Apay a ti Dumdumngeg iti Kararag Ipalubosna ti Panagsagaba?
NUPAY agkararag ti dadduma, agduaduada no talaga nga adda Dios. Apay? Nalabit gapu ta makitkitada a nakaro ti panagsagaba ditoy lubong. Naisaludsodmo kadin no apay nga ipalubos ti Dios ti panagsagaba?
Talaga kadi a ti Dios pinarsuanatayo nga imperpekto ken maikari nga agsagaba? Marigatantay la ketdi a mangraem iti dios a panggepna a pagsagabaen ti tao. Ngem usigem daytoy: Magusgustuam ti maysa a napintas a baro a kotse ngem nakitam a kuppit ti bangir a sikiganna, pagarupem kadi a kasta ti disenio ti nangaramid iti dayta? Siempre saan! Ibagam a “nagsayaat” ti pannakaaramidna ngem adda nangdadael wenno nakaigapuan ti pannakadadaelna.
Kasta met, no apresiarentayo ti urnos ken disenio ti nakaparsuaan ngem makitatayo met ti riribuk ken kinadakes a mangparparigat kadagiti tattao, ania ngata ti konklusiontayo? Isursuro ti Biblia a pinarsua ti Dios a perpekto ti umuna a pagassawaan ngem dinadaelda ti bagbagida. (Deuteronomio 32:4, 5) Naimbag laengen ta inkari ti Dios a tarimaanen ti nadadael ken isublina iti kinaperpekto dagiti natulnog a tattao. Ngem apay a nakapapaut a naguray?
Apay a Nakapapaut?
Ngamin, nainaig dayta iti saludsod nga asino ti rumbeng a mangituray iti sangatauan. Saan a pulos a panggep ni Jehova nga iturayan dagiti tattao ti bagbagida. Isu ti Agturay kadakuada. Kuna a mismo ti Biblia: “Saan a kukua ti tao a magmagna uray ti panangiturong iti addangna.” (Jeremias 10:23) Nakalkaldaang ta saanda a nagpaituray iti Dios. Nagbalinda a managbasol gapu iti kinasukirda. (1 Juan 3:4) Gapuna, napukawda ti kinaperpektoda ket dinadaelda ti bagbagida ken dagiti annakda.
Iti rinibu a tawenen, impalubos ni Jehova nga iturayan dagiti tattao ti bagbagida, ngem ipakita ti pakasaritaan a dida kabaelan nga iturayan ti bagida. Nalawag nga amin a gobierno ti tao ti nakaigapuan ti panagsagaba. Awan uray maysa a nakapasardeng iti gubat, krimen, sakit, wenno kinaawan hustisia.
No Kasano a Retubaren ti Dios ti Nadadael
Ikari ti Biblia nga asidegen nga iyeg ti Dios ti nalinteg a baro a lubong. (2 Pedro 3:13) Dagidiay laeng situtulok a mangipakita iti ayat iti Dios ken iti maysa ken maysa ti mapalubosan nga agbiag iti dayta.—Deuteronomio 30:15, 16, 19, 20.
Ibaga pay ti Biblia nga iti asidegen nga “aldaw ti panangukom,” ikkatento ti Dios ti panagsagaba ken dagiti makinggapuanan iti dayta. (2 Pedro 3:7) Kalpasanna, ni Jesu-Kristo a dinutokan ti Dios nga Agturay, iturayannanto dagiti natulnog a tattao. (Daniel 7:13, 14) Anianto ti ibanag ti panagturay ni Jesus? Kuna ti Biblia: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:11.
Kas nailangitan nga Ari, retubarento ni Jesus ti nadadael a pakairamanan ti sakit, panaglakay, ken ipapatay a resulta ti panagrebelde dagiti tattao ken Jehova, “ti ubbog ti biag.” (Salmo 36:9) Paimbagento ni Jesus amin dagidiay mangakseptar iti naayat a panangiturayna. Iti sidong ti panangiturayna, matungpalto dagitoy a kari ti Biblia:
◼ “Awanto ti agtataeng nga agkuna: ‘Masakitak.’ Dagiti umili nga agnanaed iti daga isudanto dagidiay napakawan ti biddutda.”—Isaias 33:24.
◼ “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”—Apocalipsis 21:4.
Saan kadi a makaliwliwa a maammuan a dandanin tungpalen ti Dios ti karina a mangipatingga iti panagsagaba? Kabayatanna, agtalektayo a denggenna dagiti kararagtayo uray ipalpalubosna ti panagsagaba.
Adda Dios a dumdumngeg ken makakitkita iti panagsagabam. Magagaran a makakita kenka nga agbiag a siraragsak inton mapukawen ti amin a panagduaduam ken panagsagabam.