Hvers vegna er safnaðarbóknámið mikilvægt?
1. Hvaða fyrirkomulag var á safnaðarbóknáminu áður fyrr?
1 Árið 1895 voru Biblíunemendurnir, eins og Vottar Jehóva voru kallaðir í þá daga, með námshópa sem nefndir voru Dögunarhópar. Námið var byggt á ritröðinni Millennial Dawn (Dögun þúsundáraríkisins). Síðar voru þessir hópar kallaðir Berojuhópar. (Post. 17:11) Oft kom hæfilega stór hópur saman á einkaheimili eitthvert kvöld sem hentaði hópnum. Þessar samkomur voru fyrirrennarar safnaðarbóknámsins.
2. Hvernig getum við „uppörvast saman“ í bóknáminu?
2 Hvatning og aðstoð: Þar sem bóknámshópar eru af ásettu ráði hafðir fámennir fá þeir sem eru í hópnum betra tækifæri til að tjá trú sína. Þannig getum við „uppörvast saman fyrir hina sameiginlegu trú“ okkar. — Rómv. 1:12.
3, 4. Hvernig hjálpar bóknámsfyrirkomulagið okkur að gera þjónustu okkar góð skil?
3 Við getum lært að fara „rétt með orð sannleikans“ með því að fylgjast með kennsluaðferðum bóknámsumsjónarmannsins. (2. Tím. 2:15) Taktu eftir því hvernig hann leggur áherslu á að efnið sé byggt á Biblíunni. Hann gæti dregið fram lykilatriði með því að nota Biblíuna til að rifja efnið upp í lokin ef það hentar námsefninu sem er til umfjöllunar. Gott fordæmi hans getur hjálpað okkur að verða færari kennarar í boðunarstarfinu. — 1. Kor. 11:1.
4 Auk þess að stjórna bóknáminu vikulega fer bóknámsumsjónarmaðurinn með forystuna í að boða fagnaðarerindið. Í samráði við starfshirðinn gerir hann hentugar ráðstafanir fyrir boðunarstarfið. Hann reynir að hjálpa öllum í hópnum að sinna þeirri skyldu kristinna manna að prédika fagnaðarerindið og gera menn að lærisveinum. — Matt. 28:19, 20; 1. Kor. 9:16.
5. Hvaða aðstoð getum við fengið í bóknámshópunum?
5 Bóknámsumsjónarmaðurinn hefur áhuga á andlegri velferð allra í hópnum. Hann sýnir þeim áhuga á safnaðarsamkomum og þegar hann starfar með þeim á akrinum. Þegar hann heimsækir trúsystkini sín notar hann líka tækifærið til að uppörva þau í trúnni. Öllum ætti að finnast þeir geta leitað til bóknámsumsjónarmannsins hvenær sem þeir þurfa á andlegri aðstoð að halda. — Jes. 32:1, 2.
6. (a) Hvernig hefur það styrkt bræður okkar í ákveðnum löndum að hittast í smærri hópum? (b) Hvernig hefur þú haft gagn af bóknáminu?
6 Styrkjum hvert annað: Í löndum þar sem hömlur hvíla á starfi þjóna Guðs hittast bræðurnir oft í minni hópum. Bróðir nokkur sagði: „Jafnvel þótt starf okkar hafi verið bannað héldum við vikulegar samkomur í 10 til 15 manna hópum hvenær sem færi gafst. Á samkomunum fengum við andlegan styrk af biblíunámi okkar og félagsskapnum eftir námið. Við skiptumst á frásögum og gerðum okkur grein fyrir því að við áttum öll í sömu baráttunni.“ (1. Pét. 5:9) Við ættum einnig að styrkja hvert annað með því að styðja bóknámsfyrirkomulagið af heilum huga. — Ef. 4:16.