara a maiwaras koma iti bagi. Adda kasta met la a kaso a naipadamag iti ruar nga Oktubre 8, 1986, panid 20.
[Ladawan iti panid 31]
Kalpasan dagiti operasionna
[Ladawan iti panid 31]
Ni Janice ken dagiti nagannak kenkuana itatta