Bjóðum gesti velkomna
1. Hvenær fáum við besta tækifærið til að vitna fyrir öðrum? Hvers vegna?
1 Við fáum sjaldan betra tækifæri til að vitna rækilega fyrir öðrum heldur en á minningarhátíðinni. Hugsið ykkur! Í ár er búist við að rúmlega tíu milljónir gesta verði viðstaddar minningarhátíðina. Þar fá þeir að heyra um mesta kærleiksverk allra tíma þegar Jesús gaf líf sitt að lausnarfórn. (Jóh. 3:16; 15:13) Þeir fá líka að heyra um hvaða blessun standi þeim til boða vegna þess að Jehóva gaf son sinn. (Jes. 65:21-23) Ræðumaðurinn er þó ekki sá eini sem vitnar um fagnaðarerindið á minningarhátíðinni heldur geta allir viðstaddir borið sannleikanum gott vitni með því að bjóða gesti hjartanlega velkomna. – Rómv. 15:7.
2. Hvernig getum við boðið gesti hjartanlega velkomna?
2 Væri ekki tilvalið að sýna frumkvæði og heilsa upp á nýja í stað þess að fara beint í sætið sitt og bíða þar til dagskráin hefst? Gestir vita kannski ekki við hverju er að búast og gætu verið óöruggir. Ef við brosum hlýlega til þeirra og heilsum þeim vingjarnlega á það örugglega sinn þátt í að þeim líði vel og finnist þeir velkomnir. Kannski hefur einhver gestur komið vegna þess að hann þáði boðsmiða. Til að komast að því væri gott að spyrja hvort þetta sé í fyrsta skipti sem hann kemur á samkomu eða hvort hann þekki einhvern í söfnuðinum. Þú gætir jafnvel boðið honum að sitja hjá þér og sjá með þér á söngbókina og Biblíuna. Þú gætir líka farið með hann í smá skoðunarferð ef minningarhátíðin er haldin í ríkissalnum. Vertu tilbúinn að svara spurningum hans eftir ræðuna. Ef söfnuðurinn þinn þarf að yfirgefa svæðið fljótt til að annar söfnuður komist að gætir þú sagt: „Það væri gaman að heyra hvað þér fannst um samkomuna. Getum við hist aftur?“ Gerðu síðan ráðstafanir til að fylgja áhuganum eftir. Öldungar ættu að vera sérstaklega vakandi fyrir því að uppörva óvirka boðbera sem mæta.
3. Hvers vegna þurfum við að taka fyrsta skrefið og bjóða gesti velkomna?
3 Þjónar Jehóva lifa í andlegri paradís og njóta gleði, friðar og einingar. Á minningarhátíðinni fá margir gestir að upplifa það með okkur í fyrsta skipti. (Sálm. 29:11; Jes. 11:6-9; 65:13, 14) Hvað situr eftir hjá gestum að minningarhátíðinni lokinni? Það fer mikið eftir því hvort við tökum fyrsta skrefið og bjóðum þá velkomna.