Tabaky—Pagpapintas a Naggapu iti Kayo

◼ Iti natikag a paset ti abagatan a laud ti Madagascar, agbirok dagiti babbai kadagiti shell iti igid ti baybay nga ilakoda kadagiti turista. Naikkan ti rupada iti puraw a paste a maawagan iti tabàky. Daytoy adu ti usarna a tabàky saanna laeng a salakniban ti kudil manipud iti nakaro nga init no di ket agserbi pay a pagpapintas.

Ti tabàky ket naaramid manipud iti tutot dagiti kayo a masonjoany ken fihamy (maawagan met iti aviavy). Simple laeng ti proseso: Mairadrad ti bassit a tutot iti daplat a bato, sa manayonan iti bassit a danum agingga a pumalet. Maideppel iti dayta ti nagtimbukel wenno nalamuyot a murdong ti bassit a kayo wenno plastik nga istik sa usaren dayta ti maysa a babai a mangaramid iti disenio iti rupana.

Dadduma a babbai ti mangikabil iti tabàky iti intero a rupada, malaksid iti matada. Adda met dagidiay mangsapsapo laeng iti muging, pingping, wenno timidda. Mausar met ti tabàky a mangabbong iti piglat, pekas, wenno mangkontrol iti nalanit a kudil, wenno mausar a pagpapintas. No dadduma, malaokan dayta iti sabali pay a substansia tapno makapataud iti nadumaduma a disenio, kolor, ken kita.

Asino ti mangipagarup nga adda pagpapintas a naggapu iti kayo? Ti Madagascar, nga adayo kadagiti sentro ti pagpapintas idiay Paris ken New York, ket addaan iti tabàky a naisangsangayan ngem saan a nangina a pagpapintas.