Hjálpum öðrum að koma auga á mikinn fjársjóð
1 Þegar við prédikum fagnaðarboðskapinn um Guðsríki ættum við meðal annars að stefna að því að hjálpa hreinhjörtuðu fólki að skilja hversu framúrskarandi gildi orð Guðs hefur. (Fil. 3:8) Biblíuritin gegna mikilvægu hlutverki í útbreiðslu boðskaparins um Guðsríki. Til dæmis hefur Lifað að eilífu bókin hjálpað hundruðum þúsunda að þjóna Jehóva vegna þeirra biblíusanninda sem hún hefur frætt þau um.
2 Í þjónustu okkar felst meira en að skilja einungis eftir rit hjá hverjum sem þiggja vill. Við þurfum að kynna boðskapinn á þann hátt að hann höfði til manna, hlusta með eftirtekt á hvað þeir segja og vera síðan reiðubúin til að ‚rökræða við þá út af Ritningunni.‘ — Post. 17:2.
3 Hvernig má gera þetta? Inngangsorð okkar geta opnað húsráðendum leið til að sýna hvort þeir hafi í rauninni áhuga á Biblíunni og boðskap hennar.
Þú gætir sagt:
◼ „Við heimsækjum þig til að ræða um þýðingu þess sem er að gerast í heiminum nú á dögum. Hjá mörgum gætir dvínandi áhuga á Guði og þeim lífsreglum sem hann gefur okkur í Biblíunni. Þetta hefur haft mikil áhrif á viðhorf fólks hvers til annars. Hefur þú tekið eftir því? [Gefðu kost á svari. Þú gætir vísað til sérstakra dæma.] Má ég biðja þig að taka eftir hugarfari þeirra sem nefndir eru í 2. Tímóteusarbréfi 3:1-5 og segja mér hvort þér finnist það hljóma eins og ástandið núna. [Lestu; gefðu kost á athugasemdum.] Er gild ástæða til að vænta betra ástands í framtíðinni?“ Ef áhugi kemur í ljós skaltu sýna myndina á blaðsíðu 12 og 13 í Lifað að eilífu bókinni og beina athyglinni að tölugreinum 12 og 13. Ef áhuginn er takmarkaður má bjóða smáritið Líf í friðsömum nýjum heimi.
4 Ef foreldri kemur til dyra gætum við hafið samræður okkar á þennan hátt:
◼ „Við erum að tala við fólk sem hefur áhuga á hvernig við getum betur tekist á við vandamál fjölskyldulífsins. Við reynum öll að gera okkar besta á þessu sviði en ef það er eitthvað sem getur hjálpað okkur að ná betri árangri þá viljum við gjarnan notfæra okkur það, er ekki svo? [Gefðu kost á svari.] Biblían veitir leiðsögn í þessu máli eins og sjá má af Kólossubréfinu 3:12-14. [Lestu.] Hvað er þess vegna nauðsynlegt til að fjölskyldulífið verði farsælt? Taktu eftir því sem segir í þessari bók í kaflanum ‚Farsælt fjölskyldulíf.‘“ Lestu grein 3 á blaðsíðu 238 í Lifað að eilífu bókinni. Ef húsráðandinn er upptekinn eða sýnir lítil viðbrögð reyndu þá að kynna nýlegt blað sem fjallar að einhverju leyti um málefni fjölskyldunnar.
5 Við viljum aldrei missa sjónar á þeim tilgangi okkar að bera rækilega vitni um Guðsríki. (Matt. 24:14) Ef við notfærum okkur vel Biblíuna og hið dásamlega safn guðveldislegra rita sem við höfum getum við örugg treyst því að Jehóva muni blessa viðleitni okkar í að framkvæma vilja hans á þessum miklu umbrotatímum. — Gal. 6:9.