“Dakkel a Tulong iti Medisina”

BABAEN ITI MANNURAT TI AGRIINGKAYO! IDIAY MEXICO

Agdindinamag dagiti Saksi ni Jehova iti intero a lubong gapu iti saanda a panagpayalison iti dara. Adda dagiti tattao a mangbabalaw iti dayta a naibatay iti Biblia a takderda. Ngem kas impadamag ti periodiko a Reforma idiay Mexico City, ni Dr. Ángel Herrera, mangimatmaton a siruhano iti National Institute of Oncology, kinunana: “Saan a maag dagiti Saksi. Saanda met a panatiko. . . . Dakkel ti naitulongda iti medisina yantangay gapu kadakuada, nakasursuro dagiti doktor no kasano ti agopera a maliklikan ti pannakasayang ti dara.”

Sangapulo ket lima a tawen ti napalabasen, nangorganisar ni Dr. Herrera iti maysa a grupo dagiti anestesiologo ken siruhano nga agopera a di agusar iti dara. Ni Dr. Isidro Martínez, maysa nga anestesiologo iti dayta a grupo, kinunana: “Ti umiso a pamay-an ti panagopera ket daydiay usarem ti amin a pamay-an tapno saan a masayang ti dara. Iti kasta, matulongantayo dagiti Saksi ni Jehova, kas panangraem iti narelihiosuan a takderda.”

Adda nasurok a 30 nga alternatibo ti panangyalison iti dara, impadamag ti Reforma idi Oktubre 2006. Ramanenna ti pananglanang kadagiti urat, panangbarabad kadagiti lalaem babaen iti espesial a gauze nga addaan iti kemikal a mangpasardeng iti panagdara, ken panangpaadu iti dara.a

Ni Dr. Moisés Calderón, mangimatmaton a siruhano iti puso iti La Raza General Hospital idiay Mexico City, gagangayen nga agop-opera a di agusar iti dara. Kinunana iti Reforma: “Adda peggad iti panangyalison iti dara. Mabalin a makayakar kadagiti virus, bakteria, wenno parasito. Mabalin met a pagsakitennaka a mangapektar iti panagandar ti bato ken bara.” Gapu kadagita a peggad, kinuna ni Dr. Calderón: “Ibilangmi a kasla Saksi ni Jehova ti amin a pasiente nga operaenmi. Ikagumaanmi a saan a nadara ti operasion agingga a mabalin, dalusanmi ti dara nga adda iti sugat, ken usarenmi dagiti agas a manglapped iti panagpadara ti pasiente.”

Inadaw ti pagiwarnak ti Aramid 15:28, 29, ti kangrunaan a teksto a nakaibatayan ti takder dagiti Saksi ni Jehova. Iti daytoy a teksto, imbilin dagiti apostol: “Ti nasantuan nga espiritu ken dakami inanamonganmi ti saanen a panangnayon pay iti dadagsen kadakayo, malaksid kadagitoy nasken a banag, nga itultuloyyo ti umadayo iti bambanag a naisakripisio kadagiti idolo ken iti dara ken iti bambanag a nabekkel ken iti pannakiabig.”

Ti Hospital Information Desk iti sanga nga opisina dagiti Saksi ni Jehova idiay Mexico impadamagna nga adda 75 a Hospital Liaison Committee iti dayta a pagilian ken 950 a boluntario a bumisbisita kadagiti doktor tapno mangidatag kadagiti impormasion maipapan kadagiti alternatibo iti dara. Agarup 2,000 a doktor idiay Mexico ti situtulok a mangagas a di agusar iti dara kadagiti Saksi ni Jehova. Apresiaren unay dagiti Saksi ti pannakikooperar dagitoy a doktor, a nagbalin met nga ad-adda a nasigo a tumulong kadagiti saan a Saksi a pasiente.

[Footnote]

[Ladawan iti panid 30]

Ni Dr. Ángel Herrera

[Ladawan iti panid 30]

Ni Dr. Isidro Martínez

[Ladawan iti panid 30]

Ni Dr. Moisés Calderón