Panangragpat Kadagiti Kalat
PANNAKASEKNAN ti amin a nasion, panagkakabsat, talna—asino ti di mangidayaw kadagita a nagsasayaat a kalat? Ti nangpasubli iti Olympics a ni Baron Pierre de Coubertin, patienna a parmeken dagiti ay-ayam ti panagsasalisal dagiti nasion babaen ti panangitandudona iti dakkel a panagraem kadagiti makisalip, aniaman ti puli, relihion, wenno seksoda. Patienna a “mapataud ti nasaysayaat a lubong babaen laeng kadagiti nasaysayaat nga indibidual.” Ngem pudno kadi a makaiyeg ti ay-ayam iti sangalubongan a talna? No ikeddeng manipud iti napalabas a rekordda, saan ti sungbattayo.
Nupay adda paset ti ay-ayam, ti panagadal iti Biblia ti solusion tapno maitandudo ti pudno a talna. Kinapudnona, dagiti prinsipio ti Biblia makapataudda kadagiti “nasaysayaat nga indibidual,” kas kinuna ni Coubertin. Amirisenyo ti dadduma a teksto iti Biblia a mamagkakappia kadagiti tattao a mangyaplikar kadagitoy, aniaman ti nasionalidadda.
“Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”—Juan 13:35.
“No mabalin, agingga a makapagpannuray kadakayo, makikappiakayo iti isuamin a tattao.”—Roma 12:18.
“Bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti isuamin.”—Galacia 6:10.
‘Awan ti aniaman nga aramidenyo gapu iti pannakirupir wenno gapu iti pagpasindayag, no di ket buyogen ti kinapakumbaba iti isip ibilangyo dagiti dadduma a nangatngato ngem dakayo.’—Filipos 2:3.
“Ti panagsanay iti bagi bassit ti maigunggonana; ngem ti nadiosan a debosion makagunggona iti isuamin a bambanag, ta addaan kari a biag ita ken daydiay umayto.”—1 Timoteo 4:8.
Epektibo kadi dagiti alagaden a nailanad kadagitoy a teksto iti Biblia? Usigem ti napasamak idiay Munich, Alemania. Idi 1974, dua la a tawen kalpasan a riniribuk ti terorismo ken panangpapatay ti Olympic Games a naangay iti dayta a siudad, nangangay dagiti Saksi ni Jehova iti internasional a kombension idiay Olympic Stadium. Karaman iti adu a timmabuno dagiti taga Grecia ken Turkey—nga agbimbinnusor a pagilian. Kinapudnona, bayat dayta a kalgaw, naglalaban dagiti buyot ti Grecia ken Turkey maigapu iti puro ti Cyprus. Naapektaran kadi ti itatabuno dagiti Kristiano iti daytoy a kombension? Saan! Anian a pannakatukay ti rikna ti adu a managpaliiw idi nakitada dagiti Griego ken Turko a nagiinnarakup ken nagiinnawag iti kabsat!
Agdindinamag dagiti Saksi ni Jehova iti intero a lubong gapu iti natalna a panaglalangenda a mangparmek kadagiti tubeng gapu ti nasion, puli, ken tribu. Siempre, saanda nga ibagbaga a naan-anayen a naragpatda ti kalat a sangalubongan a panagkaykaysa ken panagtutunos. Kas iti asinoman, masapul nga ikagumaanda a suroten ti balakad ti Kristiano nga apostol a ni Pablo: “Uksobenyo ti daan a personalidad agraman dagiti aramidna, ket kawesanyo ti bagbagiyo iti baro a personalidad.” (Colosas 3:9, 10) Nupay kasta, patienda unay a ti panangsurot kadagiti prinsipio ti Biblia ti makatulong kadagiti tattao a ‘mangsapul iti talna ket surotenda dayta.’—1 Pedro 3:11.
Nakalkaldaang ta nupay natan-ok dagiti kalat ti Olympics, inruarna laeng dagiti kadaksan a kababalin ti adu. Maisupadi iti dayta, ti nabileg a Sao ti Dios iruarna ti kasayaatan a kababalin dagiti tattao, nga itandudona ti pannakaseknan ken talna iti amin a nasion.
[Dagiti ladawan iti panid 8]
Kompetision ti itantandudo ti Olympics
[Credit Line]
Aus dem Fundus der MÜNCHNER OLYMPIAPARK GMBH, München
[Dagiti ladawan iti panid 9]
Talna ti itantandudo ti Biblia