Panangmatmat iti Lubong
◼ Iti nasurok a 15 a bulan, 82 a kappasngay ti nasarakan a nabaybay-an kadagiti lansangan iti Mexico City, 27 kadagitoy ti natayen.—EL UNIVERSAL, MEXICO.
◼ Adda natakuatan a 27 a kabbaro a kita ti animal gapu iti panangadal kadagiti kueba iti dua a parke nasional idiay California, E.U.A. “Daytoy patalgedanna laeng a nagbassit ti ammotayo maipapan iti aglawlawtayo,” kuna ni Joel Despain, maysa nga espesialista iti kueba para iti National Park Service.—SMITHSONIAN, U.S.A.
◼ Duapulo a porsiento iti populasion ti lubong ti awanan iti nadalus a danum nga inumen. Uppat a pulo a porsiento ti awanan kadagiti kangrunaan nga aruaten para iti sanitasion.—MILENIO, MEXICO.
◼ Dagiti di legal a mangnganup papatayenda ti 20,000 agingga iti 30,000 nga animal iti tinawen idiay laeng Serengeti National Park.—THE DAILY NEWS, TANZANIA.
◼ Ipalgak dagiti panagadal a naaramid idiay Barcelona, Espania, a 1 iti kada 3 nga estudiante nga agtawen iti 16 ti kanayon nga agsigarilio iti cannabis.—LA VANGUARDIA, SPAIN.
Dagiti Bakteria iti Opisina
Dagiti mikrobiologo iti University of Arizona sinukimatda dagiti bakteria kadagiti opisina iti adu a siudad ti Estados Unidos. Natakuatanda a “ti lima a banag a kaaduan iti bakteria ket dagiti telepono, lamisaan, pagiggaman ti paginuman a gripo (water fountain), pagiggaman iti rikep ti microwave ken dagiti keyboard,” kuna ti diario a Globe and Mail. Sigun iti damag, “100 a daras nga ad-adu ti bakteria ti kadawyan a kompiuter ngem ti lamisaan iti kosina ken 400 a daras nga ad-adu ngem iti kadawyan nga inodoro.”
“Kristiano Laeng iti Sao”
Matuktukoy ti Pilipinas kas ti kakaisuna a “Kristiano” a nasion iti Asia. Nupay kasta, kinuna ni Obispo Efraim Tendero iti Philippine Council of Evangelical Churches: “Kaaduan kadatayo ti Kristiano laeng iti sao ngem saan iti aramid.” Kas kinuna ti Manila Bulletin, mabalin a mapabasol no maminsan dagiti papangulo ti relihion ta saanda nga “insursuro kadagiti tattao no ania dagiti pannursuro ti Biblia ken no kasano nga ipategda dagita.” Makuna a dadduma kadagiti sermon iti simbaan ad-adda nga itampokda ti politika imbes a ti Kasuratan.
Dagiti Tattao ken Animal Agiinnagawda iti Taraon
“Gagangayen dagiti damag maipapan kadagiti baboon ken hyena a mangraraut kadagiti natikag a komunidad iti Somalia,” kuna ti periodiko ti Nairobi a The East African. Maysa a panaginnagaw maipapan iti danum ti nakatayan ti sumagmamano a baboon ken nakasugatan ti dadduma nga agtartaraken. Naipadamag nga iti dayta a lugar agpuesto ti bunggoy dagiti bakes kadagiti “kangrunaan a nagsangalan ti kalsada wenno kadagiti rangtay” tapno rautenda dagiti trak nga agibiahe iti taraon kadagiti tiendaan. “Gagangayen ti pannakakita kadagiti animal a mangitartaray kadagiti sinapad a saba wenno [dadakkel] a sandia,” kuna pay ti periodiko.
Dagiti Barko Apektaranda ti Paniempo iti Igid ti Baybay
Ipadamag ti diario ti Alemania a Kölner Stadt-Anzeiger, a ti kaadu dagiti barko kadagiti masansan a pagdaliasatan a dandanum mabalin nga apektaranna ti paniempo iti igid ti baybay. Dagiti managsirarak iti Max Planck Institute for Meteorology, Hamburg, inusigda ti pannakabukel ti ulep iti English Channel. Natakuatanda nga immingpis dagiti ulep iti igid ti baybay, idinto a pimmuskol dagiti ulep iti ngatuen dagiti pagdaliasatan a danum. Dayta a kasasaad ket maigapu kadagiti asuk nga ipugso ti tambutso dagiti barko. Patienda a dagiti babassit nga uging nga ipugso dagiti barko ti pangrugian dagiti mabukel nga ulep, isu a mabibiit a mabukel dagiti tedted. “Iti napalabas a 50 a tawen,” kuna ti diario, “immadu iti uppat a daras ti gasolina nga inusar dagiti barko.”