Sjálfsnám og fjölskyldunám er nauðsynlegt
1. Um hvað er hinu stjórnandi ráði sérstaklega umhugað núna og af hverju?
1 Líkt og á fyrstu öldinni er hinu stjórnandi ráði afar umhugað um velferð þjóna Jehóva. (Post. 15:6, 28) Þrengingin mikla vofir yfir og því skiptir miklu máli fyrir alla boðbera fagnaðarerindisins að eiga náið samband við Jehóva. Hvernig hefurðu hugsað þér að nota tímann sem áður var ætlaður safnaðarbóknáminu? Allir eru hvattir til þess að nota þennan tíma til að byggja upp trú fjölskyldunnar. Ef við notum þennan tíma viturlega getum við kafað dýpra í innblásið orð Guðs og notið góðs af. — Sálm. 1:1-3; Rómv. 11:33, 34.
2. Hvernig gætum við hagað kvöldinu sem ætlað er fjölskyldunámi?
2 Kvöld ætlað fjölskyldunámi: Þeir sem veita fjölskyldu forstöðu verða að axla ábyrgð sína frammi fyrir Jehóva og tryggja að reglulegt og markvisst fjölskyldunám sé á dagskrá. (5. Mós. 6:6, 7) Einhleypir bræður og systur, sem hafa ekki fjölskylduábyrgð, geta notað tímann fyrir sjálfsnám í Biblíunni. Það er áríðandi að við öll ,notum hverja stund‘ til sjálfsnáms og hugleiðingar svo að við höfum þann trúarstyrk sem þarf til að standast álag þeirra ‚vondu daga‘ sem nú eru. — Ef. 5:15, 16.
3, 4. Hvaða námsefni mætti nota og hvað ætti að hafa í huga?
3 Námsefnið: Með hjálp efnisskrár Varðturnsfélagsins eða geisladisksins Watchtower Library má finna efni sem allir í fjölskyldunni geta haft ánægju af. Fjölskyldur gætu farið saman yfir greinar í Varðturninum, til dæmis greinar í syrpunni „Farsælt fjölskyldulíf“, „Kenndu börnunum“ og „Fyrir unga lesendur“. Í Vaknið! er líka að finna greinaröðina „Ungt fólk spyr“ og hrífandi greinar um undur sköpunarverksins.
4 Ef fjölskyldan les saman í Biblíunni í ró og næði verður auðveldara fyrir alla að muna eftir meginreglum Guðs og fylgja þeim. (Hebr. 4:12) Inn á milli gætuð þið horft á og síðan rætt um mynddiska sem söfnuðurinn hefur gefið út. Það er af nógu að taka og um að gera að beita ímyndunaraflinu. Væri ekki ráð að spyrja hina í fjölskyldunni hvaða efni þeir vilji skoða og hvernig?
5. Af hverju er sjálfsnám og fjölskyldunám afar mikilvægt núna?
5 Mikilvægara en nokkru sinni fyrr: Með því að styrkja trú okkar erum við undir það búin að standa stöðug og sjá hjálpræði Jehóva. (2. Mós. 14:13) Foreldrar þurfa á leiðsögn Guðs að halda til að geta alið upp börn sín „meðal rangsnúinnar og gerspilltrar kynslóðar“. (Fil. 2:15) Börnin þarfnast hjálpar til að láta ekki hrakandi siðferði í skólanum hafa áhrif á sig. (Orðskv. 22:3, 6) Það er gott fyrir hjón að styrkja sambandið við Jehóva sem er þriðji þráðurinn í hjónabandinu. (Préd. 4:12) Við skulum því nota vel þann tíma sem eftir er til að byggja okkur upp í „helgustu trú“ okkar. — Júd. 20.