Branch Letter

Patgenmi nga Agibumbunannag iti Pagarian:

Maragsakankami a mangipadamag nga idi napan a tawen, naipasdeken ti Hantscho, a baro a pagimprentaan ditoy Bethel iti Quezon City.

Idi Agosto 11, 2005, simmangpet ditoy sanga ti baro a pagimprentaan a naggapu idiay Mexico. Nangrugi a naipasdek daytoy idi Agosto 22, 2005 ken nalpas idi Disiembre 23, 2005. Pito a kakabsat a taga-Mexico ken innem a taga-Columbia ti immay timmulong kadagiti kakabsat a nangipasdek iti pagimprentaan. Napalaus ti ragsak ti amin idi nayimprenta ti Pebrero 1, 2006 a Pagwanawanan, ti kaunaan a magasin a naimaldit iti baro a pagimprentaan.

Gapu ta 50 tonelada ti kadagsen ti baro a pagimprentaan, masapul a 35 a sentimetro ti kapuskol ti pundasionna. Duapulo ket walo a metro ti kaatiddogna ken 4.39 a metro ti kangatuan a pasetna. Makayimprenta daytoy iti 40,000 a magasin iti kada oras, kayatna a sawen, 12 a magasin iti kada segundo. Tunggal rolio ti papel nga agdagsen iti agarup 500 a kilo ket maibus iti uneg laeng ti 25 a minuto bayat ti kapartakan a panagandar ti pagimprentaan. Tapno adda pamalatpatanyo no kasano kaadu ti papel a maus-usar iti pannakayimprenta dagiti magasintayo, panunotenyo daytoy: No mayaplag ti amin a rolio ti papel a nausar iti makatawen, mamindua a marikusna ti daga.

Bayat ti Abril, 2006, agdagup iti 873,198 a magasin ti kangatuan pay laeng a naipaima. Sapay koma ta itultuloytayo amin nga iwaras Ti Pagwanawanan ken Agriingkayo! bayat ti baro a tawen serbisio. Wen, ‘itultuloytayo nga aramiden dayta nga ad-adda pay a naan-anay.’—1 Tes. 4:1.

Dagiti kakabsatyo,

Philippine Branch Office