Ti “Naimbag a Damag” Naikasaba Kadagiti Kaamiananan nga Isla ti Australia

“DAYTOY naimbag a damag ti pagarian maikaskasabanto iti intero a mapagnaedan a daga,” kinuna ni Jesus. (Mateo 24:14) Tungtungpalen dagiti Saksi ni Jehova dayta a bilin ni Jesus ken ikagkagumaanda nga idanon ti mensahe ti Biblia kadagiti tattao, sadinoman ti pagnanaedanda. (Mateo 28:19, 20) Boluntario a maar-aramid dayta a trabaho, uray kadagiti lugar a kasapulan ti dakkel a sakripisio ken gastos iti biang dagiti boluntario.

Kas pagarigan, da Nathan ken Carly, pinasimpleda ti biagda tapno makasabaanda dagiti tattao iti adayo a Torres Strait Islands. Idi 2003, maysa a pannakabagi ti sanga nga opisina dagiti Saksi ni Jehova idiay Australia ti nangawis kadakuada nga umakar idiay Thursday Island tapno makitinnulongda iti lokal a kongregasion. Maysa laeng dayta kadagiti arig berde a saniata iti asul a Pacifico iti nagbaetan ti Australia ken New Guinea.

Idi 2007, gimmatang ti pamilia iti daan a bapor a naaramid iti kayo ken nairanta a pagala iti perlas. Naawagan dayta iti Teisan-Y. Iti bukodda a gastos, pinabaroda ti bapor ket rinugianda ti aglayag tapno mangasaba kadagiti umili iti sangapulo kadagiti kaadaywan nga isla manipud kosta ti Australia. Ti Thursday Island ti isla a pagawidanda. Kadagiti sumaganad a parapo, nailanad ti linaon ti “Rekord ti Kapitan” maipapan iti dadduma a panagdaliasatda.

Enero 2008: Ita nga aldaw, nagbilogak a nagturong idiay Bamaga​—a 80 a kilometro ti kaadayona a mapan ken agsubli​—tapno dagasek ti innem a Saksi iti dayta a lugar. Nakalugankamin iti Teisan-Y ket aglaylayagkamin a mapan kadagiti isla ti Warraber ken Poruma. Napno dagiti tangkemi nga aglaon iti 5,500 a litro ti langis nga aggatad iti 2 a doliar ti maysa a litro. Nabuntog ti bapor ta agpromedio laeng iti 10 a kilometro iti kada oras ti tarayna. Ngem nagsayaat ti paniempo ken nalinak ti baybay.

Idi asidegkamin iti takdang ti Warraber, imbabami ti angkla ti bapor. Naglugan iti bilog ti sumagmamano kadagiti kaduami nga adda kabagianda iti isla, ket nakisaoda iti konsehal ti isla tapno agkiddawda iti pammalubos a mangasaba. Ti konsehal ket maysa a pastor ti lokal a relihion ngem impalubosna a makasaritami dagiti agindeg. Kasta met laeng ti inaramidmi idiay Poruma ket napalubosankami met a mangasaba. Nainggayyeman dagiti umili ken magagaranda a mangbasa kadagiti literatura. Nakairugikami iti adu a panagadal iti Biblia.

Abril 2008: Implanomi ti aglayag a mapan iti Dauan, Saibai, ken Boigu​—ti tallo kadagiti kaadaywan nga isla​—iti asideg ti beddeng ti Papua New Guinea (PNG). Dimmawel ti paniempo, isu a nagkamangkami idiay Mabuiag Island. Pitopulo a kilometro laeng ti kaadayo dayta iti pagaw-awidanmi a Thursday Island, ngem 140 a kilometro ti dinaliasatmi idi a nagsikkosikkokami a nangliklik iti adu a baknad.

Inyanud ti dakkel a dalluyon ti bilog manipud iti Teisan-Y. Uray nakangatngato dagiti dalluyon, immaniobrami ti bapor tapno maalami ti bilog. Naulaw ti kaaduan a pasahero.

Idiay Mabuiag, pinalubosandakami a mangasaba iti isla, ken sibabara a pinasangbaydakami dagiti pumurok nga uray la a nayaw-awanmi ti pannakaulawmi. Maysa a babai ti kasta unay ti ragsakna a nakangngeg iti mensahe ket immawat iti ekstra a literatura tapno makai-displey iti pagtartrabahuanna a libraria.

Mayo agingga iti Oktubre 2008: Gapu iti kasasaad ti panawen, saankami a nakapan kadagiti isla. Binusbosmi ti tiempo a nangasaba, nangged, ken nangmantener iti bapor.

Dakkel a trabaho ti panangmantener iti bapor, isu a naglayagkami a napan iti sangladan ti Weipa ket ginuyodmi ti bapor iti takdang sa inluganmi iti treyler. Saan a kaskarina nga aramiden dayta! Nagboluntario dagiti lumugar a Saksi tapno tulongandakami iti trabaho a kas iti panagpintor, panagkarpintero, ken panangestimar kadagiti tubo. Nangyeg iti taraon ti dadduma kadakuada. Adda met dagiti nangipaay iti sumagmamano a suplay para iti sumaganad a biahemi a mapan mangasaba. Di magatadan ti kinamanagpadagus ken tulongda.

Disiembre 2008: Nagsaganakami manen nga aglayag a mapan idiay Dauan, Saibai, ken Boigu. Babaen ti radar, naliklikanmi dagiti bagyo, ken babaen ti tulong ti chart plotter, naliklikanmi dagiti baknad. Dose oras ti panaglayagmi agingga iti Dauan, ngem dayta ti kapintasan pay laeng nga isla a nakitami. Naabbungotan iti ulep dagiti nangangato a turod a batbato. Sigagagar a dimngeg kadakami dagiti umili ti Dauan, ket inyurnosmi nga iyadalan ida iti Biblia babaen ti telepono apaman a makaawidkami.

Maysa nga agindeg nga agnagan Lettie ti nakagun-od kadagiti magasin ket nangipatulod kadagiti kupon nga agkidkiddaw iti ad-adu pay a literatura. Ti sanga nga opisina ti Australia pinatulodanda ni Lettie kadagiti kiddawna ken nakaawat ti kongregasionmi iti surat a naggapu iti opisina a mangkidkiddaw a no posible, sapulenmi ni Lettie. Idi agangay, nabirokanmi ni Lettie ket maragsakankami iti bassit a naitulongmi kenkuana a mangpennek kadagiti naespirituan a kasapulanna.

Iti isla ti Saibai, imparit ti konsehal a mangasabakami kadagiti agindeg iti isla. Ngem pinalubosanna dagiti tripulantemi a mangbisita ken makisarita kadagiti kakabagianda iti isla. Adda kontratak iti gobierno nga agpintor iti balbalay idiay Saibai. Dayta ti nakatulong a mangsulnit kadagiti paggastuanmi.

Maysa a kabsat a babai nga agnagan Tassie ti umili iti maysa a purok iti PNG, nga agarup uppat a kilometro laeng ti kaadayona manipud Saibai. Kas sagudayen ti katulagan iti gobierno ti Australia, amin a taga PNG ket mabalinda ti mapan agnegosio iti Saibai. Adu ti kailian ni Tassie a nakasaritana idiay Saibai ken nagkurang ti literatura nga awitna para kadakuada amin. Sipud idi nagbalin a Saksi ni Jehova ni Tassie, daytoy pay laeng ti damo a gundaway a nakasaritana dagiti kailianna. Nagsublikami iti bapor ket nangipankami iti sangakarton a literatura para ken Tassie, a kaaduan ket iti pagsasao a PNG Pidgin a pagaammo kas Tok Pisin. Inlawlawag ni Tassie ti mensahe ti Biblia iti grupo a buklen ti nasurok a 30 katao, ket naipaima amin kadagiti interesado ti sangakarton a literatura. Madanon laeng ti pagnanaedanda a purok babaen ti bapor ken nalabit di pay pulos nadanon dagiti Saksi ni Jehova.

Saan a nalaka ti mapan iti maudi nga isla, ti Boigu. Uppat a kilometro ti kaadayomi iti takdang ngem dua ket kagudua laeng a metro ti kaadalem ti danum. Nakurang la a maysa a metron ti distansia ti tukok ti baybay ken ti sirok ti bapor. Kaduak ti maysa a tripulante a nanglawlaw iti lugar babaen ti bilog tapno agsapul iti pagsangladan. Nagpigsa ti tudo ket nadaripespeskamin! Adda met la nasapulanmi a pagsangladan kalpasan ti dua nga oras.

Idi nakagtengkami iti isla, kuna dagiti masmasdaaw nga agindeg iti isla a kamali ti chart plotter nga awitmi ken awan pay uray coast guard wenno navy a nakastrek iti isla. Saan nga impalubos ti konsehal a mangasabakami ngem impalubosna kadagiti tripulante a bumisita ken mangasabada kadagiti kabagianda iti isla. Rinaemmi ti pagayatan ti konsehal isu a kakabagian laeng ti binisitami. Maysa a lalaki ti immawat iti libro nga Ania a Talaga ti Isursuro ti Biblia?,a ket binasana a dagus ken insuratna dagiti saludsodna iti likud ti Bibliana. Idi agangay, nakasabaan manen dayta a lalaki idi simmarungkar iti Thursday Island.

Enero 2009: Nagsublikami kadagiti isla ti Moa ken Mabuiag tapno sarungkaranmi dagidiay naginteres iti mensahe ti Biblia. Sibabara a pinasangbaydakami iti dayta a dua nga isla. Adu kadagiti pumurok iti St. Paul idiay Moa ti nangibaga kadakami nga agsublikami koma a dagus. Kinuna ti konsehal a nawayakami a mapan mangasaba sadiay aniaman nga oras a kayatmi.

Adda 17 nga isla ti Torres Strait. Dimi ammo no kaanonto a makasaritami amin nga agindeg kadagita nga isla. Ngem aminkami iti kongregasion kadagiti kaamiananan nga isla ti Australia ket maragsakan a mangaramid iti aniaman a kabaelanmi a mangidayaw ken Jehova, ti Naindaklan a Namarsua kadatayo.

[Footnote]

[Mapa iti panid 23]

(Para iti aktual a pannakaurnosna, kitaem ti publikasion)

AUSTRALIA

Weipa

Bamaga

TORRES STRAIT ISLANDS

PAPUA NEW GUINEA

[Credit Line]

Naibasar iti NASA/Visible Earth Imagery

[Mapa iti panid 24, 25]

Bamaga

Thursday Island

Moa Island

Warraber Island

Poruma Island

Mabuiag Island

Saibai Island

Dauan Island

Boigu Island

PAPUA NEW GUINEA

[Credit Line]

Naibasar iti NASA/Visible Earth Imagery

[Ladawan iti panid 24]

Isasangladmi iti Thursday Island

[Ladawan iti panid 24]

Pannagnami a bumisita kadagiti taga Saibai Island

[Ladawan iti panid 25]

Panangiranud iti naimbag a damag iti lenguahe a Tok Pisin