Dramatiko a Panangalaw
Babaen ti koresponsal ti Agriingkayo! idiay BENIN
“SIBIBIAG dagidiay tallo a lallaki gapu laeng ta inispal ida dagiti Saksi ni Jehova!” Dayta ti kellaat a nagwaras a damag iti intero a siudad ti Calavi, ditoy Benin, ti pagilian iti Makinlaud nga Africa, idi Mierkoles, Abril 19, 2000. Siasino ti tallo a lallaki, ket kasano a nakatulong dagiti Saksi ni Jehova iti pannakaalawda?
Agarup alas 6:30 ti agsapa idi agsagsagana nga agtrabaho da Philippe Elegbe ken Roger Kounougbe iti pagasambleaan dagiti Saksi ni Jehova a kadenna ti sanga nga opisina ti Watch Tower Society ditoy Benin. Iti rabii, ginasut ti agtataripnong sadiay para iti tinawen a Memorial iti ipapatay ni Jesu-Kristo.a Kellaat nga adda nagpigsa a dinnungparan a nangsinga iti kinatalinaay ti agsapa. Dagus a nadlaw da Philippe ken Roger nga adda napasamak nga aksidente iti haywey.
Di nagbayag, nangngegda ti inyikkis ti maysa a lalaki: “Napandagan kadagiti supot ti semento ti tallo a kakaduak!” Nagtaray da Philippe ken Roger iti haywey. Nakitada sadiay ti natumba a 20-tonelada a trak. Natnag ti pinullo a supot ti semento manipud iti trak.
Ti maysa met la a trabahador iti pagasambleaan a ni Josué Didolanvi ket immuna gayamen a napan iti nakapasamakan ti aksidente. Guyguyodenna ti maysa a lalaki iti nagbaetan ti trak ken dagiti supot ti semento. Ti tsuper a nakaruaren manipud iti trak ket nakamulaleng gapu iti pannakakigtotna. Nupay kasta, nayikkisna pay laeng: “Adda pay dua a tattao a napandagan kadagiti supot ti semento!” Dadduma nga agpalpaliiw ti nangrugin a nangikkat kadagiti supot, ngem insardengda idi agangay gapu iti napalalo a pudot. Kagapgapu ti semento iti pugon a nakaaramidanda!
Panangalaw
Inkarkarigatan da Philippe, Roger, ken Josué nga inikkat a saggaysa ti nagabsuon a supot ti semento. Uray la a nasaktan dagiti imada gapu iti kinapudot ken kinadagsen ti sag-50 a kilo a supot. Nakarkaro pay, nabuttawan dagiti supot isu nga adda nayubo a semento a nangsinit kadagiti ramayda ken nangparigat iti panaganges. “Nasinit dagiti imak, nangnangruna dagiti ramayko,” kinuna ni Josué idi agangay. “Ngem sangkapanunotko a nalabit adda pay gundaway a maispal ti siasinoman a napandagan.”
Kalpasan a nabagkatda ti dandani 40 a supot, adda nakitada nga ikamen. Nasdaawda unay a nakakita iti dua a lallaki sadiay—a naabbongan iti ikamen. Sibibiagda! Idi napasamak ti aksidente, matmaturog dagitoy a lallaki iti likudan ti trak iti rabaw ti ikamen a nayabbong kadagiti supot ti semento. Idi naitapuakda manipud iti trak, nayabbong kadakuada ti ikamen, isu a nasalaknibanda iti kasta unay a kinapudot dagiti supot ti semento a nanggabur kadakuada.
Kabayatan ken kalpasan ti panangalaw, nagaaribungbong ti adu a tattao. Nasdaaw ti amin ta nabaelan da Philippe, Roger, ken Josué nga inikkat a dagus ti dua a tonelada a naigabsuon a supot ti semento nupay nakarigrigat. Nasdaawda met ta inturtured dagitoy tallo a lallaki ti kasta a rigat tapno tulongan dagiti tattao a dida man la nga am-ammo. Di nagbayag, kas man la amin a taga Calavi ti makaammon iti naimbanuaran a panagreggetda.
[Footnote]
a Kas panagtulnog iti bilin ni Jesus, tinawen nga angayen dagiti Saksi ni Jehova daytoy a sagrado a pananglaglagip.—Lucas 22:19.
[Ladawan iti panid 31]
Ni Roger a nakaiggem iti ikamen kalpasan ti panangalaw