OBE AVỌ IVẸ SAMUẸLE

1 Nọ Sọl o whu no, nọ Devidi o zihe no obonọ ọ jọ fi ahwo Amalẹk kparobọ* ze no, ọ tẹ jọ Ziklag+ edẹ ivẹ. 2 Evaọ ẹdẹ avọ esa, ọzae jọ o te no obọ evuẹ Sọl ze avọ iwu riẹ nọ e bẹre, yọ ẹkpẹ ọ riẹe uzou. Nọ o te Devidi oma, o te kigwẹ je kiẹzẹ vovao tuotọ.

3 Devidi ọ tẹ nọe nọ: “Bovẹ who bi no ze?” O te yo nọ: “Obọ evuẹ ahwo Izrẹl mẹ vabọ no ze na.” 4 Devidi ọ tẹ nọe nọ: “Ẹvẹ eware e rrọ evaọ obei? Ivie vuẹ omẹ.” Ọzae na ọ tẹ ta nọ: “Ahwo na a dhẹ no ẹmo na no, yọ a kpe ibuobu rai no. Makọ Sọl avọ Jonatan ọmọzae riẹ a whu no.”+ 5 Devidi ọ tẹ nọ ọmoha nọ ọ wha usi na ze na nọ: “Ẹvẹ whọ rọ riẹ nọ Sọl avọ Jonatan ọmọzae riẹ a whu no?” 6 Ọmoha na ọ tẹ kẹe uyo nọ: “Nọ mẹ jọ Ugbehru Gilboa,+ mẹ tẹ ruẹ Sọl nọ ọ roma rẹrẹ ozuẹ riẹ, yọ ekẹkẹ avọ edhẹ-enyenya na e be kẹle iẹe oma no.+ 7 Nọ o kuomarẹriẹ ruẹ omẹ, o te se omẹ, me te yo nọ, ‘Mẹ na!’ 8 Ọ tẹ nọ omẹ nọ, ‘Whẹ yọ ono?’ Me te yo nọ, ‘Mẹ yọ ohwo Amalẹk.’+ 9 Ọ tẹ ta nọ, ‘Ivie, nya kẹle omẹ re who kpe omẹ no, keme edada egaga e rrọ omẹ oma, rekọ mẹ gbẹ rrọ uzuazọ ghele.’* 10 Fikiere mẹ tẹ nya kẹle iẹe, me te kpei no,+ keme mẹ riẹ nọ ọ te sae zọ họ nọ orọnọ ọ rrọ otọ yọ ọ nwoma gaga na. Kẹsena mẹ tẹ tọlọ etu-uvie* nọ ọ jọ uzou riẹ gbe ufiare nọ o jọ ugbobọ riẹ, mẹ tẹ wha ae ze se olori mẹ.”

11 Devidi ọ tẹ zaza abọ họ iwu riẹ ọ tẹ bẹre ai, ezae nọ e jọ kugbei na kpobi e tẹ bẹre iwu rai re. 12 A te je weri, be viẹ, jẹ siọ emuọriọ ba+ rite owọwọ fiki Sọl, fiki Jonatan ọmọzae riẹ, fiki ahwo Jihova, gbe fiki uwou Izrẹl,+ keme a rehọ ọgbọdọ kpe ai no.

13 Devidi ọ tẹ nọ ọmoha nọ ọ wha usi na sei na nọ: “Whẹ yọ ohwo ẹwho vẹ?” O te yo nọ: “Mẹ yọ ọmọzae ohwo Amalẹk, nọ ọ be rria Izrẹl.” 14 Devidi ọ tẹ ta kẹe nọ: “Emejabọ ozọ u gbe mu owhẹ hẹ nọ whọ rọ kpare obọ ra ro kpe ọnọ Jihova o wholo?”+ 15 Fikiere Devidi o te se ọmoha jọ, ọ tẹ ta kẹe nọ: “Nyaze re who duwu iei kpe.” O te duwu iei fihọ otọ, o te whu.+ 16 Devidi ọ tẹ ta kẹe nọ: “Azẹ ra ọ rrọ uzou obọra, keme unu obọra u se isẹri kpe owhẹ nọ, ‘Mẹ họ ọnọ o kpe ọnọ Jihova o wholo na.’”+

17 Kẹsena Devidi ọ tẹ so ole uweri nana fiki Sọl avọ Jonatan ọmọzae riẹ,+ 18 ọ tẹ ta nọ a wuhrẹ ahwo Juda ole uweri na nọ a se “Uze Na,” onọ a kere fihọ obe Jesha:+

19 “O Izrẹl, a kpe enọ i wo erru fihọ otọ evaọ eria ikpehru ra.+

Rri epanọ egba na i ro whu!

25 Rri epanọ egba na i ro whu evaọ ẹmo!

A kpe Jonatan fihọ ehru eria ikpehru ra!+

Uyoyou nọ who wo kẹ omẹ u vi uyoyou eyae.+

2 Kẹsena Devidi ọ tẹ nekpẹ mi Jihova+ nọ: “Kọ mẹ kwa kpohọ ikpewho Juda na jọ?” Jihova ọ tẹ ta kẹe nọ: “Kwa nya.” Devidi ọ tẹ nọ nọ: “Diẹse mẹ rẹ kwa kpohọ?” Ọ tẹ kẹe uyo nọ: “Kpohọ Hebrọn.”+ 2 Fikiere Devidi avọ eyae ivẹ riẹ a tẹ kwa nya, Ahinoam+ ohwo Jezrẹl na gbe Abigẹle+ ohwo Kamẹl na, ọnọ ọ jọ aye Nebale nọ o whu no. 3 Devidi ọ tẹ jẹ wha ezae nọ e jọ kugbei na lele oma,+ ezae na kpobi avọ ahwo uwou rai, a tẹ jẹ rria ikpewho nọ e wariẹ Hebrọn họ. 4 Kẹsena ezae Juda e tẹ nyaze, a tẹ jọ etẹe wholo Devidi re ọ jọ ovie kẹ uwou Juda.+

A tẹ ta kẹ Devidi nọ: “Ezae Jebẹsh-giliad họ enọ i ki Sọl.” 5 Fikiere Devidi o te vi enyukọ bru ezae Jebẹsh-giliad re a ta kẹ ae nọ: “Jọ Jihova ọ ghale owhai, keme wha dhesẹ uyoyou nọ o rẹ hiẹ hẹ kẹ olori rai Sọl nọ wha ro ki ei.+ 6 Jọ Jihova o dhesẹ uyoyou nọ o rẹ hiẹ hẹ gbe ọtẹruo kẹ owhai. Me ti dhesẹ uwowou kẹ owhai re fiki oware nana nọ wha ru na.+ 7 Enẹna wha kru obọ ga, re wha jẹ gudu, keme Sọl olori rai o whu no, yọ uwou Juda u wholo omẹ no re mẹ jọ ovie rai.”

8 Rekọ evaọ oke yena yọ Abna+ ọmọzae Nẹr, oletu ogbaẹmo Sọl, ọ rehọ Ish-boshẹt+ ọmọzae Sọl nyavrẹ kpohọ abọdekọ Mehaneyẹm+ no, 9 ọ tẹ rehọ iẹe mu ovie kẹ ahwo Giliad,+ ahwo Ashọ, Jezrẹl,+ Ifremu,+ Bẹnjamin, gbe ahwo Izrẹl soso. 10 Ikpe udhuvẹ Ish-boshẹt ọmọzae Sọl ọ jọ okenọ o zihe ruọ ovie Izrẹl, yọ ikpe ivẹ o su. Rekọ uwou Juda o jọ abọ Devidi.+ 11 Etoke* nọ Devidi ọ jọ ovie kẹ uwou Juda evaọ Hebrọn o jọ ikpe ihrẹ gbe emerae ezeza.+

12 Nọ u te oke jọ, Abna ọmọzae Nẹr avọ idibo Ish-boshẹt ọmọzae Sọl a te no Mehaneyẹm+ kpohọ Gibiọn.+ 13 Joab+ ọmọzae Zeruya+ avọ idibo Devidi a tẹ wọ lahwe re, a te zere ai evaọ ẹtẹre-ame Gibiọn; utu jọ o keria abọjọ ẹtẹre-ame na, utu odekọ o tẹ jọ abọdekọ ẹtẹre-ame na. 14 Ukuhọ riẹ Abna ọ tẹ ta kẹ Joab nọ: “Jọ emoha na a kpama re a họre* evaọ aro mai.” Joab ọ tẹ ta nọ: “Jọ a kpama.” 15 Fikiere a tẹ kpama, itu ivẹ na e tẹ salọ unu ahwo nọ a fodẹ, a tẹ fa ruọ abọdekọ. A salọ ahwo ikpegbivẹ evaọ abọ Bẹnjamin avọ Ish-boshẹt ọmọzae Sọl, gbe ahwo ikpegbivẹ evaọ udevie idibo Devidi. 16 A te kru ohwohwo uzou, a tẹ rehọ ọvuọ ọgbọdọ riẹ duwu ohwohwo abefẹ, aikpobi a te whu. Fikiere a te se oria yena nọ o rrọ Gibiọn na Hẹlkat-hazurim.

17 Ohọre nọ u lele i rie ẹdẹ yena o ga thesiwa, ukuhọ riẹ idibo Devidi a te fi Abna avọ ezae Izrẹl kparobọ. 18 Whaọ, emezae esa Zeruya+ nọ a re se Joab,+ Abishae,+ gbe Asahẹl e jariẹ; Asahẹl+ ọ jẹ hae dhẹ ohrẹ siawọ gaga wọhọ ugbosu. 19 Asahẹl o te mu Abna họ ele, yọ o je vughu rri obọze hayo ẹkpẹlobọ họ nọ o je le Abna na. 20 Nọ Abna o rri emu, ọ tẹ nọ nọ, “Asahẹl, kọ whẹ ọye?” o te yo kẹe nọ, “Ee.” 21 Abna ọ tẹ ta kẹe nọ: “Wẹriẹ obọze ra hayo ẹkpẹlobọ ra re who mu ọmoha jọ, whọ vẹ rehọ oware kpobi nọ who mi rie.” Rekọ Asahẹl ọ gwọlọ se iẹe ba ele he. 22 Fikiere Abna ọ tẹ wariẹ ta kẹ Asahẹl nọ: “Siọ omẹ ba ele. Fikieme me re ro kpe owhẹ? Kọ ovao vẹ me ti ro rri Joab oniọvo ra?” 23 Rekọ ọ rọwo se iẹe ba ele he, fikiere Abna ọ tẹ rehọ uzou ozuẹ riẹ duwu eva riẹ,+ ozuẹ na ọ tẹ lafi evaọ obọ uke riẹ; o te kie fihọ otọ, ọ tẹ nwani whu fihọ etẹe. Ohwo kpobi nọ o te oria nọ Asahẹl o whu fihọ na o ve dikihẹ dhizu omojọ evaọ etẹe.

24 Kẹsena Joab avọ Abishae a te mu Abna họ ele. Nọ ọre o je kiediwi, a te te ukpehru Amah, onọ o rẹriẹ ovao ku Gaya evaọ edhere nọ a re ro kpohọ udhude Gibiọn. 25 Ahwo Bẹnjamin a te koko wariẹ Abna họ, a tẹ jọ utu ovo je dikihẹ ehru ukpehru jọ. 26 Kẹsena Abna ọ tẹ kpaunu ta kẹ Joab nọ: “Kọ ọgbọdọ na o ti kpe ọvo ababọ eriosehọ? Kọ whọ gbẹ riẹ nọ uye ọvo u ti noi ze? Ẹvẹ u re kri te taure whọ tẹ ta kẹ ahwo na nọ a kuomarẹriẹ siọ inievo rai ba ele?” 27 Joab ọ tẹ ta kẹe nọ: “Nọ Ọghẹnẹ uzẹme na ọ rrọ uzuazọ na, whọ gbẹ hae ta ẹme he, o hai ti te ohiohiẹ odẹnotha taure ahwo na a tẹ siọ inievo rai ba ele.” 28 Joab o te kporo onware, ahwo riẹ a tẹ siọ Izrẹl ba ele, ohọre na u te kuhọ.

29 Abna avọ ahwo riẹ a tẹ nya Araba*+ na vrẹ evaọ aso yena soso, a tẹ fa Jọdan vrẹ jẹ nya ukiekpotọ na soso vrẹ,* ukuhọ riẹ a te te Mehaneyẹm.+ 30 Nọ Joab o kuomarẹriẹ siọ Abna ba ele no, o te koko ahwo na kpobi họ. Idibo Devidi nọ e jariẹ hẹ i bu te ikpegbizii, u te no Asahẹl no. 31 Rekọ idibo Devidi a fi ahwo Bẹnjamin gbe ahwo Abna kparobọ, yọ ahwo egba esa gbe udhosa (360) evaọ usu rai a whu. 32 A tẹ wọ Asahẹl,+ a te ki ei fihọ uki ọsẹ riẹ evaọ Bẹtlẹhẹm.+ Kẹsena Joab avọ ahwo riẹ a tẹ nya evaọ aso na soso, a te te Hebrọn+ nọ oke o ke no.

3 Ẹmo nọ ọ jọ udevie uwou Sọl avọ uwou Devidi o je siotọ; Devidi o te je dhe ẹgẹga,+ yọ oma o be lọhọ uwou Sọl no ẹmẹrera.+

2 Evaọ oke yena, a yẹ emezae kẹ Devidi evaọ Hebrọn.+ Amnọn+ họ ọmọ ọsosuọ riẹ, ọnọ Ahinoam+ ohwo Jezrẹl o yẹ. 3 Ọmọ avọ ivẹ riẹ kọ Kiliab, ọnọ Abigẹle+ ohwo Kamẹl na, nọ ọ jọ aye Nebale nọ o whu no o yẹ, Absalọm+ họ ọrọ avọ esa, ọnọ Meaka ọmọtẹ Talmae,+ ovie Gẹshọ o yẹ. 4 Ọrọ avọ ene kọ Adonaejah,+ ọnọ Hagit o yẹ, ọrọ avọ isoi kọ Shẹfataya, ọnọ Abital o yẹ. 5 Ọrọ avọ ezeza kọ Itriam, ọnọ Ẹgla aye Devidi o yẹ. Obọ Hebrọn a jọ yẹ emezae nana kẹ Devidi.

6 Nọ ẹmo nọ ọ jọ udevie uwou Sọl avọ uwou Devidi ọ gbẹ jọ otọ na, yọ Abna+ o bi ru nọ ọkwa riẹ evaọ uwou Sọl o bi ro dhe ẹruẹro. 7 Whaọ Sọl o wo ọse jọ vẹre nọ a re se Rizpa,+ ọmọtẹ Eyah. Ish-boshẹt+ ọ tẹ nọ Abna uwhremu na nọ: “Fikieme who ro lele ọse ọsẹ mẹ wezẹ?”+ 8 Ẹme nọ Ish-boshẹt ọ ta na ọ tẹ dha Abna eva gaga, ọ tẹ ta nọ: “Kọ mẹ yọ uzou arakọ Juda? Rite inẹnẹ na me bi ro dhesẹ uyoyou nọ o rẹ hiẹ hẹ kẹ uwou Sọl ọsẹ ra avọ inievo gbe egbẹnyusu riẹ, yọ me vivie owhẹ kẹ Devidi hi; ghele na whọ tẹ be nọ omẹ unu nẹnẹ na inọ me lele aye ru oware uyoma jọ. 9 Jọ Ọghẹnẹ ọ kẹ omẹ Abna uye je fibae* otẹrọnọ me gbe ru epanọ Jihova o duwu iyei kẹ Devidi na gba ha, inọ+ 10 o ti si uvie na no uwou Sọl, o ve ru re agbara-uvie Devidi u dikihẹ evaọ Izrẹl gbe Juda, no Dan rite Biẹ-shiba.”+ 11 Ọ sae kpahe ẹme ọvo kẹ Abna ha, keme ozọ riẹ u je mu ei.+

12 Abna ọ tẹ nwani vi enyukọ bru Devidi nọ: “Ono o wo ẹkwotọ na?” Ọ tẹ jẹ ta nọ: “Re ọvọ kugbe omẹ, mẹ vẹ te dawo ẹgba mẹ kpobi* re me ru ahwo Izrẹl kpobi ziọ abọ ra.”+ 13 Devidi ọ tẹ kẹe uyo nọ: “U woma! Mẹ te re ọvọ kugbe owhẹ. Rekọ oware ovo nọ mẹ be vuẹ owhẹ họ, whọ rẹ wha Maekal+ ọmọtẹ Sọl se omẹ nọ whọ tẹ be nyaze te ruẹ omẹ, o gbẹ rrọ ere he, whọ dawo iẹe nyaze he.” 14 Kẹsena Devidi o te vi enyukọ bru Ish-boshẹt,+ ọmọzae Sọl nọ: “Rehọ Maekal aye mẹ kẹ omẹ, ọnọ mẹ rehọ iwoliwo udhusoi (100) ahwo Filistia ru igho họ na.”+ 15 Fikiere Ish-boshẹt o te vi ahwo nyae rehọ iẹe no obọ ọzae riẹ Pọltiẹl+ ze, ọmọzae Leish. 16 Rekọ ọzae riẹ ọ tẹ jẹ nya lele iei rite ugbo obọ Bahurim, yọ ọ be viẹ nọ o bi lele iei na.+ Kẹsena Abna ọ tẹ ta kẹe nọ: “Zihe kpo!” Fikiere o te zihe kpo.

17 Evaọ oke yena, Abna o te vi uwou se ekpako Izrẹl nọ: “Oke jọ o jariẹ nọ wha jẹ gwọlọ nọ Devidi ọ jọ ovie rai. 18 Fikiere obọnana wha ru ojọ, keme Jihova ọ ta kẹ Devidi nọ: ‘Obọ Devidi odibo+ mẹ me ti ro siwi ahwo mẹ Izrẹl no obọ ahwo Filistia je no obọ ewegrẹ rai kpobi.’” 19 Kẹsena Abna o te lele ahwo Bẹnjamin ta ẹme.+ Abna ọ tẹ jẹ nya kpobọ Hebrọn re o lele Devidi ọvo ta ẹme, re ọ vuẹe oware nọ Izrẹl gbe uwou Bẹnjamin soso a rọwo nọ a ti ru.

20 Nọ Abna ọ nyabru Devidi ze evaọ Hebrọn avọ ezae udhe nọ i lele i rie, Devidi o te ru ehaa kẹ Abna avọ ezae nọ e jọ kugbei na. 21 Kẹsena Abna ọ tẹ ta kẹ Devidi nọ: “Jọ mẹ nya, re me koko ahwo Izrẹl kpobi họ bru olori mẹ ovie na ze, re a re ọvọ kugbe owhẹ, who ve ti zihe ruọ ovie kẹ ahwo kpobi nọ whọ gwọlọ.”* Fikiere Devidi o te siobọno Abna vrẹ, ọ tẹ nyavrẹ dhedhẹ.

22 Nọ ọ nwane nyavrẹ no, Joab avọ idibo Devidi a te no ẹmo ze, yọ a kwa egbo-ẹmo buobu kpozi. Oke yena Abna ọ gbẹ jọ kugbe Devidi evaọ Hebrọn ho, keme Devidi o siobọnoi vrẹ dhedhẹ no. 23 Nọ Joab+ avọ egbaẹmo nọ e jọ kugbei a te uwou, ahwo a tẹ vuẹ Joab nọ: “Abna+ ọmọzae Nẹr+ ọ nyabru ovie na ze, ovie na o te siobọnoi vrẹ dhedhẹ.” 24 Fikiere Joab ọ tẹ ruọ eva uwou bru ovie na, ọ tẹ nọe nọ: “Kinọ eme who ru na? Abna ọ nyabru owhẹ ze. Kọ fikieme who ro siobọnoi kpo omakọkọ? 25 Whọ riẹ Abna ọmọzae Nẹr! Ọ nyaze te viẹ owhẹ họ, re ọ riẹ omaa kpobi nọ who wo gbe oware kpobi nọ who bi ru.”

26 Fikiere Joab ọ tẹ nyasiọ Devidi ba, o te vi enyukọ nyai le Abna, a tẹ rehọ iẹe zihe no obonọ ọgọdọ-ame* Saera ọ rrọ ze; rekọ Devidi ọ riẹ oware ovo kpahe onana ha. 27 Nọ Abna o zihe ziọ Hebrọn,+ Joab o te sei ruọ akotọ evaọ unuẹthẹ okpẹwho na re o lele iei ọvo ta ẹme. Rekọ ọ tẹ jọ etẹe rọ ọgbọdọ duwu iei eva, o te whu;+ o ru onana fikinọ o kpe* Asahẹl oniọvo riẹ.+ 28 Nọ Devidi o yo kpahe iẹe uwhremu na, ọ tẹ ta nọ: “Jihova ọ riẹ nọ azẹ+ Abna ọmọzae Nẹr ọ rrọ omẹ avọ uvie mẹ uzou vievie he. 29 Jọ azẹ na ọ jọ uzou Joab+ gbe uwou ọsẹ riẹ soso. Jọ ọzae nọ ọ be mọ ẹyao ame-oma nọ o re hwẹ no oma ze ẹsikpobi,+ hayo ọmoti,+ hayo ọzae nọ ọ rẹ rọ ọkpọ-olulu* ro ru iruo, hayo ọnọ a rẹ rọ ọgbọdọ kpe, hayo ọnọ ọ be ruẹ emu re he ọ kare uwou Joab ho!”+ 30 Ere Joab avọ Abishae+ a ro kpe Abna+ fiki Asahẹl oniọvo rai nọ o kpe evaọ ẹmo nọ a fi+ evaọ Gibiọn.

31 Kẹsena Devidi ọ tẹ ta kẹ Joab gbe ahwo nọ a rrọ kugbei kpobi nọ: “Wha bẹre iwu rai jẹ rọ ehọ-ekpa* zuo, re wha weri Abna.” Devidi ovie na ọ tẹ jẹ nya lele ehwa nọ a be rọ wọ ori Abna vrẹ na. 32 A te ki Abna fihọ Hebrọn; ovie na ọ tẹ jẹ viẹ gaga evaọ oria uki Abna, ahwo na kpobi a te muhọ ẹviẹ re. 33 Ovie na ọ tẹ jẹ so ole uweri nana kpahe Abna, inọ:

“Kọ Abna o re whu uwhu ohwo nọ o wo areghẹ hẹ?

34 A gba abọ ra ha,

Yọ egbregba* e jọ awọ ra ha.

Who whu wọhọ ohwo nọ igbulegbu* i kpe.”+

Fikiere ahwo na kpobi a tẹ wariẹ muhọ ẹviẹ fiki riẹ.

35 Uwhremu na ahwo na kpobi a tẹ nyaze te kẹ Devidi ebrẹdi re a sasa iẹe oma* evaọ okenọ oke u ri kpo ho, rekọ Devidi o te duwu iyei nọ: “Jọ Ọghẹnẹ ọ kẹ omẹ uye je fibae* otẹrọnọ mẹ tẹ rọ ebrẹdi hayo oware jọ kpobi te unu taure ọre o te ti kiediwi!”+ 36 Ahwo na kpobi a muẹrohọ onana, yọ o were rai. Onana o were ahwo na kpobi wọhọ epanọ eware efa kpobi nọ ovie na o ru e were rai. 37 Fikiere ahwo na kpobi gbe Izrẹl soso a tẹ riẹ evaọ ẹdẹ yena nọ, orọnikọ ovie na họ ọnọ ọ ta nọ a kpe Abna ọmọzae Nẹr hẹ.+ 38 Kẹsena ovie na ọ tẹ ta kẹ idibo riẹ nọ: “Kọ wha gbẹ riẹ nọ oletu gbe ohwo ologbo o whu evaọ Izrẹl nẹnẹ na?+ 39 Mẹ wọhọ ọyẹlẹ nẹnẹ na dede nọ mẹ yọ ovie nọ a wholo,+ keme ezae nana, emezae Zeruya na,+ e geva hrọ.+ Jọ Jihova ọ hwosa kẹ orumuomu na wọhọ epaọ umuomu riẹ.”+

4 Nọ Ish-boshẹt+ ọmọzae Sọl* o yo nọ Abna o whu no evaọ Hebrọn,+ udu u te noi awọ,* ahwo Izrẹl kpobi a tẹ jẹ ruawa. 2 Ezae ivẹ jọ e jariẹ nọ i wuzou egbaẹmo ọmọzae Sọl nọ e rẹ wọ nyae kwa eware ahwo: odẹ ọjọ Beanah, odẹ ọdekọ Rikab. Ezae nana yọ emezae Rimọn, ohwo Biẹrọt ọrọ orua Bẹnjamin. (Keme a jẹ hai kele Biẹrọt+ kugbe orua Bẹnjamin. 3 Ahwo Biẹrọt na a dhẹ kpohọ Gitiam,+ yọ a be rria obei wọhọ erara rite ẹdẹ inẹnẹ na.)

4 Whaọ Jonatan+ ọmọzae Sọl o wo ọmọzae jọ nọ ọ ko awọ.+ Ikpe isoi ọ jọ okenọ usi na u do no obọ Jezrẹl+ ze nọ a kpe Sọl avọ Jonatan no. Aye nọ ọ jẹ yọrọ iẹe ọ tẹ wọe be dhẹ, rekọ epanọ ọ jẹ rọ dhẹ ọwhọwhọ avọ ozọ na, ọmọ na o te kie, u te ru nọ o ro zihe ruọ ọmo.* Odẹ riẹ Mẹfiboshẹt.+

5 Rikab avọ Beanah, emezae Rimọn ohwo Biẹrọt na, a te kpobọ uwou Ish-boshẹt evaọ okenọ uvo o rọ jọ gaga, yọ o kiẹzẹ bi serihọ. 6 A ruọ eva uwou na wọhọ ẹsenọ a gwọlọ whẹ iwhiti, a tẹ rọ ọgbọdọ duwu eva riẹ; kẹsena Rikab avọ Beanah+ oniọvo riẹ a tẹ dhẹ. 7 Evaọ okenọ a ruọ eva uwou na, yọ Ish-boshẹt o kiẹzẹ ehwa evaọ obọ ukpẹ riẹ, a te duwu iei kpe, a te bru uzou riẹ no. Kẹsena a tẹ wọ uzou na, a tẹ nya aso na soso evaọ edhere nọ o kpobọ Araba* na. 8 A tẹ wọ uzou Ish-boshẹt+ bru Devidi ovie na evaọ obọ Hebrọn, a tẹ ta kẹe nọ: “Uzou Ish-boshẹt ọmọzae Sọl ọwegrẹ ra+ nọ ọ jẹ gwọlọ uzuazọ* ra na ọna.+ Jihova o ru Sọl avọ uyẹ riẹ kele no nẹnẹ na kẹ olori mẹ ovie na.”

9 Rekọ Devidi ọ tẹ kpahe kẹ Rikab avọ Beanah oniọvo riẹ, emezae Rimọn ohwo Biẹrọt na nọ: “Nọ Jihova nọ o siwi omẹ* no uye kpobi ọ rrọ uzuazọ na,+ 10 okenọ ohwo jọ ọ nyaze te vuẹ omẹ nọ, ‘Sọl o whu no,’+ bi roro nọ emamọ usi ọ wha se omẹ, me te kru ei, me te kpei no+ evaọ Ziklag. Osa nọ mẹ hwa kẹ ohwo nọ ọ wha usi na ze oye! 11 Kabikọ ẹsenọ ezae imuomu i kpe ohwo okiẹrẹe evaọ uwou obọriẹ evaọ ehwa riẹ! Kọ u gbe fo nọ mẹ rẹ jọ obọ rai nekpẹ azẹ riẹ,+ me ve kpe owhai no otọakpọ na no?” 12 Devidi ọ tẹ ta kẹ emoha na nọ a kpe ai no.+ A te bru abọ gbe awọ rai no, a te thuru ai veghe+ evaọ akotọ ẹtẹre-ame nọ ọ rrọ Hebrọn. Rekọ a tẹ wọ uzou Ish-boshẹt, a te ki ei fihọ oria nọ a ki Abna fihọ evaọ Hebrọn.

5 Nọ u te oke jọ, erua Izrẹl kpobi e tẹ nyabru Devidi ze evaọ Hebrọn,+ a tẹ ta kẹe nọ: “Rri! Mai yọ ugbonwa gbe uwo obọra.*+ 2 Evaọ oke nọ u kpemu nọ Sọl ọ jọ ovie mai, whẹ họ ọnọ ọ jẹ hae wha ahwo Izrẹl kpohọ ẹmo.*+ Yọ Jihova ọ ta kẹ owhẹ nọ: ‘Whọ te rẹrote ahwo mẹ Izrẹl jẹ jọ osu Izrẹl.’”+ 3 Fikiere ekpako Izrẹl kpobi e tẹ nyabru ovie na ze evaọ Hebrọn, Devidi ovie na ọ tẹ jọ Hebrọn re ọvọ kugbe ai+ evaọ aro Jihova. Kẹsena a te wholo Devidi re ọ jọ ovie Izrẹl.+

4 Ikpe ọgba Devidi ọ jọ okenọ o zihe ruọ ovie, yọ ikpe udhuvẹ o su.+ 5 Ikpe ihrẹ gbe emerae ezeza ọ jọ Hebrọn su Juda, ọ tẹ jọ Jerusalẹm+ su Izrẹl soso gbe Juda ikpe ọgbagbesa. 6 Ovie na avọ ahwo riẹ a tẹ wọ ẹmo kpohọ Jerusalẹm re a họre ahwo Jebus+ nọ a jẹ rria ẹkwotọ na. A je se Devidi ẹkoko nọ: “Whọ te sai te obonẹ vievie he! Makọ enọ i tuaro gbe enọ e ko a ti le owhẹ.” A je roro nọ, ‘Devidi ọ te sai te obonẹ vievie he.’+ 7 Rekọ Devidi ọ tẹ vẹruọ oria omofọwẹ Zayọn, onọ a bi se Okpẹwho Devidi+ enẹna. 8 Devidi ọ tẹ ta evaọ ẹdẹ yena nọ: “Jọ ahwo nọ a be wọ ohọre bru ahwo Jebus na a nya orọ eghogho-ame na re a kpe ‘enọ e ko gbe enọ i tuaro na no,’ enọ Devidi* o mukpahe.” Oyejabọ nọ a rẹ rọ ta nọ: “Enọ i tuaro gbe enọ e ko na e rẹ ruọ eva uwou na vievie he.” 9 Kẹsena Devidi o te mu oria omofọwẹ na họ ẹria, yọ a je sei* Okpẹwho Devidi; Devidi o te mu ei họ ẹbọ wariẹ, no umuo Ukpehru*+ na vrẹ kpobọ eva.+ 10 Ere Devidi o je ro dhe ẹruẹro,+ yọ Jihova Ọghẹnẹ olori egbaẹmo na ọ jọ kugbei.+

11 Haeram ovie+ Taya o te vi enyukọ bru Devidi, o te je vi ite-ire sida,+ ewena ire, gbe enọ e rẹ rọ itho bọ iwou re a ma igbẹhẹ, a te mu uwou* họ ẹbọ kẹ Devidi.+ 12 Devidi ọ riẹ nọ Jihova ọ rehọ e riẹ dikihẹ gaga no re ọ jọ ovie Izrẹl,+ ọ tẹ jẹ kpare uvie+ riẹ kpehru no fiki ahwo Riẹ, Izrẹl.+

13 Devidi ọ jọ Jerusalẹm rehọ eyae gbe ese+ efa nọ o no Hebrọn ze no, a te yẹ emezae gbe emetẹ efa kẹe.+ 14 Edẹ emọ nọ a yẹ kẹe evaọ Jerusalẹm họ: Shamua, Shobab, Netan,+ Solomọn,+ 15 Ibha, Elaeshua, Nifẹg, Jefaya, 16 Ẹlishama, Eliada, gbe Ẹlifelẹt.

17 Nọ ahwo Filistia a yo nọ a wholo Devidi no re ọ jọ ovie Izrẹl,+ ahwo Filistia kpobi a tẹ wọ ze te gwọlọ Devidi.+ Nọ Devidi o yo kpahe iẹe, ọ tẹ nya kpobọ oria omofọwẹ na.+ 18 Kẹsena ahwo Filistia na a tẹ nyaze, a tẹ vaha oma fihọ Ukiekpotọ* Rẹfeyẹm+ na soso. 19 Devidi ọ tẹ nekpẹ mi Jihova+ nọ: “Kọ mẹ nyae họre ahwo Filistia na? Kọ whọ te rehọ ae họ omẹ obọ?” Jihova ọ tẹ ta kẹ Devidi nọ: “Nya, mẹ te rehọ ahwo Filistia na họ owhẹ obọ.”+ 20 Fikiere Devidi ọ tẹ nyaziọ Bale-perezim, ọ tẹ jọ etẹe kpe ai. Ọ tẹ ta nọ: “Jihova o fi ewegrẹ mẹ kparobọ+ kẹ omẹ no wọhọ ame nọ o zurie ugbẹhẹ fihọ otọ.” Oyejabọ nọ o ro se odẹ oria yena Bale-perezim.*+ 21 Ahwo Filistia na a tẹ dhẹ siọ emedhọ rai ba etẹe, Devidi avọ ahwo riẹ a tẹ kwa ae vrẹ.

22 Uwhremu na, ahwo Filistia a tẹ wariẹ wọ ze, a tẹ vaha oma fihọ Ukiekpotọ* Rẹfeyẹm+ na soso. 23 Devidi ọ tẹ nekpẹ mi Jihova, rekọ Ọ tẹ kẹe uyo nọ: “Whọ nya ovavo bru ai hi. Ukpoye, nya wariẹ họ kpobọ emu rai, re whọ vẹruọ ae evaọ aro ire beka na. 24 Nọ who te yo edo onya ahwo evaọ ehru ire beka na, whọ vẹ jowọ vẹrẹ vẹrẹ, keme Jihova ọ karo kẹ owhẹ no re o kpe ogbaẹmo ahwo Filistia na.” 25 Fikiere Devidi o te ru epanọ Jihova o jie uzi kẹe na dẹẹ, o te kpe ahwo Filistia+ na kuku otọ no Giba+ rite ugbo obọ Gizẹ.+

6 Devidi ọ tẹ wariẹ koko egbaẹmo kpobi nọ e mae riẹ ẹmo efi evaọ Izrẹl họ, ezae idu ọgba (30,000). 2 Kẹsena Devidi avọ ezae nọ e jọ kugbei kpobi a tẹ wọ re a kpohọ Bale-ijuda re a rehọ etehe ọvọ Ọghẹnẹ uzẹme na+ no obei ze, onọ ahwo a jẹ hae jọ aro riẹ bo se Jihova olori egbaẹmo,+ ọnọ ọ keria agbara-uvie riẹ evaọ obehru* chẹrub na.+ 3 Rekọ a tẹ wọ etehe ọvọ Ọghẹnẹ uzẹme na họ ehru akẹkẹ ọkpokpọ+ re a wọe no uwou Abinadab+ nọ o rrọ ukpehru na; Uzah avọ Ahaeyo, emezae Abinadab a te je lele akẹkẹ ọkpokpọ na.

4 Ere a rọ wọ etehe ọvọ Ọghẹnẹ uzẹme na no uwou Abinadab nọ o rrọ ukpehru na, yọ Ahaeyo ọ kobaro kẹ etehe ọvọ na. 5 Devidi avọ uwou Izrẹl soso a te je gbe ehaa evaọ aro Jihova avọ oghoghẹrẹ ekwakwa ikporakporo nọ a rehọ ure junipa ru, ekpata-ifi, oghẹrẹ ekpata-ifi efa,+ ejẹjẹ,+ isistrọm, gbe igogo.+ 6 Rekọ nọ a te oria Nekọn nọ a rẹ jọ si ibi no igbe ekakọ, Uzah ọ tẹ rriẹ obọ riẹ rri etehe ọvọ Ọghẹnẹ uzẹme na, o te kru ei,+ keme iruẹ na i je ti gele etehe ọvọ na kie. 7 Fikiere Jihova o te mu ofu gaga kẹ Uzah, Ọghẹnẹ uzẹme na ọ tẹ tehe iẹe kpe fihọ otọ+ evaọ etẹe fiki adhẹẹ nọ o dhesẹ hẹ,+ o te whu fihọ akotọ etehe ọvọ Ọghẹnẹ uzẹme na. 8 Rekọ eva e tẹ dha Devidi fikinọ Jihova o mu ofu ọgaga kẹ Uzah; yọ a bi se oria yena Pirẹz-uzah* rite ẹdẹ inẹnẹ na. 9 Fikiere ozọ Jihova+ u te mu Devidi evaọ ẹdẹ yena, ọ tẹ ta nọ: “Ẹvẹ etehe ọvọ Jihova ọ sae te rọ ziọ obomẹ?”+ 10 O gbẹ ruọ Devidi oma re ọ wọ etehe ọvọ Jihova na ziọ oria nọ ọ jẹ rria evaọ Okpẹwho Devidi+ hi. Ukpoye, Devidi ọ tẹ ta nọ a wọe kpohọ uwou Obẹd-idọm,+ ohwo Gat na.

11 Etehe ọvọ Jihova na ọ tẹ jọ uwou Obẹd-idọm ohwo Gat na emerae esa, Jihova ọ tẹ jẹ ghale Obẹd-idọm avọ ahwo uwou riẹ kpobi.+ 12 A tẹ vuẹ Devidi ovie na nọ: “Binọ Jihova ọ be ghale uwou Obẹd-idọm gbe eware kpobi nọ o wo fiki etehe ọvọ Ọghẹnẹ uzẹme na.” Fikiere Devidi ọ tẹ nya re ọ wọ etehe ọvọ Ọghẹnẹ uzẹme na no obọ uwou Obẹd-idọm ziọ Okpẹwho Devidi avọ oghọghọ.+ 13 Nọ ahwo nọ a wọ+ etehe ọvọ Jihova na a zare igbawọ ezeza no, ọ tẹ rehọ eruẹ gbe arao ọpoporiẹ dhe idhe.

14 Devidi ọ jẹ rehọ ẹgba riẹ kpobi gbile evaọ aro Jihova; evaọ oke yena kpobi yọ Devidi o ku ẹfọd nọ a rọ ohọ-olọlọhọ ko họ.+ 15 Devidi avọ uwou Izrẹl soso a tẹ jẹ wọ etehe ọvọ+ Jihova na ze avọ edo oghọghọ+ yọ a bi kporo onware.+ 16 Rekọ nọ a wọ etehe ọvọ Jihova te Okpẹwho Devidi no, Maekal+ ọmọtẹ Sọl ọ tẹ jọ unwido rri ziọ otọ, ọ tẹ ruẹ Devidi ovie na nọ o bi duola je bi gbile evaọ aro Jihova; ọ tẹ jẹ jẹe kufiẹ evaọ udu riẹ.+ 17 Ere a rọ rehọ etehe ọvọ Jihova na ze, a tẹ wọe fihọ oria nọ a ruẹrẹhọ kẹe evaọ obeva uwou-udhu nọ Devidi ọ bọ kẹe.+ Kẹsena Devidi o te dhe idhe emahọ+ gbe idhe ọriẹyeri+ evaọ aro Jihova.+ 18 Nọ Devidi o dhe idhe emahọ gbe idhe ọriẹyeri na no, ọ tẹ rehọ odẹ Jihova olori egbaẹmo lẹ ẹro eghale kẹ ahwo na. 19 U no ere no, ọ ghale ebrẹdi nọ a ru gheghelie wọhọ ẹmẹro, ikeki ideti,* gbe ikeki resin kẹ ahwo na kpobi, kẹ ogbotu ahwo Izrẹl soso, te ọzae te aye, kẹsena ahwo na kpobi a te kpohọ ọvuọ uwou riẹ.

20 Nọ Devidi o zihe kpo re ọ lẹ ẹro eghale kẹ ahwo uwou riẹ, Maekal+ ọmọtẹ Sọl ọ tẹ nyaze ti zere iei. Ọ tẹ ta nọ: “Rri epanọ ovie Izrẹl o si ọghọ no omariẹ okenọ ọ ba oma fihọ nẹnẹ evaọ iraro idibo-emetẹ idibo riẹ, nwane wọhọ epanọ ohwo ogheghẹ ọ rẹ ba oma fihọ evaọ ẹgbede!”+ 21 Fikiere Devidi ọ tẹ ta kẹ Maekal nọ: “Aro Jihova mẹ jọ je gbe ehaa, ọnọ ọ salọ omẹ viukpọ ọsẹ ra avọ ahwo uwou riẹ soso, ọ tẹ jẹ rehọ omẹ mu osu ahwo Jihova, Izrẹl.+ Fikiere, me re gbe ehaa evaọ aro Jihova, 22 yọ me ti tube hrẹ omamẹ kpotọ vi enẹ je tube rri omamẹ kakao dede. Rekọ ẹkwoma idibo-emetẹ nọ whọ fodẹ na a te rọ kẹ omẹ orro.” 23 Fikiere Maekal+ ọmọtẹ Sọl o yẹ ọmọ bọo ẹdẹ uwhu riẹ hẹ.

7 Nọ ovie na o mu uwou*+ riẹ họ ẹria no, yọ Jihova o ru rie wo omofọwẹ evaọ obọ ewegrẹ nọ e wariẹ e riẹ họ no, 2 ovie na ọ tẹ ta kẹ Netan+ ọruẹaro na nọ: “Whaọ mẹ be rria uwou ire sida,+ yọ etehe ọvọ Ọghẹnẹ uzẹme na ọ rrọ evaọ uwou-udhu nọ a rehọ ehọ bọ.”+ 3 Netan ọ tẹ kpahe kẹ ovie na nọ: “Nya re who ru oware kpobi nọ o rrọ owhẹ udu, keme Jihova ọ rrọ kugbe owhẹ.”+

4 Evaọ asoaso yena, ẹme Jihova o te bru Netan ze, inọ: 5 “Nya re whọ ta kẹ Devidi odibo mẹ nọ, ‘Enẹ Jihova ọ ta: “Kọ whọ rẹ bọ uwou kẹ omẹ nọ mẹ rẹ rria?+ 6 Mẹ re rria uwou ẹdẹvo ho anwẹnọ mẹ rọ rehọ ahwo mẹ Izrẹl no Ijipti ze rite inẹnẹ na,+ rekọ evaọ uwou-udhu+ mẹ be jọ no* oria ruọ oria. 7 Evaọ etoke nọ me je ro lele ahwo Izrẹl* kpobi nya na, kọ u wo ẹdẹ jọ nọ mẹ nọ isu erua Izrẹl, enọ me ro mu re a rẹrote ahwo mẹ Izrẹl inọ, ‘Fikieme wha gbẹ re bọ uwou ire sida kẹ omẹ hẹ?’”’ 8 Fikiere ta eme nana kẹ Devidi odibo mẹ inọ, ‘Enẹ Jihova olori egbaẹmo ọ ta: “Mẹ rehọ owhẹ no obọ ẹwọ ze, no obọ igodẹ nọ who je su ze,+ re whọ jọ osu kẹ ahwo mẹ Izrẹl.+ 9 Mẹ te jọ kugbe owhẹ evaọ oria kpobi nọ whọ nya,+ yọ me ti kpe ewegrẹ ra kpobi no kẹ owhẹ;+ me ti ru owhẹ wo odẹ ulogbo+ wọhọ odẹ ikpahwo otọakpọ na. 10 Mẹ te kẹ ahwo mẹ Izrẹl oria nọ a rẹ rria, a te rria etẹe yọ a gbe ti kpokpo ai ofa ha; ahwo omuomu a ti gbe kienyẹ ai ofa ha wọhọ epanọ a je ru ai evaọ oke nọ u kpemu,+ 11 no anwọ oke nọ mẹ rọ rehọ ibruoziẹ mu+ kẹ ahwo mẹ Izrẹl ze. Me ti ru owhẹ wo omofọwẹ evaọ obọ ewegrẹ ra kpobi.+

“‘“U te no ere no, Jihova ọ vuẹ owhẹ no inọ Jihova ọ te bọ uwou kẹ owhẹ.*+ 12 Okenọ edẹ ra i te re no,+ nọ who je whu wọhọ* esẹ-esẹ ra no, mẹ vẹ te rehọ ọmọ* ra mu, ọmọzae obọra,* yọ me ti ru uvie riẹ dikihẹ gaga.+ 13 Ọye họ ọnọ ọ te bọ uwou kẹ odẹ mẹ,+ yọ mẹ te rehọ agbara-esuo uvie riẹ dikihẹ gaga bẹdẹ bẹdẹ.+ 14 Mẹ te jọ ọsẹ riẹ, ọ vẹ te jọ ọmọzae mẹ.+ Nọ o te ru thọ, mẹ te rehọ ọkpọ ahwo gbe eviaviẹ emọ ahwo*+ rọ whọku ei. 15 Mẹ te siọ uyoyou mẹ nọ o rẹ hiẹ hẹ ba edhesẹ kẹe he, wọhọ epanọ mẹ se riẹ ba edhesẹ kẹ Sọl,+ ọnọ me si no aro ra. 16 Uwou ra gbe uvie ra o te jọ gbẹsinẹdẹ bẹdẹ bẹdẹ evaọ aro ra; agbara-uvie ra u ti dikihẹ gaga bẹdẹ bẹdẹ.”’”+

17 Netan ọ tẹ ta eme nana kpobi gbe eruẹaruẹ nana kpobi kẹ Devidi.+

18 Fikiere Devidi ovie na ọ tẹ ruọ eva, ọ tẹ keria aro Jihova, ọ tẹ ta nọ: “Kọ mẹ yọ ono, O Jihova Olori nọ Ọ Mai Kpehru na? Kọ amono họ ahwo uwou mẹ nọ who ro ru eware nana kpobi kẹ omẹ?+ 19 Whọ jọ etẹe serihọ họ, O Jihova Olori nọ Ọ Mai Kpehru na, whọ tẹ jẹ ta kpahe eware nọ e te via kẹ uwou odibo ra evaọ obaro thethabọ; onana yọ ujaje* kẹ ahwo-akpọ kpobi, O Jihova Olori nọ Ọ Mai Kpehru na. 20 Kọ eme ọfa Devidi odibo ra ọ rẹ gbẹ sae ta, kpakiyọ whọ riẹ omẹ te otọ,+ O Jihova Olori nọ Ọ Mai Kpehru na? 21 Who ru eware ilogbo nana kpobi fiki ẹme ra gbe fikinọ o rọwokugbe udu* ra, yọ whọ fere rai via kẹ odibo ra no.+ 22 Onana u dhesẹ nọ whọ ginẹ rrọ ruaro,+ O Jihova Olori nọ Ọ Mai Kpehru na. Ohwo nọ ọ wọhọ owhẹ ọ rrọ họ,+ u te no owhẹ no Ọghẹnẹ ọfa ọ rrọ họ;+ eware kpobi nọ ma rọ ezọ mai yo e kẹ imuẹro onana. 23 Kọ orẹwho ọfa vẹ evaọ otọakpọ na o wọhọ Izrẹl, ahwo ra?+ Ọghẹnẹ ọ nya, ọ tẹ ta ai no igbo+ fikinọ ahwo riẹ a rrọ, ọ tẹ rọ ẹkwoma ikpeware gbe eware nọ i re mu ọwhewhe nọ o ru kẹ ai+ wo odẹ kẹ omariẹ.+ Who le erẹwho na gbe eghẹnẹ rai no kẹ ahwo ra nọ whọ ta no igbo Ijipti ze kẹ omara. 24 Who ru ahwo ra Izrẹl fihọ ahwo obọra no bẹdẹ bẹdẹ;+ whẹ, O Jihova, who zihe ruọ Ọghẹnẹ rai no.+

25 “Enẹna, O Jihova Ọghẹnẹ, ru eyaa nọ whọ ya kpahe odibo ra avọ uwou riẹ na gba bẹdẹ bẹdẹ, re who ru epanọ whọ ya na gba ẹrẹrẹe.+ 26 Jọ a kpare odẹ ra kpehru bẹdẹ bẹdẹ+ re ahwo a ruẹse ta nọ, ‘Jihova olori egbaẹmo họ Ọghẹnẹ Izrẹl,’ yọ ajọ uwou Devidi odibo ra u dikihẹ gaga evaọ aro ra.+ 27 Keme whẹ, Jihova olori egbaẹmo, Ọghẹnẹ Izrẹl, who rovie oware jọ via kẹ odibo ra no nọ whọ rọ ta nọ, ‘Mẹ te bọ uwou kẹ owhẹ.’*+ Oyejabọ nọ odibo ra o ro wo udu be lẹ olẹ nana se owhẹ na. 28 Avro ọ riẹ hẹ, O Jihova Olori nọ Ọ Mai Kpehru na, whẹ họ Ọghẹnẹ uzẹme na, eme ra uzẹme,+ yọ whọ ya eyaa nọ who ti ru eware iwoma nana kẹ odibo ra. 29 Fikiere, jọ o ruọ owhẹ re whọ ghale uwou odibo ra, jọ uwou odibo ra o jọ bẹdẹ bẹdẹ evaọ aro ra;+ keme whẹ, O Jihova Olori nọ Ọ Mai Kpehru na, whọ ya eyaa na no, jọ eghale ra i te uwou odibo ra bẹdẹ bẹdẹ.”+

8 Nọ oke jọ o vrẹ no, Devidi o te lele ahwo Filistia họre,+ o te fi ai kparobọ,+ Devidi o te mi ahwo Filistia na ẹwho Mẹtẹg-ama.

2 Nọ o fi ahwo Moab kparobọ,+ ọ tẹ rehọ ai kiẹzẹ otọ, ọ tẹ rehọ ufi ma oria nọ a kiẹzẹ na. Ọ rehọ ufi na ma isiava re a kpe ahwo nọ a rrọ oria nọ ọ ma na no, ọ tẹ ma ẹsiẹvo ọfa re a siọ ahwo nọ a rrọ oria nọ ọ ma na ba uzuazọ.+ Ahwo Moab na a te zihe ruọ idibo Devidi, a tẹ jẹ hwa azọhọ kẹe.+

3 Devidi o fi Hadẹdiza ọmọzae Rihọb ovie Zoba+ kparobọ okenọ Hadẹdiza ọ jọ edhere jẹ nyai ru epanọ ọ rẹ rọ wariẹ wo udu-esuo riẹ evaọ obọ Ethẹ Yufretis na.+ 4 Devidi o te mu edhẹ-enyenya odu ọvo gbe egba ihrẹ (1,700) riẹ rehọ avọ isoja owotọ idu udhe (20,000). Kẹsena Devidi o te wiri awọ enyenya ekẹkẹ na kpobi kiọkọ udhusoi (100) ọvo.+

5 Nọ ahwo Siria obọ Damaskọs+ a nyaze ti fiobọhọ kẹ Hadẹdiza ovie Zoba, Devidi o te kpe ahwo Siria idu udhegbivẹ (22,000).+ 6 Kẹsena Devidi o te fi itu isoja sa-sa họ Damaskọs ọrọ Siria, ahwo Siria na a te zihe ruọ idibo Devidi, a tẹ jẹ hwa azọhọ kẹe. Jihova ọ jẹ kẹ Devidi obokparọ* evaọ oria kpobi nọ ọ nya.+ 7 U no ere no, Devidi o te mi idibo Hadẹdiza ejese igoru igheghelie nọ e jarae obọ, ọ tẹ rehọ ai ziọ Jerusalẹm.+ 8 Devidi ovie na ọ jọ Bita gbe Bẹrotae, ikpewho Hadẹdiza kwa ekọpa buobu rehọ.

9 Whaọ Toae ovie Hemat+ o te yo nọ Devidi o fi ogbaẹmo Hadẹdiza soso kparobọ no.+ 10 Fikiere Toae o te vi Joram ọmọzae riẹ bru Devidi ovie na re ọ nọe epanọ eware e rrọ kẹe, re o je yere iei fikinọ ọ họre Hadẹdiza je fi ei kparobọ no (keme Hadẹdiza ọ jẹ hai fi Toae ẹmo gaga), yọ ọ wha ekwakwa isiliva, igoru, gbe ekọpa ze. 11 Devidi ovie na o te ru eware nana họ ọrẹri kẹ Jihova, wọhọ epanọ o ru isiliva gbe igoru nọ ọ rehọ no obọ erẹwho kpobi nọ o fi kparobọ ze:+ 12 no obọ Siria gbe Moab ze,+ no obọ ahwo Ammọn, ahwo Filistia,+ gbe ahwo Amalẹk ze,+ jegbe eware nọ ọ kwa mi Hadẹdiza+ ọmọzae Rihọb ovie Zoba. 13 Devidi o te je wo odẹ kẹ omariẹ nọ o zihe no obọ Ukiekpotọ Uwhei+ ze, obonọ ọ jọ kpe ahwo Edọm idu ikpegberee (18,000). 14 O te fi itu isoja sa-sa họ Edọm. Oria kpobi evaọ Edọm o fi itu isoja sa-sa họ, ahwo Edọm kpobi a te zihe ruọ idibo Devidi.+ Jihova ọ jẹ kẹ Devidi obokparọ* evaọ oria kpobi nọ ọ nya.+

15 Devidi o te gbe je su Izrẹl soso,+ yọ Devidi o je bru uvioziẹ kẹ ahwo riẹ+ kpobi avọ ẹrẹreokie.+ 16 Joab+ ọmọzae Zeruya ọ jọ oletu ogbaẹmo na, Jehoshafat+ ọmọzae Ahaelọd ọ tẹ jọ ọnọ o re kere eware fihọ otọ. 17 Zedọk+ ọmọzae Ahaetọb avọ Ahimẹlẹk ọmọzae Abayata a jọ izerẹ, Seraya ọ tẹ jọ okere-obe. 18 Benaya+ ọmọzae Jehoyada o wuzou ahwo Kẹrẹt gbe ahwo Pẹlẹt+ na. Emezae Devidi e tẹ jọ isu nọ i wuzou.*

9 Kẹsena Devidi ọ tẹ nọ nọ: “Kọ ohwo jọ o gbe kiọkọ uwou Sọl nọ mẹ rẹ sai dhesẹ uyoyou nọ o rẹ hiẹ hẹ kẹ fiki Jonatan?”+ 2 Whaọ u wo odibo uwou Sọl jọ nọ a re se Zaeba.+ Fikiere a te sei se Devidi, ovie na ọ tẹ nọe nọ: “Kọ whẹ họ Zaeba?” O te yo nọ: “Mẹ yọ odibo ra.” 3 Ovie na ọ tẹ ta nọ: “Kọ ohwo jọ o gbe kiọkọ uwou Sọl nọ mẹ rẹ sai dhesẹ uyoyou Ọghẹnẹ nọ o rẹ hiẹ hẹ kẹ?” Zaeba ọ tẹ kẹ ovie na uyo nọ: “Ọmọzae Jonatan jọ ọ gbẹ riẹ; ọ ko awọ ivẹ.”+ 4 Ovie na ọ tẹ nọe nọ: “Bovẹ ọ rrọ?” Zaeba ọ tẹ kẹ ovie na uyo nọ: “Ọ rrọ obọ uwou Meka+ ọmọzae Amiẹl evaọ obọ Lo-diba.”

5 Devidi ovie na ọ tẹ nwane ta nọ a nyae rehọ iẹe ze, a tẹ rehọ iẹe no obọ uwou Meka ọmọzae Amiẹl evaọ Lo-diba ze. 6 Nọ Mẹfiboshẹt ọmọzae Jonatan ọmọzae Sọl ọ nyabru Devidi ze, ọ tẹ nwani kigwẹ vovao tuotọ je kiẹzẹ vovao tuotọ. Devidi o te sei nọ: “Mẹfiboshẹt!” o te yo nọ: “Odibo ra ọna.” 7 Devidi ọ tẹ ta kẹe nọ: “Jọ ozọ u mu owhẹ hẹ, keme mẹ te siọ uyoyou nọ o rẹ hiẹ hẹ ba edhesẹ+ kẹ owhẹ hẹ fiki Jonatan ọsẹ ra, me ti zihe etọ Sọl ọsẹ-ologbo ra kpobi kẹ owhẹ, yọ whọ te hae jọ emẹjẹ mẹ re emu* ẹsikpobi.”+

8 Fikiere o te kiẹzẹ vovao tuotọ, ọ tẹ ta nọ: “Kọ ono họ odibo ra, nọ who ro muẹrohọ* omẹ nọ ọ wọhọ arakọ nọ o whu+ no na?” 9 Ovie na ọ tẹ ta nọ a se Zaeba, odibo Sọl ze, ọ tẹ ta kẹe nọ: “Mẹ be rehọ eware kpobi nọ e rrọ erọ Sọl gbe uviuwou riẹ kpobi kẹ ọmọ-uruọmọ* olori ra.+ 10 Whẹ avọ emezae ra gbe idibo ra wha te hae kọ eware fihọ otọ na kẹe, wha ve je vu ai re wha rehọ emu kẹ ahwo uwou ọmọ-uruọmọ* olori ra nọ a rẹ re. Rekọ Mẹfiboshẹt ọmọ-uruọmọ* olori ra ọ te hae jọ emẹjẹ mẹ re emu ẹsikpobi.”+

Whaọ Zaeba o wo emezae ikpegbisoi gbe idibo udhe.+ 11 Kẹsena Zaeba ọ tẹ ta kẹ ovie na nọ: “Odibo ra o ti ru oware kpobi nọ olori mẹ ovie na o jie uzi kẹ odibo riẹ nọ o ru.” Fikiere Mẹfiboshẹt ọ tẹ jẹ hae re emu evaọ emẹjẹ Devidi* wọhọ omọvo emezae ovie na jọ. 12 Whaọ Mẹfiboshẹt o wo ọmọzae jọ nọ ọ gbẹ jọ ọmaha nọ a re se Maeka;+ ahwo kpobi nọ a jẹ rria uwou Zaeba a te zihe ruọ idibo Mẹfiboshẹt. 13 Mẹfiboshẹt ọ tẹ jẹ rria Jerusalẹm keme ọ jẹ hae jọ emẹjẹ ovie na re emu ẹsikpobi;+ yọ ọ ko awọ ivẹ.+

10 Uwhremu na, ovie ahwo Ammọn+ o te whu, Henọn ọmọzae riẹ o te zihe ruọ ovie evaọ ẹta riẹ.+ 2 Fikiere Devidi ọ tẹ ta nọ: “Me ti dhesẹ uyoyou nọ o rẹ hiẹ hẹ kẹ Henọn ọmọzae Nehash, wọhọ epanọ ọsẹ riẹ o dhesẹ uyoyou nọ o rẹ hiẹ hẹ kẹ omẹ na.” Fikiere Devidi o te vi idibo riẹ re a nyae sasa iẹe oma fiki ọsẹ riẹ nọ o whu na. Rekọ nọ idibo Devidi a ziọ ẹkwotọ ahwo Ammọn na, 3 ikpahwo-esuo ahwo Ammọn a tẹ ta kẹ Henọn olori rai nọ: “Kọ who roro nọ Devidi ọ gwọlọ kẹ ọsẹ ra ọghọ o ro vi ahwo ze te sasa owhẹ oma? Kọ ogbẹrọnọ o vi idibo riẹ bru owhẹ ze re ọ kiẹ okpẹwho na rri jẹ riẹ epanọ eware e rrọ re ọ sai fi okpẹwho na kparobọ?” 4 Fikiere Henọn o te kru idibo Devidi na, ọ tẹ nware abọvo etuagba rai no+ jẹ jọ umuo ikebe bru iwu rai ibro ivẹ, o te siobọno ai vrẹ. 5 Nọ a vuẹ Devidi, ọ tẹ nwani vi ahwo nyai zere ai, keme oware nọ a ru ezae nana yọ oware omovuọ gaga; ovie na ọ tẹ ta kẹ ae nọ: “Wha daji Jẹriko+ bẹsenọ etuagba rai i re di ze no, kẹsena wha ve zihe ze.”

6 Nọ u te oke jọ, ahwo Ammọn a tẹ ruẹ nọ a bi tu Devidi oma, fikiere ahwo Ammọn a te vi ahwo nyae rehọ ugho zizie ahwo Siria nọ a rrọ Bẹt-rihọb+ gbe ahwo Siria nọ a rrọ Zoba,+ isoja owotọ idu udhe (20,000); gbe ovie Meaka+ avọ ezae odu ọvo (1,000); a tẹ jẹ jọ Ishtọb* zizie ezae idu ikpegbivẹ (12,000).+ 7 Nọ Devidi o yo kpahe iẹe, o te vi Joab avọ ogbaẹmo na soso, te egbaẹmo riẹ nọ e mae ga nya.+ 8 Ahwo Ammọn a tẹ wọ lahwe, a te dhe uhie ẹmo họ evaọ obọ aro unuẹthẹ okpẹwho na, yọ ahwo Siria nọ a rrọ Zoba gbe Rihọb, jegbe ahwo Ishtọb* gbe ahwo Meaka a rrọ oria rai sa evaọ okegbe ovevẹ na.

9 Nọ Joab ọ ruẹ nọ egbaẹmo na e be họrọ bru ei ze evaọ obaro gbe obemu, ọ tẹ salọ egbaẹmo jọ nọ e mae riẹ ẹmo efi evaọ Izrẹl, a te dhe uhie ẹmo họ re a nyabru ahwo Siria na.+ 10 O te fi ezae nọ i kiọkọ họ otọ* Abishae+ oniọvo riẹ re o dhe ai họ uhie ẹmo, a vẹ nyabru ahwo Ammọn.+ 11 Ọ tẹ ta nọ: “Otẹrọnọ ahwo Siria na a be ga obọ vi omẹ, whọ rẹ nyaze te thọ omẹ hrọ; rekọ otẹrọnọ ahwo Ammọn a be ga obọ vi owhẹ, mẹ te nyaze te thọ owhẹ. 12 Ma re kru oma ga je wo udu+ fiki ahwo mai gbe fiki ikpewho Ọghẹnẹ mai, Jihova o ti ru onọ u kiehọ evaọ aro riẹ.”+

13 Kẹsena Joab avọ ezae nọ e rrọ kugbei a te si kẹle ahwo Siria na re a fi ẹmo, rekọ ahwo Siria na a tẹ dhẹ kẹe.+ 14 Nọ ahwo Ammọn a ruẹ nọ ahwo Siria a dhẹ no, ai omarai a tẹ dhẹ kẹ Abishae, a tẹ ruọ okpẹwho na. Kẹsena Joab o te zihe no obọ ahwo Ammọn na ze, ọ tẹ ziọ Jerusalẹm.

15 Nọ ahwo Siria na a ruẹ nọ Izrẹl o fi rai kparobọ no, a tẹ wariẹ koko oma họ.+ 16 Fikiere Hadẹdiza+ o te vi ahwo bru ahwo Siria nọ a rrọ ubrotọ Ethẹ* na,+ a tẹ ziọ Hilam, yọ Shobak nọ ọ rrọ oletu ogbaẹmo Hadẹdiza ọ wha rai nya.

17 Nọ a vuẹ Devidi kpahe onana, ọ tẹ nwani koko egbaẹmo Izrẹl soso họ, a tẹ fa Jọdan na vrẹ, a tẹ ziọ Hilam. Kẹsena ahwo Siria na a te dhe uhie ẹmo họ re a nyabru Devidi je lele iei fi ẹmo.+ 18 Rekọ ahwo Siria na a tẹ dhẹ kẹ Izrẹl; Devidi o te kpe ahwo Siria egba ihrẹ (700) nọ e rẹ dhẹ ekẹkẹ gbe edhẹ-enyenya idu udhuvẹ (40,000) rai, o te je duwu Shobak oletu ogbaẹmo rai fihọ otọ, o te whu fihọ etẹe.+ 19 Nọ ivie na kpobi, idibo Hadẹdiza, a ruẹ nọ ahwo Izrẹl a fi rai kparobọ no, a te ru udhedhẹ kugbe ahwo Izrẹl vẹrẹ vẹrẹ, a tẹ jọ otọ esuo rai;+ ozọ o gbẹ jọ ahwo Siria fiobọhọ kẹ ahwo Ammọn ofa ha.

11 Evaọ emuhọ ukpe na,* evaọ okenọ ivie i re ro kpohọ ẹmo, Devidi o te vi Joab avọ idibo riẹ gbe egbaẹmo Izrẹl soso re a nyae raha ahwo Ammọn no, fikiere a te ko Raba họ,+ rekọ Devidi ọ tẹ jọ Jerusalẹm.+

2 Evaọ owọwọ ẹdẹ jọ,* Devidi ọ tẹ kparoma no ehwa riẹ, ọ tẹ jẹ nya wariẹ evaọ obọ ehru uwou* ovie na. Ọ tẹ jọ obọ ehru uwou na ruẹ aye jọ nọ ọ be họ, yọ aye na o wo erru gaga. 3 Devidi o te vi ohwo nyae nọ kpahe aye na, ọ tẹ niyẹrẹ kẹe nọ: “Aye na yọ Bat-shiba,+ ọmọtẹ Elayam+ aye Uraya+ ohwo Hit na.”+ 4 Kẹsena Devidi o te vi enyukọ nya re a rehọ iẹe ze.+ Aye na ọ tẹ nyabru ei ze, o te lele iei wezẹ.+ (Onana o via evaọ okenọ o je ru oma riẹ fo no egbegbe riẹ.*)+ Kẹsena o te zihe kpobọ uwou riẹ.

5 Aye na o te dihọ, ọ tẹ vuẹ se Devidi nọ: “Me dihọ no.” 6 Fikiere Devidi o te vi uwou se Joab nọ: “Vi Uraya ohwo Hit na se omẹ.” Joab o te vi Uraya se Devidi. 7 Nọ Uraya ọ nyabru ei ze, Devidi ọ tẹ nọe epanọ eware e rrọ kẹ Joab, gbe epanọ eware e rrọ kẹ egbaẹmo na gbe epanọ ẹmo na ọ rrọ. 8 Devidi ọ tẹ ta kẹ Uraya nọ: “Nya kpobọ uwou ra re who somahọ.”* Nọ Uraya ọ nya no uwou ovie na no, a te vi okẹ ovie* na lele iei. 9 Rekọ Uraya o te lele idibo olori riẹ nọ i kiọkọ kpobi kiẹzẹ obọ unuighẹ uwou ovie na, ọ nya kpobọ uwou obọriẹ hẹ. 10 A tẹ vuẹ Devidi nọ: “Uraya o kpobọ uwou obọriẹ hẹ.” Fikiere Devidi ọ tẹ ta kẹ Uraya nọ: “Binọ who no erẹ ze obọ! Fikieme who gbe kpobọ uwou obọra ha?” 11 Uraya ọ tẹ kẹ Devidi uyo nọ: “Etehe ọvọ+ na avọ ezae Izrẹl gbe Juda a rrọ iwou-owhre, yọ Joab olori mẹ avọ idibo olori mẹ a rrọ obọ ẹwọ. Kọ me re kpobọ uwou mẹ nyae re jẹ da je kiẹzẹ kugbe aye mẹ?+ Nọ whọ gbẹ be wẹ jẹ rrọ uzuazọ na,* me ti ru oware nana ha!”

12 Devidi ọ tẹ ta kẹ Uraya nọ: “Jọ etenẹ nẹnẹ re, odẹnotha me ti siobọno owhẹ vrẹ.” Fikiere Uraya ọ tẹ jọ Jerusalẹm ẹdẹ yena gbe okiokiọ riẹ. 13 Devidi ọ tẹ ta nọ a se Uraya ze re o lele iei re jẹ da, o te ru ei da idi vrẹ oma. Rekọ nọ owọwọ u te, Uraya ọ tẹ nyai kiẹzẹ ehwa riẹ kugbe idibo olori riẹ, ọ nya kpobọ uwou riẹ hẹ. 14 Evaọ ohiohiẹ, Devidi o te kere ileta se Joab, ọ tẹ rehọ iẹe kẹ Uraya re ọ whae ro sei. 15 O kere fihọ ileta na nọ: “Fi Uraya họ obaro ẹmo na evaọ oria nọ ẹmo na ọ jọ mae ga. Kẹsena wha vẹ rehọ oma se iẹe ba evaọ obemu riẹ, re a ruẹsi duwu iei fihọ otọ, o ve whu.”+

16 Joab ọ jẹ romatotọ muẹrohọ okpẹwho na, o te fi Uraya họ oria nọ ọ riẹ nọ egbaẹmo egaga e rrọ. 17 Nọ ezae okpẹwho na e wọ lahwe ze te họre Joab, idibo Devidi jọ i te whu, Uraya ohwo Hit na ọ jọ usu ahwo nọ a whu.+ 18 Joab o te vi ohwo nyae vuẹ Devidi kpahe oware kpobi nọ o via evaọ ẹmo na. 19 Ọ ta kẹ ọnyukọ na nọ: “Nọ whọ tẹ vuẹ ovie na eware kpobi nọ e via evaọ ẹmo na no, 20 ẹsejọhọ eva e te dha ovie na, ọ vẹ te ta kẹ owhẹ nọ, ‘Eme ọ lẹliẹ owhai nya kẹle okpẹwho na tere nyae họre? Kọ wha gbẹ riẹ nọ a rẹ sa ese no obọ ehru ugbẹhẹ na ze? 21 Ono o kpe Abimẹlẹk+ ọmọzae Jerubeshẹt?+ Kọ ogbẹrọnọ aye jọ o gbolo utho nọ a re ro wuhu eware no obọ ehru ugbẹhẹ ze kie fihọ iẹe uzou, onọ u kpe rie evaọ Tibẹz? Fikieme wha rọ nya kẹle ugbẹhẹ na tere?’ Whọ vẹ ta nọ, ‘Uraya odibo ra ohwo Hit na o whu re.’”

22 Fikiere ọnyukọ na ọ tẹ nyae vuẹ Devidi oware kpobi nọ Joab o vi rie nọ ọ ta kẹe. 23 Ọnyukọ na ọ tẹ vuẹ Devidi nọ: “Egbaẹmo rai e ga obọ vi omai, yọ a wọ bru omai ze evaọ obọ ẹwọ na; rekọ ma te le ai zihe kpobọ aro unuẹthẹ okpẹwho na. 24 Enọ e rẹ sa ese na e tẹ jẹ sa idibo ra no obọ ehru ugbẹhẹ na ze, idibo ovie na jọ i te whu; Uraya odibo ra ohwo Hit na o whu re.”+ 25 Fikiere Devidi ọ tẹ ta kẹ ọnyukọ na nọ: “Ta kẹ Joab nọ: ‘Whọ jọ oware nọ o via na o kẹ owhẹ uye he, keme ọgbọdọ ọ rẹ sai kpe ohwo kpobi evaọ ẹmo. Kru obọ ga họre okpẹwho na re who fi ei kparobọ.’+ Whọ vẹ tuduhọ iẹe awọ.”

26 Nọ aye Uraya o yo nọ Uraya ọzae riẹ o whu no, o te mu ọzae riẹ họ eweri. 27 Nọ etoke uweri na o nwani re no, Devidi o te vi ahwo nyae rehọ iẹe ze uwou riẹ, o te zihe ruọ aye riẹ,+ o te yẹ ọmọzae kẹe. Rekọ oware nọ Devidi o ru na o dha Jihova eva gaga.+

12 Fikiere Jihova o te vi Netan+ bru Devidi. Ọ tẹ ruọ eva uwou bru ei,+ ọ tẹ ta nọ: “Ezae ivẹ jọ e jọ okpẹwho jọ, ọjọ ọdafe, ọjọ oyogbe. 2 Ọdafe na o wo igodẹ gbe iruẹ buobu gaga;+ 3 rekọ oyogbe na o wo oware ovo ho ajokpaọ omogodẹ aye ọboba ọvo jọ nọ ọ dẹ.+ Ọzae na ọ jẹ rẹrotei, ọ tẹ jọ obọ riẹ avọ emezae riẹ rro. Ọ rẹ jọ umutho emu nọ a wo re jẹ da ame evaọ egho riẹ je kiẹzẹ igbama riẹ. Ọ tẹ jọ kẹe wọhọ ọmọtẹ nọ o yẹ. 4 Nọ u te ẹdẹ jọ, ohwo jọ ọ tẹ kpahe ọdafe na, rekọ ọ jọ igodẹ gbe iruẹ riẹ kpe ọvuọvo ro there emu kẹ ọrara nọ ọ nyabru ei ze na ha. Ukpoye, ọ tẹ rehọ omogodẹ oyogbe na, ọ tẹ rehọ iẹe there emu kẹ ọzae nọ ọ kpahe riẹ na.”+

5 Nọ Devidi o yo eme nana, eva ọzae na e tẹ dhae gaga, ọ tẹ ta kẹ Netan nọ: “Nọ Jihova ọ rrọ uzuazọ na,+ ọzae nọ o ru oware nana o fo uwhu! 6 Ọ rẹ hwa omogodẹ na akuane,+ keme o ru oware nana ababọ ọdawẹ nọ o dhesẹ.”

7 Kẹsena Netan ọ tẹ ta kẹ Devidi nọ: “Whẹ họ ọzae na! Enẹ Jihova Ọghẹnẹ Izrẹl ọ ta: ‘Mẹ họ ọnọ o wholo owhẹ re whọ jọ ovie Izrẹl,+ mẹ tẹ jẹ thọ owhẹ no obọ Sọl.+ 8 O ruọ omẹ nọ mẹ rẹ rehọ uwou olori ra+ kẹ owhẹ jẹ rehọ eyae olori ra+ họ igbama ra, yọ mẹ kẹ owhẹ uwou Izrẹl gbe orọ Juda+ re who su. O tẹ jẹ ruọ omẹ nọ me re ru vrẹ ere kẹ owhẹ otẹrọnọ eyena i gbe te he.+ 9 Kọ fikieme whọ rọ jẹ ẹme Jihova kufiẹ nọ who ro ru oware nọ u yoma evaọ aro riẹ? Whọ rehọ ọgbọdọ kpe Uraya ohwo Hit na!+ Kẹsena whọ tẹ rehọ aye riẹ+ okenọ whọ rehọ ọgbọdọ ahwo Ammọn+ kpei no. 10 Enẹna, ọgbọdọ o ti no uwou ra+ vievie he, keme whọ jẹ omẹ kufiẹ nọ whọ rọ rehọ aye Uraya ohwo Hit na re ọ jọ aye ra.’ 11 Enẹ Jihova ọ ta: ‘Me ti ru nọ okpẹtu o ti ro no uwou obọra ze te owhẹ;+ yọ evaọ iraro ra mẹ te jọ rehọ eyae ra kẹ ọzae ọfa,*+ o ve ti lele ai wezẹ evaọ uvo kekeke.*+ 12 Dede nọ whọ lẹlẹ ru eware nana,+ me ti ru onana evaọ iraro ahwo Izrẹl kpobi evaọ uvo kekeke.’”*

13 Devidi ọ tẹ ta kẹ Netan nọ: “Mẹ raha uzi Jihova no.”+ Netan ọ tẹ kpahe kẹ Devidi nọ: “Jihova ọ rehọ uzioraha ra rọvrẹ owhẹ no re.*+ Who ti whu hu.+ 14 Rekọ, fikinọ whọ jọ oware nana nọ o via na kẹ Jihova adhẹẹ vievie he na, ọmọzae nọ a yẹ kẹ owhẹ na ọ te seba ewhu hu.”

15 Kẹsena Netan o te kpobọ uwou obọriẹ.

Jihova ọ tẹ rehọ ẹyao tehe ọmọ nọ aye Uraya o yẹ kẹ Devidi na, o te muhọ ẹmọ. 16 Devidi ọ tẹ jẹ lẹ Ọghẹnẹ uzẹme na fiki ọmọ na. Devidi ọ tẹ siọ emuọriọ ba riẹriẹriẹ, nọ ọ tẹ ruọ eva uwou riẹ o ve kiẹzẹ otọ gheghe okioke.+ 17 Fikiere ekpako uwou riẹ e tẹ nya kẹle iẹe, a tẹ be gwọlọ kpare iẹe kpama no otọ, rekọ ọ rọwo ho, yọ o je lele ai re emu hu. 18 Evaọ ẹdẹ avọ ihrẹ ọmọ na o te whu, rekọ ozọ epanọ idibo Devidi a rẹ rọ vuẹe nọ ọmọ na o whu no u te je mu ai. A ta nọ: “Nọ ma jẹ ta ẹme kẹe okenọ ọmọ na ọ jọ uzuazọ ọ gaviezọ kẹ omai hi. Kọ ẹvẹ ma sae rọ vuẹe nọ ọmọ na o whu no? Ọ sai ru oware uyoma jọ!”

19 Nọ Devidi ọ ruẹ nọ idibo riẹ a be ta ẹme imimẹ kẹ ohwohwo, ọ tẹ riẹ nọ ọmọ na o whu no. Devidi ọ tẹ nọ idibo riẹ nọ: “Kọ ọmọ na o whu no?” A tẹ kẹe uyo nọ: “O whu no.” 20 Fikiere Devidi ọ tẹ kpama no otọ. Ọ tẹ họ, rehọ udẹ wholo,+ nwene iwu riẹ, o te kpobọ uwou+ Jihova, o te kigwẹ guzou kpotọ. Kẹsena o te kpobọ uwou* riẹ, ọ tẹ ta nọ a kẹe emu, ọ tẹ re emu. 21 Idibo riẹ e tẹ nọe nọ: “Eme ọ lẹliẹ owhẹ ru oware nọ who ru na? Nọ ọmọ na ọ jọ uzuazọ, whọ siọ emuọriọ ba, whọ tẹ jẹ viẹ ọvo; rekọ nọ ọmọ na ọ nwani whu no, whọ tẹ kpama, whọ tẹ re emu.” 22 Ọ tẹ kpahe kẹ ae nọ: “Nọ ọmọ na ọ jọ uzuazọ, mẹ siọ emuọriọ ba,+ mẹ tẹ jẹ viẹ ọvo keme mẹ ta kẹ omamẹ nọ, ‘Ono ọ riẹ sọ Jihova o ti rri omẹ aro ọ vẹ siọ ọmọ na ba uzuazọ?’+ 23 Enẹna nọ ọmọ na o whu no na, fikieme mẹ jẹ siọ emuọriọ ba? Kọ mẹ sai zihe iei ziọ uzuazọ?+ Mẹ họ ọnọ ọ te nyabru ei,+ rekọ o ti zihe bru omẹ ze he.”+

24 Kẹsena Devidi ọ tẹ sasa Bat-shiba+ aye riẹ oma. Ọ tẹ ruọ eva uwou bru ei, o te lele iei wezẹ. Oke jọ o vrẹ no, o te yẹ ọmọzae, a te sei Solomọn.*+ Jihova o you rie gaga,+ 25 o te vi Netan+ ọruẹaro na nya inọ a se ọmọ na Jẹdidaya* fiki Jihova.

26 Joab ọ tẹ gbẹ jẹ họre Raba+ ọrọ ahwo Ammọn,+ o te fi okpẹwho esuo* na kparobọ.+ 27 Fikiere Joab o te vi enyukọ bru Devidi nọ: “Mẹ họre Raba,+ yọ me fi okpẹwho ame* na kparobọ no. 28 Enẹna, koko egbaẹmo nọ i kiọkọ na họ re wha fa evuẹ kẹle okpẹwho na, wha vẹ họre iẹe je fi ei kparobọ. O gbẹ rrọ ere he, mẹ họ ọnọ o ti fi okpẹwho na kparobọ, a ve ti kele iei kẹ omẹ nọ me fi rie kparobọ.”*

29 Fikiere Devidi o te koko egbaẹmo na kpobi họ, a te kpohọ Raba, a tẹ họre iẹe je fi ei kparobọ. 30 Ọ tẹ ba etu-uvie Malkam no uzou riẹ. Etu na ọ gbẹdẹ te etalẹnte* igoru ọvo, yọ u wo itho eghaghae, a te ku ei họ Devidi uzou. Ọ tẹ jẹ jọ okpẹwho+ na kwa egbo-ẹmo buobu gbidi gbidi rehọ.+ 31 Ọ tẹ rehọ ahwo nọ a jọ okpẹwho na noi ze, ọ tẹ kẹ ae iruo nọ a rẹ jọ bru itho, nọ a rẹ jọ rehọ ekwakwa ayọno edada gbe iwhe ayọno ru iruo, gbe iruo ibriki ema. Ere o ru ikpewho ahwo Ammọn kpobi. Ukuhọ riẹ, Devidi avọ egbaẹmo na kpobi a te zihe kpobọ Jerusalẹm.

13 Whaọ Absalọm ọmọzae Devidi o wo oniọvo-ọmọtẹ jọ nọ o wo erru gaga nọ a re se Tama,+ yọ ọmọtẹ na ọ dhẹ ruọ ọmọzae Devidi ọfa nọ a re se Amnọn+ oma gaga. 2 Iroro Tama ọmọsẹ riẹ e kẹ Amnọn uye te epanọ ọ jẹ rọ mọ, keme Tama ọ jọ ọmọtẹ-kọkọ, yọ o jọ bẹbẹ kẹ Amnọn re o ru ei oware nọ o jariẹ eva. 3 Whaọ Amnọn o wo ogbẹnyusu jọ nọ a re se Jehonadab,+ ọmọzae Shimiah,+ oniọvo-ọmọzae Devidi; yọ Jehonadab o wo ẹghẹ gaga. 4 Jehonadab ọ tẹ nọ Amnọn nọ: “Eme ọ be lẹliẹ owhẹ ọmọzae ovie na jọ ọkọkora kohiohiẹ kohiohiẹ? Kọ whọ gbẹ tae kẹ omẹ?” Amnọn ọ tẹ ta kẹe nọ: “Tama oniọvo-ọmọtẹ+ Absalọm, ọmọsẹ mẹ, ọ dhẹ ruọ omẹ oma.” 5 Jehonadab ọ tẹ ta kẹe nọ: “Kiẹzẹ ehwa ra re who ru wọhọ ẹsenọ whọ be mọ. Nọ ọsẹ ra ọ tẹ nyaze te ruẹ owhẹ, whọ vẹ ta kẹe nọ, ‘Ivie, jọ Tama oniọvo-ọmọtẹ mẹ ọ nyaze te kẹ omẹ emu nọ mẹ rẹ re. Nọ ọ tẹ jọ iraro mẹ there emu nọ a re there kẹ ohwo nọ ọ be mọ,* mẹ te jọ obọ riẹ re emu na.’”

6 Amnọn o te kiẹzẹ, o te ru wọhọ ẹsenọ ọ be mọ, ovie na ọ tẹ nyaze te ruẹ e riẹ. Amnọn ọ tẹ ta kẹ ovie na nọ: “Ivie, jọ Tama oniọvo-ọmọtẹ mẹ ọ nyaze re ọ jọ iraro mẹ ru ikeki ivẹ nọ e wọhọ ubiudu, re mẹ jọ obọ riẹ re emu.” 7 Fikiere Devidi o te vi uwou se Tama evaọ obọ uwou inọ: “Ivie, nya kpobọ uwou Amnọn ọmọsẹ ra re who there emu* kẹe.” 8 Fikiere Tama o te kpobọ uwou Amnọn ọmọsẹ riẹ evaọ oria nọ o kiẹzẹ. Ọ tẹ rehọ eka nọ a wuhu nọ a gua no, ọ tẹ jọ iraro riẹ ma ae ro ru ikeki, o te there ai. 9 Kẹsena ọ tẹ tọlọ omodhe ọkpakpala, ọ tẹ rehọ iẹe wọ ae kẹe. Rekọ Amnọn ọ rọwo re he, Amnọn ọ tẹ ta nọ: “Ta kẹ ohwo kpobi nọ ọ nyavrẹ!” Ahwo na kpobi a tẹ nyase iẹe ba.

10 Amnọn ọ tẹ ta kẹ Tama nọ: “Wọ emu* na ziọ obọ ukpẹ re mẹ jọ obọ ra re iẹe.” Fikiere Tama ọ tẹ wọ ikeki nọ e wọhọ ubiudu nọ o ru na, ọ tẹ rehọ ai se Amnọn ọmọsẹ riẹ evaọ obọ ukpẹ na. 11 Nọ ọ wọ ai sei re ọ re, Amnọn ọ tẹ jabọ kru ei, ọ tẹ ta nọ: “Nyaze ti lele omẹ wezẹ, oniọvo-ọmọtẹ mẹ.” 12 Rekọ Tama ọ tẹ ta kẹe nọ: “Ijo, ọmọsẹ mẹ! Who si ọghọ no omẹ oma ha, keme a rẹ jọ Izrẹl ru oware utiona ha.+ Who ru oware omovuọ nana ha.+ 13 Ẹdẹ vẹ omovuọ na u re no omẹ oma? Yọ a ti rri owhẹ wọhọ omọvo ezae nọ i fioka ha evaọ Izrẹl. Ivie nyae ta kẹ ovie na, ọ te siọ omẹ ba ẹrehọ kẹ owhẹ hẹ.” 14 Rekọ Amnọn ọ rọwo gaviezọ kẹe he, obọ riẹ o tẹ ga vi ei, ọ tẹ gbae du. 15 Kẹsena eva riẹ i te mu Amnọn họ ẹdha avọ omukpahọ ọgaga, te epanọ omukpahọ na o rọ ga vi uyoyou nọ o wo kẹe vẹre. Amnọn ọ tẹ ta kẹe nọ: “Kpama; no etenẹ no!” 16 Tama ọ tẹ ta kẹe nọ: “Ijo ọmọsẹ mẹ, ele nọ who bi le omẹ na u tube yoma vi oware nọ who ru omẹ na!” Rekọ ọ rọwo gaviezọ kẹe he.

17 Fikiere Amnọn o te se odibo riẹ, ọ tẹ ta nọ: “Ivie si ohwo nana no aro mẹ no, re whọ kare ẹthẹ na.” 18 (Whaọ oke yena Tama o ku obọdẹ ewu othethei jọ* họ, keme oghẹrẹ iwu itieye emetẹ ovie na nọ e re riẹ ọzae he e jẹ hai ku họ.) Fikiere odibo riẹ na o te kru ei ruọ otafe, ọ tẹ kare ẹthẹ na. 19 Kẹsena Tama ọ tẹ whẹ enwo fihọ uzou+ jẹ bẹre obọdẹ ewu othethei nọ o ku họ na; ọ tẹ whabọ họ uzou, ọ tẹ nyavrẹ, yọ ọ be viẹ nọ ọ be nya na.

20 Absalọm oniọvo-ọmọzae riẹ+ ọ tẹ nọe nọ: “Kọ Amnọn ọmọsẹ ra o ru owhẹ oware nana? Fọ tou oniọvo-ọmọtẹ mẹ. Ọmọsẹ ra ọ rrọ.+ Whọ jọ ẹme nana o kpokpo udu ra ha.” Kẹsena Tama ọ tẹ jẹ rria uwou Absalọm oniọvo-ọmọzae riẹ, yọ o je kuomagbe ahwo ho. 21 Nọ Devidi ovie na o yo kpahe eware nana kpobi, eva e tẹ dhae gaga.+ Rekọ ọ gwọlọ ru Amnọn ọmọzae riẹ eva dha ha fikinọ o you rie gaga, keme ọye ọ jọ ọmọ ọsosuọ riẹ. 22 Absalọm ọ kpọ Amnọn unu vievie he, ọ ta ẹme oyoma hayo owoma ọvo kẹe he; keme Absalọm o mukpahe+ Amnọn fikinọ ọ gba Tama oniọvo-ọmọtẹ riẹ du.+

23 Nọ ikpe ivẹ gbagba e vrẹ no, enọ i re bru eto igodẹ Absalọm e tẹ jọ Bale-hezọ nọ o kẹle Ifremu,+ Absalọm o te zizie emezae ovie na kpobi.+ 24 Fikiere Absalọm ọ tẹ nyabru ovie na ze, ọ tẹ ta kẹe nọ: “A bi bru eto igodẹ odibo ra. Ivie, jọ ovie na avọ idibo riẹ a lele omẹ nya.” 25 Rekọ ovie na ọ tẹ ta kẹ Absalọm nọ: “Ijo ọmọzae mẹ. Otẹrọnọ mai kpobi ma te lele owhẹ nya, ma te jọ owha kẹ owhẹ.” Dede nọ ọ jẹ tẹzẹ iẹe, ọ rọwo nọ o re lele iei nya ha, rekọ ọ tẹ lẹ ẹro kẹe. 26 Kẹsena Absalọm ọ tẹ ta kẹe nọ: “Otẹrọnọ whọ sae nya ha, ivie jọ Amnọn ọmọsẹ mẹ o lele omai nya.”+ Ovie na ọ tẹ kpahe kẹe nọ: “Fikieme o re ro lele owhẹ nya?” 27 Rekọ Absalọm ọ tẹ tẹzẹ iẹe, fikiere o te vi Amnọn avọ emezae ovie na kpobi lele iei.

28 Absalọm ọ tẹ ta kẹ idibo riẹ nọ: “Wha muẹrohotọ, okenọ eva e tẹ be were Amnọn fiki enwaene, mẹ te ta kẹ owhai nọ, ‘Wha kpe Amnọn no!’ Wha re kpei no hrọ. Jọ ozọ u mu owhai hi. Kọ ogbẹrọnọ mẹ ta nọ wha ru ere? Wha kru oma ga je wo udu.” 29 Idibo Absalọm i te ru Amnọn epanọ Absalọm ọ ta kẹ ae na dẹẹ; fikiere emezae ovie na nọ i kiọkọ kpobi a tẹ kpama, a tẹ la ruọ ọvuọ esi* riẹ, a tẹ dhẹ. 30 Nọ a rrọ edhere na, usi na u te do te Devidi oma nọ: “Absalọm o kpe emezae ovie na kpobi no, ọvuọvo ọ zọ họ.” 31 Fikiere ovie na ọ tẹ kpama jẹ bẹre iwu riẹ, o te kiẹzẹ otọ, yọ idibo riẹ kpobi a dikihẹ kẹle iẹe avọ iwu rai nọ a bẹre.

32 Rekọ Jehonadab+ ọmọzae Shimiah,+ oniọvo-ọmọzae Devidi ọ tẹ ta nọ: “Jọ olori mẹ o roro nọ emezae ovie na kpobi a kpe he, Amnọn ọvo o whu.+ Absalọm họ ọnọ ọ ta nọ a kpei, ere ọ jiroro nọ o ti ru+ anwọ ẹdẹ nọ Amnọn ọ rọ gba Tama+ oniọvo-ọmọtẹ riẹ du+ na. 33 Jọ olori mẹ ovie na ọ kezọ kẹ usi na ha* inọ, ‘Emezae ovie na kpobi i whu no’; Amnọn ọvo o whu.”

34 Evaọ oke yena, Absalọm ọ tẹ dhẹ.+ Uwhremu na nọ ororoke na ọ kpare ovao riẹ, ọ tẹ ruẹ nọ ahwo buobu a bi zurie no obọ edhere nọ ọ rrọ obemu riẹ ze kẹle ugbehru na. 35 Fikiere Jehonadab+ ọ tẹ ta kẹ ovie na nọ: “Rri! Emezae ovie na i zihe ze no. Nwane wọhọ epanọ odibo ra ọ ta na.” 36 Nọ ọ nwane ta ẹme na no, emezae ovie na e tẹ ruọ eva, yọ a bi kuenu oviẹ; ovie na avọ idibo riẹ kpobi a tẹ jẹ viẹ gaga re. 37 Rekọ Absalọm ọ tẹ dhẹ bru Talmae+ ọmọzae Amaehọd ovie Gẹshọ. Devidi o te weri ọmọzae riẹ edẹ buobu. 38 Nọ Absalọm ọ dhẹ kpobọ Gẹshọ+ no, ọ tẹ rria obei ikpe esa.

39 Ukuhọ riẹ, u te je si Devidi urru re ọ nyabru Absalọm, keme ọ kpairoro vrẹ uwhu Amnọn no.*

14 Whaọ Joab ọmọzae Zeruya+ ọ tẹ te riẹ nọ urru Absalọm u bi si ovie na.+ 2 Fikiere Joab o te vi ohwo kpobọ Tekoa+ nyai se aye jọ nọ o wo areghẹ gaga ze, ọ tẹ ta kẹ aye na nọ: “Ivie, ru wọhọ ẹsenọ whọ rrọ uweri, re who ku iwu uweri họ, who wholo udẹ hẹ.+ Ru wọhọ ẹsenọ whọ rrọ uweri ohwo nọ o whu kri no. 3 Kẹsena whọ vẹ nyabru ovie na re whọ ta ẹme nana kẹe.” Fikiere Joab o te fi ẹme họ iẹe unu.*

4 Aye Tekoa na ọ tẹ nyabru ovie na, o te kigwẹ guzou kpotọ je kiẹzẹ vovao tuotọ, ọ tẹ ta nọ: “O ovie, fiobọhọ kẹ omẹ!” 5 Ovie na o te yo kẹe nọ: “Eme ọ via?” Aye na ọ tẹ ta nọ: “Mẹ yọ aye-uku; ọzae mẹ o whu no. 6 Mẹ odibo ra me wo emezae ivẹ vẹre, aimava a tẹ jẹ họre ohwohwo evaọ obọ ẹwọ. Ohwo ọvo ọ jariẹ nọ o re kru rai hi, fikiere ọjọ ọ tẹ fa ọjọ fihọ otọ, o te whu. 7 Whaọ obọnana unuwou na soso o wọ bru omẹ odibo ra ze be ta nọ, ‘Rehọ ọnọ o kpe oniọvo riẹ na ze re ma kpei no fiki uzuazọ* oniọvo riẹ nọ o kpe na,+ o tẹ make rọnọ ọreuku na ọ te rọ ere whu no dede!’ A ti furie uwowo-erae ọvo nọ o kiọkọ kẹ omẹ no,* ọzae mẹ o gbe ti wo ohwo nọ o re yo odẹ riẹ hayo wo ọmọ* ọvo evaọ otọakpọ na ha.”

8 Ovie na ọ tẹ ta kẹ aye na nọ: “Nya kpobọ uwou ra, me ti jie uzi fiki ra.” 9 Fikiere aye Tekoa na ọ tẹ ta kẹ ovie na nọ: “O olori mẹ ovie, jọ abe-ọriọ na ọ jọ uzou mẹ avọ uwou ọsẹ mẹ, rekọ ovie na avọ agbara-uvie riẹ a te reabe he.” 10 Ovie na ọ tẹ ta nọ: “Otẹrọnọ ohwo jọ ọ tẹ gbẹ ta ẹme kẹ owhẹ, rehọ iẹe bru omẹ ze, o ti gbe kpokpo owhẹ vievie he.” 11 Rekọ aye na ọ tẹ ta nọ: “Ivie, jọ ovie na ọ kareghẹhọ Jihova Ọghẹnẹ riẹ, re ọnọ ọ be kioja azẹ+ na ọ gbẹ wha okpẹtu ọfa ze je kpe ọmọzae mẹ no ho.” Fikiere ovie na ọ tẹ ta nọ: “Nọ Jihova ọ rrọ uzuazọ na,+ ubioto ọmọzae ra ovo u ti kie te otọ họ.” 12 Aye na ọ tẹ ta nọ: “Ivie jọ odibo ra ọ ta ẹme ọvo jọ kẹ olori mẹ ovie na.” Ovie na ọ tẹ ta nọ: “Ta ze!”

13 Aye na ọ tẹ ta nọ: “Fikieme whọ rọ jiroro nọ who re ru ahwo Ọghẹnẹ oware utiona?+ Nọ ovie na ọ tẹ be ta ẹme enẹ, o bi bruoziẹ kpe omariẹ, keme ovie na ọ rehọ ọmọzae obọriẹ nọ a le no ẹwho zihe ze he.+ 14 Ma te seba ewhu hu, yọ ma te jọ wọhọ ame nọ a ku họ otọ nọ a rẹ sae jẹ zihe ze he. Rekọ Ọghẹnẹ ọ rẹ rehọ uzuazọ họ,* o re roro kpahe oware nọ u gbe ro fo ho re ọ nyasiọ ọnọ o le no oma ba obonọ ọ rrọ. 15 Mẹ nyaze te vuẹ olori mẹ ovie na keme ahwo na a ru ozọ mu omẹ. Fikiere odibo ra ọ tẹ ta nọ, ‘Ivie, jomẹ ta ẹme kẹ ovie na. Ẹsejọhọ ovie na o ti ru oware nọ ọrigbo riẹ ọ yare riẹ. 16 Otiẹsejọ ovie na ọ te gaviezọ je siwi omẹ ọrigbo riẹ no obọ ahwo nọ a be gwọlọ kpe omẹ avọ ọmọzae ọvo mẹ siọ ukuoriọ nọ Ọghẹnẹ ọ kẹ omai ba.’+ 17 Kẹsena odibo ra ọ tẹ ta nọ, ‘Ivie, jọ eme olori mẹ ovie na e kẹ omẹ omosasọ,’ keme olori mẹ ovie na ọ wọhọ ukọ-odhiwu Ọghẹnẹ nọ ọ riẹ ohẹriẹ nọ o rrọ oware nọ u woma gbe onọ u yoma. Jọ Jihova Ọghẹnẹ ra ọ jọ kugbe owhẹ.”

18 Ovie na ọ tẹ kpahe kẹ aye na nọ: “Ivie, whọ ko oware ovo dhere omẹ hẹ evaọ ẹme nọ mẹ be te nọ owhẹ na.” Aye na ọ tẹ ta kẹe nọ: “Ivie, jọ olori mẹ ovie na ọ ta ẹme.” 19 Ovie na ọ tẹ nọe nọ: “Kọ Joab o vi owhẹ nọ whọ ta eme nana kpobi?”+ Aye na o te yo kẹe nọ: “Nọ whọ rrọ* uzuazọ na, O olori mẹ ovie, nwane epanọ olori mẹ ovie na ọ ta na ere o ginẹ rrọ,* odibo ra Joab họ ọnọ o vi omẹ uwou nana, ọye ọ vuẹ odibo ra eme nana kpobi nọ ọ ta na. 20 Joab odibo ra o ru onana re o nwene oghẹrẹ nọ eware e rrọ, rekọ olori mẹ o wo areghẹ wọhọ ukọ-odhiwu Ọghẹnẹ uzẹme na, ọ tẹ jẹ riẹ oware kpobi nọ o be via evaọ ẹkwotọ na.”

21 Ovie na ọ tẹ ta kẹ Joab nọ: “U woma, me ti ru oware nana.+ Nyae rehọ Absalọm ọmoha na zihe ze.”+ 22 Fikiere Joab o te kigwẹ guzou kpotọ je kiẹzẹ vovao tuotọ, o te jiri ovie na. Joab ọ tẹ ta nọ: “Nẹnẹ na mẹ odibo ra mẹ riẹ nọ me wo aruoriwo evaọ aro ra, O olori mẹ ovie, keme ovie na o ru oware nọ odibo riẹ ọ yare riẹ.” 23 Kẹsena Joab ọ tẹ kpama o te kpobọ Gẹshọ,+ ọ tẹ rehọ Absalọm ziọ Jerusalẹm. 24 Rekọ ovie na ọ tẹ ta nọ: “Jọ o zihe kpobọ uwou obọriẹ, rekọ ọ te sae ruẹ ovao mẹ hẹ.” Fikiere Absalọm o te zihe kpobọ uwou obọriẹ, yọ ọ ruẹ ovao ovie na ha.

25 Whaọ evaọ Izrẹl soso, ọzae ọvo ọ jariẹ hẹ nọ a je jiri gaga fiki erru riẹ wọhọ Absalọm. No evawọ riẹ rite oko uzou riẹ, o wo epe ọvo ho. 26 Nọ ọ tẹ nware eto uzou riẹ (urere ukpe kpobi ọ rẹ nware ai keme eto na e jẹ hae jọ uzou riẹ gbẹgbẹdẹ) e rẹ gbẹdẹ te shẹkẹl egba ivẹ (200)* nọ a tẹ rehọ utho owawọ ovie* wawọ ae. 27 A yẹ emezae esa+ gbe ọmọtẹ ọvo kẹ Absalọm, odẹ ọmọtẹ na Tama. Ọmọtẹ na o wo erru gaga.

28 Absalọm ọ tẹ rria Jerusalẹm ikpe ivẹ soso, rekọ ọ ruẹ ovao ovie na ha.+ 29 Fikiere Absalọm ọ tẹ ta nọ a se Joab sei re o vi ei bru ovie na, rekọ Joab ọ nyaze he. Ọ tẹ wariẹ vi ohwo nyai sei orọ avọ isiava, ọ rọwo nyaze ghele he. 30 Ukuhọ riẹ ọ tẹ ta kẹ idibo riẹ nọ: “Ẹkẹ otọ Joab o kẹle ọmẹ, yọ o wo ebali jọ evaọ otọ na. Wha nyai tu erae họ iẹe.” Fikiere idibo Absalọm a te tu erae họ ẹkẹ otọ na. 31 Fikiere Joab ọ tẹ kpama, ọ tẹ nya kpobọ uwou Absalọm ọ tẹ nọe nọ: “Fikieme idibo ra i ro tu erae họ ẹkẹ otọ mẹ?” 32 Absalọm ọ tẹ kpahe kẹ Joab nọ: “Rri! Me vi uwou se owhẹ nọ, ‘Nyaze re me vi owhẹ bru ovie na, re whọ nọe nọ: “Fikieme me ro no obọ Gẹshọ+ ze? O hẹ mai woma kẹ omẹ re mẹ jọ obei. Enẹna jomẹ ruẹ ovao ovie na, yọ otẹrọnọ mẹ reabe, jọ o kpe omẹ no.”’”

33 Fikiere Joab ọ tẹ ruọ eva bru ovie na, ọ tẹ ta kẹe. Kẹsena o te se Absalọm, ọ tẹ ruọ eva bru ovie na, o te kiẹzẹ rriẹ oma họ otọ evaọ aro ovie na, yọ ọ vovao tuotọ. Ovie na ọ tẹ viọlọ Absalọm.+

15 Nọ eware nana kpobi e vrẹ no, Absalọm o te ti wo akẹkẹ avọ enyenya kẹ omariẹ gbe ezae udhuvẹ-gbikpe nọ e rẹ dhẹ karo kẹe.+ 2 Absalọm ọ rẹ kpama evaọ irioke, ọ vẹ nyai dikihẹ akotọ edhere nọ o kpobọ unuẹthẹ okpẹwho na.+ Oke kpobi nọ ohwo jọ ọ tẹ be wọ ẹdhọ bru ovie na ze,+ Absalọm o ve sei, ọ vẹ nọe nọ: “Okpẹwho vẹ who no ze?” ohwo na ọ vẹ ta nọ: “Orua jọ evaọ Izrẹl odibo ra o no ze.” 3 Absalọm ọ vẹ ta kẹe nọ: “Rri, eme nọ whọ ta na kpobi e gba, i te je kiehọ, rekọ ovie na o fi ohwo ọvo họ nọ ọ te gaviezọ kẹ ẹdhọ ra ha.” 4 Kẹsena Absalọm ọ vẹ ta nọ: “Dodokọ a rẹ rọ omẹ mu oguẹdhọ evaọ ẹkwotọ na! Kẹsena ohwo kpobi nọ o wo ẹdhọ ọ vẹ te nyabru omẹ ze, mẹ vẹ te ruẹ nọ me bru uvioziẹ kẹe.”

5 Nọ ohwo ọ tẹ nya kẹle iẹe re o guzou kpotọ kẹe, Absalọm ọ vẹ rriẹ obọ kru ohwo na, ọ vẹ viọlọ iẹe.+ 6 Enẹ Absalọm o je ru kẹ ahwo Izrẹl kpobi nọ a jẹ wọ ẹdhọ bru ovie na ze; Absalọm ọ tẹ jẹ rọ ere dẹ udu ezae Izrẹl rehọ.+

7 Nọ ikpe ene* e vrẹ no, Absalọm ọ tẹ ta kẹ ovie na nọ: “Ivie, jomẹ nya kpobọ Hebrọn+ re me ru eyaa nọ mẹ ya kẹ Jihova gba. 8 Keme okenọ odibo ra ọ jẹ rria obọ Gẹshọ+ evaọ Siria, ọ ya eyaa nana+ inọ: ‘Otẹrọnọ Jihova ọ rehọ omẹ zihe ze Jerusalẹm, me ti dhe idhe kẹ* Jihova.’” 9 Ovie na ọ tẹ ta kẹe nọ: “Nya tou.” Fikiere ọ tẹ wọ, o te kpobọ Hebrọn.

10 Absalọm o te vi ekiotọ kpohọ erua Izrẹl kpobi, inọ: “Nọ wha tẹ nwani yo edo onware, wha ve whowho nọ, ‘Absalọm o zihe ruọ ovie no evaọ Hebrọn!’”+ 11 Whaọ ezae egba ivẹ (200) i no Jerusalẹm lele Absalọm nya; ezizie a zizie ahwo na, a tẹ nya ogbogbori, a riẹ oware nọ o jẹ via ha. 12 U te no ere no, nọ Absalọm o je dhe idhe na, o vi ohwo nyai se Ahitofẹl+ ohwo Gaelọ na, ọnọ ọ jọ ọkiroro*+ Devidi, o te no obọ Gaelọ+ okpẹwho riẹ ze. Ẹgwae omuomu nọ ọ jẹ lẹlẹ gba na o te je dhe ẹgẹga, yọ ahwo nọ a jọ abọ Absalọm a je dhe ebuebu.+

13 Nọ u te oke jọ, ohwo jọ ọ tẹ nyae vuẹ Devidi nọ: “Udu ezae Izrẹl u kurẹriẹ bru Absalọm no.” 14 Devidi ọ tẹ nwane ta kẹ idibo riẹ kpobi nọ e rrọ kugbei evaọ Jerusalẹm nọ: “Wha kpama re ma dhẹ,+ keme mai ọvuọvo ọ te va Absalọm abọ họ! Ovẹrẹ, o gbẹ rrọ ere he ọ sai ko omai họ, ọ vẹ wha okpẹtu se omai jẹ rehọ ọgbọdọ kpe ahwo okpẹwho na!”+ 15 Idibo ovie na e tẹ kpahe kẹe nọ: “Oware kpobi nọ olori mẹ ovie na ọ jiroro riẹ nọ o re ru, oye idibo ra a ti ru.”+ 16 Ere ovie na ọ rọ nyavrẹ avọ ahwo uwou riẹ kpobi nọ a je lele iei, rekọ ovie na ọ tẹ nyasiọ ese+ ikpe riẹ ba re a rẹrote uwou* na. 17 Ovie na avọ ahwo kpobi nọ a bi lele iei a tẹ ruabọhọ onya rai, nọ a te Bẹt-mẹhak, a tẹ daji.

18 Idibo riẹ kpobi nọ i je lele iei* avọ ahwo Kẹrẹt kpobi, ahwo Pẹlẹt+ kpobi, gbe ahwo Gat+ na kpobi, ezae egba ezeza (600) nọ i lele i rie no obọ Gat+ ze, a tẹ jẹ nyavrẹ yọ ovie na ọ be kiẹ ai riwi.* 19 Kẹsena ovie na ọ tẹ ta kẹ Itai+ ohwo Gat na nọ: “Fikieme who re ro lele omai nya re? Zihe re whọ jọ kugbe ovie ọkpokpọ na, keme whẹ yọ ohwo orẹwho ọfa, whọ tẹ jẹ rrọ ohwo nọ ọ dhẹ no ẹwho riẹ. 20 Odẹnukpo whọ nyaze, kọ u fo re me ru owhẹ lele omai ghoro nẹnẹ, re who lele omẹ okenọ mẹ be nyavrẹ je kpohọ obonọ mẹ be nya? Te owhẹ te inievo ra wha zihe, yọ ajọ Jihova o dhesẹ uyoyou nọ o rẹ hiẹ hẹ gbe ọtẹruo+ kẹ owhẹ!” 21 Rekọ Itai ọ tẹ kpahe kẹ ovie na nọ: “Nọ Jihova ọ rrọ uzuazọ na, yọ olori mẹ ovie na ọ rrọ uzuazọ na, oria kpobi nọ olori mẹ ovie na ọ rrọ, etẹe odibo ra ọ te jọ re,+ te uwhu te azọ!” 22 Fikiere Devidi ọ tẹ ta kẹ Itai+ nọ: “Nyae fa vrẹ.” Ere Itai ohwo Gat na ọ rọ fa vrẹ, avọ ahwo riẹ gbe emọ riẹ kpobi.

23 Ahwo kpobi nọ a jọ ẹkwotọ na a tẹ jẹ viẹ gaga nọ ahwo nana kpobi a be fa vrẹ na, yọ ovie na o dikihẹ Ukiekpotọ Kidrọn;+ ahwo na kpobi a tẹ jẹ fa vrẹ kpohọ edhere nọ o kpobọ udhude na. 24 Zedọk+ ọ jọ etẹe re, yọ ahwo Livae+ na kpobi nọ a wọ etehe+ ọvọ Ọghẹnẹ uzẹme na+ a jọ kugbei re; a tẹ wọ etehe ọvọ Ọghẹnẹ uzẹme na fihọ otọ; Abayata+ ọ jọ etẹe bẹsenọ ahwo na kpobi a rọ fa vrẹ no okpẹwho na. 25 Rekọ ovie na ọ tẹ ta kẹ Zedọk nọ: “Wọ etehe ọvọ Ọghẹnẹ uzẹme na zihe kpobọ okpẹwho na.+ Otẹrọnọ Jihova o te rri omẹ aro, ọ te rehọ omẹ zihe ze jẹ kẹ omẹ uvẹ ruẹ etehe ọvọ na gbe oria nọ o rrọ.+ 26 Rekọ otẹrọnọ ọ tẹ ta nọ, ‘Eva ra e be were omẹ hẹ,’ jọ o ru omẹ oware kpobi nọ o were riẹ.” 27 Ovie na ọ tẹ ta kẹ Zedọk ozerẹ na nọ: “Kọ ogbẹrọnọ ọruẹ-ude whọ rrọ?+ Zihe kpobọ okpẹwho na tou, re wha rehọ emezae ivẹ rai Ahimehaz ọmọzae ra gbe Jonatan+ ọmọzae Abayata lele oma. 28 Rri, mẹ te hẹrẹ omojọ evaọ eria ekpakpafua ethẹ na nọ e rrọ udhude na bẹsenọ me re yo mi owhai.”+ 29 Fikiere Zedọk avọ Abayata a tẹ rehọ etehe ọvọ Ọghẹnẹ uzẹme na zihe kpobọ Jerusalẹm, a tẹ jọ obei.

30 Nọ Devidi ọ jọ edhere jẹ nya kpobọ Ugbehru* Olivi,+ yọ ọ be viẹ nọ ọ be nya na; ọ rehọ ohọ ruru uzou riẹ, yọ ọ be rọ evawọ gheghe nya. Ahwo kpobi nọ a jọ kugbei a rehọ ohọ ruru uzou rai re, yọ a be viẹ nọ a be nya na. 31 Evaọ oke yena a tẹ vuẹ Devidi nọ: “Ahitofẹl ọ rrọ usu ahwo nọ a kuomagbe Absalọm+ evaọ ẹgwae omuomu+ riẹ na.” Fikiere Devidi ọ tẹ ta nọ: “O Jihova,+ ivie, rẹriẹ ohrẹ Ahitofẹl ruọ ohrẹ ugheghẹ!”+

32 Nọ Devidi ọ nyate obọ ehru ugbehru na evaọ oria nọ ahwo a jẹ hae jọ guzou kpotọ kẹ Ọghẹnẹ na, Hushae+ ohwo uyẹ Akae+ na ọ tẹ nyabru ei ze etẹe, avọ ewu othethei riẹ nọ ọ bẹre, gbe ẹkpẹ nọ ọ riẹe uzou. 33 Rekọ Devidi ọ tẹ ta kẹe nọ: “Otẹrọnọ who te lele omẹ fa vrẹ, whọ te jọ owha kẹ omẹ. 34 Rekọ otẹrọnọ who te zihe kpobọ okpẹwho na whọ jẹ ta kẹ Absalọm nọ: ‘O ovie, mẹ yọ odibo ra. Mẹ jọ odibo ọsẹ ra evaọ okenọ u kpemu, rekọ enẹna mẹ yọ odibo ra,’+ kẹsena whọ vẹ sae raha ohrẹ Ahitofẹl kẹ omẹ.+ 35 Binọ Zedọk avọ Abayata izerẹ na a rrọ obei kugbe owhẹ. Whọ rẹ vuẹ Zedọk avọ Abayata izerẹ na oware kpobi nọ whọ jọ obọ uwou ovie+ na yo. 36 Rri! Emezae ivẹ rai e rrọ kugbe ai, Ahimehaz+ ọmọzae Zedọk gbe Jonatan+ ọmọzae Abayata, ae who re vi ze te vuẹ omẹ oware kpobi nọ who yo.” 37 Fikiere Hushae, ogbẹnyusu Devidi*+ o te kpobọ okpẹwho na evaọ okenọ Absalọm ọ jẹ ruọ Jerusalẹm.

16 Nọ Devidi ọ nya vrẹ ehru ugbehru na no omojọ,+ ọ tẹ ruẹ Zaeba,+ odibo Mẹfiboshẹt+ nọ ọ nyaze ti zere iei avọ eketekete ivẹ nọ a ruẹrẹ kpahe no, yọ ikulu ebrẹdi egba ivẹ (200), ikeki resin udhusoi (100), ikeki ibi-ire ezi ivo* udhusoi (100), gbe akana udi ologbo e rrọ ehru rai.+ 2 Ovie na ọ tẹ nọ Zaeba nọ: “Fikieme whọ rọ rehọ eware nana ze?” Zaeba o te yo nọ: “Eketekete na e rrọ kẹ ahwo uwou ovie na nọ a rẹ dhẹ, ebrẹdi avọ ibi-ire ezi ivo na e rrọ kẹ emoha na nọ a rẹ re, yọ udi na o rrọ kẹ enọ oma o te rrọ evaọ udhude na re a da.”+ 3 Ovie na ọ tẹ ta nọ: “Kọ ọmọzae* olori ra ọ rrọ?”+ Zaeba ọ tẹ ta kẹ ovie na nọ: “Ọ rrọ obọ Jerusalẹm, keme ọ ta nọ, ‘Nẹnẹ na, uwou Izrẹl u ti zihe esuo uvie ọsẹ mẹ kẹ omẹ.’”+ 4 Ovie na ọ tẹ ta kẹ Zaeba nọ: “Rri! Oware kpobi nọ Mẹfiboshẹt o wo u zihe ruọ ora no.”+ Zaeba ọ tẹ ta nọ: “Me guzou kpotọ kẹ owhẹ. Jọ me wo aruoriwo evaọ aro ra, olori mẹ ovie.”+

5 Nọ Devidi ovie na o te Bahurim, ọzae jọ evaọ unuwou Sọl nọ a re se Shimia,+ ọmọzae Gira, ọ tẹ nya lahwe, yọ ọ be bọwo ehao nọ ọ be nyabru ae na.+ 6 Ọ tẹ jẹ rọ itho fi Devidi avọ idibo Devidi kpobi, te ahwo na kpobi gbe egbaẹmo nọ e jọ te obọze te ẹkpẹlobọ riẹ. 7 Enẹ Shimia ọ jẹ ta nọ ọ jẹ bọwo ehao na: “Nya no etenẹ no, nya no etenẹ no, whẹ nọ o kpe azẹ vọ uzou na! Whẹ nọ o fioka ohwo ho na! 8 Jihova o zihe azẹ ahwo kpobi nọ who kpe evaọ uwou Sọl ziọ uzou ra no, ọnọ who mi esuo uvie na, rekọ Jihova ọ tẹ rehọ uvie na kẹ Absalọm ọmọzae obọra. Enẹna okpẹtu o te owhẹ oma no, keme whẹ yọ ọzae nọ ọ reabe azẹ!”+

9 Kẹsena Abishae ọmọzae Zeruya+ ọ tẹ ta kẹ ovie na nọ: “Fikieme arakọ owhuowhu nana+ ọ rẹ rọ bọwo olori mẹ ovie na ehao?+ Ivie, jomẹ nya re me bru uzou riẹ no.”+ 10 Rekọ ovie na ọ tẹ ta nọ: “Eme me wo kugbe owhai, whai emezae Zeruya?+ Wha kẹe uvẹ re ọ bọwo omẹ ehao,+ keme Jihova ọ ta kẹe nọ,+ ‘Bọwo Devidi ehao!’ Kọ ono ọ rẹ ta nọ, ‘Fikieme who bi ro ru onana?’” 11 Kẹsena Devidi ọ tẹ ta kẹ Abishae avọ idibo riẹ kpobi nọ: “Rri, ọmọzae obọmẹ, ọnọ o no oma obọmẹ ze ọ be gwọlọ uzuazọ* mẹ kpe,+ kọ ohwo orua Bẹnjamin+ họ ọnọ o re ru ere he! Wha vu ei wa re ọ bọwo omẹ ehao, keme Jihova ọ ta kẹe nọ o ru ere! 12 Ẹsejọhọ Jihova ọ te ruẹ oja nọ mẹ be re,+ Jihova ọ vẹ te rọ ewoma hwosa kẹ omẹ viukpọ ehao nọ ọ bọwo omẹ nẹnẹ na.”+ 13 Devidi avọ ahwo riẹ a tẹ ruabọhọ be nyavrẹ evaọ edhere na, yọ Shimia ọ be nya akotọ ugbehru nọ o kẹle riẹ, be bọwo ae ehao,+ be rehọ itho fi ai jẹ be whẹ ovu ku ai.

14 Ukuhọ riẹ ovie na avọ ahwo kpobi nọ a jọ kugbei a tẹ nyate obonọ a bi kpohọ avọ oma nọ o rrọ rai no, a te serihọ.

15 Evaọ oke yena, Absalọm avọ ezae Izrẹl kpobi a te te Jerusalẹm, yọ Ahitofẹl+ ọ jọ kugbei. 16 Nọ Hushae+ ohwo uyẹ Akae+ na, ogbẹnyusu Devidi* ọ nyabru Absalọm ze, Hushae ọ tẹ ta kẹ Absalọm nọ: “Jọ ovie na ọ rria tọ! Jọ ovie na ọ rria tọ!”+ 17 Absalọm ọ tẹ ta kẹ Hushae nọ: “Kọ uyoyou nọ o rẹ hiẹ hẹ nọ who wo kẹ ogbẹnyusu ra ona? Fikieme who gbe lele ogbẹnyusu ra ha?” 18 Fikiere Hushae ọ tẹ ta kẹ Absalọm nọ: “Ijo, abọ ohwo nọ Jihova, ahwo nana, gbe ezae Izrẹl kpobi a salọ mẹ rrọ. Mẹ te jọ kugbei. 19 U te no ere no, mẹ ta kẹ omamẹ nọ, Ono mẹ rẹ gbodibo kẹ? Kọ ogbẹrọnọ ọmọzae riẹ? Nwane wọhọ epanọ mẹ gbodibo kẹ ọsẹ ra na, ere mẹ te gbodibo kẹ owhẹ re.”+

20 Kẹsena Absalọm ọ tẹ ta kẹ Ahitofẹl nọ: “Wha kẹ omẹ ohrẹ.+ Eme ma re ru?” 21 Ahitofẹl ọ tẹ ta kẹ Absalọm nọ: “Lele ese ọsẹ ra+ na wezẹ, enọ ọ nyaseba re a rẹrote uwou*+ na. Ahwo Izrẹl kpobi a ve ti yo nọ who ru omara họ oware nọ u re tu ohwo oma kẹ ọsẹ ra no, u ve ti ru ahwo nọ a rrọ abọ ra kru oma ga.” 22 Fikiere a tẹ rọ uwou-udhu vi kẹ Absalọm evaọ ehru uwou na,+ Absalọm o te je lele ese ọsẹ riẹ wezẹ+ evaọ iraro ahwo Izrẹl soso.+

23 Evaọ edẹ yena, a jẹ hai rri ohrẹ Ahitofẹl+ wọhọ ẹme* Ọghẹnẹ uzẹme na. Yọ ere Devidi avọ Absalọm a jẹ hai rri ohrẹ Ahitofẹl kpobi.

17 Kẹsena Ahitofẹl ọ tẹ ta kẹ Absalọm nọ: “Ivie, jomẹ salọ ezae idu ikpegbivẹ (12,000) re mẹ wọ nyai le Devidi aso nana. 2 Mẹ te vẹruọ ẹe evaọ okenọ oma o rrọ riẹ no nọ o gbe wo ogaga ha,*+ mẹ vẹ te whẹ ozọ họ iẹe oma; ahwo nọ a rrọ kugbei kpobi a vẹ te dhẹ, me ve kpe ovie na ọvo.+ 3 Kẹsena me ve ti zihe ahwo na kpobi bru owhẹ ze. Oware nọ o te via kẹ ọzae nọ whọ be gwọlọ na oye u ti ru nọ ahwo na kpobi a sai ro zihe ze. Kẹsena ahwo na kpobi a vẹ te rria dhedhẹ.” 4 Iroro nọ ọ jẹ ze na e tẹ nwani kiehọ evaọ aro Absalọm avọ ekpako Izrẹl kpobi.

5 Rekọ Absalọm ọ tẹ ta nọ: “Ivie wha se Hushae+ ohwo uyẹ Akae na ze re, re ma yo ẹme nọ ọ te ta.” 6 Fikiere Hushae ọ tẹ nyabru Absalọm ze. Absalọm ọ tẹ ta kẹe nọ: “Ohrẹ nọ Ahitofẹl ọ kẹ ona. Kọ ma lele ohrẹ riẹ na? O gbẹ rrọ ere he, ta onọ ma re ru kẹ omai.” 7 Hushae ọ tẹ ta kẹ Absalọm nọ: “Ohrẹ nọ Ahitofẹl ọ kẹ evaọ onana u woma ha!”+

8 Hushae ọ tẹ jẹ ta nọ: “Whọ riẹ vevẹ nọ ọsẹ ra avọ ezae nọ e rrọ kugbei a rrọ gaga,+ yọ eva e be dha ae gaga wọhọ adaka nọ emọ riẹ i vru evaọ ẹwọ.+ U te no ere no, ọsẹ ra yọ ọgbaẹmo,+ yọ ọ te jọ oria nọ ahwo na a rrọ evaọ aso na ha. 9 Nọ ma be ta ẹme na, o dhere eghogho-utho* jọ hayo oria ofa jọ;+ nọ ọ tẹ kake wọ ohọre lahwe, ahwo nọ a ti yo kpahe iẹe a te ta nọ, ‘A fi ahwo nọ a bi lele Absalọm kparobọ no!’ 10 Makọ ọzae nọ ọ gudu nọ udu riẹ o wọhọ orọ okpohrokpo+ dede, ozọ u ti kpei no, keme ahwo Izrẹl kpobi a riẹ nọ ọsẹ ra yọ ọgba,+ jegbe nọ ezae nọ e rrọ kugbei a gudu gaga. 11 Ohrẹ nọ mẹ be kẹ owhẹ họ: Jọ a koko Izrẹl kpobi họ bru owhẹ ze, no Dan rite Biẹ-shiba,+ ogbotu nọ ọ rrọ buobu wọhọ uwẹkpẹ akotọ abade,+ who ve su ai kpohọ ẹmo na. 12 Ma te họre iẹe evaọ oria kpobi nọ ma jọ ruẹ e riẹ, ma vẹ te whẹ ruru iei wọhọ igrigri nọ i bi kie fihọ otọ; uvumọ ohwo evaọ usu rai ọ te zọ họ, makọ ọyomariẹ hayo ezae nọ e rrọ kugbei na. 13 Otẹrọnọ ọ dhẹ ruọ okpẹwho jọ, ahwo Izrẹl kpobi a te tọlọ ifi ruọ okpẹwho yena, ma ve ti si okpẹwho na ruọ ukiekpotọ na, bẹsenọ makọ ubiutho dede u gbe ti kiọkọ etẹe he.”

14 Kẹsena Absalọm avọ ezae Izrẹl kpobi a tẹ ta nọ: “Ohrẹ Hushae ohwo uyẹ Akae na u woma vi+ ohrẹ Ahitofẹl!” Keme Jihova ọ gba riẹ mu* no nọ ọ rẹ raha emamọ ohrẹ Ahitofẹl+ na, re Jihova ọ ruẹse wha okpẹtu se Absalọm.+

15 Kẹsena Hushae ọ tẹ ta kẹ Zedọk avọ Abayata+ izerẹ na nọ: “Ohrẹ nọ Ahitofẹl ọ kẹ Absalọm avọ ekpako Izrẹl ona, rekọ ohrẹ nọ mẹ kẹ rai ona. 16 Enẹna wha vi uwou se Devidi ovẹrẹ, re wha vẹvẹ iẹe unu nọ: ‘Who du jọ eria ekpakpafua ethẹ na* nọ e rrọ udhude na aso nana ha, whọ rẹ fa vrẹ hrọ, o gbẹ rrọ ere he a ti voro* ovie na avọ ahwo nọ a rrọ kugbei kpobi muotọ.’”+

17 Jonatan+ avọ Ahimehaz+ a jẹ rria Ẹn-rogẹl+ nọ ọ rrọ otafe okpẹwho na, re ahwo a siọ ae ba ẹruẹ; fikiere a te vi odibo-ọmọtẹ jọ nyae vuẹ ae, ae omarai a tẹ nyae vuẹ Devidi ovie na. 18 Rekọ ọmoha jọ ọ ruẹ e rai, ọ tẹ nyae vuẹ Absalọm. Fikiere aimava na a tẹ nyavrẹ vẹrẹ vẹrẹ, a tẹ ziọ uwou ọzae jọ evaọ Bahurim,+ ọnọ o wo oza evaọ ighẹ riẹ. A tẹ ruọ eva oza na, 19 aye ọzae na ọ tẹ rọ oware jọ ruru unu oza na, ọ tẹ vravra ibi ekakọ nọ a kpare no fihọ ehru riẹ; ohwo ọvo ọ riẹ kpahe oware nọ o via na ha. 20 Idibo Absalọm a tẹ nyabru aye na ziọ uwou riẹ, a tẹ nọe nọ: “Kọ Ahimehaz avọ Jonatan a rrọ?” Aye na o te yo kẹ ae nọ: “A nya etenẹ vrẹ rri obọ ethẹ na.”+ Ezae na e tẹ jẹ gwọlọ ae, rekọ a ruẹ e rai hi, a te zihe kpobọ Jerusalẹm.

21 Nọ ezae na e nyavrẹ no, a te no eva oza na ze, a tẹ nyae vuẹ Devidi ovie na uwou nọ a vi rai na. A vuẹ riẹ nọ: “Kpama re whọ fa ethẹ na vrẹ vẹrẹ vẹrẹ, keme ohrẹ nọ Ahitofẹl ọ kẹ kpahe owhẹ ona.”+ 22 Devidi avọ ahwo kpobi nọ a rrọ kugbei a tẹ nwane wọ, a tẹ fa Ethẹ Jọdan na vrẹ. Nọ oke o ke, ohwo ọvo o kiọkọ họ nọ ọ re fa Ethẹ Jọdan vrẹ hẹ.

23 Nọ Ahitofẹl ọ ruẹ nọ a ru lele ohrẹ riẹ hẹ, ọ tẹ ruọ eketekete, o te kpobọ uwou riẹ evaọ obọ ẹwho riẹ.+ Nọ ọ vuẹ ahwo uwou riẹ oware nọ a re ru no,+ o te thuru whu.*+ Ere o ro whu, a te ki ei fihọ oria nọ a ki esẹ-esẹ riẹ fihọ.

24 Evaọ oke yena, Devidi o te kpobọ Mehaneyẹm,+ Absalọm avọ ezae Izrẹl kpobi a tẹ fa Ethẹ Jọdan vrẹ. 25 Absalọm o te fi Amesa+ họ oletu ogbaẹmo na evaọ ẹta Joab;+ Amesa yọ ọmọzae ọzae Izrẹl jọ nọ a re se Itra nọ o lele Abigẹle+ ọmọtẹ Nehash wezẹ,* Abigẹle yọ oniọvo-ọmọtẹ Zeruya, oni Joab. 26 Ahwo Izrẹl avọ Absalọm a tẹ fa evuẹ fihọ ẹkwotọ Giliad.+

27 Nọ Devidi ọ nwani te Mehaneyẹm, Shobae ọmọzae Nehash nọ o no Raba+ ọrọ ahwo Ammọn ze, Meka+ ọmọzae Amiẹl nọ o no Lo-diba ze, gbe Bazilae+ ohwo Giliad nọ o no Rogilẹm ze 28 a tẹ rehọ eware nana se ai: ehwa, idhe, iwho, iwhiti, ebali, eflawa, eka nọ a sasa,* egwa ikpokpoko, ezaa, ibi ekakọ eyaya, 29 ọnyọ, ebọta, igodẹ, gbe ichizi.* A rehọ eware nana kpobi se Devidi gbe ahwo nọ a rrọ kugbei re a re,+ keme a ta nọ: “Ohọo u bi kpe ahwo na, oma o rrọ rai no, yọ uruame u bi kpe ai evaọ udhude na.”+

18 Kẹsena Devidi o te kele ezae nọ e jọ kugbei, ọ tẹ rehọ iletu mu kẹ ae, iletu itu ahwo idu gbe iletu itu ahwo udhusoi.+ 2 Devidi o te fi abọvo abasa ezae na họ otọ* Joab,+ abọvo abasa jọ ọ tẹ jọ otọ oniọvo Joab nọ a re se Abishae,+ ọmọzae Zeruya,+ abọvo abasa ọfa ọ tẹ jọ otọ Itai+ ohwo Gat na. Kẹsena ovie na ọ tẹ ta kẹ ezae na nọ: “Me ti lele owhai nya re.” 3 Rekọ a tẹ ta nọ: “Whọ rẹ nya vievie he,+ keme otẹrọnọ ma tẹ dhẹ, a te daezọ mai* hi; yọ otẹrọnọ abọvo egbaẹmo na ọ tẹ maki whu dede, a te daezọ mai hi, keme whẹ ọvo who te egbaẹmo idu ikpe (10,000) mai.+ Fikiere o te mai woma re who vi ahwo no okpẹwho na ze ti fiobọhọ kẹ omai.” 4 Ovie na ọ tẹ ta kẹ ae nọ: “Me ti ru oware kpobi nọ wha rri nọ o mai woma.” Fikiere ovie na o te dikihẹ akotọ unuẹthẹ okpẹwho na, ezae na kpobi e tẹ nyavrẹ itu-itu, itu ahwo udhusoi gbe itu ahwo idu. 5 Kẹsena ovie na o te jie uzi kẹ Joab gbe Abishae gbe Itai nọ: “Wha rẹrẹ obọ kẹ Absalọm ọmoha na fiki mẹ.”+ Ezae na kpobi a yo evaọ okenọ ovie na o jie uzi kẹ iletu na kpobi kpahe Absalọm.

6 Ezae na e tẹ wọ bru ahwo Izrẹl kpobọ ẹwọ na, a te fi ẹmo evaọ owhawho Ifremu.+ 7 Idibo Devidi+ a tẹ jọ etẹe fi ahwo Izrẹl+ kparobọ, a te kpe ahwo buobu evaọ ẹdẹ yena, ezae idu udhe (20,000). 8 Ẹmo na ọ tẹ vaha ruọ ubrotọ na soso. Ofariẹ, ahwo nọ owhawho na u kpe a bu vi enọ a rehọ ọgbọdọ kpe evaọ ẹdẹ yena.

9 Ukuhọ riẹ Absalọm ọ tẹ dhẹ ku idibo Devidi. Absalọm ọ jẹ dhẹ eketekete,* eketekete* na ọ tẹ dhẹ ruọ otọ egha ure ulogbo jọ, eto riẹ e tẹ jẹhọ ure ulogbo na, o te je veghe evaọ ehru* yọ eketekete* nọ ọ jọ ehru riẹ na ọ be dhẹ vrẹ ọvo. 10 Kẹsena ohwo jọ ọ tẹ ruẹ e riẹ, ọ tẹ vuẹ Joab+ nọ: “Rri! Mẹ ruẹ Absalọm nọ o bi veghe evaọ ehru ure ulogbo jọ.” 11 Joab ọ tẹ kpahe kẹ ọzae na nọ: “Otẹrọnọ whọ ruẹ e riẹ, fikieme who gbe duwu iei kpe fihọ otọ ẹsiẹsiẹ yena ha? Mẹ hae te rọ evawere kẹ owhẹ ewẹ isiliva ikpe gbe umueku.” 12 Rekọ ọzae na ọ tẹ ta kẹ Joab nọ: “A tẹ make kẹ omẹ ewẹ isiliva odu ọvo (1,000) dede,* mẹ rẹ sae rehọ obọ mẹ kpe ọmọzae ovie na ha, keme ma yo uzi nọ ovie na o jie kẹ owhẹ avọ Abishae gbe Itai inọ, ‘Wha ruẹ nọ uvumọ ohwo ọ nwa Absalọm ọmoha na oma ha.’+ 13 O hae jọ nọ mẹ ghẹmeeyo jẹ rehọ uzuazọ riẹ no,* a hae ko ẹe dhere ovie na vievie he, yọ whọ hae te thọ omẹ hẹ.” 14 Fikiere Joab ọ tẹ ta nọ: “Mẹ te gbẹ raha uvumọ oke kugbe owhẹ hẹ!” Ọ tẹ tọlọ ese* esa fihọ obọ, ọ tẹ rehọ ae duwu Absalọm udu ruọ eva nọ ọ gbẹ rrọ uzuazọ evaọ ure ulogbo na. 15 Kẹsena idibo ikpe nọ e wha ekwakwa ẹmo Joab a tẹ nyaze, a te duwu Absalọm bẹsenọ o ro whu.+ 16 Joab o te kporo onware, egbaẹmo na i te zihe no obọ ahwo Izrẹl nọ a je le ze; ere Joab ọ rọ vuẹ ai nọ a dobọji. 17 A tẹ wọ Absalọm, a te gbolo iei fihọ ọgọdọ ologbo jọ evaọ owhawho na, a tẹ kwa itho buobu ruru iei.+ Ahwo Izrẹl kpobi a tẹ dhẹ kpobọ iwou rai.

18 Whaọ okenọ Absalọm ọ jọ uzuazọ, ọ rehọ upila jọ vi kẹ omariẹ evaọ Ukiekpotọ* Ovie na,+ keme ọ ta nọ: “Me wo ọmọzae ọvo nọ a te rọ kareghẹhọ odẹ mẹ hẹ.”+ Fikiere ọ tẹ rọ odẹ riẹ se upila na, yọ a bi sei Oka Ekareghẹhọ Absalọm rite ẹdẹ inẹnẹ na.

19 Ahimehaz+ ọmọzae Zedọk ọ tẹ ta nọ: “Ivie, jomẹ dhẹ nyae vuẹ ovie na usi na, keme Jihova o bru uvioziẹ kẹe no nọ o ro siwi ei no obọ ewegrẹ riẹ.”+ 20 Rekọ Joab ọ tẹ ta kẹe nọ: “Whọ te jọ ọnọ ọ rẹ wha usi nẹnẹ hẹ. Whọ sae wha usi ẹdẹ ọfa, rekọ nẹnẹ na whọ te wha usi na ha, keme ọmọzae obọ ovie na o whu na.”+ 21 Kẹsena Joab ọ tẹ ta kẹ ohwo Kush+ jọ nọ: “Nya re whọ vuẹ ovie na oware nọ whọ ruẹ.” Ohwo Kush na o te guzou kpotọ kẹ Joab, ọ tẹ dhẹ vrẹ. 22 Ahimehaz ọmọzae Zedọk ọ tẹ wariẹ ta kẹ Joab nọ: “Oghẹrẹ kpobi nọ o rrọ kẹhẹ, ivie jomẹ dhẹ lele ohwo Kush na.” Rekọ Joab ọ tẹ ta kẹe nọ: “Ọmọzae mẹ, fikieme whọ rẹ rọ dhẹ lele iei kpakiyọ usi ovo o riẹ nọ whọ be wha ha?” 23 Ghele na, Ahimehaz ọ tẹ ta nọ: “Oghẹrẹ kpobi nọ o rrọ kẹhẹ, jomẹ dhẹ nya.” Fikiere Joab ọ tẹ ta kẹe nọ: “Dhẹ nya!” Ahimehaz ọ tẹ dhẹ orọ ubrotọ Jọdan,* ukuhọ riẹ o te mi ohwo Kush na aro.

24 Whaọ Devidi ọ keria udevie inuethẹ ivẹ okpẹwho+ na, yọ ororoke+ na ọ gadiẹ kpobọ ehru unuẹthẹ nọ o kẹle ugbẹhẹ na. Nọ ọ kpare ovao, ọ tẹ ruẹ ọzae jọ nọ ọye ọvo ọ be dhẹ ze. 25 Fikiere ororoke na ọ tẹ kpaunu se ovie na, ọ tẹ ta kẹe. Ovie na ọ tẹ ta nọ: “Otẹrọnọ ọye ọvo ọ rrọ usu, kiyọ usi jọ ọ be wha ze na.” Nọ ohwo na ọ be dhẹ kẹle ae na, 26 ororoke na ọ tẹ ruẹ ọzae ọfa nọ ọ be dhẹ ze. Ororoke na ọ tẹ kpaunu se orou-unuẹthẹ* na nọ: “Rri! Ọzae ọfa jọ ọvo ọ rrọ usu be dhẹ ze!” Ovie na ọ tẹ ta nọ: “Usi jọ ọ be wha ze re na.” 27 Ororoke na ọ tẹ ta nọ: “Mẹ be ruẹ nọ ọzae ọsosuọ na ọ be dhẹ wọhọ Ahimehaz+ ọmọzae Zedọk,” fikiere ovie na ọ tẹ ta nọ: “Emamọ ohwo ọ rrọ, yọ emamọ usi ọ rẹ wha ze.” 28 Kẹsena Ahimehaz ọ tẹ kpaunu ta kẹ ovie na nọ: “Eware i woma no!” O te kigwẹ guzou kpotọ kẹ ovie na. Kẹsena ọ tẹ ta nọ: “Jọ ujiro u te Jihova Ọghẹnẹ ra, ọnọ ọ rehọ ezae nọ e be kpareso* olori mẹ ovie na họ obọ riẹ no!”+

29 Rekọ ovie na ọ tẹ nọe nọ: “Kọ Absalọm ọmoha na ọ rrọ omakọkọ?” Ahimehaz ọ tẹ ta kẹ ovie na nọ: “Mẹ ruẹ ozighi ọgaga nọ ọ jọ otọ evaọ okenọ Joab o vi odibo ovie na gbe omẹ odibo ra vrẹ, rekọ mẹ riẹ oware nọ o wha ozighi na ze he.”+ 30 Fikiere ovie na ọ tẹ ta nọ: “Ruọ akotọ, dikihẹ etenẹ.” Ọ tẹ ruọ akotọ, o te dikihẹ etẹe.

31 Kẹsena ohwo Kush na ọ tẹ dhẹ ze,+ ohwo Kush na ọ tẹ ta nọ: “Jọ olori mẹ ovie na ọ jẹ usi nana rehọ: Nẹnẹ na Jihova o bru uvioziẹ no nọ o ro siwi owhẹ no obọ ahwo kpobi nọ a kpareso owhẹ.”+ 32 Rekọ ovie na ọ tẹ nọ ohwo Kush na nọ: “Kọ Absalọm ọmoha na ọ rrọ omakọkọ?” Ohwo Kush na ọ tẹ ta nọ: “Jọ ewegrẹ olori mẹ ovie na kpobi avọ ahwo kpobi nọ a kpareso owhẹ re a nwa owhẹ oma a jọ wọhọ ọmoha na!”+

33 Onana o tẹ kẹ ovie na uye, o te kpobọ ubruwou obehru nọ o rrọ ehru unuẹthẹ okpẹwho na ọ tẹ jẹ viẹ, yọ ọ be nya wariẹ be ta nọ: “Absalọm ọmọzae mẹ, ọmọzae mẹ, Absalọm ọmọzae mẹ! Dodokọ mẹ o whu na, viukpọ owhẹ, Absalọm ọmọzae mẹ, ọmọzae mẹ!”+

19 A tẹ vuẹ Joab nọ: “Ovie na ọ be viẹ je bi weri fiki Absalọm.”+ 2 Fikiere obokparọ* nọ a wo ẹdẹ yena u te zihe ruọ uweri kẹ ahwo na kpobi fikinọ a yo nọ ovie na o bi weri ọmọzae riẹ. 3 Ahwo na a tẹ lẹlẹ ruọ okpẹwho na+ evaọ ẹdẹ yena wọhọ ahwo nọ oma o be vo fikinọ a dhẹ no ẹmo. 4 Ovie na ọ tẹ rehọ ohọ ruru ovao riẹ yọ ọ be viẹ bi bo nọ: “Absalọm ọmọzae mẹ! Absalọm ọmọzae mẹ, ọmọzae mẹ!”+

5 Kẹsena Joab ọ tẹ nyabru ovie na evaọ obọ uwou, ọ tẹ ta nọ: “Nẹnẹ na, who ru oma vuọ idibo ra kpobi, enọ i siwi uzuazọ* ra nẹnẹ na gbe uzuazọ* emezae ra,+ emetẹ ra,+ eyae ra, gbe ese ra.+ 6 Ahwo nọ a mukpahe owhẹ who you, who te mukpahe ahwo nọ a you owhẹ, keme who dhesẹ via vevẹ no nẹnẹ na inọ who se iletu ra gbe idibo ra gboware ovo ho, keme u mu omẹ ẹro nọ, o hae jọ nọ Absalọm ọvo ọ rrọ uzuazọ nẹnẹ na, mai ahwo nọ a kiọkọ ma je whu, oye o hẹ mae were owhẹ. 7 Obọnana kpama, re whọ nyaruọ otafe, re whọ tuduhọ idibo ra awọ,* keme mẹ rehọ odẹ Jihova duwu iyei nọ, whọ gbẹ ruọ otafe he, ohwo ọvo o ti kiọkọ kugbe owhẹ evaọ aso nana ha. Onana u ve ti yoma kẹ owhẹ vi eware iyoma kpobi nọ e via kẹ owhẹ no anwọ oke uzoge ra ze rite enẹna.” 8 Fikiere ovie na ọ tẹ kpama, ọ tẹ nyae keria unuẹthẹ okpẹwho na, a tẹ vuẹ ahwo na kpobi nọ: “Ovie na ọ nyae keria obọ unuẹthẹ okpẹwho na no.” Kẹsena ahwo na kpobi a tẹ nyaze aro ovie na.

Rekọ ahwo Izrẹl a dhẹ kpohọ ọvuọ uwou riẹ no.+ 9 Ahwo kpobi nọ a rrọ erua Izrẹl kpobi a tẹ be whọ kuoma, be ta nọ: “Ovie na o siwi omai no obọ ewegrẹ mai+ je siwi omai no obọ ahwo Filistia; rekọ enẹna ọ dhẹ no ẹkwotọ na no fiki Absalọm.+ 10 Yọ Absalọm nọ ma ro mu* re o su omai+ o whu no evaọ ẹmo na.+ Kọ fikieme wha gbe bi ru oware ovo re wha rehọ ovie na zihe ze he?”

11 Devidi ovie na o te vi uwou se Zedọk+ avọ Abayata+ izerẹ na nọ: “Wha ta kẹ ekpako Juda+ nọ, ‘Fikieme wha rẹ rọ jọ ahwo urere nọ a rẹ rehọ ovie na zihe kpobọ uwou riẹ, kpakiyọ ẹme nọ ahwo Izrẹl soso a be ta u do te ovie na oma no evaọ obọ uwou riẹ? 12 Inievo obọmẹ wha rrọ; whai yọ ugbonwa gbe uwo obọmẹ.* Fikieme wha rẹ rọ jọ ahwo urere nọ a rẹ rehọ ovie na zihe ze?’ 13 Wha rẹ jẹ ta kẹ Amesa+ nọ, ‘Whẹ yọ ugbonwa gbe uwo obọmẹ. Fikiere, jọ Ọghẹnẹ ọ kẹ omẹ uye je fibae* otẹrọnọ no umuo enẹna vrẹ mẹ gbẹ rehọ owhẹ nwene Joab ho re whọ jọ oletu ogbaẹmo mẹ.’”+

14 Fikiere ọ tẹ ta* udu ezae Juda kpobi kurẹriẹ wọhọ omọvo, a te vi uwou se ovie na nọ: “Whẹ avọ idibo ra kpobi wha zihe kpozi.”

15 Ovie na ọ tẹ wọ muhọ ezihe, ọ tẹ nyate Ethẹ Jọdan, ahwo Juda a tẹ ziọ Gilgal+ ti zere ovie na re a su ei fa Ethẹ Jọdan na vrẹ. 16 Shimia+ ọmọzae Gira, ohwo orua Bẹnjamin nọ o no Bahurim ze o te siawọ lele ezae Juda na nyai zere Devidi ovie na, 17 yọ ezae odu ọvo (1,000) nọ e rrọ ahwo orua Bẹnjamin e jọ kugbei. Zaeba,+ odibo uwou Sọl, avọ emezae ikpegbisoi gbe idibo udhe riẹ a siawọ kpobọ Jọdan na re, a tẹ kake rọ ovie na te obei. 18 Ọ* fa oria okpakpafua ethẹ na ruọ abọdekọ re ọ rehọ ahwo uwou ovie na no abọ obei ze, re o je ru oware kpobi nọ ovie na ọ gwọlọ. Rekọ Shimia ọmọzae Gira o te kigwẹ fihọ aro ovie na okenọ ọ jẹ gwọlọ fa Jọdan na vrẹ. 19 Ọ tẹ ta kẹ ovie na nọ: “Jọ olori mẹ o brukpe omẹ hẹ, yọ ajọ ọ kareghẹhọ oware uyoma nọ odibo riẹ o ru+ evaọ ẹdẹ nọ olori mẹ o ro no Jerusalẹm ho. Jọ ovie na o sei gboja ha, 20 keme mẹ odibo ra mẹ riẹ nọ mẹ raha uzi; fikiere nẹnẹ na, mẹ họ ohwo ọsosuọ evaọ uwou Josẹf soso nọ ọ nyaze ti zere olori mẹ ovie na.”

21 Ẹsiẹvo na Abishae+ ọmọzae Zeruya+ ọ tẹ ta nọ: “Kọ u gbe fo re a kpe Shimia no fiki oware nọ o ru na, fikinọ ọ bọwo ọnọ Jihova o wholo ehao?”+ 22 Rekọ Devidi ọ tẹ ta nọ: “Eme o jọ onana te owhai, whai emezae Zeruya,+ nọ wha be rọ wọso omẹ nẹnẹ na? Kọ u fo nọ a rẹ jọ Izrẹl kpe ohwo jọ nẹnẹ na? Kọ mẹ gbẹ riẹ nọ mẹ yọ ovie Izrẹl nẹnẹ na?” 23 Kẹsena ovie na ọ tẹ ta kẹ Shimia nọ: “Who ti whu hu.” Ovie na o te duwu iyei rọ ya eyaa kẹe.+

24 Mẹfiboshẹt+ ọmọ-uruọmọ* Sọl ọ nyaze ti dede ovie na re. Anwọ ẹdẹ nọ ovie na ọ rọ nyavrẹ na rite ẹdẹ nọ o ro zihe ze dhedhẹ na, Mẹfiboshẹt ọ re te wozẹ awọ riẹ hayo vo eto-enu riẹ hayo fọrọ iwu riẹ hẹ. 25 Nọ ọ nyaze Jerusalẹm* ti dede ovie na, ovie na ọ tẹ nọe nọ: “Mẹfiboshẹt, fikieme who gbe lele omẹ nyavrẹ hẹ?” 26 O te yo kẹe nọ: “Olori mẹ ovie, odibo mẹ+ ọ viẹ omẹ họ. Keme mẹ odibo ra ọ ta nọ, ‘Jomẹ ruẹrẹ eketekete mẹ họ re mẹ dhẹe lele ovie na,’ keme ọmo odibo ra ọ rrọ.+ 27 Rekọ ọ tẹ ta odibo ra raha kẹ olori mẹ ovie na.+ Dede na, olori mẹ ovie na ọ wọhọ ukọ-odhiwu Ọghẹnẹ uzẹme na, fikiere ru oware kpobi nọ u kiehọ owhẹ oma. 28 Olori mẹ ovie na ọ hẹ sai kpe ahwo uwou ọsẹ mẹ soso muotọ, rekọ who te fi odibo ra họ usu ahwo nọ a be jọ emẹjẹ ra re emu.+ Kọ udu vẹ me wo nọ mẹ rẹ rọ yare oware ofa mi ovie na?”

29 Rekọ ovie na ọ tẹ ta kẹe nọ: “Fikieme whọ gbẹ be rọ ta ẹme enẹ? Mẹ jiroro no inọ whẹ avọ Zaeba wha ghale udhu na.”+ 30 Mẹfiboshẹt ọ tẹ ta kẹ ovie na nọ: “Jọ ọye ọvo ọ rehọ iẹe kpobi no, nọ orọnọ olori mẹ ovie na o zihe ziọ uwou riẹ dhedhẹ no na.”

31 Kẹsena Bazilae+ ohwo Giliad na o te no obọ Rogilẹm ze ziọ Jọdan re o su ovie na te obọ Ethẹ Jọdan na. 32 Bazilae ọ kpako gaga no, ikpe udhone ọ jọ, yọ evaọ okenọ ovie na ọ jẹ rria Mehaneyẹm+ ọ jẹ rehọ emu se ovie na, keme o fe gaga. 33 Fikiere ovie na ọ tẹ ta kẹ Bazilae nọ: “Lele omẹ fa ruọ abọ obei, mẹ te hae kẹ owhẹ emu evaọ obọ Jerusalẹm.”+ 34 Rekọ Bazilae ọ tẹ ta kẹ ovie na nọ: “Bro edẹ* uzuazọ mẹ i kiọkọ, nọ me re ro lele ovie na kpohọ Jerusalẹm? 35 Ikpe udhone mẹ rrọ nẹnẹ na.+ Kọ mẹ gbẹ sae riẹ ohẹriẹ nọ o rrọ oware uwoma gbe uyoma? Kọ mẹ odibo ra ọ gbẹ sae riẹ awere nọ ọ rrọ oware nọ mẹ be re hayo da? Kọ mẹ gbẹ sae gaviezọ kẹ uvou emezae avọ emetẹ nọ e rẹ so ile?+ Kọ fikieme odibo ra ọ rẹ rọ jọ owha ofa kẹ olori mẹ ovie na? 36 Ethẹ Jọdan nọ odibo ra o su ovie na te na u te. Kọ fikieme ovie na ọ rẹ rọ hwosa zihe kẹ omẹ? 37 Ivie jọ odibo ra o zihe kpo, re me whu evaọ okpẹwho mẹ kẹle oria nọ a ki ọsẹ mẹ gbe oni mẹ fihọ.+ Rekọ Kimham+ odibo ra ọ rrọ etenẹ. Jọ o lele olori mẹ ovie na fa vrẹ, whọ sai ru oware nọ u kiehọ owhẹ oma kẹe.”

38 Fikiere ovie na ọ tẹ ta nọ: “Kimham o ti lele omẹ fa vrẹ, yọ me ti ru oware nọ u kiehọ owhẹ oma kẹe; oware kpobi nọ whọ yare mi omẹ me ti ru kẹ owhẹ.” 39 Ahwo na kpobi a te mu Ethẹ Jọdan na họ ẹfa vrẹ, nọ ovie na ọ jẹ gwọlọ fa vrẹ, ọ tẹ viọlọ Bazilae+ jẹ lẹ ẹro eghale kẹe; Bazilae o te zihe kpo. 40 Nọ ovie na ọ jẹ fa vrẹ kpohọ Gilgal,+ Kimham ọ fa vrẹ lele iei. Ahwo Juda kpobi gbe abọvo ahwo Izrẹl a su ovie na fa vrẹ.+

41 Kẹsena ezae Izrẹl soso e tẹ nyabru ovie na, a tẹ nọe nọ: “Fikieme imoni mai, ezae Juda a rọ lẹlẹ rehọ owhẹ ovie na avọ ahwo uwou riẹ fa Jọdan vrẹ, kugbe ezae Devidi kpobi?”+ 42 Ezae Juda soso e tẹ kpahe kẹ ezae Izrẹl nọ: “Fikinọ ovie na yọ omoni mai.+ Fikieme eva e be rọ dha owhai kpahe onana? Kọ ma jọ obọ ovie na re oware jọ no, manikọ ọ kẹ omai okẹ jọ no?”

43 Rekọ ezae Izrẹl e tẹ kpahe kẹ ezae Juda nọ: “Abọ ikpe ma wo evaọ ovie na, fikiere mai ma wo Devidi vi owhai. Fikieme wha ro rri omai vo enẹ? Kọ ogbẹrọnọ mai u fo nọ ma hae kake nyae rehọ ovie mai zihe ze?” Rekọ ẹme ezae Juda o te gbe ẹme ezae Izrẹl họ otọ.*

20 Whaọ ọgwọlọ-ẹme jọ ọ jariẹ nọ a re se Shiba+ ọmọzae Bikrae, ohwo orua Bẹnjamin. O kporo onware,+ ọ tẹ ta nọ: “Ma wo usu ovo kugbe Devidi hi, yọ ma wo ukuoriọ ovo evaọ ọmọzae Jẹsi+ hi. Jọ ohwo kpobi o zihe bru eghẹnẹ* riẹ, O Izrẹl!”+ 2 Fikiere ezae Izrẹl kpobi e tẹ siọ Devidi ba elele re a lele Shiba ọmọzae Bikrae;+ rekọ ezae Juda i te tilẹmu ovie rai no Jọdan na rite obọ Jerusalẹm.+

3 Nọ Devidi o te uwou* riẹ evaọ Jerusalẹm,+ ọ tẹ rehọ ese ikpe nọ ọ nyaseba re a rẹrote uwou na,+ o te fi ai họ uwou nọ ahwo a je rou.* Ọ jẹ hae kẹ ae emu, rekọ o je lele ai wezẹ hẹ.+ A jọ oria nọ a fi rai họ na bọo ẹdẹ uwhu rai, a jọ wọhọ eyae-uku, dede nọ ọzae rai ọ gbẹ jọ uzuazọ.

4 Ovie na ọ tẹ ta kẹ Amesa+ nọ: “Se ezae Juda kokohọ kẹ omẹ evaọ oware wọhọ edẹ esa, yọ whẹ omara whọ rẹ jọ etenẹ re.” 5 Fikiere Amesa ọ tẹ nyai se ahwo Juda kokohọ, rekọ oke nọ a fihọ kẹe o vrẹ taure ọ tẹ te nyaze. 6 Kẹsena Devidi ọ tẹ ta kẹ Abishae+ nọ: “Shiba+ ọmọzae Bikrae ọ sae wha uye nọ u vi orọ Absalọm se omai.+ Rehọ idibo olori ra re wha nyai lei, re ọ gbẹ dhẹ ruọ ikpewho nọ a di ogba wariẹ họ* re ọ va omai abọ họ.” 7 Fikiere ezae nọ e jọ kugbe Joab,+ ahwo Kẹrẹt, ahwo Pẹlẹt,+ gbe egba na kpobi a te lele iei; ere a rọ wọ no Jerusalẹm re a le Shiba ọmọzae Bikrae. 8 Nọ a kẹle utho ulogbo nọ o jọ Gibiọn+ no, Amesa+ ọ tẹ nyabru ai ze. Evaọ oke yena Joab o ku ewu ẹmo riẹ họ, yọ ọ gba ọgbọdọ nọ ọ thọrọ họ owa fihọ eku riẹ. Nọ ọ nya kẹle Amesa, ọgbọdọ na o te kie.

9 Joab ọ tẹ ta kẹ Amesa nọ: “Ẹvẹ eware e rrọ, oniọvo mẹ?” Kẹsena Joab ọ tẹ rehọ obọze riẹ kru etuagba Amesa wọhọ ẹsenọ ọ gwọlọ viọlọ iẹe. 10 Amesa ọ yọroma kẹ ọgbọdọ nọ ọ jọ Joab obọ na ha, Joab ọ tẹ rehọ ọgbọdọ na duwu iei eva,+ ivu riẹ i te furu lahwe fihọ otọ. U du gwọlọ nọ ọ rẹ wariẹ duwu iei hi; keme ẹsiẹvo nọ o duwu i rie na u te epanọ u re ro kpei. Kẹsena Joab avọ Abishae oniọvo-ọmọzae riẹ a te le Shiba ọmọzae Bikrae vrẹ.

11 Omọvo ezae nọ e jọ kugbe Joab o te dikihẹ kẹle iẹe, ọ tẹ be ta nọ: “Ohwo kpobi nọ ọ rrọ abọ Joab, gbe ohwo kpobi nọ ọ rrọ ohwo Devidi, jọ o lele Joab!” 12 Evaọ oke yena kpobi yọ Amesa ọ be jọ ehru azẹ riẹ thuẹ evaọ oko edhere na. Nọ ọzae na ọ ruẹ nọ ahwo na kpobi a bi dikihẹ, o te si Amesa no edhere na fihọ ẹwọ. Kẹsena o te si ohọ ruru iei, keme ọ ruẹ nọ ahwo kpobi a bi dikihẹ nọ a te te oria nọ ọ rrọ. 13 Nọ o si rie no edhere na no, ezae na kpobi i te lele Joab re a le Shiba+ ọmọzae Bikrae.

14 Shiba ọ tẹ dhẹ erua Izrẹl kpobi vrẹ kpobọ Ebẹle ọrọ Bẹt-meaka.+ Ahwo Bikrae a te kokohọ, a te lele iei ruọ eva re.

15 Joab avọ ezae nọ e jọ kugbei a tẹ nyaze,* a te koi họ Ebẹle ọrọ Bẹt-meaka, a tẹ ma igbuhru ro ko okpẹwho na họ, keme ogba o wariẹ okpẹwho na họ. Ezae kpobi nọ e jọ kugbe Joab e tẹ jẹ tọ ugbẹhẹ na re u zurie fihọ otọ. 16 Aye owareghẹ jọ ọ tẹ kpaunu se no okpẹwho na ze nọ: “Wha gaviezọ, ezae na, wha gaviezọ! Ivie wha ta kẹ Joab nọ ọ nyaze re mẹ ta ẹme jọ kẹe.” 17 Fikiere Joab ọ tẹ nya kẹle aye na, aye na ọ tẹ nọe nọ: “Kọ whẹ họ Joab?” O te yo nọ: “Ee.” Aye na ọ tẹ ta kẹe nọ: “Gaviezọ kẹ ẹme nọ odibo ra ọ te ta.” Joab ọ tẹ ta nọ: “Mẹ be gaviezọ.” 18 Aye na ọ tẹ ta nọ: “A jẹ hae ta evaọ oke nọ u kpemu nọ, ‘Jọ a nyae nekpẹ evaọ obọ Ebẹle, yọ ere ẹme nọ ọ rrọ otọ ọ jẹ hai ro kuhọ.’ 19 Me dikihẹ kẹ ahwo Izrẹl nọ a rrọ dhedhẹ nọ a rẹ sai fievahọ. Whọ be gwọlọ raha okpẹwho nọ o wọhọ oni evaọ Izrẹl. Fikieme whọ rẹ rọ raha* ukuoriọ Jihova no?”+ 20 Joab ọ tẹ kẹe uyo nọ: “Mẹ rẹ sai roro kpahe oware utioye vievie he inọ mẹ rẹ raha iẹe no. 21 Oware nọ o lẹliẹ omai nyaze oye vievie he. Ukpoye, ọzae jọ nọ a re se Shiba,+ ọmọzae Bikrae nọ o no ubrotọ igbehru Ifremu+ ze nọ ọ kpareso* Devidi ovie na ma gwọlọ ze. Otẹrọnọ wha tẹ rehọ ọzae ọvo nana ze, me ti kuomarẹriẹ nyasiọ okpẹwho na ba.” Kẹsena aye na ọ tẹ ta kẹ Joab nọ: “Rri! A ti gbolo uzou riẹ nya ugbẹhẹ na vrẹ se owhẹ!”

22 Aye owareghẹ na ọ tẹ nwane ruọ eva bru ahwo na kpobi, a te bru uzou Shiba ọmọzae Bikrae no, a te gbolo iei kẹ Joab. Fikiere o te kporo onware, a tẹ vahabọ no okpẹwho na kpohọ ọvuọ uwou riẹ;+ Joab o te zihe kpobọ Jerusalẹm bru ovie na.

23 Whaọ Joab ọ jọ oletu ogbaẹmo ahwo Izrẹl soso;+ Benaya+ ọmọzae Jehoyada+ o te wuzou ahwo Kẹrẹt gbe ahwo Pẹlẹt+ na. 24 Adoram+ o te wuzou ahwo nọ a fihọ rọkẹ iruo ọgbahọ; Jehoshafat+ ọmọzae Ahaelọd ọ tẹ jọ ọnọ o re kere eware fihọ otọ. 25 Shiva ọ jọ okere-obe; Zedọk+ avọ Abayata+ a tẹ jọ izerẹ. 26 Aera ohwo uyẹ Jeya na o zihe ruọ osu nọ o wuzou* re rọkẹ Devidi.

21 Whaọ ohọo u mu+ ikpe esa soso evaọ oke Devidi, fikiere Devidi ọ tẹ nekpẹ mi Jihova, Jihova ọ tẹ ta nọ: “Sọl avọ uwou riẹ a reabe azẹ, keme a kpe ahwo Gibiọn.”+ 2 Fikiere ovie na o te se ahwo Gibiọn,+ o te lele ae ta ẹme. (Whaọ ahwo Gibiọn na yọ ahwo Izrẹl he rekọ ahwo Amọ+ nọ a kiọkọ otọ na, yọ ahwo Izrẹl a duwu iyei nọ a ti kpe ai hi,+ rekọ Sọl ọ jẹ gwọlọ epanọ o re ro kpe ai no fiki ọwhọ nọ o wo kẹ ahwo Izrẹl gbe Juda.) 3 Devidi ọ tẹ nọ ahwo Gibiọn na nọ: “Eme me re ru kẹ owhai, kọ eme me re ru rọ kpọ oruthọ na vi, re wha lẹ ẹro eghale kẹ ukuoriọ Jihova?” 4 Ahwo Gibiọn na a tẹ ta kẹe nọ: “Ẹme nana nọ ma wo kugbe Sọl avọ ahwo uwou riẹ na o rrọ ẹme nọ ma rẹ jọ mi isiliva hayo igoru hu;+ yọ ma sai kpe ohwo ọvo evaọ Izrẹl he.” Fikiere Devidi ọ tẹ ta nọ: “Me ti ru oware kpobi nọ wha ta kẹ owhai.” 5 A tẹ ta kẹ ovie na nọ: “Ọzae nọ o kpe omai jẹ ma omaa nọ o re kpe omai muotọ re ma gbẹ rria oria ovo evaọ ẹkwotọ Izrẹl he na+— 6 jọ a rehọ emezae ihrẹ riẹ kẹ omai. Ma te jọ aro Jihova thuru ori rai veghe*+ evaọ Gibiah+ ọrọ Sọl, ọnọ Jihova ọ salọ na.”+ Kẹsena ovie na ọ tẹ ta nọ: “Mẹ te rehọ ae kẹ owhai.”

7 Rekọ ovie na o te dhesẹ ọdawẹ kẹ Mẹfiboshẹt,+ ọmọzae Jonatan nọ ọ rrọ ọmọzae Sọl, fiki iyei nọ Devidi avọ Jonatan+ ọmọzae Sọl a jọ aro Jihova duwu. 8 Ovie na ọ tẹ rehọ Amonae avọ Mẹfiboshẹt, emezae ivẹ nọ Rizpa+ ọmọtẹ Eyah o yẹ kẹ Sọl, gbe emezae isoi nọ Maekal*+ ọmọtẹ Sọl o yẹ kẹ Edriẹl+ ọmọzae Bazilae ohwo Mẹhola. 9 Ọ tẹ rehọ ae kẹ ahwo Gibiọn na, a tẹ jọ aro Jihova thuru ori rai veghe evaọ ugbehru na.+ Ẹdẹ ọvona emezae ihrẹ na i whu; a kpe rai evaọ ẹdẹ ọsosuọ ivuẹvu, evaọ emuhọ ezi nọ a re ro bru ebali. 10 Kẹsena Rizpa+ ọmọtẹ Eyah ọ tẹ tọlọ ohọ-ekpa,* ọ tẹ rriẹe họ ehru utho na no okenọ a ro mu ivuẹvu họ rite okenọ oso ọ rọ rrọ no ehru ze ku iri na; ọ kuvẹ hẹ re evra obọ ehru* na i kiemu ai evaọ uvo, hayo re erao ẹwọ e nya kẹle ae evaọ aso.

11 A tẹ vuẹ Devidi oware nọ ọse Sọl, Rizpa ọmọtẹ Eyah o ru na. 12 Fikiere Devidi ọ tẹ nyae rehọ igbenwa Sọl avọ igbenwa Jonatan ọmọzae riẹ no obọ isu* Jebẹsh-giliad+ ze, enọ i tho rai evaọ oko-ore Bẹt-shan, oria nọ ahwo Filistia a thuru rai fihọ evaọ ẹdẹ nọ ahwo Filistia a ro kpe Sọl evaọ Gilboa.+ 13 Ọ tẹ rehọ igbenwa Sọl avọ igbenwa Jonatan ọmọzae riẹ no obei ze, a te koko igbenwa ezae nọ a kpe* na họ re.+ 14 Kẹsena a te ki igbenwa Sọl avọ erọ Jonatan ọmọzae riẹ fihọ uki Kish+ ọsẹ Sọl evaọ Zila+ nọ o rrọ ẹkwotọ Bẹnjamin. Nọ a ru oware kpobi nọ ovie na ọ ta kẹ ae no, Ọghẹnẹ ọ tẹ gaviezọ kẹ olẹ nọ a be lẹ fiki ẹkwotọ na.+

15 Ẹmo ọ tẹ wariẹ du lahwe evaọ udevie ahwo Filistia avọ Izrẹl.+ Devidi avọ idibo riẹ a tẹ nyae họre ahwo Filistia na, rekọ oma o tẹ rrọ Devidi no. 16 Ohwo uyẹ Rẹfeyẹm+ nọ a re se Ishbae-binọb, nọ ozuẹ ekọpa riẹ ọ gbẹdẹ te shẹkẹl egba esa (300),*+ nọ o wo ọgbọdọ ọkpokpọ ọ tẹ jẹ gwọlọ nọ o re duwu Devidi fihọ otọ. 17 Abishae+ ọmọzae Zeruya ọ tẹ nwane nyaze ti fiobọhọ kẹ Devidi,+ o te duwu ohwo Filistia na fihọ otọ, o te kpei no. Evaọ oke yena egbaẹmo Devidi a te duwu iyei nana kẹe nọ: “Whọ rẹ gbẹ dawo iẹe lele omai kpohọ ẹmo ofa ha!+ Who re furie ukpẹ Izrẹl no vievie he!”+

18 Nọ onana o vrẹ no, ẹmo ọ tẹ wariẹ du lahwe, a te lele ahwo Filistia fi ẹmo+ evaọ Gọb. Evaọ oke yena Sibekae+ ohwo Husha na o te kpe Saf, ọnọ ọ rrọ ohwo uyẹ Rẹfeyẹm.+

19 Ẹmo ọ tẹ wariẹ du lahwe, a te lele ahwo Filistia na fi ẹmo+ evaọ Gọb, Ẹlhenan ọmọzae Jerẹ-oregim ohwo Bẹtlẹhẹm o te kpe Goliat ohwo Gat na, ọnọ ozuẹ riẹ o wo ọkpọ nọ o wọhọ ọkpọ ọgbogbodo ahwo nọ a re fi ilulu họ ekpọ ro zuo ehọ.+

20 Ẹmo ọ tẹ jẹ wariẹ du lahwe evaọ Gat, oria nọ ọzae jọ nọ ọ rro thesiwa ọ jọ, o wo iziabọ ezeza evaọ obọ ọvuọvo, gbe iziawọ ezeza evaọ owọ ọvuọvo, aikpobi udhegbene; yọ ohwo uyẹ Rẹfeyẹm+ ọ jọ re. 21 Ọ jẹ poviẹ Izrẹl.+ Fikiere Jonatan ọmọzae Shimia,+ oniọvo-ọmọzae Devidi o te duwu iei kpe.

22 Imane nana yọ ahwo uyẹ Rẹfeyẹm evaọ Gat, yọ Devidi avọ idibo riẹ a rehọ obọ rai kpe ai.+

22 Devidi ọ tẹ rọ eme ole nana+ ta ẹme kẹ Jihova evaọ ẹdẹ nọ Jihova o ro siwi ei no obọ ewegrẹ riẹ+ kpobi je no obọ Sọl.+ 2 Ọ ta nọ:

“Jihova họ ugbehru-utho mẹ gbe oria omofọwẹ mẹ+ gbe Ọnọ o bi siwi omẹ.+

11 Ọ dhẹ chẹrub,+ ọ tẹ rra ze.

A ruẹ e riẹ nọ ọ jọ ehru ibekpe omama ẹzi.*+

13 Elo nọ ọ rrọ aro riẹ ọ lẹliẹ iwowo-erae ware.

Ojese ọ rrọ rọkẹ ahwo kpobi nọ a be dhẹ ruọ otọ riẹ.+

32 Ono họ Ọghẹnẹ, u te no Jihova no?+

Kọ ono họ utho, u te no Ọghẹnẹ mai no?+

44 Who ti siwi omẹ no obọ ahwo mẹ nọ a be jọ obọ mẹ gwọlọ oruthọ.+

47 Jihova ọ rrọ uzuazọ! Jọ ujiro u te Utho mẹ!+

Jọ a kpare Ọghẹnẹ utho esiwo mẹ kpehru.+

23 Enana họ eme urere Devidi:+

 5 Kọ ogbẹrọnọ ere uwou mẹ o rrọ evaọ aro Ọghẹnẹ?

8 Edẹ egbaẹmo egaga Devidi ena:+ Josheb-bashibẹt ohwo uyẹ Takimonae, ọnọ o wuzou egbaẹmo egaga esa na.+ Evaọ ẹdẹ jọ ọ rehọ ozuẹ riẹ kpe ahwo egba eree (800). 9 Ọnọ ọ rọ kẹle iẹe kọ Ẹlieza+ ọmọzae Dodo,+ ọmọzae Ahohae, ọ jọ usu egbaẹmo egaga esa nọ e jọ kugbe Devidi okenọ a jẹ poviẹ ahwo Filistia na. Nọ ahwo Filistia na a kokohọ re a lele ezae Izrẹl fi ẹmo, ezae Izrẹl e tẹ be dhẹ, 10 rekọ ọ tẹ dadamu, o te mu ahwo Filistia na họ ekpe fihọ otọ bẹsenọ obọ o rọ rrọe, obọ riẹ o tẹ ghọ fihọ ọgbọdọ nọ o kru na.+ Ere Jihova o ro ru ai wo obokparọ ulogbo* evaọ ẹdẹ yena;+ egbaẹmo ahwo Izrẹl na i te zihe bru ei ze re a kwa eware ahwo nọ o kpe na.

11 Ọnọ ọ rọ kẹle iẹe kọ Shamah ọmọzae Egi ohwo Hara na. Nọ ahwo Filistia a kokohọ Lihae, evaọ ẹkẹ otọ jọ nọ a kọ ezaa buobu fihọ, ahwo Izrẹl a tẹ dhẹ fiki ahwo Filistia na. 12 Rekọ ọ tẹ dadamu udevie udhu na, ọ tẹ whaha ae re a siọ udhu na ba ẹruọ, o te je kpe ahwo Filistia na. Ere Jihova o ro ru ai wo obokparọ ulogbo.*+

13 Ezae esa evaọ usu ezae ọgba nọ i wuzou na e tẹ nyabru Devidi kpobọ eghogho-utho Adọlam+ evaọ etoke ivuẹvu na, yọ evuẹ* ogbaẹmo Filistia o jọ Ukiekpotọ* Rẹfeyẹm.+ 14 Oke yena yọ Devidi ọ rrọ oria nọ u siomano na,+ yọ utu isoja ahwo Filistia o rrọ Bẹtlẹhẹm. 15 Kẹsena Devidi o te weroma gaga nọ: “Dodokọ mẹ rẹ sae ruẹ ame ọgọdọ-ame* nọ ọ kẹle unuẹthẹ Bẹtlẹhẹm na da!” 16 Fikiere egbaẹmo egaga esa na e tẹ rọ ogaga ruọ evuẹ egbaẹmo Filistia na, a tẹ jọ ọgọdọ-ame* nọ ọ kẹle unuẹthẹ Bẹtlẹhẹm na vo ame, a tẹ rehọ iẹe se Devidi; rekọ ọ rọwo dae he, o te ku ei fihọ otọ kẹ Jihova.+ 17 Ọ ta nọ: “Nọ oware nọ mẹ rẹ sai ru vievie he, O Jihova. Kọ mẹ rẹ da azẹ+ ezae nọ i fi uzuazọ* rai họ ọza nyai vo ame ze?” Fikiere ọ gbẹ rọwo da ame na ha. Enana họ eware nọ egbaẹmo egaga esa riẹ i ru.

18 Abishae+ oniọvo-ọmọzae Joab ọmọzae Zeruya+ ọ jọ ọnọ o wuzou egbaẹmo esa efa; evaọ ẹdẹ jọ ọ rehọ ozuẹ riẹ kpe ahwo egba esa (300), a tẹ riẹe odẹ wọhọ epanọ a riẹ egbaẹmo egaga esa ọsosuọ na.+ 19 Dede nọ ọye ọ mae viodẹ evaọ usu egbaẹmo esa edekọ na je wuzou rai, ọkwa riẹ o te ọrọ egbaẹmo esa ọsosuọ na ha.

20 Benaya+ ọmọzae Jehoyada ọ jọ ọzae nọ ọ gudu* nọ o ru ikpeware buobu evaọ Kabziẹl.+ O kpe emezae ivẹ Eriẹl ọrọ Moab, ọ tẹ jẹ ruọ eva ọgọdọ ame ọyaya evaọ ẹdẹ nọ ekpalekpa-ame i ro kie gaga, o te kpe okpohrokpo.+ 21 O te je kpe ohwo Ijipti jọ nọ ọ rro thesiwa. Dede nọ ohwo Ijipti na o kru ozuẹ họ obọ, ọkpọ Benaya o kru họ obọ bru ei, o te fru ozuẹ na mi ei, ọ tẹ rehọ ozuẹ obọriẹ kpei. 22 Eware nana Benaya ọmọzae Jehoyada o ru, yọ a riẹ riẹ odẹ wọhọ egbaẹmo egaga esa na. 23 Dede nọ ọ viodẹ vi ezae ọgba na, ọkwa riẹ o te ọrọ egbaẹmo esa na ha. Rekọ Devidi o fi rie họ ọnọ o wuzou egbaẹmo nọ i re rou rie.*

24 Asahẹl+ oniọvo-ọmọzae Joab ọ jọ usu ezae ọgba na, ezae efa nọ e jọ usu rai họ: Ẹlhenan ọmọzae Dodo ọrọ Bẹtlẹhẹm,+ 25 Shamah ohwo Herọd na, Elaeka ohwo Herọd na, 26 Hilẹz+ ohwo Palti na, Aera+ ọmọzae Ikẹsh ohwo Tekoa na, 27 Abi-iza+ ohwo Anatọt+ na, Mebonae ohwo Husha na, 28 Zalmọn ohwo uyẹ Ahohae na, Meharae+ ohwo Nẹtofa na, 29 Hilẹb ọmọzae Beanah ohwo Nẹtofa na, Itai ọmọzae Raebae ohwo Gibiah ọrọ ahwo orua Bẹnjamin, 30 Benaya+ ohwo Piratọn, Hidae ọrọ ito* Geash+ na, 31 Ebae-abọn ohwo Abat na, Azmevẹt ohwo Bahurim na, 32 Elayaba ohwo Shealbọn na, gbe emezae Jeshẹn, Jonatan, 33 Shamah ohwo Hara na, Ahayam ọmọzae Shera ohwo Hara na, 34 Ẹlifelẹt ọmọzae Ahasbae, ọmọzae ohwo Meakat na, Elayam ọmọzae Ahitofẹl+ ohwo Gaelọ na, 35 Hẹzrọ ohwo Kamẹl na, Pearae ohwo Arab na, 36 Aigal ọmọzae Netan ọrọ Zoba, Benae ohwo orua Gad na, 37 Zilẹk ohwo Ammọn na, Neharae ohwo Biẹrọt na, ọnọ ọ rẹ wha ekwakwa ẹmo Joab ọmọzae Zeruya, 38 Aera ohwo Itri na, Gerẹb ohwo Itri+ na, 39 gbe Uraya+ ohwo Hit na—aikpobi ezae ọgbagbihrẹ.

24 Jihova ọ tẹ wariẹ mu ofu gaga kẹ ahwo Izrẹl+ okenọ ọjọ o ru Devidi* wọso ae inọ: “Nya, re who kele+ ahwo Izrẹl gbe Juda.”+ 2 Fikiere ovie na ọ tẹ ta kẹ Joab+ oletu ogbaẹmo na nọ ọ jọ kugbei inọ: “Ivie, nya erua Izrẹl kpobi duwu, no Dan rite Biẹ-shiba,+ re who kere edẹ ahwo na fihotọ, re mẹ ruẹse riẹ unu rai.” 3 Rekọ Joab ọ tẹ ta kẹ ovie na nọ: “Jọ Jihova Ọghẹnẹ ra o ru ahwo na vihọ isia udhusoi (100), yọ ajọ ibiaro olori mẹ ovie na e ruẹ e riẹ, rekọ fikieme olori mẹ ovie na ọ rọ gwọlọ ru oware utioye?”

4 Rekọ ẹme ovie na o te gbe ẹme Joab avọ iletu ogbaẹmo na họ otọ. Fikiere Joab avọ iletu ogbaẹmo na a te no aro ovie na re a nyai kere edẹ ahwo Izrẹl fihotọ.+ 5 A fa Ethẹ Jọdan vrẹ, a tẹ fa evuẹ fihọ Aroa,+ evaọ obọze* okpẹwho nọ o rrọ udevie ukiekpotọ* na, a tẹ nya rri ofẹ ẹkwotọ ahwo orua Gad, je no etẹe vrẹ kpobọ Jeza.+ 6 Kẹsena a tẹ nya kpobọ Giliad+ gbe ẹkwotọ Tatim-họdshae, a te no etẹe kpobọ Dan-jeyan, a tẹ nya ghelie họ kpobọ Saedọn.+ 7 Kẹsena a tẹ nya kpobọ oria adhẹzọ Taya+ gbe ikpewho ahwo Hiv+ kpobi gbe erọ ahwo Kenan kpobi, a te ku onya rai họ evaọ Biẹ-shiba+ nọ o rrọ Negẹb*+ Juda. 8 Ere a rọ nya ẹkwotọ na soso duwu, a te ti zihe ziọ Jerusalẹm, nọ emerae izii gbe edẹ udhe e vrẹ no. 9 Joab ọ tẹ rehọ unu ahwo nọ a kere fihotọ na kẹ ovie na. Egbaẹmo Izrẹl nọ e rẹ wha egbọdọ i bu te idu egba eree (800,000), yọ ezae Juda i bu te idu egba isoi (500,000).+

10 Rekọ udu* Devidi u te brukpei+ okenọ o kele ahwo na no. Devidi ọ tẹ ta kẹ Jihova nọ: “Mẹ rọ oware nana nọ me ru na raha uzi+ ulogbo no. Enẹna Jihova, ivie rehọ oruthọ odibo ra rọvrẹ riẹ,+ keme oware nọ me ru na u ghẹ gaga.”+ 11 Nọ Devidi ọ kpama evaọ ohiohiẹ, ẹme Jihova o te bru Gad+ ọruẹaro na ze, ọruẹ-ude Devidi, inọ: 12 “Nya re whọ ta kẹ Devidi nọ, ‘Enẹ Jihova ọ ta: “Mẹ be kẹ owhẹ eware esa nọ whọ rẹ jọ salọ. Salọ onọ me re ru owhẹ.”’”+ 13 Fikiere Gad ọ tẹ nyabru Devidi ze, ọ tẹ ta kẹe nọ: “Kọ whọ gwọlọ nọ ohọo u mu evaọ ẹkwotọ ra ikpe ihrẹ?+ Hayo kọ whọ gwọlọ nọ ewegrẹ ra i le owhẹ no uwou evaọ emerae esa?+ Manikọ whọ gwọlọ nọ okpẹyao nọ o re vo ọ jọ ẹkwotọ ra evaọ edẹ esa?+ Romatotọ roro oware nọ mẹ rẹ nyae vuẹ Ọnọ o vi omẹ ze.” 14 Fikiere Devidi ọ tẹ ta kẹ Gad nọ: “O be kẹ omẹ uye gaga. Ivie, joma kie fihọ obọ Jihova,+ keme ọ rẹ re ohrọ gaga;+ rekọ whọ jọ omẹ kie fihọ obọ ohwo-akpọ họ.”+

15 Jihova o te vi okpẹyao+ nọ o re vo ruọ Izrẹl no ohiohiẹ rite oke nọ o fihọ, ahwo idu udhosa-gbikpe (70,000) a tẹ jọ Izrẹl whu,+ no Dan rite Biẹ-shiba.+ 16 Nọ ukọ-odhiwu na ọ rriẹ obọ rri Jerusalẹm re ọ raha iẹe no, okpẹtu na o tẹ da Jihova,+ ọ tẹ ta kẹ ukọ-odhiwu nọ ọ jẹ raha ahwo na nọ: “U te no! Enẹna fi obọ họ otọ.” Oke yena yọ ukọ-odhiwu Jihova ọ kẹle oria nọ Arọna+ ohwo Jebus+ na ọ rẹ jọ si ibi no igbe ekakọ.

17 Nọ Devidi ọ ruẹ ukọ-odhiwu nọ o je kpe ahwo na, ọ tẹ ta kẹ Jihova nọ: “Mẹ họ ọnọ ọ raha uzi, mẹ họ ọnọ o ru thọ; rekọ eme igodẹ nana+ i ru? Ivie jọ obọ ra o rọsuọ omẹ avọ uwou ọsẹ mẹ.”+

18 Fikiere Gad ọ tẹ nyabru Devidi ze evaọ ẹdẹ yena, ọ tẹ ta kẹe nọ: “Nya, re whọ bọ agbada-idhe kẹ Jihova evaọ oria nọ Arọna ohwo Jebus+ na ọ rẹ jọ si ibi no igbe ekakọ na.” 19 Devidi ọ tẹ nya wọhọ epanọ Gad ọ ta na, keme ere Jihova ọ ta. 20 Nọ Arọna o rri jẹ ruẹ ovie na avọ idibo riẹ nọ e be nyabru ei ze, Arọna ọ tẹ nwane nya lahwe, o te kigwẹ vovao tuotọ kẹ ovie na. 21 Arọna ọ tẹ nọ nọ: “Fikieme olori mẹ ovie na ọ rọ nyabru odibo riẹ ze?” Devidi ọ tẹ kẹe uyo nọ: “Mẹ nyaze te dẹ oria nọ whọ rẹ jọ si ibi no igbe ekakọ na mi owhẹ, re mẹ ruẹse bọ agbada-idhe kẹ Jihova, re uye ogaga na nọ u bi te ahwo na o ruẹsi serihọ.”+ 22 Rekọ Arọna ọ tẹ ta kẹ Devidi nọ: “Jọ olori mẹ ovie na ọ rehọ iẹe ọvọvẹ re ọ rehọ oware nọ u kiehọ iẹe oma* dhe idhe. Iruẹ nọ whọ sai ro dhe idhe emahọ na e rrọ etenẹ gbe ewẹ ekpala nọ a re ro si ibi no igbe ekakọ na, avọ ekwakwa nọ a rẹ gba fihọ iruẹ na nọ whọ sai ro ru ire erae. 23 O ovie, mẹ Arọna ọ be rọ eware nana kpobi kẹ ovie na.” Kẹsena Arọna ọ tẹ ta kẹ ovie na nọ: “Jọ Jihova Ọghẹnẹ ra o wo aruoriwo kẹ owhẹ.”

24 Rekọ ovie na ọ tẹ ta kẹ Arọna nọ: “Ijo, mẹ rẹ rehọ ugho dẹe mi owhẹ hrọ. Me ti dhe idhe emahọ kẹ Jihova Ọghẹnẹ mẹ ababọ oware nọ o rẹ rehọ mi omẹ hẹ.” Fikiere Devidi ọ tẹ rọ shẹkẹl* isiliva udhuvẹ-gbikpe dẹ oria nọ a rẹ jọ si ibi no igbe ekakọ na gbe iruẹ na.+ 25 Devidi ọ tẹ bọ agbada-idhe+ fihọ etẹe kẹ Jihova, o te dhe idhe emahọ gbe idhe ọriẹyeri. Jihova ọ tẹ kezọ kẹ olẹ ayare-ọgaga nọ a lẹ fiki ẹkwotọ na,+ uye ogaga nọ u te Izrẹl na u te serihọ.