TRADISION
Impormasion, doktrina, wenno kaugalian nga inyallatiw dagiti nagannak kadagiti annakda, wenno naipasdeken a wagas ti panagpampanunot wenno panagtigtignay. Ti Griego a sao a pa·raʹdo·sis literal a kaipapananna ti “maysa a banag a naited kas kanayonan” ket ngarud “daydiay nayallatiw babaen iti sao ti ngiwat wenno iti panagsurat.” (1Co 11:2, Int) Sigun ti pannakausarna iti Kristiano a Griego a Kasuratan, daytoy a sao ket tumukoy kadagiti tradision nga umiso wenno maakseptar nga aspeto ti pudno a panagdaydayaw, kasta met kadagiti tradision a di umiso wenno kadagidiay nasurot wenno naibilang a makadangran ken di maanamongan.
Iti panaglabas ti adu a siglo, naaddaan dagiti Judio iti adu a tradision. Karaman ditoy dagiti wagas ti panagkawkawes ken panangaramid iti bambanag kas kadagiti kasar ken pumpon. (Jn 2:1, 2; 19:40) Kasta met, ti sumagmamano nga aspeto ti panagdaydayaw dagiti Judio idi umuna a siglo K.P. ket naibatay iti kaugalian wenno iti tradision, kas iti panagusar iti arak iti pannangan iti Paskua ken iti panangrambak iti pannakaidedikar manen ti templo. (Lu 22:14-18; Jn 10:22) Saan a sinupiat ni Jesus ken dagiti apostolna ti kasta, nupay ammoda a saan a kalikaguman ti Linteg dagita a banag. Idi nagbalin ti sinagoga kas gagangay a lugar a pagdaydayawan dagiti Judio, nagbalin met a kaugalian wenno tradision ti panagdaydayaw sadiay iti tunggal Sabbath. Kuna ni Lucas a timmabuno met ni Jesus, “sigun iti kaugalianna.”—Lu 4:16.
Dagiti Di Naanamongan a Tradision. Nupay kasta, adu a berbal a tradision ti innayon dagiti Judio a panguluen ti relihion iti naisurat a Sao, ket imbilangda dagitoy a nagpateg iti pudno a panagdaydayaw. Idi a ni Pablo (Saulo) ket maysa a Fariseo ken saan pay a nagbalin a Kristiano, nakaregregta iti panangalagadna kadagiti tradision ti Judaismo. Siempre, karaman ditoy dagidiay maakseptar ken dagidiay di umiso a tradision. Ngem gapu iti panangsurotna iti “bilbilin dagiti tattao kas doktrina,” nagbalin a manangidadanes kadagiti Kristiano. (Mt 15:9) Kas pagarigan, “saanda a mangan malaksid no bugguanda dagiti imada agingga iti siko, a salsalimetmetanda a sititibker ti tradision dagiti tattao kadagidi immun-una a tiempo.” (Mr 7:3) Kadagidiay a tattao, daytoy a kaugalian ket saan a maipaay iti kinadalus, no di ket ritual a seremonia nga addaan kampay idi iti narelihiosuan a kinapateg. (Kitaenyo ti PANANGBUGGO ITI IM-IMA.) Impakita ni Kristo nga awan ti pangibatayanda a mangbabalaw kadagiti adalanna iti saanda a panangsurot iti dayta ken iti dadduma pay a saan a napateg a “bilbilin dagiti tattao.” (Mt 15:1, 2, 7-11; Mr 7:4-8; Isa 29:13) Kanayonanna pay, babaen iti tradisionda mainaig iti “korban,” (maysa a sagut a naidedikar iti Dios) pinagbalin dagiti panguluen ti relihion nga awan kapapay-an ti Sao ti Dios ken sinalungasingda ti bilin ti Dios.—Ex 20:12; 21:17; Mt 15:3-6; Mr 7:9-15; kitaenyo ti KORBAN.
Saan a pulos nagadaw ni Jesus wenno dagiti adalanna manipud iti berbal a tradision dagiti Judio tapno patalgedanda dagiti sursuroda no di ket nagbasarda iti naisurat a Sao ti Dios. (Mt 4:4-10; Ro 15:4; 2Ti 3:15-17) Idi naipasdeken ti kongregasion Kristiano, ti panangalagad kadagiti di nainkasuratan a Judio a tradision ket nagbalin nga ‘awanan bunga a kita ti panagbibiag’ nga ‘inawat dagiti Judio a tattao babaen iti tradision manipud kadagidi ammada [Gr., pa·tro·pa·ra·doʹtou, “nayawat manipud kadagiti amma”].’ (1Pe 1:18) Idi nagbalin a Kristiano dagidiay a Judio, tinallikudanda ti kakasta a tradision. Idi a ti sumagmamano nga ulbod a mannursuro idiay Colosas indagadagda kadagiti dadduma nga alagadenda ti kasta a porma ti panagdaydayaw, namakdaar ni Pablo maibusor iti “pilosopia ken ubbaw a panangallilaw maitunos iti tradision dagiti tattao.” Nabatad a dagiti tradision ti Judaismo ti kangrunaanna a tuktukoyenna.—Col 2:8, 13-17.
Dagiti Nakristianuan a Tradision. No ti tradision ibilang kas pagannurotan a nayallawat iti berbal a pamay-an wenno babaen iti ulidan, ngarud ti impormasion a direkta nga inawat ni apostol Pablo manipud ken Jesus mabalin a maikanatad a mayallatiw kadagiti kongregasion Kristiano kas maakseptar a Nakristianuan a tradision. Ti maysa a pagarigan iti daytoy isu ti panangrambak iti Pangrabii ti Apo. (1Co 11:2, 23) Dagiti sursuro ken ulidan dagiti apostol ket maibilang a maikanatad a tradision. Gapuna, yantangay nagbannog a mismo ni Pablo babaen iti im-imana tapno saan nga agbalin a dadagsen kadagiti kakabsatna no iti pinansial (Ara 18:3; 20:34; 1Co 9:15; 1Te 2:9), mabalinanna nga idagadag kadagiti Kristiano a taga Tesalonica nga ‘adaywanda ti tunggal kabsat a magmagna a nakagulgulo ken saan a maitunos iti tradision [pa·raʹdo·sin]’ nga inawatda. Daydiay saanna a kayat ti agtrabaho ket nabatad a saanna a sursuroten ti nasayaat nga ulidan wenno tradision dagiti apostol.—2Te 3:6-11.
Idi agangay, dagiti “tradision” a nasken maipaay iti nadalus ken di natulawan a panagdaydayaw iti Dios ket naitipon iti naipaltiing a Kasuratan. Gapuna, dagiti tradision wenno paglintegan nga inyallatiw ni Jesus ken dagiti apostol a napateg iti pananggun-od iti biag ket saan a napagtalinaed iti berbal a kasasaadda tapno saan a maballikug iti panaglabas ti tiempo. Imbes ketdi, siuumiso a nailanad iti Biblia agpaay a pakagunggonaan dagiti Kristiano nga agbibiag kadagiti maud-udi a tiempo.—Jn 20:30, 31; Apo 22:18.