Dagskrá svæðismótsins í maí
1 Stefið, sem dagskrá svæðismótsins í maí snýst um, er „Vakið, standið stöðugir, verið styrkir.“ Það er byggt á uppörvunarorðum Páls til kristinna manna á fyrstu öldinni eins og þau eru skráð í 1. Korintubréfi 16:13.
2 Dagskráin hefst með því að dregið er skýrt fram hve mjög við þurfum að ástunda andlega sjálfsrannsókn. Til þess að geta á þessum ‚síðustu dögum‘ viðhaldið óbifanlegri afstöðu með því sem rétt er þurfum við að leggja raunhæft mat á samband okkar við Jehóva og í hvaða áliti við erum innan jarðnesks skipulags hans. (2. Tím. 3:1) Við verðum minnt á að Guð kann sannarlega að meta dugnað okkar. Við þurfum að fá leiðbeiningar um leiðir til að bæta og efla kristna eiginleika okkar og vera ávallt til fyrirmyndar í hegðun okkar.
3 Einnig verður lögð áhersla á nauðsyn þess að sinna af kostgæfni því verkefni að gera menn að lærisveinum jafnframt því að sækjast eftir að taka andlegum framförum og vera hæf til andlegra ábyrgðarstarfa. Í fjölbreyttum ræðum, sýnikennslum og umræðum verða settar fram hagnýtar tillögur um hvernig einstaklingar og fjölskyldur geta komið sér upp þeirri venju að taka reglubundið inn andlega næringu og haldið sér við þann vanagang.
4 Á laugardeginum gefst þeim sem reynst hafa hæfir til skírnar tækifæri til að játa opinberlega að þeir hafi vígt sig Jehóva og sýna það með því að skírast í vatni. Við viljum síðan öll gæta þess að vera viðstödd á sunnudeginum þegar fluttur verður opinberi fyrirlesturinn sem ber heitið „Í hvaða áliti ert þú hjá Guði?“
5 Dagskránni lýkur með hvatningu til að halda áfram að vera stöðug í trúnni og koma alltaf fram hvert við annað í anda kærleika og friðar. Svæðismótið er eitt þeirra sérstöku tækifæra sem Jehóva veitir okkur til að ‚hvetja hvert annað til kærleika og góðra verka.‘ (Hebr. 10:24, 25) Vertu ákveðinn í að gera það sem til þarf til þess að geta verið viðstaddur alla dagskrá mótsins báða dagana.