Ti Panagtitinnulong Mangparang-ay iti Espiritualidad
KADAGIDIAY mayat a maaddaan iti pamilia a narang-ay ti espiritualidadna, napateg ti panagtitinnulong. Idi pinarsua ni Jehova ti immuna a pagassawaan, impaganetgetna ti kinapateg ti panagtitinnulong. Ni Eva ket makipagtrabaho ken Adan kas “komplimentona.” (Gen. 2:18) Ti panagasawa ket rumbeng a panagkadua, kayatna a sawen, agtinnulong ti lalaki ken babai. (Ecl. 4:9-12) Ti panangtungpal iti akem nga inted ni Jehova kadagiti nagannak ken annak ket agkasapulan met iti panagtitinnulong.
Panagdaydayaw ti Pamilia
Lima ti annak da Barry ken Heidi. Napaneknekanda a makatulong iti irarang-ayda ti regular a sangapamiliaan a panagadalda iti Biblia. Inlawlawag ni Barry: “Iti sangapamiliaan a panagadalmi, sagpaminsan nga ikkak dagiti annakko iti asaynmentda. Mabalin a kiddawek a mangisaganada iti komento manipud kadagiti artikulo iti Agriingkayo! Praktisenmi met ti ibagami iti tay-ak tapno nakasagana ti tunggal anakko inton mangasaba.” Innayon ni Heidi: “Addaankam amin iti listaan dagiti naespirituan a kalat a kayatmi a maragpat ken kadarato a repasuenmi dagita bayat ti sangapamiliaan a panagadalmi tapno makita ti nagrang-ayanmi.” Napaneknekan met dagitoy nga agassawa a kadagiti inkeddengda a rabii iti kada lawas a dida agbuya iti TV, adda gundawayda amin nga agbasa a siuulimek.
Dagiti Gimong ti Kongregasion
Uppat nga annak ti pinadakkel da Mike ken Denise. Kasano a nagunggonaan ti pamiliada gapu iti panagtitinnulongda? Kinuna ni Mike: “No dadduma, nupay nagsayaat ti planomi, adda latta pakataktakanmi. Ngem nakitami a no agtitinnulongkami, saankami a maladaw kadagiti gimong.” Inlawlawag ni Denise: “Idi dumakdakkel dagiti annakmi, adda naituding nga aramiden ti tunggal maysa kadakuada. Ti balasangmi a ni Kim ti tumulong idi nga agluto ken agidasar.” Malagip ti baroda a ni Michael: “Adda gimong a maangay iti balaymi iti rabii ti Martes. Isu a dalusanmi ti salas, ken urnosenmi dagiti tugaw.” Kinuna met ti sabali pay a baroda a ni Matthew: “No adda gimong, sapsapaen ni Tatang ti agawid manipud iti pagtrabahuanna tapno maidauluannakami nga agsagana a makigimong.” Ania dagiti resultana?
Makagunggona ti Panagreggetda
Insalaysay ni Mike: “Idi 1987, nagpayunirkami ken Denise. Iti dayta a tiempo, adda pay laeng iti podermi ti tallo kadagiti annakmi. Dua kadakuada ti nagpayunir met ket nagtrabaho ti dadduma kadagiti proyekto a panagbangon iti Bethel. Naragragsak manen ti pamiliami ta natulonganmi ti 40 a tattao agingga a nagdedikar ken nagpabautisarda. Naaddaankami met a sangapamiliaan iti pribilehio a makipagbangon kadagiti pasdek nga agpaay ken Jehova, uray kadagiti sabali a pagilian.”
Talaga a makagunggona ti panagtitinnulong kas maysa a pamilia. Adda kadi mapanunotyo a sabali pay a pamay-an a makapagtitinnulongkayo a sangapamiliaan? Masiertoyo a no agtitinnulongkayo a sangapamiliaan, ad-adda a rumang-ay ti espiritualidad ti pamiliayo.
[Ladawan iti panid 28]
Ti panagpraktis parang-ayenna ti abilidadtayo iti ministerio