Stjörnuspeki, afmælisdagar og Biblían

Rithöfundarnir Ralph og Adelin Linton segja greinileg tengsl milli stjörnuspeki og afmælisdaga. Í bók sinni, The Lore of Birthdays, segja þau: „Mesópótamía og Egyptaland, sem voru vagga siðmenningarinnar, voru líka fyrstu löndin þar sem menn minntust og héldu upp á afmæli. Til forna þótti mikilvægt að halda skrá um fæðingardag fólks fyrst og fremst vegna þess að hann var nauðsynlegur til að lesa ævi manns eftir afstöðu stjarnanna.“

Að vísu tíðkaðist það líka meðal Ísraelsmanna að halda fæðingarskrár, en það var gert til að henda reiður á aldur manna til prestþjónustu, herþjónustu og slíks. (4. Mósebók 1:2, 3; 4:2, 3; 2. Konungabók 11:21) Biblían tilgreinir hins vegar ekki fæðingardag nafntogaðra manna svo sem Nóa, Abrahams, Móse, Davíðs — eða Jesú Krists! „Vissulega,“ segir í áðurnefndu riti, „er minnst á afmælisdagahald í Biblíunni, en einungis illra trúvillinga svo sem Heródesar eða heiðingja eins og Faraós. Þegar sumir kristnir menn á öldum áður reyndu að henda reiður á fæðingardegi Krists álitu margir kirkjufeðranna það helgispjöll . . . þeir lýstu yfir að enginn skyldi reyna að halda daginn hátíðlegan því að það væri óguðlegur, heiðinn siður.“