Natakuatan a Nailemmeng a Gameng
ADDA kadi natakuatamon a gameng iti dimo ninamnama a lugar? Idi Marso 27, 2005, adda kasta a natakuatan ni Ivo Laud, maysa a Saksi ni Jehova idiay Estonia. Tultulonganna idi ni Alma Vardja, maysa a kapammatian a baket, a mangrakrak iti maysa a daan a paglinongan. Bayat a liklikkabenda ti makinruar a diding, nakitada nga adda tabla iti maysa a sikigan ti adigi. Idi inikkatda ti tabla, nakitada a nakungkongan ti adigi iti agarup 10 a sentimetro ti kaakabana, 1.2 a metro ti kaatiddogna, ken 10 a sentimetro ti kaunegna. (1) Maysa a pagidulinan iti gameng! Ania dagita a gameng? Asino ti nangilemmeng kadagita?
Naglaon dayta a pagidulinan iti sumagmamano a pakete a nabungon a naimbag iti adu a papel. (2) Naglaon dagita a pakete kadagiti literatura dagiti Saksi ni Jehova, a kaaduanna ket maadal nga artikulo ti Pagwanawanan, a dadduma ti napetsaan manipud 1947. (3) Siaannad a naisuratda iti Estonia a lenguahe. Dadduma kadagita a pakete ti naglaon kadagiti pamalatpatan no asino ti nangidulin kadagita a material. Rekord dagita ti pannakapalutpot idi ti asawa ni Alma a ni Villem Vardja. Karaman met kadagita ti impormasion maipapan kadagiti tawtawen a binusbosna iti pagbaludan. Apay a naibalud?
Addaan idi ni Villem Vardja kadagiti annongen iti Tartu a Kongregasion ken idi agangay iti Otepää a Kongregasion idiay Estonia, maysa kadagiti kameng ti dati a Soviet Socialist Republics. Agparang a naammuanna ti kinapudno iti Biblia sakbay ti Gubat Sangalubongan II. Sumagmamano a tawen kalpasanna, idi Disiembre 24, 1948, ti Komunista a rehimen inarestona ni Kabsat Vardja maibatay kadagiti aktibidadna kas Saksi. Pinalutpot ken minaltrato dagiti polis tapno pilitenda nga inagananna dagiti kapammatianna. Gapu ta saan a naikkan iti gundaway a mangidepensa iti bagina iti korte, nasentensiaan a maibalud iti sangapulo a tawen kadagiti kampo iti Russia.
Nagtalinaed ni Villem Vardja a matalek ken Jehova agingga iti ipapatayna idi Marso 6, 1990. Saan nga ammo ni baketna ti maipapan kadagita a literatura. Nalabit a kayatna a salakniban ni baketna no kas pagarigan ta palutpotenda. Apay nga inlemmengna dagita a literatura? Gapu ta ti Soviet State Security Committee, ti KGB, masansan a di mapakpakadaan a rekisaenda ti pagtaengan dagiti Saksi ni Jehova tapno agbirokda kadagiti narelihiosuan a publikasion. Mabalin nga inlemmeng ni Kabsat Vardja dagita a literatura tapno masiguradona nga adda naespirituan a taraon nga usaren dagiti kapammatianna no bilang ta kompiskaren ti KGB ti amin a literaturada. Adda dadduma pay a pagidulinan iti literatura a nasarakan sakbay dayta, idi kalgaw ti 1990. Maysa ti natakuatan idiay Tartu, iti abagatan nga Estonia. Indulin met laeng dayta ni Villem Vardja.
Apay nga ibilangtayo a gameng dagita a dokumento? Dagitoy a nagrigrigatanda a sinakar ken siaannad a naidulin a kopia ket nalawag a pammaneknek iti panangipateg dagiti Saksi kadagiti naespirituan a taraon kadagidi a tiempo. (Mat. 24:45) Ipatpategmo met laeng kadi dagiti naespirituan a taraon a magunggun-odam ita? Karaman kadagita Ti Pagwanawanan iti Estonia a lenguahe ken iti nasurok a 170 a dadduma pay a lenguahe.