Ti Naragsak a Panagserbik ken Jehova

Iti simmaruno a tawen, nayanunsio iti pamilia ti Bethel nga agkasapulan ti sangay iti South Africa kadagiti boluntario, ta adda maipan sadiay a baro a pagimprentaan. Nagpalistaak ket permi ti ragsakko idi napiliak. Napili met ti tallo pay a Bethelite iti Canada​—da Ken Nordin, Bill McLellan, ken Dennis Leech. Naibaga kadakami a one-way laeng ti tiketmi a mapan sadiay!

Tinawagak ni nanangko: “Nanang, adda ipadamagko kenka. Ibaondak idiay South Africa!” Saan unay a maun-uni ni nanangko ngem natibker ti pammatina ken nabileg ti espiritualidadna. Awan unay ti imbagana ngem ammok a suportaranna ti desisionko. Nupay naladingitan da Nanang ken Tatang iti iyaadayok, saanda a kinontra ti desisionko.

NAPANAK ITI SOUTH AFRICA!

Iti Brooklyn Bethel, dimmalankami nga uppat iti tallo a bulan a training para iti panagusar iti napudot a buli para iti typesetting a mausar iti letterpress printing. Kalpasan dayta, naglugankami iti pangkargamento a barko nga agpa-Cape Town, South Africa. Bainte anyosak la idi. Rabiin idi nakadanonkami iti Cape Town sa naglugankami iti tren nga agpa-Johannesburg. Ti immuna a nagsardenganmi iti parbangon ket ti bassit nga ili ti Karoo, a medio desierto a lugar. Nakataptapok, nakaas-asuk ken nakadagdagaang. Simmiripkami nga uppat iti tawa ket pinampanunotmi no ania a klase a lugar daydi ken no ania ti pagbalinan ti biagmi. Kalpasan ti sumagmamano a tawen, pinasiarmi dayta a lugar. Napintas ken natalna gayam dagidiay a babassit nga ili.

Iti sumagmamano a tawen, nagbalinak nga opereytor ti makapabilib ken komplikado a Linotype machine, ket inurnosko dagiti buli (lead) a mausar iti panagimprenta kadagiti magasin a Pagwanawanan ken Agriingkayo! Ti sanga nga opisina ket nagimprenta kadagiti magasin iti adu a lengguahe iti Africa, saan laeng a para iti South Africa no di ket para iti adu a pagilian iti amianan. Nakaragragsakkami ta kanayon a maus-usar ti baro a rotary printing press nga isu ti rason a nakadanonkami iti Africa!

Idi agangay, nagtrabahoakon iti Factory Office, a mangas-asikaso iti nadumaduma a trabaho iti translation, printing, ken shipping. Nagadu ti trabaho, ngem makapnek ken naragsak ti biagko.

PANAGASAWA KEN BARO NGA ASAYNMENT

Idi 1968, inkasarko ni Laura Bowen, maysa a payunir nga agnanaed iti asideg iti Bethel. Agtrabtrabaho met iti Bethel kas typist iti Translation Department. Kadagidi a tiempo, awan pay ti urnos nga agtalinaed iti Bethel dagiti kakaskasar, isu a nayasaynkami nga agserbi kas special pioneer. Medio madanaganak idi. Sangapulo a tawenkon iti Bethel ken naruamakon a saanmi a gatangen ti kanenmi ken saanmi a bayadan ti pagyananmi. Kasanomi ngata nga iyan-anay ti allowance-mi kas special pioneer? Kada bulan, makaawat ti tunggal maysa kadakami iti 25 a rand ($35 U.S. idi)​—no maabutmi ti makiddaw nga oras, panagsarungkar, ken maipaima a publikasion. Iyan-anaymi dayta a kuarta a pagbayadmi iti abang, makan, ken plete, agraman iti medikal ken dadduma pay a paggastosan.

Naidestinokami iti bassit a grupo nga asideg iti siudad ti Durban, iti Indian Ocean. Nagadu ti Indian sadiay. Adu kadakuada ket annak dagiti trabahador a nakontrata iti industria ti asukar idi maudi a paset ti 1800’s. Kadagidi a tiempo, sabalin ti trabahoda, ngem nagtalinaed ti kultura ken taraonda, a pakairamanan dagiti naimas a curry. English met ti pagsasaoda isu a saankami a narigatan.

Nakiddaw kadagiti special pioneer a mangbusbosda iti 150 nga oras kada bulan iti ministerio, isu nga iti umuna nga aldaw, inyeskediulmi ken Laura nga innem nga oras ti usarenmi. Nagdagaang ken nagpudot. Awan pay idi ti sarsarungkaranmi ken iyad-adalan iti Biblia​—basta innem nga oras nga agbalaybalaykami tapno mangasaba. Kalpasan ti sumagmamano a minuto, kinitak ti relok​—40 a minuto pay laeng ti limmabas! Pinampanunotko, kasanokami ngata a makapagtultuloy kas special pioneer?

Di nagbayag, naurnosmi met laengen ti eskediulmi. Kada aldaw, agisaganakami iti sandwich ken agbalonkami iti sopas wenno kape iti thermos. No mabisinkamin, iparadak ti bassit a Volkswagen-mi iti linong ti maysa a kayo iti asideg​—a no dadduma ket arakendakami dagiti nagpipintas nga ubbing nga Indian nga agusioso ta naiduma ti itsurami! Kadagiti simmaruno nga aldaw, saanmi a napupuotan a kalpasan ti umuna a dua wenno tallo nga oras, mumalem gayamen.

Maragragsakankami a nangidanon iti kinapudno ti Biblia kadagiti managpadagus a tattao iti dayta teritoria! Nakitami a dagiti Indian ket nadayaw, nasingpet, ken managbuteng iti Dios. Adu a Hindu ti immawat iti kinapudno. Magustuanda ti agsursuro maipapan ken Jehova, ken Jesus, iti Biblia, iti masanguanan a natalna a baro a lubong, ken iti namnama para kadagiti natay. Kalpasan ti makatawen, 20 ti iyad-adalanmin iti Biblia. Kada aldaw, maragragsakankami a makipangaldaw iti maysa kadagiti pamilia nga iyad-adalanmi. Nakaragragsakkami.

Di nagbayag, adda manen baro nga asaynmentmi​—ti trabaho iti sirkito iti kosta ti nagpintas nga Indian Ocean. Kada lawas, nagduduma a balay ti pagyananmi ken nakipagtrabahokami kadagiti agibumbunannag iti kongregasion tapno paregtaenmi ida. Imbilangdakami a kapamiliada, ket magusgustuanmi ti makikadua kadakuada, kadagiti annakda ken uray kadagiti tarakenda. Limmabas ti dua a nararagsak a tawen. Pagammuan ta timmawag ti sanga nga opisina. Imbagada, “Kayatmi nga agsublikayo ditoy Bethel.” Insungbatko, “Ammoyo, nakaragragsakkami ditoy.” Ngem siempre, situtulokkami nga agserbi iti sadinoman a pakaibaonanmi.

PANAGSUBLI ITI BETHEL

Ti asaynmentko iti Bethel ket iti Service Department. Naaddaanak iti pribilehio a makipagtrabaho iti adu a nataengan ken eksperiensiado a kakabsat. Kadagidi nga aldaw, makaawat ti tunggal kongregasion iti surat kalpasan a maipatulod ti manangaywan iti sirkito ti reportna iti panagbisitana iti dayta a kongregasion. Ti panggep dagita a surat ket mangparegta ken mangted iti aniaman a direksion a kasapulanda. Nagdakkel a trabaho daytoy para kadagiti sekretariomi ta ipatarusda iti English dagiti surat a Xhosa, Zulu, ken dadduma pay a lengguahe. Sa ipatarusda met dagiti surat nga English kadagiti lengguahe ti Africa. Apresiarek dagidiay a nakagaggaget a paraipatarus a timmulong kaniak tapno maawatak a naimbag dagiti pakarigatan dagiti kakabsattayo a black African.

Kadagidi a tiempo, dagiti South African ket iturturayan ti apartheid system ti gobierno. Adda naituding a lugar a pagnaedan ti tunggal puli, isu a manmano nga agpupulapol dagiti tattao a nagduduma ti pulida. Us-usaren dagiti kakabsattayo a black African dagiti bukodda a lengguahe, mangasabada kadagiti bukodda a lengguahe, ken makigimongda kadagiti kongregasion nga agus-usar kadagiti bukodda a lengguahe.

Manmano a kakabsat a black African ti am-ammok ta kanayon idi nga English ti lengguahe dagiti bisbisitaek a kongregasion. Ngem ita, addan gundawayko a maam-ammo dagiti black African agraman ti kultura ken dagiti kostumbreda. Naammuak dagiti problema dagiti kakabsat gapu kadagiti tradision iti lugarda ken narelihiosuan a patpatienda. Dida kayat a suroten dagiti espiritistiko nga aramid. Nakaturturedda a saan a nangsurot kadagiti tradision a di maitunos iti Biblia ken iti nakaro nga ibubusor dagiti kapamilia ken kalugaranda! Nakapobpobre dagiti tattao kadagiti barrio. Adu ti saan a nakapageskuela, ngem raraemenda ti Biblia.

Naaddaanak iti pribilehio a tumulong a mangasikaso iti dadduma a kaso iti korte a konektado iti wayawayatayo nga agdaydayaw ken neutralidad. Makapabileg unay iti pammati a makita ti kinamatalek ken kinatured dagiti ubbing a Saksi a naikkat iti eskuelaan gapu ta dida kayat ti makipaset kadagiti kararag ken narelihiosuan a kanta.

Adda pay sabali a problema a nakaipasanguan dagiti kakabsat iti bassit a pagilian ti Africa a maawagan idi iti Swaziland. Idi natay ni Ari Sobhuza II, naobligar ti amin nga umili a makipaset kadagiti ritual a konektado iti panagladingit iti ipapatay ti maysa a tao. Masapul nga agpakalbo ti amin a lallaki, ket masapul nga agpukis dagiti babbai iti ababa. Adu a kakabsattayo ti naidadanes ta saanda a kayat ti makipaset iti kasta a ritual a konektado iti panagdaydayaw kadagiti inapo. Bilibkami iti kinamatalekda ken Jehova! Adu ti nasursuromi iti kinamatalek ken kinaanus dagiti kakabsattayo iti Africa, ket dayta ti nangpabileg iti pammatimi.

PANAGSUBLI ITI PAGIMPRENTAAN

Idi 1981, naikkanak iti asaynment a tumulong iti panagusar iti kompiuter iti panagimprenta. Isu a nagsubliak iti pagimprentaan. Makapagagar daydi a tiempo! Nagdakkelen ti nagbalbaliwan ti pamay-an ti panagimprenta. Adda lokal nga ahente a nangted iti sanga nga opisina iti phototypesetter tapno padasenmi nga usaren nga awan bayadanmi. Kas resultana, nasukatan ti siam a Linotype machine iti lima a baro a phototypesetter. Adda met na-install a baro a rotary offset printing press. Pimmartak ti panagimprenta!

Gapu iti kompiuter, napataud dagiti baro a pamay-an ti panag-compose kadagiti publikasion babaen ti MEPS, ti Multilanguage Electronic Publishing System. Nagdakkel a panagbalbaliw dayta. Ti maus-usar idi ket dagiti nadagsen ken nabuntog a Linotype machine ken hot-lead printing press, nga isu ti rason a nakadanonkami nga uppat a Bethelite a taga-Canada iti South Africa! (Isa. 60:17) Iti dayta a tiempo, agpapadakami nga addaanen iti asawa a nasingpet ken naespirituan ti panagpampanunotna a payunir. Dakami ken Bill ket agserserbi pay laeng iti Bethel. Ngem da Ken ken Dennis ket addaanen iti annak ken agnanaedda iti asideg ti Bethel.

Immadu ti trabaho iti sanga nga opisina. Nanayonan dagiti lengguahe a maipatarus, mayimprenta, ken maipatulod iti dadduma a sanga nga opisina. Isu a kasapulanmi ti baro a pasilidad ti Bethel. Imbangon dagiti kakabsat dayta a pasilidad iti napintas a lugar iti laud ti Johannesburg, ket naidedikar dayta idi 1987. Maragsakanak ta nagbalinak a paset dagita nga irarang-ay ken nagserbiak a miembro ti Branch Committee iti South Africa iti adu a tawen.

SABALI MANEN NGA ASAYNMENT!

Idi 2001, nasdaawkami unay ta naawisak nga agbalin a miembro ti kabubuangay a Branch Committee iti United States. Nupay malidayanak a mangpanaw iti trabaho ken gagayyemmi iti South Africa, magagarankami a mangirugi iti baro a biagmi kas paset ti pamilia ti Bethel iti United States.

Ngem madanagankami ta mapanawanmi ti bumakbaketen a nanang ni Laura. Awan unay no kuan ti maitulongmi no addakami idiay New York, ngem ti tallo a babbai nga adding ni Laura ti nagboluntario a tumulong kenkuana iti pisikal, emosional, ken pinansial. Imbagada, “Saanmi a kabaelan ti amin-tiempo a panagserbi, ngem no dakami ti mangaywan ken Nanang, makatulong dayta iti panagtultuloyyo iti asaynmentyo.” Agyamankami unay kadakuada.

Kasta met laeng ni manongko ken ti ipagko nga agnanaed idiay Toronto, Canada. Isudan ti nangaywan ken Nanang manipud idi nabalo. Iti dayta a tiempo, nasuroken a 20 a tawen a makipagnanaed kadakuada ni Nanang. Agyamyamankami unay iti ayat ken panangasikasoda kenkuana agingga iti ipapatayna, di nagbayag kalpasan ti isasangpetmi idiay New York. Maysa a bendision ti kaadda dagiti manangsuporta a kapamilia a situtulok a mangi-adjust iti biagda tapno isuda ti mangibaklay iti responsabilidad a no dadduma, talaga a nakarigrigat!

Iti United States, adu met a tawen a timmulongak iti panagimprenta kadagiti publikasion, a nagbalinen a mas moderno ken napasimple. Ngem itay nabiit, addaakon iti Purchasing Department. Nakaragragsakak iti 20 a tawen a panagserbik iti daytoy nagdakkel a sanga nga opisina, nga ita ket addaanen iti nasurok a 5,000 a Bethelite ken agarup 2,000 a commuter!

Innem a pulo a tawenen ti napalabas. Diak man la pulos impagarup a kastoy ti agbalin a biagko. Kanayon a supsuportarannak ni Laura. Nakaragragsak ti nagbalin a biagko! Tagipatgenmi ti nadumaduma nga asaynmentmi ken ti amin a nagsasayaat a kakabsat a nakatrabahomi, agraman dagiti kakabsat iti adu a sanga nga opisina a binisitami iti adu a paset ti lubong. Ita, nasuroken nga 80 ti tawenko, isu a nakissayanen ti trabahok. Ngamin, adu metten nga agkabannuag a kakabsat a lallaki ti makabael a mangasikaso iti trabaho.

Insurat ti salmista: “Naragsak ti nasion a ni Jehova ti Diosna.” (Sal. 33:12) Pudno unay dayta! Agyamanak unay ta siraragsak a nakapagserbiak a kaduak ti naragsak nga ili ni Jehova.