DAMDAMAG ITI LUBONG

Lubong

“Tinawen a dandani 3 a milion a maladaga ti matay iti umuna a bulan ti biagda, a kaaduan kadagiti makagapu ket mabalin koma a malapdan. Nasurok a 1/3 kadakuada ti matay iti umuna pay la nga aldaw ti biagda.”​—⁠Save the Children International.

Britain

Sigun iti Public Health England, immadu dagiti natay gapu iti polusion iti angin iti 15 a distrito iti London idi 2011. Nakaskasdaaw ta ti krudo ket maibagbaga a saan unay a makadangran iti aglawlaw gapu ta nain-inut ken basbassit ti iruarna a carbon dioxide. Ngem 91% iti polusion ti angin iti dayta a lugar ket aggapu kadagiti lugan nga agus-usar iti krudo.

Russia

Sigun iti surbey ti Public Opinion Foundation iti Russia idi 2013, imbaga ti agarup 52% kadagiti Russian a miembro iti Orthodox Christian a dida pay pulos nakabasa iti uray maysa la a paset ti Biblia. Kinuna met ti 28% a manmanoda nga agkararag.

Africa

Sigun iti report ti World Bank, nabuntog ti irarang-ay ti agrikultura ken kumarkaro ti kinapanglaw gapu ta di masinunuo no siasino ti makinkua iti matalon a daga. Iti Africa ti ayan ti 50% kadagiti mamulaan koma a daga iti lubong a saan pay a mataltalon​—⁠agarup 202 a milion nga ektaria. Kadagiti amin a mabalin koma a mausar iti agrikultura, 25% laeng sadiay ti mataltalon.

United States

Iti adu nga eskuelaan ken unibersidad, dagiti libro ket masuksukatanen kadagiti electronic tablet a naglaon kadagiti software, apps, dadduma pay nga impormasion a masapul a basaen ken adalen dagiti estudiante. Ngem makueskuestionaran no dakdakkel met laeng a kuarta ti maekonomia iti dayta.