Prédikunarstarfið greinir okkur frá öðrum
1 Margir spyrja hvaða munur sé á vottum Jehóva og öðrum trúarbrögðum. Hverju myndir þú svara? Þú gætir útskýrt einhverjar af biblíutengdum trúarkenningum okkar. En hefur þér dottið í hug að benda á hve boðunarstarf okkar meðal almennings greinir okkur frá öðrum trúarbrögðum? — Matt. 24:14; 28:19, 20.
2 Fáir finna hjá sér hvöt til að segja öðrum frá trú sinni þótt þeir séu trúhneigðir. Þeim finnst kannski nægja að hlýða lögum keisarans, lifa siðsömu lífi eða gera öðrum gott, en telja sig ekki skuldbundna að hjálpa öðrum að kynnast því sem Biblían segir um hjálpræði. Að hvaða leyti erum við ólík?
3 Ötult boðunarstarf okkar sker sig mjög úr athöfnum annarra trúarbragða. Í meira en hundrað ár hafa vottarnir prédikað fagnaðarerindið af kostgæfni til endimarka jarðar að fyrirmynd hinna frumkristnu. Markmið okkar er að hjálpa eins mörgum og mögulegt er til að samræma líf sitt vilja Guðs. — 1. Tím. 2:4; 2. Pét. 3:9.
4 Hvaða orð fer af þér? Ertu þekktur fyrir að prédika orð Guðs af kostgæfni? (Post. 17:2, 3; 18:25) Sjá nágrannar þínir greinilegan mun á trú þinni og sinni sökum prédikunar þinnar? Ertu þekktur fyrir áhuga þinn að segja öðrum frá von þinni? Tekurðu að staðaldri þátt í boðunarstarfinu? Munum að við aðgreinum okkur ekki bara með nafninu vottar Jehóva heldur einnig með því að gera það sem fólgið er í nafninu — að bera vitni um Jehóva. — Jes. 43:10.
5 Kærleikur til Guðs og náungans knýr okkur til að taka þátt prédikunarstarfinu. (Matt. 22:37-39) Þess vegna viljum við nota sérhvert tækifæri til að segja öðrum frá boðskapnum um Guðsríki líkt og Jesús og postularnir gerðu. Höldum því áfram að prédika fagnaðarerindið af kostgæfni fyrir þeim sem eru fúsir til að hlusta. Þannig sýnum við hjartahreinum mönnum fram á „þann mismun, sem er á milli . . . þess, sem Guði þjónar, og hins, sem ekki þjónar honum.“ — Mal. 3:18.