Agserserbi Dagiti Boluntario

KADA malem ti Biernes, maysa a nataenganen a maestra idiay Brazil a ni Sirley pagbalinenna ti salasna a kuarto a pagadalan. Iti agarup alas dos, sumangpet ni Amélia, maysa kadagiti estudiante. Awan ti leksion a malangananna, ket nasaysayaaten ti panagbasana ngem ti adu nga estudiante iti haiskul. Agtawen ti 82 ni Amélia.

Tultuladen ni Amélia ti nasurok nga 60 a lallakay ken babbaket a nagturpos iti libre a klase ti panagbasa ken panagsurat nga ikonkondukta ni Sirley iti ilina. Nabiit pay nga adda detalyado nga artikulo iti periodiko ti Brazil a Jornal do Sudoeste maipapan iti boluntario a trabaho ni Sirley. Idi nabigbigda nga adda “nagsayaat nga epekto ti trabahona iti komunidad,” imbaga ti artikulo ti periodiko nga epektibo unay ti panangisuro ni Sirley kadagiti lallakay ken babbaket ta “kalpasan laeng ti 120 nga oras ti klase, agsursuraten, agbasbasan iti periodiko, ken agkukuentan dagitoy ken ar-aramidendan iti dadduma pay nga inaldaw a trabaho.” Ibaga pay ti artikulo nga us-usaren ni Sirley ti bokleta a Learn to Read and Write (Agsursuro nga Agbasa ken Agsurat), nga insagana dagiti Saksi ni Jehova.a

Timmured ti Dati a Mababain

Imbaga ti maysa pay nga estudiante ni Sirley a ni Dona Luzia, nga agtawen iti 68, a sakbay a nakasursuro nga agbasa ken agsurat, mababain idi a makisarita iti sabsabali. Marigatan pay a makitienda. “Ita, agsursuratakon kadagiti kakabagiak iti sabali nga ili, ket siak ti mangig-iggemen iti kuartak. Awanen ti mangkusit kaniak,” kunana a nakaisem. Malagip met ni Maria, nga 68 met ti tawenna, a mababain idi no ideppelna ti tanganna iti tseke a pensionna. “Mariknak idi a kasla baldadoak,” kunana. Ngem gapu iti klase ti panagbasa ken panagsurat, maragsakanen ni Maria a mangipirma iti naganna.

Gapu iti pammadayaw dagiti estudiante ken dagiti nagturpos, limmatak unay ti libre a programa ni Sirley isu nga umil-ileten ti salasna. Asidegen nga umakar ti klase iti nalawlawa a lugar.

Programa a Nakagun-od iti Pammadayaw

Maysa a Saksi ni Jehova ni Sirley. Awan duadua nga ammom ti ar-aramiden dagiti Saksi ni Jehova a boluntario a serbisio a panangisuro iti Biblia. Nupay kasta, saan laeng a ni Sirley ti nagballigi. Dagiti klase ti panagbasa ken panagsurat a maikonkondukta iti ginasut a Kingdom Hall iti intero a Brazil ket nakatulongen iti 22,000 a tattao iti dayta a pagilian tapno masursuroda ti agbasa ken agsurat.

Nagballigi dagiti umasping a programa dagiti Saksi ni Jehova iti dadduma a paset ti lubong. Iti Burundi a pagilian ti Africa, kas pagarigan, naay-ayo unay ti National Office for Adult Literacy (maysa a departamento iti Ministry of Education) iti resulta ti programa dagiti Saksi a mangisuro iti panagbasa ken panagsurat, isu a pinadayawanna ti uppat a maestro gapu iti “gagetda a nangisuro iti sabsabali nga agbasa.” Maragsakan unay dagiti opisial ti gobierno ta 75 a porsiento kadagidiay nakasursuro nga agbasa ken agsurat ket babbaket​—maysa a grupo a gagangay a mabain nga agatender kadagita a programa.

Idiay Mozambique, 4,000 ti nagpasalista kadagiti klase ti panagbasa ken panagsurat nga ikonkondukta dagiti Saksi, ket nasurok a 5,000 nga estudiante ti nakasursuron nga agbasa ken agsurat iti napalabas nga uppat a tawen. Kastoy ti insurat ti maysa a dati nga estudiante: “Kayatko nga iyebkas ti napasnek a panangapresiarko. Gapu iti eskuelaan, makabasa ken makasuratakon.”

“Praktikal ken Saan a Pammarang Laeng” a Panangsaranay

Ti panangsaranay ket sabali pay a kita ti boluntario a serbisio nga ar-aramiden dagiti Saksi ni Jehova. Iti nabiit pay, kumaribuso iti maysa a bodega iti asideg ti Paris, Francia. Agarup 400 a boluntario ti nangbusbos iti ngudo ti lawasda nga agikarton kadagiti taraon, kawes, ken agas. Idi naturposen ti ngudo ti lawas, nakasaganan a maipatulod ti siam a dadakkel a bagon (container) a napno iti suplay nga aggatad iti dandani $1 a milion (E.U.). Di nagbayag kalpasanna, simmangpeten ti naipatulod agpaay iti dinadael ti gubat a Central Africa, a sadiay dagiti suplay ket sipapartak nga inwaras dagiti boluntario a Saksi iti dayta a lugar. Kaaduan kadagiti suplay ket indonar met dagiti Saksi.

Indayaw ti maysa a periodiko idiay Congo (Kinshasa) ti trabaho dagiti Saksi ni Jehova a panangsaranay kadagiti marigrigat kas “praktikal ken saan a pammarang laeng.” Inyebkas met dagiti opisial ti United Nations High Commissioner for Refugees (UNHCR) ti panangsuportarda. Naragsakan unay ti maysa nga opisial ti UNHCR idiay Democratic Republic of Congo iti kinaurnos ti panangikagumaan dagiti Saksi a mangsaranay isu nga impausarna ti luganna kadagiti boluntario. Naragsakan met dagiti umili. Idi nadlaw dagiti agpalpaliiw a nakaparpartak ti pannakaidanon dagiti suplay kadagiti amin nga agkasapulan, masmasdaaw ti dadduma a nagimtuod: “Kasano ti panangyurnosyo tapno matulongan ti amin?”

Ti panangikagumaan dagiti Saksi ni Jehova a mangsaranay ken dagiti programada a panangisuro iti panagbasa ken panagsurat ket dua laeng kadagiti pagarigan ti serbisio nga ar-aramiden dagiti Saksi ni Jehova iti intero a lubong iti pinulpullo a tawenen. Nupay kasta, makipaspaset met dagiti Saksi iti maysa pay a klase ti panagboluntario​—maysa a serbisio a pudno a makaipaay iti manayon a gunggona. Daytoy ti amirisen ti sumaganad nga artikulo.

[Footnote]

[Kahon/Ladawan iti panid 6, 7]

Ti Agbalbaliw a Lubong ti Panagboluntario

Bayat nga agdaldaliasat ni Julie iti intero a lubong gapu iti negosiona, kabaelanna latta nga iyeskediul ti tiempona nga agboluntario iti sumagmamano nga oras iti nadumaduma a lugar, nupay okupado. Iti nabiit pay a kaaddana idiay Abagatan nga America, binusbosna ti maysa a malem a timmulong iti pagtaengan dagiti ulila iti asideg ti Santiago, Chile. Sigun kenkuana, ti panagbiahe ket mangipaay iti “adu a gundaway” tapno makapagboluntario.

Kas ken Julie, umad-adu a boluntario ti mangipapaay iti basbassit laengen a tiempo. “Kabarbaro dayta a pagannayasan,” kuna ni Sara Meléndez a presidente ti grupo a mangsuksukimat ken mangur-urnong iti rekord ti panagboluntario. “Agboluntario dagiti tattao, ngem no agboluntarioda, manmano ken sagpaminsan laengen wenno kadagiti nabiit laeng a proyekto.” Kas resultana, madanagan dagiti organisador gapu ta “bassit dagiti agboluntario,” ket ikagkagumaanda ti maaddaan kadagiti boluntario iti programada.

“Mannakibagay a Panagboluntario”

Patien ti dadduma nga organisador a daytoy baro a pagannayasan​—bumasbassit a tiempo ti panagboluntario​—ket maigapu iti panagbalbaliw ti kababalin dagiti boluntario. “Awanen ti boluntario a mangibaga iti ‘adtoyak no kasapulandak,’” kuna ni Susan Ellis, maysa a konsultant para iti grupo dagiti boluntario. “Saanen a makikumit dagiti tattao.” Umanamong ti periodista a ni Eileen Daspin. Kalpasan nga ininterbiuna ti sumagmamano a direktor ti grupo dagiti boluntario maipapan iti kinabassit ti bilang dagiti boluntario, imbagana nga “apektado ti panagboluntario gapu iti nakaro a panagamak ti tattao iti napaut a pannakikumit.”

Nupay kasta, marikna ni Kathleen Behrens a direktor ti New York Cares, a nadakamat itay iti daytoy a serye, a dagidiay agboluntario iti apagbiit laeng ket agboluntarioda, saan a gapu ta dida makikumit, no di ket kurang ti tiempoda. Saanen a makapagboluntario a kanayon dagiti tattao a mangbingbingay iti nasurok a 50-oras a panagtrabaho iti linawas ken panagaywan iti annakda wenno iti lallakay ken babbaketen a dadakkelda. “Ngem,” kunana a “ti kinapudno a pagbalinen pay laeng dagitoy nga okupado a tattao a paset ti biagda ti panagserbi iti komunidad ti pakakitaan a talaga a napasnekda iti pannakikumitda.”

Para kadagita a bassit ti tiempoda a boluntario, kuna ni Behrens, “mannakibagay a panagboluntario” ti solusion. Adu nga organisasion dagiti boluntario ti mangitukon pay itan iti maysa nga aldaw laeng a panagboluntario. “Daytoy ti mangipaay iti gundaway kadagiti tattao a makapagboluntario iti adu a pamay-an a makagunggona ngem kaskasdi a makibagayda iti oras a kayatda.”

Kasta met nga umad-adu ti tattao nga agbolboluntario nga agiserrek ken agsirarak iti impormasion iti computer-da iti pagtaengan. “Nalabit karkarna unay ti panagboluntario babaen ti panangusar iti computer,” kuna ti The Wall Street Journal, “ket sigun iti dadduma, daytat’ kababalligian iti maaw-awaganen a ‘mannakibagay a panagboluntario.’”

[Kahon/Dagiti ladawan iti panid 8]

Panangarayat Idiay Kobe!

Idi adda ginggined a napasaran iti dumurdur-as a siudad ti Kobe, Japan, idi Enero 1995, nakaro unay ti pannakadadael. Nasurok a 5,000 ti natay. Dayta ti ginggined idiay Japan a kaaduan ti pinatayna nanipud idi 1923. Dagus nga inyussuat dagiti Saksi ni Jehova idiay Japan ken iti intero a lubong ti panangsaranay kadagiti biktima. Idi naurnongen ti pondo, nasurok a sangamilion a doliar ti naidonar iti tallo nga aldaw ti trabaho. Nagdadarison ti amin a kita dagiti pangsaranay nga abasto idiay Kobe.

Natakuatan ti maysa a Kristiano a panglakayen a nakiraman iti panangsaranay nga apagbiit a napno ti Kingdom Hall-na iti abasto a sobra pay ngem iti kasapulanda. Ania ti naaramid kadagiti sobra nga abasto? Insingasingna nga idonarda ti dadduma a suplay iti asideg nga ospital. Pinunno dagiti Saksi ti maysa a lugan ket linasatda dagiti rebbek. Nagbiaheda iti adu nga oras imbes a ti gagangay a sumagmamano laeng a minuto. Idiay ospital, intukonda dagiti suplay iti mangtartarawidwid a doktor​—a pakairamanan dagiti ules, kutson, diaper, kappuros a prutas ken agas a magatang a din kasapulan ti reseta. Gapu ta naragsakan, imbaga ti doktor a maragsakan ti ospital nga umawat iti aniaman nga ited dagiti Saksi. Nangnangruna a naapresiar dagiti prutas, ta awan ti umdas a kappuros a prutas nga agpaay iti amin a pasiente.

Bayat nga agdisdiskarga dagiti Saksi kadagiti suplay, siuulimek nga agbuybuya ti doktor​—nupay naganat unay ti trabahona. Kalpasanna, sipapakumbaba a nagtamed ken nagyaman kadakuada. Idi pimmanawdan, nakatakder pay laeng sadiay a mangipakita iti kasta unay a panagyamanna. Napaliiw ti panglakayen a nakiraman iti panangsaranay a daytoy met la nga ospital ket nagbalin a mannakitinnulong unay kadagiti pasiente a Saksi ni Jehova idi agangay.

[Kahon/Dagiti ladawan iti panid 9]

Panagboluntario​—Makagunggona nga Aramid

Idi ti maysa a grupo dagiti boluntario idiay Kabezi, maysa a bassit a komunidad idiay Burundi, kayatda ti mangibangon iti Kingdom Hall dagiti Saksi ni Jehova, adda naisangsangayan a kiniddaw ti administrador iti dayta a lugar. Kiniddawna no mabalin a tarimaanen dagiti Saksi ti kalsada a lumasat iti kaapiring ti naiplano a pagibangonan. Siraragsak dagiti Saksi nga immanamong a tarimaanenda ti nadadael a kalsada, ket ima laeng ti inaramatda a nagtrabaho. Nagsayaat ti panagtrabaho dagiti boluntario ta uray la nga inapresiar dagiti opisial iti dayta a lugar ti kinagaget ken kinatulokda. Kalpasanna, imbangonen dagiti boluntario ti Kingdom Hall, a naretrato iti ngato. Addaanda itan iti napintas a patakder a makatulong a mangidur-as iti panangisuro iti Biblia iti adu a tawen iti masanguanan. Kinapudnona, makaipaay iti napaut a gunggona ti adu a kita ti panagboluntario.

[Dagiti ladawan iti panid 6, 7]

Maragsakan ni Sirley a mangisuro kadagiti sabsabali nga agbasa

[Credit Line]

Nelson P. Duarte-Jornal do Sudoeste