ER HÆGT AÐ BJARGA JÖRÐINNI?
LOFTIÐ
VIÐ þurfum loft en ekki bara til að geta andað. Andrúmsloftið skýlir jörðinni að mestu leyti fyrir skaðlegri geislun sólarinnar. Án andrúmsloftsins myndi hitastigið fara niður fyrir frostmark um alla jörð.
Loftið í hættu
Loftmengun ógnar öllu lífi á jörðinni. Aðeins eitt prósent jarðarbúa andar að sér lofti sem stenst öryggismörk Alþjóðaheilbrigðismálastofnunarinnar.
Loftmengun getur valdið öndunarfærasjúkdómum, lungnakrabbameini og hjarta- og æðasjúkdómum. Rekja má um 7.000.000 ótímabærra dauðsfalla á ári til loftmengunar.
Jörðin – hönnuð til að endurnýja sig
Jörðin er hönnuð til að sjá öllum loftháðum lífverum sínum fyrir stöðugum straumi af hreinu lofti. Náttúrleg kerfi hennar virka best þegar mengun af mannavöldum er haldið í skefjum. Skoðum fáein dæmi.
Við þekkjum öll hæfni skóganna til að binda koldíoxíð í loftinu. Færri vita að votlendi með fenjaviði nálægt sjó gera enn meira gagn. Fenjaviður gegnir þar mikilvægu hlutverki en hann bindur allt að fimm sinnum meira koldíoxíð í loftinu en hitabeltisskógarnir.
Nýlegar rannsóknir sýna að sumir stórvaxnir þörungar eins og þari bæði binda koldíoxíð í andrúmsloftinu og grafa það. Blöðruþang, til dæmis, er með gasfylltar blöðrur svo að það getur flotið langar leiðir. Þegar það er komið á haf út springa blöðrurnar og þarinn sekkur til botns með kolefninu sem hann hefur bundið. Þar getur hann legið grafinn öldum saman.
Að andrúmsloftið geti hreinsast af skaðlegu magni mengunarefna sýndi sig þegar COVID-19 takmarkanirnar stóðu yfir. Árið 2020 bötnuðu loftgæðin stórlega þegar verksmiðjum var lokað og umferð vélknúinna ökutækja snarminnkaði. Samkvæmt loftgæðaskýrslunni „2020 World Air Quality Report“ greindu rúmlega 80 prósent þátttökulanda frá því að loftið hafi verið hreinna stuttu eftir að takmörkununum var komið á.
Hvað er gert í málinu?
Með því að hjóla í vinnuna geturðu dregið úr loftmengun.
Ríkisstjórnir halda áfram að þrýsta á atvinnurekendur að draga úr mengun. Vísindamenn leita líka nýrra leiða til að draga úr áhrifum mengunar. Til dæmis er komin fram aðferð þar sem notaðar eru örverur til að breyta mengunarefnum í skaðlaus efni. Fólk er líka hvatt til að ganga eða hjóla í staðinn fyrir að nota bíl og til að beita sér fyrir orkusparnaði á heimilinu.
Í sumum löndum láta stjórnvöld í té nútímalegar eldavélar til að draga úr loftmengun en margir hafa samt ekki aðgang að þeim.
En meira þarf til eins og sjá má af skýrslu frá árinu 2022 sem tekin var saman af alþjóðastofnunum, þar á meðal Alþjóðaheilbrigðismálastofnuninni og Alþjóðabankanum.
Í skýrslunni kemur fram að árið 2020 hafi um þriðjungur jarðarbúa aðallega notað mengandi aðferðir og eldsneyti við eldun. Víða um lönd hafa fáir efni á nýjum eldavélum eða aðgang að betra eldsneyti.
Ástæður til bjartsýni – hvað segir Biblían?
„Þetta segir hinn sanni Guð, Jehóva, hinn mikli Guð sem skapaði himininn ... hann sem breiddi út jörðina með öllu sem á henni vex, sem gefur íbúum hennar andardrátt.“ – Jesaja 42:5.
Guð skapaði loftið sem við öndum að okkur og hringrásir náttúrunnar sem hreinsa það. Hann býr líka yfir takmarkalausum mætti og elskar mannkynið. Er þá rökrétt að hann ætli ekki að gera neitt til að stemma stigu við loftmenguninni? Sjá greinina „Guð lofar að jörðinni verði bjargað“.