Þegar hamfarir verða
EF ÞÚ hefur einhvern tíma orðið fyrir hamförum þekkirðu án efa tilfinningarótið sem margir upplifa í kjölfar hamfara – áfall, afneitun, uppnám, kvíða og martraðir. Mörg fórnarlömb hamfara eru vondauf og uppgefin og sjá litla ástæðu til að koma lífi sínu aftur á réttan kjöl.
Ef þú hefur lent í hamförum, sem hafa lagt líf þitt í rúst, gætirðu verið við það að gefast upp. Kannski ertu jafnvel farinn að hugleiða hvort lífið sé erfiðisins virði. Biblían sýnir fram á að lífið er erfiðisins virði og að þú hafir fulla ástæðu til að vera bjartsýnn á framtíðina.
BIBLÍUÞEKKING VEITIR OKKUR VON
Í Prédikaranum 7:8 segir: „Betri er endir máls en upphaf.“ Lífið gæti virst vonlaust rétt eftir hamfarirnar þegar þú ert enn að ná áttum. En þegar þú hefst handa og vinnur þolinmóður að því að koma lífi þínu í rétt horf fer þér smám saman að ganga betur.
Biblían segir fyrir þann tíma þegar ,aldrei framar heyrist grátur og kvein‘. (Jesaja 65:19) Þetta verður að veruleika þegar jörðinni verður breytt í paradís undir stjórn Guðsríkis. (Sálmur 37:11, 29) Hamfarir heyra þá sögunni til. Allar þrálátar þjáningar og sárar minningar verða þurrkaðar út að eilífu því að alvaldur Guð lofar: „Hins fyrra verður ekki minnst framar og það skal engum í hug koma.“ – Jesaja 65:17.
Hugsaðu þér! Skaparinn er með fyrirætlanir um að veita þér „vonarríka framtíð“ – friðsælt líf undir fullkominni stjórn Guðsríkis. (Jeremía 29:11) Getur þessi þekking gert líf þitt erfiðisins virði? Sally, sem vitnað var í áður, segir: „Að hugsa um allt það dásamlega, sem Guðsríki gerir fyrir okkur í framtíðinni, hjálpar manni að gleyma því sem liðið er og að komast í gegnum daginn.“
Við hvetjum þig til að kynna þér betur það sem Guðsríki mun brátt gera fyrir allt mannkynið. Þá geturðu farið að treysta því að þrátt fyrir hörmungarnar, sem þú hefur upplifað, er lífið erfiðisins virði núna á meðan þú bíður með eftirvæntingu eftir framtíð þar sem engar hörmungar verða. En þar til sá tími kemur geturðu nýtt þér hagnýt ráð Biblíunnar til að kljást við eftirköst hamfara. Skoðum nokkur af þessum ráðum.