Áhrifarík myndbönd
1 „Sonur okkar hefur horft á myndbandið síðan hann var smábarn. Hann horfir á það aftur og aftur. Það er yndislegt að eiga svona hjálpargögn sem glæða kærleika til Jehóva með börnunum.“ Hvaða myndband var þetta kristna foreldri að tala um? Myndbandið Noah — He Walked With God (Nói — hann gekk með Guði). Móðir, sem ekki er vottur, sendi deildarskrifstofunni framlag að andvirði 10.000 íslenskra króna og spurði hvort við ættum fleiri myndbönd fyrir börn, en sonur hennar hafði séð Nóamyndbandið á öðru heimili. Myndböndin, sem skipulag Jehóva framleiðir, hafa sterk áhrif á unga jafnt sem aldna.
2 Í fjölskyldunni: Eftir að vottafjölskylda horfði á myndbandið Staðfesta votta Jehóva í ofsóknum nasista sagði móðirin: „Ég hef velt því fyrir mér í allan dag hvernig Jehóva gerði venjulegu fólki kleift að standast ótrúlegustu raunir og það minnir mig á hvað vandamál mín eru í raun smávægileg. Dætur okkur skildu betur hve nauðsynlegt er að reiða sig á Jehóva eftir að við höfðum horft á myndbandið með þeim. Og með því að ræða saman um myndbandið á eftir höfum við búið þær betur undir að takast á við hvaða þrýsting og ofsóknir sem þær kunna að verða fyrir.“
3 Í skólanum: Ungur vottur fékk tækifæri til að sýna bekknum sínum hluta af Staðfestumyndbandinu í tengslum við ritgerðaverkefni. Áður hafði kennarinn sagt að sér líkaði ekki við vottana. En eftir að hafa horft á myndbandið sagði hún: „Þetta hefur algerlega breytt áliti mínu á vottum Jehóva. Næst þegar þeir heimsækja mig lofa ég að hlusta á þá og þiggja biblíunámskeið.“ Hvað breytti viðhorfi hennar til okkar? Hún sagði að það hefði verið ‚sannur kærleikur okkar og hollusta.‘
4 Í boðunarstarfinu: Systir hitti konu sem hikaði við að þiggja blöð þótt hún hefði spurningar um okkur og trú okkar. Systirin kom aftur með myndbandið Jehovah’s Witnesses — The Organization Behind the Name (Vottar Jehóva — skipulagið að baki nafninu) og sýndi konunni og eiginmanni hennar. Þau voru bæði mjög hrifin og þáðu biblíunámskeið. Boðskapurinn hafði þau áhrif að þau fóru að breyta lífi sínu í samræmi við vilja Guðs.
5 Nýtir þú myndböndin okkar til fulls?