Ti Sungo ti Elepante

● Dagiti managsirarak ket mangar-aramid iti takiag a robot a nalaplap-it ken al-alisto nga aggunay. Sigun iti manedyer ti seksion ti panagdisenio iti kompania a mangar-aramid kadagiti kasta nga alikamen, ti kabbaro a takiag ket “adayo a nasaysayaat ngem iti aniaman a produkto ti industrial automation.” Nangtuladanda iti dayta? “Ti sungo ti elepante,” kinunana.

Usigem: Ag-140 a kilo ti kadagsen ti sungo ti elepante ken naawagan kas ti “kaaduan ti maitulong ken maaramidan a paset ti bagi ditoy daga.” Mabalin dayta nga agserbi kas agong, pagsusop, takiag, wenno ima. Babaen iti dayta, ti elepante ket makaanges, makaangot, makainum, makaiggem, wenno makapataud iti makatitileng nga uni!

Ngem saan la a dayta. Ti sungo ti elepante ket addaan iti agarup 40,000 a linabag ti masel isu a maigarawna dayta iti aniaman a direksion. No usarenna ti murdong ti sungona, mapidutna ti bassit a sensilio. Mabalinna met a pagbagkat kadagiti banag nga agdagsen iti uray agingga iti 270 a kilo!

Namnamaen dagiti managsirarak a matuladda ti estruktura ken maaramidan ti sungo ti elepante. Iti kasta, makaaramidda kadagiti nasaysayaat a robot a mausar iti balay ken industria. Kuna ti pannakabagi ti kompania a nadakamaten: ‘Nakaaramidkamin iti baro a makina a naiduma kadagiti ordinario a robot. Dayta ti damo a gundaway a sitatalged ken siaannayas a makapagtrabaho a sangsangkamaysa dagiti makina ken tattao.’

Ania ti makunam? Timmaud kadi ti sungo ti elepante babaen ti ebolusion? Wenno nadisenio dayta?