Ný greinaröð til að hefja biblíunámskeið
1. Hvaða nýja greinaröð birtist í almennri útgáfu Varðturnsins og hver er tilgangurinn með henni?
1 Frá og með næsta mánuði birtist ný greinaröð í almennri útgáfu Varðturnsins sem mun auðvelda okkur að hefja biblíunámskeið. Hún nefnist „Kynntu þér orð Guðs“. Enda þótt sumir á svæðinu hafi eflaust ánægju af að lesa þessar greinar eru þær aðallega birtar til að hægt sé að ræða um efni þeirra við húsráðandann.
2. Lýstu nýju greinaröðinni.
2 Nýja greinaröðin: Titill greinanna og millifyrirsagnirnar eru spurningar sem hægt er að spyrja húsráðandann. Í stað þess að vitna í lykilritningarstaði er vísað í þá þannig að húsráðandinn fái fræðsluna beint frá orði Guðs. Málsgreinarnar eru stuttar til þess að hægt sé að ræða um þær jafnvel í dyragættinni. Hver grein vísar í bókina Hvað kennir Biblían? þannig að hægt er að halda umræðunum áfram með hjálp þeirrar bókar þegar það á við.
3. Hvernig getum við notað þessa greinaröð til að hefja biblíunámskeið í boðunarstarfinu hús úr húsi?
3 Hvernig við notum þær: Þegar þú býður blöðin gætirðu varpað fram spurningu sem er til þess fallin að vekja áhuga á efni greinarinnar. Í janúar-mars blaðinu er til dæmis rætt um það hvaða gildi Biblían hefur fyrir okkur. Þú gætir spurt: „Heldurðu að Biblían sé orð Guðs eða telurðu að hún sé bara góð bók? [Gefðu kost á svari.] Mig langar til að sýna þér athyglisverða grein sem fjallar um þetta.“ Bentu á fyrstu spurninguna, lestu málsgreinina sem fylgir og flettu upp biblíutilvísuninni. Lestu svo spurninguna aftur og leyfðu húsráðandanum að svara. Farðu yfir eins mikið efni og aðstæður leyfa og notaðu spurningarnar til þess. Beindu athygli húsráðandans að næstu spurningu áður en þú ferð og gerðu ráðstafanir til að koma aftur og ræða um hana. Reyndu að hitta hann næstu vikurnar til að fara yfir hluta greinarinnar. Önnur aðferð er að spyrja húsráðandann beint hvort hann vilji þiggja biblíunámskeið. Notaðu þá greinina til þess að sýna hvernig það fer fram.
4. Hvernig getum við nýtt okkur nýju greinaröðina þegar við förum í endurheimsóknir?
4 Þú getur líka nýtt þér þessa nýju greinaröð með góðum árangri þegar þú heimsækir þá sem þiggja blöðin reglulega eða sýna áhuga. Þú gætir einfaldlega sagt: „Það er komin ný greinaröð í Varðturninn. Mig langar að sýna þér hvernig er hægt að nýta sér hana.“ Það er bæn okkar að þessi nýja greinaröð verði til þess að margir fleiri „komist til þekkingar á sannleikanum“.— 1. Tím. 2:4.